متّی 25
25
ݙاہ کُواریں دی مثال
1اِیندے بعد یِسُوع اُنہیں کُوں آکھیا، ”اَسمان دی بادشاہی اِیویں ہے جو ݙاہ کُواریں ہَن جیرھیاں اپݨے ݙِیوے چا کرائیں گھوٹ کُوں جی آیاں آکھݨ کیتے ٹُر ڳئیاں۔ 2اُنہیں اِچ پنج ڳالھیاں اَتے پنج سیاݨیاں ہَن۔ 3جیرھیاں ڳالھیاں ہَن اپݨے نال ݙِیوے تاں گھِن گھِدے پَر اپݨے ݙِیوئیں کیتے وادُھو تیل نہ گھِدا۔ 4پَر سیاݨی کُواریں اپݨے ݙِیوئیں دے نال کُپیں اِچ تیل وی چا گھِدا۔ 5گھوٹ دے آوَݨ اِچ دیر تھی ڳئی تَہُوں او ساریاں نیندر کنُوں ٻُݙ ڳئیاں۔
6اَتے اَدھ رات کُوں شور مَچ ڳیا، ’ݙیکھو گھوٹ پُڄ ڳئے اَتے اُونکُوں جی آیاں آکھݨ کیتے ڄُلو۔‘ 7ساریاں جاگ پِیاں اَتے اپݨے اپݨے ݙِیوے جوڑَݨ لڳ پِیاں۔ 8ڳالھی کُواریں سیاݨی کُواریں کُوں آکھیا، ’اپݨے تیل اِچوں ساکُوں وی کُجھ ݙے ݙیو ساݙے ݙِیوے وِسمدے ویندِن۔‘ 9پَر سیاݨی کُواریں وَلدا ݙِتا، ’کَینا، اِیں نہ تِھیوے جو ایہ تیل ساݙے تُہاݙے ݙُوہائیں کیتے پورا نہ تِھیوے، تُساں ہَٹی تے وَنڄ کرائیں اپݨے کیتے مُل گھِن آؤ۔‘ 10اَتے جیرھے ویلے ڳالھیاں کُواریاں تیل مُل گھِنݨ ویندیاں پِیاں ہَن تاں اُوں ویلے گھوٹ پُڄ ڳیا اَتے جیرھیاں کُواریاں تیار ہَن او شادی دے جشن اِچ رَل ڳئیاں تے دَر بند تھی ڳیا۔
11کُجھ دیر بعد او کُواریاں وَل آ کرائیں اَوازاں ݙِیندیاں ریہاں، ’سَئیِں، سَئیِں! ساݙے کیتے دَر کھولو۔‘ 12پَر گھوٹ جواب ݙِتا، ’مَیں سچّ اَہداں جو مَیں تُہاکُوں نَئیِں ڄاݨدا۔‘“
13یِسُوع مُکدی مُکیندئیں ہوئیں آکھیا،”تُساں سُڄاک رَہو کیوں جو تُساں نہ اُوں ݙینہہ کُوں اَتے نہ اُوں لحظے کُوں ڄاݨدو۔“
تَرائے ٻاہنیں دی مثال
(رَلدا مِلدا حوالہ: لُوقا 19:11-27)
14وَل یِسُوع آکھیا،”ہِک بندہ ہَئی جَیں سفر تے وَنڄن کنُوں پہلے اپݨی مال مݙی اپݨے تَرائے ٻاہنیں دے حوالے کر ݙِتی۔ 15اَتے اُنہیں دی لیاقت دے حساب نال پہلے کُوں سونے دے پنج ہزار سِکّے، ݙُوجھے کُوں ݙُو ہزار سِکّے اَتے تریجھے کُوں ہِک ہزار سِکّے ݙِتے اَتے فوراً لڳا ڳیا۔ 16جیرھے ٻاہنے کُوں پنج ہزار سِکّے مِلئے ہَن اُوں وَنڄ کرائیں کاروبار اِچ لا ݙِتے تے اُوں پنج ہزار سِکّے ٻئے کما گھِدے۔ 17اِیویں ای جَینکُوں ݙُو ہزار سِکّے مِلئے ہَن اُوں ݙُو ہزار ٻئے کمتّے۔ 18پَر جَیں کُوں ہِک ہزار سِکّے مِلئے ہَن، اُوں اپݨے مالک دے ݙِتے ہوئے سِکّے کھݙ کھَٹ کرائیں زمین اِچ پُور ݙِتے۔
