Pogsiog Nang 11
11
Petrusti Korneliusap haiptarekne sembe elkabo yogne Yerusalem wamekne ambatsiogha
1Petrus as Kaisarea wamogpa, Yesusti wepto pogsiog nimi Petrus elkabo yogne babe mog so'o Yudea wamek. Wamekpa, “Yahudi sisa kom nimi babe wene Allah yubu ka'ero saelba ul palamang,” alameka Yesusti wepto pogsiog nimi yogneap, Yesusag sikne aro seneragtop nimi mog so'o Yudea wamek nimi tanekoapti ka'ebaek. 2Ka'ebaek aghana, Yahudi nimiri senelamekne, “Allahri samenag ambatsiogha sunsunum uro nimi nengabo kon karebel dalamik tanena, Allahap ma'ap tangtop nimi tanep,” aro Petrusag tam pibek.#Sumbaogha 17:9-14 Ane sembe, Petrus mog so'o Kaisarea laplobi agha as Yerusalem yingkiogpa, Yahudi nimi as Yerusalem wamekne Petrusag piekti, yubu lelamekti, 3“An Yahudinge aghana, sin Yahudi sisa kom nimi kon kareptop kom nimiri aeag wa'ina kwaneng nikag teom. Sa'a sembe Yahudi nimiri uanep komne nene uaom?” alamek.
4Wene alamekpa, Petrusti anam alniro yabioghag agha uro yabiogne ni ambarelamsiogti, 5“Na as Yope Allahag molona mololamnori, haing uamna kwelekamna senenag agha kemelamnoag agha kekneba nanag uao. Nari kemelamnoag agha ag sangaroba ag ingkisag-ingkisag haing tombare kerektop saog urop ag imag agha na saramag pelengel alamoa imno.#Pogsiog Nang 10:11 6Pelengel alamoba, lomag kemelamnoag agha lebe aroba yan tombareri yabiropneap, lebe aroba nimiri paia urop komneap, lebe aroba mon magti yabiropneap, winang im toman yabiropneap imno. 7Kemelamnoag agha imag agha nanag yubu lelamori, ‘Petrus sekmendi, lebe aroba tane oro yobamendi telamlulam,’ alamoa ka'ebano.
8Wene alamoa ka'ebanori narina, ‘Nu Saelba Ulamsilamne. Allahri sembenga kaolbanne seneropneap, salik-malik uropneap samenag agha ik nhon babe lebe aroba sop undoba saogha nari pamdi telamna kom. Ane sembe wene babe mali sembandi, tenun kom,’ seno.
9Wene senoba, nen ik phendepne imag agha yubu ka'ebano yubu enekori lelamori, ‘Allahri yubu, “Wali nembandi, wene tululam,” alamla ane sembe, “Lebe aroba sop tane salik-malik uropne, nimiri tenep kom,” aro andi sap wene seheng kom,’ seo. 10Undo unuaonge nene ik wilindi unuaori, nen ag sangaroba ni lomag wamonge imag agha nen kiliro tobo,” aro Petrusti Yahudi nimiag ambatsiog.
11Petrusti nen tipto yubu ambarelamsiogti, “Kiliro toboba, wamnoag agha nimi wilindi as Kaisarea agha na wamnoag pogsioba, yaongdi na wamno aeag ina siramag sekamong. 12Sin sekamongba, Allah Yame Walinge nenekori na ambarelamneori, ‘Sin kembiag agha wana phende seneragna koma, sinap nhon pululom,’ seoba nangkabo no'opbare tane wamang nangap nhon pibo. Nu nhon as Kaisarea pibori, nimi wilindi pogsionge ponekori aeag wa'ibo. 13Wa'iboba Kaisarea nimi enekori nunag ambarelamsiori, ‘Allah arukna imagne malaikat nari aeag wa'ina na whingag lag taori, yubu lelamori, “As Yope nimi si Simon, si nhon Petrus pone enel pukang nimi pogsululam. 14Pogsimenba enero poa yaikpa, Simon Petrusti a'unag yubu ambatsilul. Yubu ambatsilenge toman agha anap andi ae lom nimi niap Allahri a'un taluro pipsilul,” aro Allah arukna malaikatti nanag ambatneo,’ aro Kaisarea nimi enekori nebatneo. 15Kaisarea nimi enekori nebatneoba, nari yubu ambarelamsinoag agha Allah Eldamne Yame Walinge neneko samenag nunag kulukul aog saog uro, sinag babe kulukulao. 16Kulukulaoba nu Saelba Uhiropne Yesusti samenag lebog yubu ane, ‘Yohanesti samenag nimi maghag pelengelamsiog aghana, Allahri Eldamne Yame Walinge a'unag pelengkatsilul,’ seogne nene el tanori wamno.#Pogsiog Nang 1:4-5 17Nangkabo, nu Saelba Uhiropne Yesus Kristus ponekoag nuri sikne aro wana palilamap nimi sembe Allahri Eldamne Yame Walinge nunag tatsiog. Nunag tatsiogne saog uro sin nimi taneko babe tatsio tanena, nari welaro Allahag, ‘Tatsiseng kom,’ senep?” aro Petrusti elkabo Yahudi sisa nimiag ambatsiog.
