Pogsiog Nang 12
12
Nimiri Yakobus obekti, Petrus haing sae kaupto kop aeag tobongkibeka
1Kwaneng yo nubunge waelbaog li enekoag Roma nimi saelbamsiogne Kaisar Klaudius umag Yahudi nimi sembe yubu sia leropne nhon babe sina Herodes wamog. Yubu sia leropne Herodes ponekori, “Yesusag sikne aro winil dalamang nimi seklebaukang,” aro ilipsabo yin salerop nang pogsiro, “Haing sae kaupto poa yalamsululom,” aro ambarelamsiogpa, elag poa yalamsiek. 2Elag poa yalamsiek nimi nhon sina Yakobus, Yohanes eldo wamog. Herodesti el umag nimiag, “Yakobus neneko karoghag agha karepto oplulom,” aro arukahiogpa, ya'ag obek. 3Yakobus ya'ag obeka sembe Yahudi nimiri wali aro awi senelamekpa, Herodesti ipsiogti, “Petrus babe saelbalulom,” aro arukahiog. Herodes ilipsabori Petrus saelbaek sum enena, Yahudi nimiri kwaneng roti walerop komne tero ik etpare Allah omekto wameka, ik nhon sum eneko Petrus sae kaupto saelbaek. 4Petrus saelbaekti, kop aeag tolongolamekpa, Herodesti el umag yin salerop nang ao tarabare nangag ambarelamsiogti, “A'un ina siram sunuro nimi tombare-tombare yae wamlulom,” aro ambatsiog.
Wene aro ambatsiogti, “Paskah sum seneragto kwaneng roti walerop komne terop li liogha Petrus tam ane nimi maikno whingag karebanun,” aro Petrus kop aeag tobongkibog.
5Petrus poneko kop aeag aneko wamogpa, Yesusag sikne aro winil dalamek nimi tanekori sol wali, wali uro, “Petrus yeplulam,” aro Allahag molona mololamek.
Allahri Petrus kop aeag agha lambirogha
6Herodesti, “Ambuhum nimi maikno wamika haingag agha tam karebaukap,” aro wamogpa, Petrus poneko sae tara-tara yin salerop nangdi saeap a'amsuro kaubirekpa, Petrus malamog. Sindi sae a'amsuro kaubirek haing aneko besi agha sorop haingag agha kaubirek. Petrus malamog ae lom ina siramag yin salerop nang nenne babe yae wamek. 7Yae wamekpa, lo'om aro nu Saelba Uhiropneri arukna imagne malaikat poghogne nhon Petrus malamog aeag lag taogpa, Petrus wamog ae lom eneko warelobog. Allah arukna imagne malaikat anekori Petrus malamogha kaombaogti, “Nangkae, elemag puke,” alamog abeneko besi agha sorop haing sae kaubamek haing eneko loptangka timbaog. 8Loptangka timbaogpa, Allah arukna imagne malaikat anekori Petrusag yubu lelamogti, “Anenge uwoghag nopna noptoba nopto amendi, yan wangana wangaro alulam,” seogpa wangkaog. Wangkaogpa nen lelamogti, “Ag nongagne enekto amendi, nanag nelebanululam,” seog.
9Wene seogpa, Petrus kop aeag anekoa Allah arukna malaikat nelepto lanalamog. Nelepto lanalamogti Petrustina, “Ot sik uro Allah arukna malaikatti lobol anel,” semban koma, “Haing uamna kwelekamna senenag agha ililamna,” senero Allah arukna malaikat nelepto lambaog. 10Allah arukna malaikat nelepto palamogti, yin salerop nang ina siram tenap lomag tao weamekne phibom agha, nen tenap phendepne yae wamekne phiro asag lambanebag besiri soro lingniloropneag palamdek. Palamdekpa ina siram aneko mo kup taog. Mo kup taogpa, lanaro palamdekti, ina ingkisag anekoa palamdekti, Allah arukna malaikat anekori Petrus laploa piog. 11Ina ingkisag aneko pirekti, Allah arukna malaikat anekori Petrus laploa piogpa, wana hekaogti, “Yahudi nimiri na, ‘Obukap,’ aro ulamang aghana, nu Saelba Uhiropne ponekori arukna imagne malaikat arukalba, Herodes saeag agha taulbanelba, wene sik uro el tanel,” seog.
12Undo wene seogti seneraglamogti, Yohanes si nhon Markus ilin Mariari aeag piog. Ae aneko nimi maikno poloro tekneamekti, Petrus sembe Allahag molona mololamek.#Pogsiog Nang 12:5 13Ae enekoag piogti, leka toroba ina siramag kaungkaogpa, “Etneri kaungulamla,” aro Maria arukna kelabo sina Rode kel enekori kemel aog. 14Kemel aogti Petrus yubu lelamogha ka'ebaogti, awi lelem ina kupna koma, “Nimi ambatsinun,” aro ae lomag piogti, “Petrus asag wamla,” aro nimi longoro tekneamekne ambatsiog.
