Pogsiog Nang 10
10
Allah arukna imagne malaikat nhon Kornelius wamoghag kulukul aogha
1As Kaisarea nimi nhon sina Kornelius wamog. Kornelius ponena, Roma nimi yin salerop nang kong-kongne wamek aghana, teng tombare yin salerop nang sikindo wamog. Elap, elkaboap, el umag wamek nimiap sembe, “Italia nimi yin salerop nang,” alamsiek. 2Elap eldi aeag wamek nimiap Allah yubu sunsunum uro ulamekti, Allah omeklamek. Eldi nimi saeagha orogne maiknoro yeplamsiogti, sop-sop Allahag molona mololamog. 3Ik nhon sum heng taolbaogti, sin tanep peram haing uamna kwelekamna senenag agha tibin uro kemelamogpa, Allahri Eldamneri arukna imagne malaikat nhon poghol aogne yaog. Elag yingkina yubu lelamogti, “Kornelius,” seog. 4“Kornelius,” seogpa Korneliusti ibogti logti, “Nai, anna tane sa'a sembe yalamdi,” seog.
Wene seogpa, Allah arukna imagne malaikat anekori, “Andi Allahag molona mololamlamne Allahri ka'elamlaba, andi nimi saeagha orogne yeplamsilamne babe Allahri iangkeldi tiplengkangkel. Ni ulamlamne sembe Allahri kembangkeldi, ‘Walia aghabog na sembe ulamla,’ senelamla. 5Wene nimi etpare undo pogsimenba, as Yope piikti, nimi si Simon, si nhon Petrus, pone enel pukang. 6Simon Petrus poneko elkae Simon pham sapi kon logto mektopne poneri aeag mag laut longorop mag nubunge libunag sorop ae eneag wamla,” seog. 7Ambarogti Allah arukna imagne malaikat aneko piogpa, Kornelius poneko arukna phendeap, yin saleropne el yae ua uropne Allah yubu sunsunum uro ulamogneap yopsiog. 8Yopsiogti, “Allah arukna imagne malaikat yaldi, yubu wene ane ambatnelne sunsunum uro, as Yope Simon si nhon Petrus wamlange enel pululom,” aro pogsiog.
Petrus haing uamna kwelekamna senenag agha Allahri yubu ambarogha
9Korneliusti pogsiogpa, sin wilindi abeneko as Yope peramag inaag palamek abeneko Petrus ae siro heng ik mol-mol aloghogpa, “Ae imaghag molona molbanun,” aro waelbaog. 10Waelbaogti Allahag molona mololamoghag agha kwaneng yo uaogpa, “Kwaneng tehene,” sembaog. “Kwaneng tehene,” sembaogpa kwaneng el sembe yobarelamekpa, haing uamna kwelekamna senenag agha kemelamoghag agha kekneba uaog. 11Kekneba uaogpa, imag sip tiwalengelamoghag agha im phoro ag sangaroba ag ingkisag-ingkisag haing tombare kerektop saog urop ag pelengel alamog. 12Pelengel alamogpa, lomag tao wamekpa, ipsiog ana lebe aroba yan tombareri yabiropneap, mon magti yabiropneap, winang im toman yabiropneap ipsiog. 13Pelengel alamog pere ka'elamoghag agha yubu lelamogti, “Petrus sekmendi, lebe aroba tane oro yobamendi telamlulam,” alamog.
14Wene alamogpa, ka'ebaogti Petrusti, “Nu Saelba Ulamsilamne. Allahri sembenga kaolbanne seneropneap, salik-malik uropneap ik nhon babe lebe aroba sop undoba saogha telamna kom.#10:14 Allahri samenag Musaag, “Allah whingag sembenga pabimunagti, lebe aroba undo-undoba tululom kom,” aro ambarog. Ambarogpa Musari nen tipto mome toro pibogpa, Yahudi nimiri yubu eneko saelba ul palamek (Imamat - Memnang 11:1-47). Ane sembe, wene babe mali sembandi, tenun kom,” seog.
15Wene seogpa, yubu ka'ebaog yubu enekori nen lelamogti, “Allahri yubu, ‘Wali nembandi, wene tululam,’ alamla ane sembe, ‘Lebe aroba sop tane salik-malik uropne, nimiri tenep kom,’ aro andi sap wene seheng kom,” seog.
16Undo unuaogne nene ik wilindi unuaogti, peket ag sangaroba ni lomag wamogne imag agha kiliro tobog.
17Undo haing uamna kwelekamna senenag agha kekneba unuaogpa, Petrusti kembaogne sembe, “Sa'a sembe ual?” aro seneragto pukamog. Seneragto pukamog abeneko, nimi Korneliusti, “As Yope pululom,” aro pogsiog nimi taneko ae Simondi ae ibekti, ae kanero leka solingkirobag ina siramag sekamek.
