Pogsiog Nang 18

Paulus as Korintus piogha

1As Atena olog wameka, Paulus poneko Atena laplobi agha as Korintus piog. 2Korintus piogti, Yahudinge nhon si Akwila haiptarek. Akwila poneko mog so'o Pontusne wamogti, as Roma sekelingkiog. Aghana Roma nimi salehiropne sina Klaudius yubu sia leropne nubunge ponekori, “Yahudi nimi as Roma ane wamseng kom,” aro as Roma agha yag lambahiog. As Roma agha yag lambahiogpa, Akwila elkel Priskilaap as Roma mog so'o Italia wamog as laplobi agha as Korintus yarekti, Paulusap haiptaek. 3Paulus poneko sin wamdekag piogpa, sin elkel ela'ange abeneko babe, “Nu awe nikne, lebe aroba kon mektopne agha kalun ae wetnero sorop nimi wamap,” aro sin phenderi aeag nhon wamekti, awe nhon tolamek. 4Wamekti awe nhon tolamekti, Sabat sum yalamog tanena, Paulus ponekori sop-sop Allah yubu lero winirop aeag wa'alamogti ambarelamsiog. Ambarelamsiogti Yahudi nimiap Yunani nimiap, “Yesusag sikne aro seneraglamlulom,” aro olnoro ambarelamsiogpa sindi, “El tahabe,” aro hailamekne eldi tibin nenero ambarelamsiog.

5Allah yubu ambarelamsiogti wamogpa, Silasap Timotiusap mog so'o Makedonia agha yarek. Yarekpa Paulus ponekori ag wetnero tolamogne libogti, “Allah yubu nimi ambatsinunne aghabog uanun,” aro sol wali, wali uro ambarelamsiog. Sop-sop Yahudi nimi sikne lag nenero ambarelamsiogti, “Yesus poneko Allahri wepto poghol aogne Kristus wamla,” aro ambarelamsiog. 6Paulusti ambarelamsiogpa, Yahudi nimi tanekori el san tilipto yubu toraplamekpa, Paulusti ag enektopne leng-lenga wamogne po'oro pelengkaog. Enektop ag po'oro pelengkaogti, sinag yubu lelamogti, “Allahri opsileba, a'undinge eneng a'undinge usoghag timbale! Allahri awe nari saeag nembaneogne tolamnari, Yesus sembe a'unag samen yubu ambarelamsin ane sembe, nari walinge uanepne uitna. Wene anea lambaneri, Yahudi sisa kom nimi mog so'o yog nimiag ambarel pihinun,” seog.#Matius 10:14; Markus 6:11; Lukas 9:5; 10:11

7Wene seogti, Yahudi nimiri Allah yubu lero winirop ae anekoa lambaogti, ae anekoap tipto sorobag ae wamogneag palamog. Ae ngainge si Titius Yustus wamogne poneko nimi sisa Yahudinge kom aghana, Allah omeklamogne wamog. Titius ponekori aeag alniro wa'alamogti, Paulusti Yesus sembe nimi ambarelamsiog. 8Ambarelamsiogne ka'elamekag agha Yahudi nimiri Allah yubu lero winirop ae saleropne si Krispus poneap, eldi ae lom nimiapti nu Saelba Uhiropne Yesusag sikne aro wana palilamek. Paulusti ambarelamsiogne sik senelamekti wamekpa, Korintus nimi Yahudi sisa kom nimi maikno Paulusti Yesus sembe ambarelamsiogne ka'elamekti, sikne aro wana palilamek. Yesusag sik senelamek nimi taneko maghag pelengkahiek.#18:8 Paulusti nimi nhon-nhon maghag pelengkahiog aghana, eldi yepsirop nimi wamekneri maiknoro nimi maghag pelengkahiek (1 Korintus 1:14-16).

9Ik nhon sum inipnag Paulus malamogpa, lenda saog uro haing uamna kwelekamna senenag agha nu Saelba Uhiropne ponekori yubu ambarog. Paulusag yubu lelamogti, “Log kom uro ambarelamsululam! Yubu kom taheng kom! 10Nari an paiangken. Nimi naringe as eneag nimi maikno wamang ane sembe, tane wapmenne nimi nhondi babe yo uro saelbaghukang kom. Ona babe opkukang kom,” seog.

11Wene seogpa, Paulus poneko as Korintus wamogti, Allah yubu ambarelamsiogpa, hengkun nhon wal no'opbare taog. 12Hengkun nhon wal no'opbare taogpa, nimi nubunge si Galio, “Mog so'o Akhaya saelbamlul,” aro towalengkaek. Akhaya saelbamsiogpa, sin Yahudi nimi taneko ma'ap taekti, “Paulusag tam ikinne pibukap,” aro yubu tam lelekto kemero kareptopne ponekoag poa piek. 13Poa piekti, yubu lelamekti, “Nimi eneri ekel ina Allah yubu amoro, ‘Undo-undo Allah omeklamlulom,’ aro ambarelamsil aghana, nu Yahudi nimi nunisag Musari aruksirop yubu ingisapto ambarelamsil,” alamek.

14Wene alamekpa Paulusti, “Pelep tangtop yubu samoro lemnun,” aro ulamoghag agha, Galio ponekori Yahudi nimiag yubu lelamogti, “A'un Yahudi nimiri tam payalom nena, ‘Nu saelbamsiang nangdi samenag yubu sia pibekne phibao,’ aro lemnepne wamsoba, ologne to, nubunge to payahom tanena, ‘Wali payaang,’ aro tam karebahane. 15-16Aghana tam payalomne nene yubu kiki sembe, nimi si sembe, samenag aruksirop yubu a'un Yahudi nimiri saelba ulamlomne sembe leplomdi payalom. Ane sembe tam nene nari karebanun kom. A'undam nimiri tam karebalulom,” aro Yahudi nimi taneko yubu tam kareptop aeag agha yag lambahiog. 17Yag lambahiogpa, nimi tanekori Yahudi nimi nhon sina Sostenes saelbaekti, yubu tam kareptop ae ina siramag agha olamek. Sostenes poneko Yahudi nimiri Allah yubu lero winirop ae saelba uropne wamog aghana, Sostenes olameka ipsiogti, Galio ponekori yubu olog lebog kom.