15Ambatsiogpa sindina, “Anna serem saelbamlamdi lelamlam,” aro wene alamekpa eldina, “Ot sik,” seog. “Ot sik,” seogpa sindina, “Allah arukna malaikatti Petrus paiamlange yalba lelamla,” alamek. 16Yubu undo lelamekpa, Petrusti ina kaungu-kaungu palamogha sembe ina kupto kemelamek. Kemelamekpa Petrus ina siramag wamogha ibekti, lo'om seek. 17Lo'om seekpa Petrusti, “Yubu kom talulom,” aro sae maubitsiogti, “Nu Saelba Uhiropneri eldi arukna malaikat poglaba, kop aeag agha enero poa lambitnelba yan,” aro tibin nenero ambatsiog. “Ambatsinne nene Yakobusap#12:17 Petrusti, “Yakobus,” seogne nene Yesus ilipsae taptopne, Petrus yubu eptopne saog wamogne pone sembe lebog. Yakobus Yohanes elkae Herodesti nimiri samenag obek (Pogsiog Nang 12:2). nungkabo Yesusag sikne aro seneraglamang nimi yogneap ambatsululom,” seogti lamba ora asag piog.
18Lukunap yin salerop nang Petrus yae ulamekne tanekori, “Petrusag sa'a agha ualba, welaro lambal?” aro logti, sin mamun maikno haum aro lelamek. 19Yin salerop nang taneko logti, sin mamun maikno haum aro lelamekti wamekpa, Herodes ponekori, “Petrus ebalulom,” seogpa sen-sena ebaek. Ebaekpa orogti Herodesti, “Yin salerop nang Petrus yae wamek nang payahilulom,” seogpa payahiekpa, Herodesti sinag, “Tam kemero haibahinun,” aro haim-haim alamsiog. Sinag haibahiogti, “ ‘Sindi saeag agha lambal,’ aro opsululom,” seogpa yin salerop nang orangeri, “Opsukap,” aro pabahiek.
Undo Herodesti saeag agha Petrus Allahri lambirogpa, Herodes poneko mog so'o Yudea laplobi agha as Kaisarea piogti wamog.
Herodes tebaogha
20Herodesap, mog so'o Tirus nimiap, mog so'o Sidon nimiap sin iriktangto saog uro wamekti, Herodesti sin sembe yo senelamog. Yo senelamog aghana, Herodesti mog so'oag agha sindi tisirik wamogpa, Tirus nimiap Sidon nimiap ma'ap taekti, “ ‘Nimi nubunge Herodesap nunap tam wamlul kom,’ aro elag yubu lel pukap,” aro piek. Elag piekti, nimi nhon si Blastus, yubu sia leropne Herodesti yubu eptopne ae lomag o'olamsiogne ponekoag, “Herodesap nunap ma'ap taukap,” aro samenag yubu yangaro lebek. Yubu yangaro lebekpa, Blastus sinag sip taogti, Herodesag yubu tipto ambarog. 21Herodesti, “Sinag yubu lebukap,” seog sum eneko el yubu sia lennangdi enektop ag walinge enekaogti, elel-molel aroba towalengkaog. Nimi nubunang tam kareptop nang purobag pulingkiogti, sinag yubu lebog. 22Yubu lelamogpa, ka'eamek nimi tanekori, “Nunag wali sembahilul,” aro kibiang towalengelamekti, “Nimiri yubu lelamla kom. El memne mikiba imag wamlange nimi saog taldi lelamla,” alamek.
23Wene alamekpa, Nuni Allahri, “Mog so'oag nimiri na mo omekaneheng aghana, Herodes omeklamang. Herodesti sinag, ‘Na omekaneheng kom. Allahag agha omekalulom,’ senep aghana, ‘Wali omeklamneang,’ sembaldi wamla,” aro nu Saelba Uhiropneri arukna imagne malaikat nhon, “Herodes oplulam,” aro poghog. Poghogpa Herodes obogpa, kolagti tero tebaog.
24Herodes tebaogpa, yubu kom taog aghana, Allah yubu nubu taogpa, nimi maiknori, “Allah yubu wali,” aro ka'elamek.
25Barnabasap Saulusapti as Antiokhia nimiri saeagha nimi yepsiroba pabireka taneko tatsirekti, Yerusalem laplobi agha samoro yalamdek.#Pogsiog Nang 11:30 Yalamdekti Yohanes si nhon Markus poneko enero poa yarek.#Pogsiog Nang 12:12
Currently Selected:
Pogsiog Nang 12: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
