Pogsiog Nang 17

As Tesalonika nimiri Paulusap Silasap sembe yanghang alamsieka

1As Filipi laplobi agha Paulusap elkaboap as Amfipolis ina agha as Apolonia ina agha palamekti, as Tesalonika piek. As anekoag Yahudi nimiri Allah yubu lero winirop ae nhon wamog. 2Allah yubu lerop sum Sabat sum taogpa, Paulus ponekori ora asag ulamog saog uro as Tesalonika anekoa babe Yahudi nimiri Allah yubu lero winirop ae enekoag wa'alamog. Wa'alamogti Allah yubu lerop sum Sabat sum ik wilindi Allah Yubu samenag mome toro pibekne ambarelamsiogpa sindi, “El tahabe,” aro hailamekne eldi tibin nenero wana heklamsiog. 3Wana heklamsiogti, Allah Yubu samenag mome toro pibek mome sangalamogti, Allahri wepto poghol aogne Kristus poneko sembe sin el nenero ambarelamsiog. Ambarelamsiog nena, “Allah Yubu samenag mome toro pibekne sunsunum uro Kristus poneko seklero tebanep taneogna, el teptop nimi anabiag agha kamag tanepneog wamla. Kristus ponekoag uro yabinepneog wamlange neneko Yesus ponekoag uro yabiogne sembe ambarelamsin,” aro lag nenero ambarelamsiog.

4Paulusti wene aro ambarelamsiogpa, Yahudi nimi etpareri sik senelamekti, Paulusap Silasap sae tiptangto ma'al dalamek. Ma'al dalamek nimi tane Yunani nimi Allah omektop nimi maikno babe, kelabo as Tesalonika kelabo sikinin yabo saog uro wamek kelabo maikno babe, sindi sik senelamekti, Paulus elkaboap ma'al dalamek. 5Sin ma'al dalameka kembi agha Yahudi nimiri, “Nimi maiknori sin phende maiplamsiang,” aro wana mali senelamek. Wana mali senelamekti, Yahudi nimi tanekori ulamekti, malia ulamek nimi ambengka uro urop nimi etpare sae kiliro topsiekti, “Put-put ana ulamukang,” aro Yahudi nimiri, “Unulamlulom,” aro arukahiek.

Wene aro arukahiekpa, put-put alamek nang tanekori as aneko nimi wana bobo nenelamsiek. Wana bobo nenelamsiekpa, nimi tanekori, “Yanghang alamsiberi, yag lambahukap” aro poloro winip taek. Poloro winip taekpa, Yahudi nimiap put-put arop nimiap tanekori, “Paulusap Silasap ero saelbahiberi, poloro winip taang nimi saeag nembahukap,” aro sikinkae Yasondi ae kwerekto wa'iek. 6Kwerekto wa'iekti kemelamsiekpa, Paulusap Silasap orog wamdek. Orog wamdekpa, Yasonap sikinkabo Yesusag sikne aro seneragtop nimi etpareap saelbahiekti, kiliro so'oag lelepto poa palamsiekti, nimi nubunang as eneko saelbamsiek nang saeag tarel pihiek. Yubu haum aro poa palamsiekti, “Mog so'o as tala-tala tam palilamdangba, yubu talamla nimi taneko wene nuri asag yingkilamdang,” alamekti kiliro pabalamsiek. 7“Yasondi Silasap Paulusap kiliro nuri asag palilamsil. Roma nimi sembe yubu sia leropne nubunge Kaisarti yubu tam karepto pibog aghana, yarong nimi tanekoap, sikinkabo tanekoapti philamang. Roma nimiri mog so'o wamap ane sembe, yubu sia leropne nhonog Kaisar wamla aghana, sindi ambarelamsirangne, ‘Yubu sia leropne nubunge nhon Yesus wamla,’ aro ambarelamsirang,” alamek.

8Wene alamekpa, nimi maikno tanekoap nimi nubunang tanekoapti ka'ebaekti, wana samsamolopsiogpa wamek. Wana samsamolopsiogpa wamekti, 9nimi nubunang tanekori tam karebaek. Tam karebaekti, Yasonap elkaboap ambarelamsiekti, “A'undi nunag, ‘Tam ane nen waelbalul kom,’ aro salag palilapmundi, kamna nunag tatsululom. Tam ane nen waelbale kom tanena, nen samoro tatsukap. Aghana nen waelbale tanena, nuri saeag ya'ag wamlul,” aro tam karepto ambatsiek. Ambatsiekpa Yason elkaboapti salag pairo kamna tatsiek. Kamna tatsiekpa tobekti, “A'unungeag pululom,” seekpa lambaek.

