متّی 24
24
ہَیکل دی بربادی دی پیش گوئی
(رَلدا مِلدا حوالہ: مرقس 13:1-2؛ لُوقا 21:5-6)
1اَتے یِسُوع جݙّاں ہَیکل کنُوں نِکل کرائیں ویندا پِیا ہا اَتے اُوندے شاگِرد کولھ آئے جو اُونکُوں ہَیکل دیاں عمارتاں ݙکھاوَن۔ 2یِسُوع اُنہیں کُوں جواب ݙِتا، ”مَیں تُہاکُوں سچّ اَہداں جو جیرھے پَتھریں دے وار تُساں ݙیہدو ایہ سارے پَتھر برباد تھی ویسِن اِتھاں ہِک پَتھر وی اینجھا نہ ہوسی جیرھا برباد نہ کیتا ویسی۔“
مُصیبتیں دا شروع
(رَلدا مِلدا حوالہ: مرقس 13:3-13؛ لُوقا 21:7-19)
3اِیندے بعد یِسُوع زَیتُون دے پہاڑ اُتے وَنڄ ٻیٹھا اَتے خاص شاگِرد اَنجھ آ کرائیں آکھݨ لڳے، ”ساکُوں ݙسا ایہ ڳالھیں کݙاں تھِیسن؟ اَتے تیݙے آوَݨ تے دُنیاں ختم تھِیوَن دی کیا نِشانی ہوسی؟“ 4یِسُوع جواب ݙِتا، ”خبردار رَہو کُوئی تُہاکُوں گُمراہ نہ کر ݙیوے۔ 5کیوں جو ٻَہُوں لوک میݙا ناں گھِن تے آسِن اَتے آکھسِن،’مَیں مسِیحا ہاں‘ اَتے او ٻَہُوں لوکیں کُوں گُمراہ کریسِن۔ 6تُساں جنگاں اَتے جنگیں دیاں افواہیں سُݨسو پَر وِٻلائے نہ کیوں جو دُنیاں ختم تھِیوَن کنُوں پہلے اِنہیں ڳالھیں دا تھِیوَن ضرور ہے۔ 7قوماں ہِک ٻئے نال جنگ کریسِن اَتے بادشاہیاں ہِک ٻئے تے چڑھائی کریسِن اَتے جاہ جاہ تے کال پوسِن اَتے زلزلے آسِن۔ 8پَر ایہ سب کُجھ ایویں ہوسی جیویں پِیڑیں دے دَرد دا شروع ہوندا۔ 9وَل لوک تُہاکُوں پکڑویسِن، تنگ کریسِن اَتے قتل کر ݙیسِن، میݙے پیروکار ہووَن دی وجہ کنُوں سارے لوک تُہاݙے نال نفرت کریسِن۔ 10اُوں ویلے ٻَہُوں لوک اپݨے اِیمان کنُوں پِھر ویسِن، اَتے ہِک ݙُوجھے کُوں دُشمن دے حوالے کریسِن، اَتے ہِک ٻئے کنُوں نفرت کریسِن۔ 11ٻَہُوں کُوڑے نبی اُٹھی کھڑسِن اَتے ٻَہُوں سارے لوکیں کُوں گُمراہ کریسِن۔ 12اَتے دُنیاں اِچ بُرائی دے وَدھ وَنڄن نال لوکیں دی مُحبّت ٹھر ویسی۔ 13پَر جیرھا آخر تَئیِں اِیمان اُتے قائم رَہسی اُونکُوں چُھٹکارا مِلسی۔ 14اَتے اَسمان دی بادشاہی دی خُوشخبری دا پرچار ساری دُنیاں اِچ کیتا ویسی تاں جو سارے لوکیں کیتے گواہی تِھیوے اِیندے بعد ای دُنیاں دا اَنت تھیسی۔“
مُقدّس جاہ دا مَکروہ تھِیوَن
(رَلدا مِلدا حوالہ: مرقس 13:14-23؛ لُوقا 21:20-24)
