متّی 22
22
ولیمے دی مثال
(رَلدا مِلدا حوالہ: لُوقا 14:15-24)
1اَتے یِسُوع وَلا اُنہیں نال مثالاں ݙے کرائیں ڳالھیں کریندے، 2”اَسمان دی بادشاہی اِیویں ہے جیویں ہِک بادشاہ اپݨے پُتر دے ولیمے دا اِنتظام کیتا۔ 3اَتے اپݨے ٻاہنئیں کُوں بھیڄیا جو جنہیں مہمانیں کُوں کانڈھے ݙِتے ڳئین اُنہیں کُوں سَݙو پَر او آوَݨ نہ چاہندے ہَن۔ 4وَل اُوں ٻئے ٻاہنئیں کُوں ایہ آکھ کرائیں بھیڄیا، ’اُنہیں مہمانیں کُوں آکھو مَیں تُہاݙے کیتے موٹے تازے وَاڑھے اَتے ڳابے کُوہ کرائیں کھاݨا تیار کروائے اَتے ٻیا سب کُجھ وی تیار ہے۔ تُساں ولیمے تے آؤ۔‘ 5پَر او بےپروا تھِیندئیں ہوئیں اپݨے اپݨے کَم دو ٹُر پئے کُوئی اپݨی رَڑھ دو اَتے کُوئی اپݨے وپار دو۔ 6اَتے ٻنہیں مہمانیں تاں اُنہیں ٻاہنئیں کُوں بےعزت کیتا اَتے جان کنُوں مار گھتیا۔ 7ایہ ݙیکھ کرائیں بادشاہ کُوں ٻَہُوں کاوڑ لڳی اَتے اُوں اپݨی فوج بھیڄ کرائیں قاتلیں کُوں مَروا ݙِتا اَتے اُنہیں دے شہر کُوں بھاہ لَوا ݙِتی۔ 8اِیندے بعد ٻاہنیں کُوں آکھیا، ’شادی دے ولیمے دا کھاݨا تاں تیار ہے پَر جنہیں کُوں کانڈھا ہَئی او لوک اِیندے قابل نہ ہَن۔ 9اِیں کیتے تُساں شہروں ٻاہر نِکلݨ آلئیں رَستیں تے لڳے وَنڄو اَتے آوَݨ وَنڄن آلئیں کُوں شادی دا کانڈھا ݙیو۔‘ 10اَتے ٻاہنے ٻاہر رَستیں دو نِکل ڳئے اَتے جیرھے وی اُنہیں کُوں مِلے بھانویں او چَنڳے ہَن یا بُرے او ولیمے اِچ گھِن آئے، اِیویں ولیمے اِچ ٻَہُوں لوک جمع تھی ڳئے۔ 11پَر جیرھے ویلے بادشاہ مہمانیں کُوں ݙیکھݨ کیتے اَندر آیا تاں اُوں ہِک بندے کُوں ݙِٹھا جیرھا ولیمے کیتے پُشاک نہ پاتی کھڑا ہا۔ 12بادشاہ پُچھیا، ’سنگتی! تُوں شادی والی پُشاک پاتے بغیر اندروں کیویں آ ڳئیں؟‘ اَتے او بندہ کُوئی جواب نہ ݙے سڳیا۔ 13وَل بادشاہ اپݨے خادمیں کُوں آکھیا، ’اِیندے ہَتھ پیر ٻَدھ کرائیں ٻاہر اَندھارے اِچ سَٹ ݙیو، جِتھاں رووَݨ تے ݙَند پیہوَݨ ہوسی۔‘“
14اَتے یِسُوع آکھیا،”بَس سَݙیا تاں ٻَہُوں لوکیں کُوں ہا پَر چُݨئیں ہوئے گَھٹ ہِن۔“
مصُول ݙِیوَݨ بارے سوال
(رَلدا مِلدا حوالہ: مرقس 12:13-17؛ لُوقا 20:20-26)
15اِیندے بعد فرِیسیئیں وَنڄ کرائیں آپت اِچ صلاح کیتی جو یِسُوع کُوں کیویں ڳالھیں اِچ پھساؤں۔ 16وَل اُنہیں اپݨے شاگِردئیں دے کٹھے ہیرودیس دے کُجھ لوکیں نال یِسُوع کولھ بھیڄیا اَتے اُنہیں آکھیا، ”اَے اُستاد! اَساں ڄاݨدے ہَئیں جو تُوں سچّا ہَئیِں اَتے سچّائی نال خُدا دے رَستے دی تعلیم ݙیندیں ہوئیں تَیکُوں اِیں ڳالھ دی کوئی پرواہ نَئیِں جو لوک تیݙے بارے کیا پئے اَہدِن کیوں جو تُوں کہیں دا وَٹپ نَئیِں کریندا۔ 17ساکُوں ݙسا، تُوں کیا سمجھدِیں جو قیصر کُوں ٹیکس ݙیوَݨ شرعی طور جائز ہے یا کَینا؟“ 18پَر یِسُوع اُنہیں دی رِیاکاری کُوں ڄاݨدے ہوئیں آکھیا، ”اَے رِیاکارو! مَیکُوں کیوں پھسیندو۔ 19مَیکُوں ٹیکس ݙیوَݨ آلا چاندی دا سِکّہ ݙِکھاؤ،“ او ہِک سِکّہ اُوندے کولھ گھِن آئے۔ 20اُوں اُنہیں کنُوں پُچھیا، ”اِیں دے اُتے کَیندا ناں اَتے مُورت ہے؟“ 21اُنہیں جواب ݙِتا، ”قیصر دی۔“ وَل یِسُوع آکھیا، ”جیرھا قیصر دا ہے او قیصر کُوں اَتے جیرھا خُدا دا ہے او خُدا کُوں ݙیو۔“ 22او ایہ سُݨ کرائیں حیران تھئے اَتے اُونکُوں چھوڑ کرائیں لڳے ڳئے۔