19اَتے ٻَہُوں عرصے بعد اُنہیں ٻاہنیں دا مالک وَل آیا تاں اُنہیں کنُوں حساب گھِدا۔ 20اَتے جَینکُوں پنج ہزار سِکّے مِلئے ہَن،آیا اَتے ایہ اَہدئیں ہوئیں ٻئے پنج ہزار سِکّے وی ݙِتے’سَئیِں! تُساں مَیکُوں پنج ہزار سِکّے ݙِتے ہَن، ݙیکھو مَیں پنج ہزار سِکّے ٻئے کما گھِدِن۔‘ 21اُوندے مالک آکھیا،’اَے میݙے چَنڳے اَتے دیانتدار ٻاہنے! تُوں تھوڑی شئیں اِچ دیانتدار ریہا، مَیں تَیکُوں ٻَہُوں شئیں دا مُختار بݨیساں، اندر آ اَتے اپݨے مالک دی خُشی اِچ شریک تھی۔‘ 22وَل جَینکُوں ݙُو ہزار سِکّے مِلئے ہَن، آیا اَتے آکھیا،’سَئیِں! تُساں مَیکُوں ݙُو ہزار سِکّے ݙِتے ہَن، ݙیکھو مَیں ݙُو ہزار سِکّے ٻئے کما گھِدِن۔‘ 23اُوندے مالک اُونکُوں آکھیا، ’اَے چَنڳے اَتے دیانتدار ٻاہنے! تُوں تھوڑی شئیں اِچ دیانتدار ریہا، مَیں تَیکُوں ٻَہُوں شئیں دا مُختار بݨیساں، اندر آ اَتے اپݨے مالک دی خُشی اِچ شریک تھی۔‘ 24وَل او ٻاہنا وی آیا جَینکُوں ہِک ہزار سِکّے مِلئے ہَن، اُوں آکھیا،’سَئیِں! مَیں ڄاݨداں جو تُوں ٻَہُوں کُراڑا بندہ ہَیں جِتھاں تُوں نَئیِں چھَٹیندا اُتھوں کَپیندیں اَتے جِتھاں تُوں نَئیِں رَہیندا اُتھوں وی کٹھا کریندیں۔ 25اِیں کیتے مَیں ݙَر ڳیا ہامی اَتے وَنڄ کرائیں تیݙے سِکّے زمین اِچ پُور ݙِتے ہامی، ایہ ݙیکھ جیرھا کُجھ تیݙا ہے او اپݨا گھِن چا۔‘ 26اُوندے مالک جواب اِچ اُونکُوں آکھیا، ’اَے نافرمان اَتے آلسی ٻاہنے! تَیکُوں پتا ہا جو جِتھاں مَیں نَئیِں چھَٹیندا اُتھوں مَیں کَپینداں اَتے جِتھاں مَیں نَئیِں رَہیندا اُتھوں کٹھا کرینداں۔ 27اِیں کیتے تَیکُوں چاہیدا ہا جو میݙی مݙی لوکیں کُوں اُدھار ݙیویں ہا جِتھوں مَیں وَل آ کرائیں منافعے سمیت وَلا گھِن گھِندا۔‘ 28بَس مالک حُکم ݙِتا، ’ایہ سِکّے اِیندے کنُوں گھِنو اَتے اُونکُوں ݙیو جَیندے کولھ ݙاہ ہزار سِکّے ہِن۔ 29کیوں جو جَیندے کولھ کُجھ ہے اُونکُوں ٻِیا ݙِتا ویسی اَتے اُوندے کولھ ڈھیر تھی ویسی پَر جَیندے کولھ کُوئی شئے کَینی، اُوندے کنُوں او وی گھِن گھِدا ویسی۔ 30اَتے اِیں نِکمے ٻاہنے کُوں ٻاہر اَندھارے اِچ سَٹ ݙیو جِتھاں رووَݨ اَتے ݙَند پیہوَݨ ہوسی۔‘“
اِبنِآدم یعنی یِسُوع دی بادشاہت اَتے عدالت
31وَل یِسُوع آکھیا، ”جݙّاں اِبنِآدم یعنی مَیں بادشاہ بݨ کرائیں اَوساں اَتے سارے فرِشتے میݙے نال ہوسِن وَل مَیں اپݨے شاہی تخت اُتے ٻَہساں۔ 32اُوں ویلے ساری قومیں دے لوک میݙے اَڳوں کٹھے کیتے ویسِن اَتے مَیں اُنہیں کُوں ہِک ݙُوجھے کنُوں اَنجھ کریساں جیویں آڄڑی بِھیݙیں کُوں ٻکرئیں کنُوں اَنجھ کریندے۔ 33مَیں راستبازیں کُوں جیرھے بِھیݙیں وانگوں ہِن،اپݨے سَڄے پاسوں اَتے ٻنہیں کُوں جیرھے ٻکرئیں وانگوں ہِن، کَھٻے پاسوں کریساں۔ 