Paulusap Silasapti Berea nimi Allah yubu ambatsireka

10Lambaek sum eneko inipnag, sikinkabo Yesusag sikne aro seneragtop nang tanekori “Nangkabo pururom,” seekpa Paulusap Silasap as Berea pirek. Aneko pirekti, Yahudi nimiri Allah yubu lero winirop aeag aneko wa'irek. 11Yahudi nimi agha as Tesalonika wamek nimi taneko wana yo nimi wamek aghana, Yahudi nimi agha as Berea wamek nimi wana lobarektop nimi wamekti, wanaag sol wali, wali uro Allah yubu ka'elamek. Ka'elamekti, “Paulusti Allah yubu ambarelamsilne sik to, kom to,” aro tam kemero hailamekti, Allah Yubu samenag toro pairop mome sop-sop lelekto kemelamek. 12Allah Yubu lelekto kemelamekti, Yahudi nimi agha as Berea wamek nimi maiknori Yesusag sikne aro wana palilamek. Yunani nimi sikinin yabo saog uro wamek kelabo taneko babe, Yunani nimi kelaboap nengaboap sin maiknori Yesusag sikne aro wana palilamek. 13As Berea nimi maiknori Yesusag seneraglamek aghana, “Paulusti as Berea nimi Allah yubu ambarelamsil,” ana Yahudi nimi agha Tesalonika wamek nimi tanekori ka'ebaekti, “Paulusti yubu ka'ebaukang kom,” aro as Berea aneko piek. Piekti put-put aro wana aluktop yubu ambarelamsiekpa, ka'elamekti wana samsamolopsiogpa wamek.

14Wene alamekne sembe Paulus elkabo Yesusag sikne aro seneragtop nimi tanekori mag laut longorop mag abolag sip poghol piekpa, Silasap Timotiusap agha as Berea aneko wamdek. 15Paulus poneko elkabori enero poa as Atena pail piekti, yalamekpa Paulus ponekori, “Silasap Timotiusap elemag na amik yarukang,” aro yubu pibog.

Paulusti Atena nimi Allah yubu ambatsiogha

16As Atena aneko piogti, Silasap Timotiusap sembe nang-nangaro tibogto wamsiogti, as anekoag nimi saeri sunurop mema phalamekne maikno wamogha kembaogti, Paulus wana ikin sembaog. 17Wana ikin taogne sembe, Yesus sembe ambarelamsiogti, eldi yubu ka'elamek nimiap sop-sop haibil dalamekti, “El tahabe,” aro hailamekne tibin nenero ambarelamsiog. Yahudi nimiri Allah yubu lero winirop aeag wa'alamekti, Yahudi nimiap Yahudi sisa kom nimi Allah omektop nimi tanekoap Yesus sembe ambarelamsiog. As Atena nimiri nia mangkina pail wa'ina tolamekag babe Paulusti sop-sop palamogti, nimi pang-yang ulamek nimi taneko wamekne babe ambarelamsiog. 18Nimi etpare mome ambatsirop nang Epikurosti seneragtopne saelbamek nangap, Stoari seneragtopne saelbamek nangap, Paulusap alniro yubu nikag lero haibil dalamek. Haibil dalamekti, Paulusti yubu walinge Yesus sembe ambarelamsiogti, “Nimi teptopne kamag tanep,” aro wene seogne sembe, nimi taneko etpareri, “Nimi ene el wamla te? Eldi seneragna olog aghana, yubu pamag agha lelamla,” alamekpa nen nimiri, “Nimi eneri mema ora mog so'oag nimiri phalamangne nu ekonne ambarelamsil te?” alamek.#17:18 Paulusti Yesus kamag taogne sembe ambarelamsiogti, Yunani yubuag, “Kamag taog,” seogne yubu kiki, “Anastasis,” aro lebog. Wene seogpa ka'elamekti, nimi nhon-nhondi, “El ambarelamsil nena, mema si Anastasis sembe ambarelamsil te?” senelamek.

19Wene alamekti, Paulus poneko tam kareptobag Areopagus yimag poa piekti, “Andi yubu tam wendogne lelamlamne nene nu babe ka'ebaukapti, nen ma'aro ambatsi,” alamek. 20“Andi lelamlamne nuri aoag olog ka'elamabag agha lelamlamne nene sembe, ‘Sa'a alamla?’ senelamap. Ane sembe, lag phoro ambatsululam te?” alamek.

21As Atena wamek nimiap, nimi ora asag agha sekelingirop nimi tanekoap ora aba uan koma yubu tam wendogne sembe ngagto ka'elamekti wamek.