18Ina siramag sekel pina nimi nhon yobekti hailamekti, “Nimi nhon sina Simon Petrus ae eneag yingkina ua unne no?” aro haibaek.
19Wene aro hailamekpa, Petrusti haing uamna kwelekamna senenag agha kekneba kembaogne sembe, “Sa'a sembe ual?” aro seneraglamog. Seneraglamog pere Allah Yame Walingeri Petrusag yubu lelamogti, “Petrus, nimi wilindiri an elangkeang. 20Sekom agha kulukamendi, sin kembiag agha wana phende seneragna koma sinap nhon pululom. Nari arukahinba, sinna yang,” seog.
21Wene seogpa, Petrus kulukaogti, nimi tanekoag yubu lelamogti, “Na a'undi elamnelomne pone wamna. Sa'a sembe yalomdi elamnelom?” seog.
22Wene seogpa sindina, “Nu nuni yin salerop nang sikindo sina Korneliusti nu pogsio. Elna Allah omektopne, Allah yubu sunsunum uro wana porogne wamla. Nimi sisa Yahudi nimi niri el sembe wali aro lelamang. Allahri Eldamneri arukna imagne malaikat nhon poghol aogne ponekori ambaroa sunsunum uro pogsioba yabo. Yabongena an enelaghukap aro yaap. Andi nunap nhon piberi, nuni Korneliusti aeag wa'iberi, lepmenne nu nuniri ka'ebalul,” aro ambarek.
23Wene aro ambarekpa, Petrusti yubu lelamogti, “Wali, na wamna aeag mabukap,” aro ambatsiogpa, aeag wa'iek.
Simon Petrus poneko Kornelius wamoghag piogha
Mabeka lukunap Petrusap, el enel piek nangap nhon palamekpa, Petrus elkabo as Yope nimi Yesusag sikne aro seneragtop nimi babe Petrusap nhon piek. 24Sin inaag mabekti, palamekpa Kornelius ponekori eldi kelmabo meap, elkaboap, eldo yabo, ilipsabo yopsiogti, Petrus tibogto wamekag as Kaisarea Petrus piog. 25Tibogto wamekag Petrus piogpa, Kornelius ponekori Petrus yanag amupto malingkina kibog. 26Kornelius ponekori Petrus yanag amupto malingkina kiplamog aghana, Petrusti sae kiliro toro sekirogti ambarelamogti, “Nangkae sekelingki! Na babe an saog uro nimi agha yan,” seog.
27Wene seogpa, Petrusap yubu leple aeag wa'alamdekpa, nimi maikno tekneamek. 28Tekneamekpa kembahiogti, Petrusti yubu ambarelamsiogti, “Nangkabo a'un el wamlom, na Yahudinge wamna. Nu Yahudi nimi sembe nubunangdi, ‘Yahudi sisa kom nimiap haole nenep tangto, nimi pali nenep tangkamseng kom,’ aro ambarelamsiek. Aghana Allahri seneropne na whingag lag taongena, mog so'oag nimi nhon babe, ‘Salik-malik nimi sembenga kaolban nimi,’ aro engkanep kom. 29Ane sembe nai, andi moloro, ‘Yalulam,’ seomba na kom sen koma yan. Nai, andi yopneomne sa'a sembe, ‘Yalulam,’ seom?” seog.
30Petrusti wene seogpa Korneliusti, “Ne sum eneko heng taolbaori, wene sin tanep peram wamla saog wamoba, na aeag agha Allahag molona mololamno. Mololamnori kemelamnoag agha kabuni nhon ag heng-henga tingiropne enekamori, na whingag sekamo. 31Sekamori nanag yubu lelamori, ‘Kornelius, andi nimi saeagha orogne yeplamsilamdi, molona mololamlamne Allahri ka'elamlari wamla. 32Ane sembe nimi arukahimenba, as Yope piikti, nimi si Simon, si nhon Petrus, pone enel pukang. El wamla aena pham sapi kon logto mektopne poneko sina Simondi aeag mag laut longorop mag nubunge libunag wamla,’ aro Allah arukna malaikatti ambatneo. 33Ane sembe nari elemag nimi pogsinoba, nai an tol pikeongba, an wana waliapti, an nanag yalam. Wene wali yalamba, nu babe Allah whingag longoro wamap. Nu Saelba Uhiropne ponekori, ‘Yubu ambatsululam,’ aro pogkeonge nu babe ka'ebaukapti, nu babe lelero ambatsi,” aro Korneliusti Petrusag molbaog.