15وَل یِسُوع آکھیا،”جݙّاں تُساں اُڄاڑݨ آلی شے نال مُقدّس جاہ کُوں مکروہ تِھیندا ݙیکھو جَیندا ذِکر دانیایل کیتے۔ پَڑھن آلا سمجھ گھِنے، 16اُوں ویلے جیرھے صوبہ یہُودیہ اِچ ہووَن او پہاڑیں دو بَھڄ وَنڄن، 17اَتے جیرھا اپݨے گھر دی چھت اُتے ہووے او کُجھ چاوَݨ کیتے تَلے نہ آوے، 18اَتے جیرھا رَڑھ اِچ ہووے او اپݨی لُکار چاوَݨ کیتے نہ ولھے۔ 19اَتے اُنہیں تریمتیں تے افسوس، جیرھیاں اُنہیں ݙینہواریں اِچ پیٹ نال ہووِن یا اپݨے ٻالیں کُوں کھیر پِلیندیاں ہووِن۔ 20تُساں دُعا مَنگاہے جو تُہاکُوں سیالے اِچ یا سبت دے ڈینہہ کُوں بھڄݨا نہ پووے۔ 21کیوں جو اُوں ویلے اِینجھی وَݙّی مُصیبت ہوسی جیرھی دُنیاں دے شروع کنُوں اَڄ تَئیِں ݙیکھݨ اِچ نہ اَئی ہے اَتے نہ کݙاہیں اَؤسی۔ 22پَر جے خُدا مُصیبت دے ݙِیہاڑے گَھٹ نہ کریندا تاں کُوئی نہ بچدا پَر چُݨے ہوئے لوکیں کیتے ایہ ݙیہاڑے گَھٹ کر ݙِتے ڳئین۔ 23اُوں ویلے جے کوئی تُہاکُوں آکھے جو ݙیکھو مسِیحا اِتھاں ہے یا اُتھاں ہے تاں تُساں اُوندی ڳالھ اصلوں نہ مَناہے۔ 24کیوں جو اُوں ویلے کُوڑے مسِیحا اَتے کُوڑے مسیحا اُٹھی کھڑسِن جیرھے وَݙّے وَݙّے نِشان اَتے عجیب کَم ݙیکھسِن تاں جو چُݨے ہوئے لوکیں کُوں وی گمراہ کر ݙیوَݨ۔ 25ݙیکھو! مَیں تُہاکُوں ایہ ڳالھیں تھِیوَن کنُوں پہلے ݙسیندا پِیاں۔
26اَتے جے تُہاکُوں آکھن،’ݙیکھو او بَربیابان اِچ ہے،‘ تاں ٻاہر نہ وَنڄاہے یا آکھن،’ݙیکھو او کوٹھری دے اندروں ہے،‘ تاں یقین نہ کراہے۔ 27کیوں جو جیویں بجلی پوادھ کنُوں چمک کرائیں پچادھ تَئیِں ݙِسدی ہے اُونویں ای اِبنِآدم یعنی میݙا آوَݨا ہوسی۔
28جِتھاں مُردار ہوسی اُتھاں ڳجِھیں کٹھیاں تھی ویسِن۔“
یِسُوع دا ݙُوجھی واری آوݨ
(رَلدا مِلدا حوالہ: مرقس 13:24-27؛ لُوقا 21:25-28)
29”وَݙّی مُصیبت آلے ݙینہواریں دے گُزرݨ دے فوراً بعد سِجھ کالا تھی ویسی اَتے چَندر وی اپݨا سوجھلا ݙیوَݨ چھوڑ ݙیسی اَتے سارے تارے اَسمان کنُوں ڈھہہ پوسِن اَتے اَسمان دیاں ساریاں طاقتاں ہَلا ݙِتیاں ویسِن۔ 30اِیندے بعد اِبنِآدم یعنی میݙے آوَݨ دا نِشان اَسمان تُوں نظر اَؤسی تے اُوں ویلے دُنیاں دیاں سارئیں قوماں ماتم کریسِن اَتے مَیکُوں وَݙّی طاقت اَتے سَڄدَھڄ نال اَسمان دے بَدلئیں اُتے اَندا ݙیکھسِن۔ 31اَتے مَیں اپݨے فرِشتئیِں کُوں شرنا دی اُچی اَواز نال بھیڄیساں تاں جو میݙے چُݨے ہوئے لوکیں کُوں چودھاروں یعنی اَسمان دے ہِک پاسے کنُوں ݙُوجھے پاسے تَئیِں کٹھا کرَݨ۔“
ہنجیر دے وَݨ کنُوں سبق
(رَلدا مِلدا حوالہ: مرقس 13:28-31؛ لُوقا 21:29-33)
32”اَتے ہنجیر دے وَݨ دی کنُوں مثال سِکھو جیویں ای اُوندیاں لَڑیاں کُولیاں تھِیندِن اَتے اُنہیں کنُوں نَویں پَتر نِکلدِن تاں تُہاکُوں پتا لڳدے جو ہُنالا کولھ آ ڳئے 33اِیویں تُساں وی ایہ سارئیں ڳالھیں ݙیکھ کرائیں سمجھ ویسو جو او ویلا نیڑے بلکہ دَر اُتے ہے۔ 34مَیں تُہاکُوں سچّ اَہداں جو اِیں پیڑھی دے ختم تھِیوَن کنُوں پہلے ایہ ساریاں ڳالھیں پوریاں تھی ویسِن۔ 35اَسمان اَتے زمین ختم تھی ویسِن پَر میݙیاں ڳالھیں ہمیشاں تَئیِں قائم رَہسِن۔“