18Ambatsiogpa ka'ebaekti, wana wali tahiog. Wana wali tahiogpa, Allah omeklamekti, “Yaghe! Allahri Yahudi sisa kom nimi babe yeplamsilba, sin Yahudi sisa kom nimiri malia seneragto ulamangne laplobi agha Allahri senenne saelba ulamang. Ane sembe Allahri sin opsin koma ya'ag kamag uro wamukang,” alamek.
Yesusag sikne aro seneragtop nimi as Antiokhia winil dalameka
19Samenag Petrus as Kaisarea anam pin komag, Stefanus ponekori Yesusag sikne aro wana palilamogne sembe Yahudi nimiri Stefanus ya'ag obek. Stefanus obekti, Yesusag sikne aro seneragtop nimi yogne babe Yahudi nimiri sarekerepto olamsiek. Olamsiekpa Yesusag sikne aro seneragtop nimi taneko yog asag nimi anabi tang-tang piek. Nimi anabi tang-tang piekagna, nhon-nhon a'el dalamekti, mog so'o Fenisia palamekpa, as Antiokhia ina agha tang-tang piek. Nimi orange mag alip toman heng purukul pirobag sip palamekti, mag longo kanektop mog so'o Siprus piek. Piek abeneko pere yubu walinge Yesus sembe ambarelamsiek. Yesus yubu ambarelamsiek aghana, ot Yahudi nimiag aghabog yubu walinge ambarelamsiekti, Yahudi sisa kom nimiag ambarelamsiek kom. 20Undo unulamekpa, yog nimina, mog so'o Siprus nimiap, mog so'o Kirene nimiapti yubu walinge Yesus sembe ka'ebaekti, as Antiokhia piekti, nimi sisa Yunani nimiag babe yubu walinge nu Saelba Uhiropne Yesus sembe tipto ambarelamsiek. 21Nu Saelba Uhiropne ponekori sin yeplamsiogpa, nimi maikno Yesus sembe yubu ambarelamsiek. Ambarelamsiekpa ka'elamek nimi tanekori mali-malia seneragto ulamekne lililamsiekti, nu Saelba Uhiropne ponekoag sikne aro wana palilamek.
22As Yerusalem Yesusag sikne aro seneraglamek nimiri ka'elamekti, “As Antiokhia Yunani nimi maiknori Yesusag sikne aro seneraglamang,” alameka ka'ebaek. Ka'ebaekti Yahudi nimi Yesusag sikne aro winil dalamek nimi Yerusalem wamek nimi tanekori, “As Antiokhia nimiag uro yabalamlange kemel phululam,” aro nimi si Barnabas poghek. 23-24Barnabas ponekoag Allah Eldamne Yame Walinge wa'ina teknero ua ulamogpa, Barnabasti Yesusag sikne aro wana to'opto palilamogti, walia aghabog ulamog. As Yerusalem nimiri Barnabas poghekpa, as Antiokhia piogti kemelamsiogpa, Allahri sinag wana yororo walia tarelamsiogne ibogti, Barnabas awi sembaog. Awi sembaogti wenelamsiogti, “Wene Yesusag wana seneraglamlomne nene wali. Wana phende seneragna koma, nu Saelba Uhiropne ponekoag sikne aro wana to'opto palilamlulom,” aro wembahiog. Barnabasti Antiokhia nimi wana wali uro wenelamsiogpa, nimi maiknori malia seneragto ulamekne lipsiekti, nu Saelba Uhiropne Yesusag sikne aro seneraglamek nimi maikno tangto palamog.
25Wameka Barnabas poneko, “Saulus ebanun,” aro as Tarsus piogti, 26Saulus ibogti, samoro as Antiokhia enero payaog. Enero payaogti, as Antiokhia Yesusag sikne aro winil dalamek nimiap haiptangto Saulusap Barnabasapti Allah yubu tibin nenero nimi maikno ambarelamsirekpa, hengkun nhon taog. Yesusti yubu ka'ero neleplamek nimi sembe samenag yum-yum as Antiokhia asag anea sisa, “Kristen,” aro engelamsiek. 27Wamekpa Yerusalema Allahri yubu silimu tiptop nimi as Antiokhia yaek. 28Yaek nimi taneko nhon sina Agabus Allah Yame Walingeri el pere agha yubu lelamogti, “Mog so'o Roma nimi saelbamsiek mog so'o niag kwaneng yo nubunge waelbalul,” aro ambatsiog. Ambatsiogne nene yubu sia leropne nubunge Kaisar sina Klaudius nimi saelbamsiog li kwaneng yo neneko waelbaog. 29Kwaneng yo neneko waelbaogpa, Yesus yubu ka'ero neleplamek nimiri, “Nungkabo Yesusag sikne aro seneragtop nimi Yudea wamangne kwaneng yo seklelamang nimi nuri yepsukap,” aro yubu saekag lebek. Yubu saekag lebekti, Yesus yubu ka'ero neleplamek nimi ni as Antiokhia wamek nimi tanekori saeag phelekto wamogha sunsunum uro, “Yudea nimi tatsinun,” aro yepsineba poloro palilamsiek. 30Poloro palilamsiekpa, “Mog so'o Yudea nimi wenehirop nang tanokoag tarel phululom,” aro Barnabasap Saulusap pogsiekpa pabalamdek.
Currently Selected:
Pogsiog Nang 11: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