34وَل مَیں سَڄے پاسے آلئیں کُوں آکھساں،’آؤ، میݙے باپ دے مُبارک لوکو! جیرھی بادشاہی اِیں دُنیاں دے شروع کنُوں تُہاݙے کیتے تیار کیتی ڳئی ہے اُوندے وارث بݨو۔ 35کیوں جو مَیں بُکھا ہامی تُساں مَیکُوں کھاوَݨ کیتے ݙِتا مَیں تِرسیا ہامی تُساں مَیکُوں پِیوَݨ کیتے ݙِتا مَیں پردیسی ہامی تُساں مَیکُوں اپݨے گھر ٹِکائے۔ 36نَنگا ہامی تُساں مَیکُوں کپڑے پوائے، بیمار ہامی تُساں میݙی ݙیکھ بھال کیتی، قید اِچ ہامی تُساں مَیکُوں مِلݨ آئے۔‘ 37اِیندے بعد راستباز لوک جواب اِچ پُچھسِن، ’سَئیِں! اَساں کݙاں تَیکُوں بُکھا ݙیکھ کرائیں کھوایا ہا یا تِرسیا ݙیکھ کرائیں پاݨی پِلایا ہا؟ 38اَساں کݙاں تَیکُوں پردیسی ݙیکھ کرائیں گھر اِچ ٹِکایا ہا؟ یا نَنگا ݙیکھ کرائیں کپڑے پوائے ہَن؟ 39اَساں کݙاں تَیکُوں بیمار یا قید اِچ ݙیکھ کرائیں تیݙے کولھ آئے ہاسے؟‘ 40وَل مَیں جواب اِچ اُنہیں کُوں آکھساں، ’مَیں تُہاکُوں سچّ اَہداں جو جݙّاں تُساں میݙے پیروکاریں اِچوں کہیں نِکے کنُوں نِکے نال ایہ سلُوک کیتا تاں سمجھو میݙے نال کیتا۔‘
41اِیندے بعد مَیں کَھٻے پاسے آلئیں کُوں آکھساں، ’اَے لعنتی لوکو! مَیں کنُوں پَرے تھی وَنڄو اَتے اُوں ہمیشاں دی بھاہ اِچ لڳے وَنڄو جیرھی شیطان اَتے اُوندے فرِشتئیِں کیتے تیار کیتی ڳئی ہے۔ 42کیوں جو مَیں بُکھا ہامی تُساں مَیکُوں نہ کھوایا، تِرسیا ہامی تُساں مَیکُوں پاݨی نہ پلایا، پردیسی ہامی تُساں مَیکُوں نہ ٹِکایا۔ 43نَنگا ہامی تُساں مَیکُوں کپڑے نہ پوائے، بیمار اَتے قید اِچ ہامی تُساں میݙی ݙیکھ بھال نہ کیتی۔‘ 44اِیندے بعد او وی جواب اِچ پُچھسِن، ’اَے سَئیِں! اَساں کݙاں تَیکُوں بُکھا، تِرسیا، پردیسی، نَنگا، بیمار اَتے قید اِچ ݙِٹھا پَر تیݙی خدمت نہ کیتی؟‘ 45وَل مَیں جواب ݙیساں،’مَیں تُہاکُوں سچّ اَہداں جو جݙّاں تُساں اِنہیں نِکے کنُوں نِکے نال ایہ سلُوک نہ کیتا تاں سمجھو میݙے نال نہ کیتا۔‘ 46اَتے اِنہیں کُوں ہمیشاں دی سزا مِلسی پَر راستبازیں کُوں ہمیشاں دی حیاتی مِلسی۔“
Currently Selected:
متّی 25: سرائیکی
Highlight
Share
Copy
Want to have your highlights saved across all your devices? Sign up or sign in
متّی دی راہِیں اِنجِیل
سرائیکی بولی اِچ
Gospel of Matthew in Common Saraiki (Test edition for limited distribution)
Copyright © 2023 The Pakistan Bible Society
All rights reserved Gospel of Matthew, in Common Saraiki (Test edition for limited distribution) Copyright © 2023 by The Pakistan Bible Society
Typesetting: CAP Department, Pakistan Bible Society
PUBLISHER: THE PAKISTAN BIBLE SOCIETY