22Wamekti, “Ambatsululam te,” alamekpa Paulus poneko Areopagus yimag aneko poloro winil dalamek nimi whingag sekogti, yubu lelamogti, “Atena nimi nangkabo. A'undi mema phalamlomne sol wali uro ulamlomne kemelamsin. 23A'undi mema phalamloma tane sembe ina yabalamnori, mema pharobag nhon kemelamno. Kemelamnoba mome toro piplumne lilimna ane: ‘Mema nimiri ekon uropne sembe,’ aro mome toroba mema pharobag ane piplum. A'undi mema ekon urop mema phalamlomne poneko sembe wene nari a'unag ambatsinun. 24Allahri nia mangkina mog so'oag wamlange sumbaogti, imap so'oap saelbamsil. Imap so'oap Saelba Ulamsilne poneko nimi saeri mem ae soropneag ua urop kom. 25Imap so'oap sumbaogne ponekori nimi ni kamag nenelamsildi, hain tarelamsildi, ni nuri saeag wamlangena tarelamsil. Nu nimi mog so'oag nimiri, ‘Imap so'oap sumbaogne poneko el teko wamla,’ sembanep kom. Nuri saeag agha el yepnep kom. 26Yum-yum samenag sumbaog nimi nhonag agha nimi maikno likto palamogpa, nimi sisa ni tala-tala mog so'oag wamangne likto piek. Nimi likto piek nimi taneko, ‘Tala-tala wamikti, mog so'o to'op taukang,’ aro Allahri nimi sumbahiog. Sumbahiogti tam kareplamogti, ‘Nimi mog so'o a'ero-a'ero wamukangne, tane nhon, tane nhon wamukang,’ aro tam karebaogti pipsiog. Apna, ‘Nimi ane ko'o eneag wamlul, nen nimi li ko'o nhon likto pilul,’ aro tam karepto pibog. 27-28Allahri tam karepto pibog nena, ‘Nimi na whing elamneikti nanag sae nginikto, “Yepsi,” aro mololamnukang to, kom to,’ aro Allahri undo unuaog. A'uni yabo nimi nubunangdi sipto seplamekti, ‘Nu mog so'oag nimi eldi mangaro likto pipsiogne wamap. Ot elap ma'ap tangto uropneag agha kamag uro lebe aro ulamap,’ aro sipto seplamek. Nu mog so'oag wamapne el wamlange weag wamla kom ane sembe, sae nginikto ulamebeba, el nunag lag talul.

29Nu mog so'oag nimi Allahri mangaro likto pipsiogne wamap ane sembe nimiri, ‘El nia mangkina sumbahiogne poneko sunumna sumbaukap,’ sembaheng kom. Leng-leng aroba emasap, perakap, wali kirikap tobi agha nimi saeri walia sunuroba taneko el memne poneko sunumna sumbanep kom. 30-31Nu mog so'oag nimi limituk uro wamuburi, ‘Nia mangkina sumbahiogne poneko sunumna sumbaukap,’ aro lebe arop komne agha sunulamubu. Sunulamubunge neneko sembe samenag Allahri, ‘Sin ekondi ulamangne unulamik,’ sembaogti lipsiog. Samenag lipsiog aghana, wene Allahri yubu pibog nena, ‘ “Sum eneko uanun,” sembamsinge sunsunum uro, nimi nhon wepto sekitsinge sae pere agha nimi ni mog so'oag uropne tam ua uropne wana porog uro tam karebanun,’ aro yubu pibog. Wene aro yubu pibog ane sembe, eldi nimi ni tala-tala wamang nimiag aruklamsil nena, ‘Samenag malia seneragto ulamlumne lipsimundi, nari senenne saelbalulom,’ aro aruklamsil. ‘Tam karebalul nimi nhon wepto sekitsi,’ seogne poneko sembe, ‘Nimi ni sik sembaukang,’ senenneag agha Allahri nimi teptopne nusamag agha el poneko kamag nembaog,” aro ambatsiog.

32“Nimi teptopne nen kamag tanep,” aro Paulusti ambatsiogpa, ka'ebaek nimi taneko pogtaek. Nimi nenne tanekori Paulusag og sobaek aghana, nen nimiri, “Nangkae, wene selamne nene sembe nen lepmenba, nu ka'ebaukap,” seek.

33Wene seekpa, Paulus yubu tam kareptop nimi winil dalamekag aneko laploa lambaog.

34Wene alamekag agha ka'ebaek nimi etpare Paulusag sip talamekti, wene aro ambatsiogne sembe Yesusag sikne aro seneraglamek. Sin Yesusag sikne aro seneraglamek nimina, Areopagus yimag tam kareptopne nhon sina Dionisiusap, kelabo nhon Damarisap, nimi etpareap sik senelamek.

Currently Selected:

Pogsiog Nang 17: kklKOS

Highlight

Copy