مَحشر دے ݙینہہ زندہ تھِیوَن بارے سوال
(رَلدا مِلدا حوالہ: مرقس 12:18-27؛ لُوقا 20:27-40)
23اُوں ݙینہہ صدوقی فرقے دے لوک یِسُوع کولھ آئے، جیرھے منیندے ہَن جو مُردے زندہ نہ تھِیسن۔ اُنہیں اُوں کنُوں پُچھیا، 24”اَے اُستاد! موسیٰ نبی ساکُوں حُکم ݙِتے جو کُوئی پَرنیا ہویا اوترک مَر وَنڄے اَتے اُوندا بِھرا ہووے، تاں بِھرا دا فرض ہے جو اُوندی بیوہ نال پَرنیڄے اَتے اپݨے بِھرا کیتے اولاد ڄَماوے۔ 25اِیویں ہے جو اِتھاں سَت بِھرا ہَن، سارے کنُوں وَݙّا بِھرا پَرنیا پَر اوترک مَر ڳیا اَتے ݙُوجھے بِھرا کیتے ذال چھوڑ ڳیا۔ 26اِیویں ای ݙُوجھا، تریجھا اَتے وَل سَتویں بِھرا تَئیِں۔ 27آخر اِچ او تریمت وی مَر ڳئی۔ 28ہُݨ ݙساؤ جو مَحشر دے ݙینہہ او کَیندی ذال ہوسی؟ کیوں جو بھِراویں نال پَرنیڄی ہَئی۔“
29یِسُوع جواب ݙِتا، ”تُساں گُمراہی اِچ اِینجھے ٻُݙے پئے ہِوے جو نہ پاک کلام کنُوں واقف ہِوے اَتے نہ خُدا دی قُدرت کنُوں۔ 30کیوں جو مَحشر دے ݙینہہ پرنیڄݨ کَینا ہوسی بلکہ اَسمان اُتے رَہݨ آلے فرِشتئیِں وانگوں ہوسِن۔ 31پَر مُردے زندہ تھِیوَن دے بارے جیرھی ڳالھ خُدا تُہاکُوں ݙسائی ہے کیا تُساں او کَینی پَڑھی؟ 32خُدا ݙسائے، مَیں ابرہام دا خُدا، اِضحاق دا خُدا، اَتے یعقُوب دا خُدا ہاں۔ اِیندا مطلب ایہ ہے جو او مُردئیں دا خُدا نَئیِں بلکہ جیندئیں دا خُدا ہے۔“
33اَتے ایہ سُݨ کرائیں ساری بھِیڑ اُوندی تعلیم کنُوں ٻَہُوں حیران تھی ڳئی۔
سب کنُوں وَݙّا حُکم
(رَلدا مِلدا حوالہ: مرقس 12:28-34؛ لُوقا 10:25-28)
34اَتے جݙّاں فرِیسیئیں ایہ سُݨیا جو یِسُوع صدوقیئیں کُوں جواب ݙیوَݨ دے قابل نَئیِں چھوڑیا تاں او کٹھے تھی ڳئے۔ 35اَتے اُنہیں اِچوں ہِک جیرھا شرع دا عالم ہا، یِسُوع کُوں پھساوَݨ کیتے سوال کیتا۔ 36اَے اُستاد! ”شریعت اِچ سب کنُوں وَݙّا حُکم کیرھا ہے؟“ 37یِسُوع اُونکُوں جواب ݙِتا، ”تُوں خُداوند اپݨے خُدا نال اپݨے سارے دِل اَتے اپݨی ساری جان اَتے اپݨی ساری عقل نال مُحبّت کر۔“ 38وَݙّا اَتے پہلا حُکم اِیہو ہے۔ 39اَتے ݙُوجھا ایہ، ”تُوں اپݨے ہمسائے نال وی اِیویں مُحبّت رَکھِیں جیویں تُوں اپݨے نال مُحبّت رکھیندیں۔“ 40اِنہیں ݙُو حُکمیں اُتے ساری تورات اَتے نبیئیں دے صحیفییں دی تعلیم دی بُنیاد ہے۔
مسِیحا دے بارے سوال
(رَلدا مِلدا حوالہ: مرقس 12:35-37؛ لُوقا 20:41-44)
41جݙّاں کُجھ فرِیسی کٹھے تھئے تاں یِسُوع اُنہیں کنُوں پُچھیا، 42”تُساں مسِیحا دے بارے اِچ کیا سوچ رکھیندو؟ او کَیندا پُتر ہے؟“ اُنہیں جواب ݙِتا،”او داؤد نبی دا پُتر ہے۔“ 43یِسُوع پُچھیا، ”اَتے وَل داؤد نبی خُدا دے رُوح دی ہدایت نال اُونکُوں کیوں اپݨا خُداوند اَہدے جو:
44’خُدا میݙے خُداوند کُوں آکھیئے میݙے سَڄے پاسے ٻَہہ تھی
جے تَئیِں مَیں تیݙے دُشمنیں کُوں تیݙے پیریں دے تَلے نہ کر ݙیواں‘
45اَتے جݙّاں داؤد نبی اُونکُوں اپݨا خُداوند اَہدے تاں وَل او اُوندا پُتر کیویں تھِیا؟“
46اَتے کُوئی اُوندا جواب نہ ݙے سڳیا اَتے اُوں ݙینہہ کنُوں وَل کہیں اِچ یِسُوع کنُوں سوال کرَݨ دی جُرات نہ تھئی۔
Currently Selected:
متّی 22: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