Petrusti Korneliusag Yesus sembe ambatsiogha
34Wene seogpa Petrus ponekori, “Allahrina, ‘Nimi ane Yahudi sisa nimi to, kom to,’ semban koma nimi ni sembe o'ona senelamsildi wamlange, sumene na el tandi, sik semban. 35Nimi sisa mog so'o tala-tala nimi Yahudi nimi sisa kom nimi aghana, et nimiri Allah kipto eldi yubu sunsunum uro sikne ulamnari wamna tanena, Allahri toro kiplamsil,” seog. 36Petrusti nen tipto ambarelamsiogti, “Nangkabo, Yesus nia mangkina Saelba Uhiropne nu Israel nimiap nhon palamubu. El wepto poghol aogne Yesus Kristus pere agha Allahri Israel nimiag yubu ambarelamsiogpa, Yesusag uro yabiogne sembe a'un ni el wamlom. Yubu walinge ambatsiog nena Allahri, ‘Nanap nimiap ma'ap taukap,’ aro Yesus wepto poghog. 37-38Wepto poghogpa Yohanesti Allah yubu ambatto nimi maghag pelengelamsiog. Yohanes ponekori Allah yubu ambatto nimi maghag pelengelamsiogti, Yesus babe maghag pelengkaog abeneko pere Allahri, ‘Taulbahimendi saelbamsululam,’ aro Yesus Nazaretne poneko Allah Eldamne Yame Walingeap, eldamne mikipneap elag pibog. Elag pibogpa, Galilea so'oag agha Yudea so'oag tala-tala palamogti, wali-walia aghabog ulamog. Unulamogpa Allahri el yeplamogpa, phia sikini nubungeri saelba ulamsiog nimi wali nenelamsiog. Yesusti unulamogne nene sembe nu ni el wamsil. 39Nu Yahudi nimi mog so'oag babe, as Yerusalem babe eldi ulamogneap ulamongeap nu nang eneri haingdi ibobori, sikne lag nenero ambarelamsiap. Walinge aghabog ulamo aghana, nimiri kalag siplobongdi, ya'ag olobong. 40Olobong aghana, ik wilindip sum teptobag agha Allahri kamag nembao. Kamag nembaoba Allahri, ‘Nimiag lag nenep talul,’ sembaogne sunsunum uro lag nenel dalamo. 41El Allahri kamag nembaonge lag nenel dalamoa nimi niag kom. Ot nu Allahri samenag wepsiog nimiri mo haingdi babe ibobo, kwanengap maghap babe nhon telamobori, sikne lag nenero ambarelamsiap. 42El nunap nhon wamoboa, nunag yubu lelamori, ‘Nimiag ambarelamsimundi, “Yesus poneko Allahri wepto sekirog. Wepto sekirogpa, amik ualul nena, nimi teptop nimiap, kamag urop nimiap, Yesusti nimi poloro wepsileri, tam karebalul,” aro sikne lag nenero ambarelamsululom,’ aro Yesusti nu pogsio.
43Pogsioba wene nuri ambarelamsiap yubuna, samenag Allahri yubu silimu tiplamek nang ni wamek nimi tanekori Yesus sembe sikne lag nenero ambarelamsiek. Yesus sembe ambarelamsiek nena, ‘Nimi etneri elag sikne aro wana palilamikpa, Allahri kembahileri, “Nari wepto poghol ahinge poneko siag kekhaektop nimi wamang,” aro malia uroba tam wailag nembalul,’ aro yubu tiplamek,” aro Petrusti ambarelamsiog.
44Wene aro Petrusti yubu ambarelamsiogpa, ka'elamek nimi tanekoag Allah Eldamne Yame Walinge sin nongag kulukul aog. 45-46Allah Yame sinag kulukul alamogpa, a'ero-a'erop yubu Allah Eldamne Yame Walingeri tarelamsiog yubuag lero Allah omeklamek. Allah omeklamekpa, Yahudi nimi agha Yesusag sikne aro seneragtop nimi Petrusap nhon yaek nang tanekori babe ibek. Ibek nang taneko Yahudi nimi nengabo kon karebel dalamek nang aghana, Yahudi sisa kom nimiri Allah omeklameka ibekti, Yahudi nimi kon kareptop nimi taneko lo'om seek. Lo'om aro seneraglamekti, “Yahudi nimi kom aghana, sinag babe Allahri Eldamne Yame Walinge tarelamsil,” aro lo'om seek. Yahudi nimiri kemelamsiekpa, Yahudi sisa kom nimiri a'ero-a'erop yubu Allah Eldamne Yame Walingeri tarelamsiog yubuag lelamekpa, Petrusti, 47“Kembahilulom. Allah Eldamne Yame Walinge nunag tahio saog uro sin nimi taneag babe tahil. Ane sembe nimi taneri Yesusag sikne aro seneraglamang tanena, maghag pelengehinne sembe nimi nhondi babe kom senep te?” seog. 48Wene seogti, Petrusti nen yubu lelamogti, “Nimi tanekori Yesus Kristus siag kekhaekto nenel dalamangne sembe maghag pelengkipsukap,” seogpa maghag pelengkahiek. Maghag pelengkipsiekpa, nimi tanekori Petrusag, “Ik etpare nhon wamukap,” aro molbaekpa, Petrus wamog.
Currently Selected:
Pogsiog Nang 10: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