سُڄاک رَہو
(رَلدا مِلدا حوالہ: مرقس 13:32-37؛ لُوقا 17:26-30، 34-36)
36وَل یِسُوع آکھیا، ”اِنہیں دا کہیں کُوں وی پتا کَینی جو ایہ کیرھے ݙینہہ یا کیرھے لحظے تھی ویسِن نہ اَسمان دے فرِشتئیِں اَتے نہ پُتر کُوں پَر صرف اَسمانی باپ کُوں پتا ہے۔ 37جیویں نُوح دے زمانے اِچ تھِیا ہا، اِبنِآدم یعنی میݙا آوَݨا وی اُونویں ای ہوسی۔ 38کیوں جو طوفان آوَݨ کنُوں پہلے تَئیِں لوک کھندے پیندے اَتے شادیاں پئے کریندے ہَن جے تَئیِں نُوح ٻیڑے اِچ نہ ٻَہہ ڳیا۔ 39اَتے جے تَئیِں طوفان سارئیں لوکیں کُوں لوڑھ نہ ڳیا اُوں ویلے تَئیِں آوَݨ والی مُصیبت دے بارے اِچ او لوک نہ ڄاݨدے ہَن اِیویں ای میݙا آوَݨ ہوسی۔ 40اُوں ویلے ݙُو بندے رَڑھ اِچ ہوسِن ہِک کُوں گھِن گھِدا ویسی اَتے ݙُوجھے کُوں چھوڑ ݙِتا ویسی۔ 41ݙُو تریمتیں چکی پیہندیاں ہوسِن ہِک کُوں گھِن گھِندا ویسی اَتے ݙُوجھی کُوں چھوڑ ݙِتا ویسی۔ 42اِیں کیتے سُڄاک رہو کیوں جو تُساں نَئیِں ڄاݨدے جو تُہاݙا خُداوند کیرھے ݙینہہ اَؤسی۔ 43اَتے جے کہیں گھر دے مالک کُوں پتا ہوندا جو چور رات دے کیرھے پَہر اَؤسی تاں تُساں یقین کر گھِنو جو او ضرور سُڄاک رَہندا اَتے چور کُوں اپݨے گھر اِچ سَندھ نہ مارَݨ ݙیندا۔ 44اِیں کیتے تُساں وی ہر ویلے تیار رَہو کیوں جو مَیں اُوں ویلے اَوساں جݙّاں تُہاکُوں پتا وی نہ ہوسی۔“
وفادار ٻاہنے دی مثال
(رَلدا مِلدا حوالہ: لُوقا 12:41-48)
45اَتے وَل یِسُوع آکھیا، ”کیرھا ٻاہنا وفادار اَتے سمجھدار ہے؟ جَینکُوں گھر دے مالک باقی نوکریں اُتے وَݙّا بݨائے جو او ݙُوجھے نوکریں کُوں ویلے تے کھاݨا ݙیوے۔ 46اَتے او ٻاہنا چَنڳاں ہوسی جَینکُوں اُوندا مالک وَلݨ تے ایہ سارا کُجھ کریندا ݙیکھے، 47مَیں تُہاکُوں سچّ اَہداں جو او مالک اپݨے گھر دا سارا اِنتظام ݙیکھ کرائیں اُونکُوں اپݨی ساری جائیداد دا کارمُختار بݨا ݙیسی۔ 48پَر جے او ٻاہنا اپݨے دِل اِچ ایہ سوچے جو مالک دے وَلݨ اِچ اَڄݨ ٻَہُوں دیر ہے۔ 49اَتے او اپݨے ڄوٹیوال ٻاہنئیں کُوں مارݨ کُٹݨ اَتے خُود شرابئیں نال کھاوَݨ پیوَݨ لڳ پووے۔ 50تاں اُوں ٻاہنے دا مالک اِینجھے ویلے اَؤسی جَیندا نوکر کُوں پتا ای کائنا ہوسی۔ 51اَتے او نوکر کُوں ٻَہُوں کوڑے مار تے رِیاکاریں نال رَلا کرائیں اُتھاں سَٹ ݙیسی جِتھاں رووَݨ اَتے ݙَند پیہوَݨ ہوسی۔“
Currently Selected:
متّی 24: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