Paulus samoro as Antiokhia Siria so'oag samoro yaogha

18Paulus ik maiknoro Korintus wamogha elkabo Yesusag sikne aro seneragtop nimi tanekoag, “Mog so'o Siria simbik pinun,” seogti mag alip toman agha palamog. “Mag alip toman pinun,” aro as Kengkrea piogti, Yahudi nimiri ulamekne sunsunum uro, “ ‘Allah arukna sol wali walinge wamnun,’ aro keknep uro yabalamne abeneko, hong kareptop koma wamnea, wal nenekoag hong karebanukang,” aro salag pibogne sunsunum uro hong karebaek.#18:18 Paulusti salag pibogne anena, “Nazar,” salag alameka saog uro pibog (A'iliroba 6:1-21). Paulustina, “Allahri yeplamneleba, ‘Nana Allah Eldamne arukna wamna,’ senenne kekneba pimnun,” sembaogti ik maiknoro eldi usog hong karebaog kom. “Allahri yepnelul,” aro hong kareban koma ulamogne anena, “Allahri Paulusag salag pibogne, ‘Opkukang kom,’ seogne sunsunum uro sembaogti ulamog,” sembanep (Pogsiog Nang 18:10). Hong karebaekpa, palamoghag agha Priskilaap Akwilaap nhon palamekti, 19as Efesus piek. Piekti Priskilaap ela'ange Akwilaap abenekori, “Nu tane wamnunam,” serekpa Paulus ponekori, “Nen tipto palamnun,” seog. “Palamnun,” seog aghana, Yahudi nimiri Allah yubu lero winirop ae as Efesus wamog aeag aneko wa'ina Yahudi nimi tanekoag Yesus yubu ambatsiog. Ambarelamsiogti sindi, “El tahabe,” aro hailamekne eldi tibin nenero ambarelamsiog. 20Tibin nenero ambarelamsiogpa, Yahudi nimi tanekori Paulusag mololamekti, “An nunap olog tane wamebea,” aro molbaek aghana Paulusti, “Kom,” seog. 21“Kom,” seog aghana, “Pinun,” aro kiplamsiogti, “Amik Allahri nanag, ‘Wali saombalulam,’ aro ambatnele tanena, amik a'unag samoro yanun,” aro kipsiog. Kipsiogti as Efesus aneko laplobi agha mag alip toman agha as Kaisarea sip piog. 22As Kaisarea sip piogti, mag abolag sekel piogti, “Yesusag sikne aro winil dalamang nimi kipsinun,” aro Yerusalem#18:22 Lukasti Yunani yubuag, “Waelbaogti kulukul aog,” aro mome toro pibog aghana, as Yerusalem waelbaogti, kulukul aogne sembe mome toro pibog. Kaisarea agha Antiokhia piropne sembe, “Kulukul aog” senep kom. waelbaogti kipsiog. Kipsiogti as Antiokhia Siria so'oag wamog as aneko kulukul aog. 23As Antiokhia aneko pina wamogha, lanaro kemeroa yabalamsiogti, mog so'o Galatia ina agha mog so'o Frigia ina agha ni kemelamsiogti, Yesus yubu ka'ero neleplamek nimi wana mikip nenelamsiog.

Apolos as Efesus wamogha

24Paulus nimi wana mikip nenero poa tongolamsiogpa, Yahudinge nhon si Apolos as Aleksandria mangkaekne poneko as Efesus yaog. El yubu lena babe, Allah yubu mome toro pairoba babe yabo telekto wali uro elne yaog. 25Apolos el uro wamog nena, nu Saelba Uhiropne Yesusti ina pa'abaogne sembe nimiri samenag elag tipto amoro ambarekpa, eldi sol wali, wali uro Yesus sembe yeng uro sik uro ambarelamsiog. Sik uro ambarelamsiog aghana, ot samen Yohanesti maghag pelengelamsioghag agha ambarelamsiogne sembe aghabog Apolos el uro wamog. Amik Yesusag sikne aro wana palirop nimi maghag pelengkahinepne sembe ekon uro wamog. 26Yahudi nimiri Allah yubu lero winirop aeag aneko Apolosti log kom uro alniro nimi ambarelamsiogha Priskilaap Akwilaapti ka'ebarekti, sindi poa sindi aeag pirek. Pirekti, yubu kiki telekto ambarelamdekti, “Allahri Yesus poghol aogneri mog so'oag nimi enero poa Allahag samoro payalamsil ina pa'abaogne undo,” aro ma'aro ambattek. 27Apolos, “Mog so'o Akhaya pinun,” aro ulamogpa, elkabo Yesusag sikne aro seneraglamek nang as Efesus wamek nangdi, “Wali leplam,” aro wana mikip nembaek. Elkabo tanekori mome toro sikinkabo Yesus yubu ka'ero neleplamek nimi mog so'o Akhaya wamek nangag, “Nungkae Apolos a'unag yaleba, wali kiplulom,” aro mome toro pibek. Sikinkabo Akhaya so'oag wamek nimi taneko samenag Allahri wana yorolamsilneag agha Yesusag sikne aro wana palilamek. Yesusag wana palilamek nimi Akhaya wamekag Apolos piogti, sin maiknoro yeplamsiog. 28Apolosti sin yeplamsiog nena, Yahudi nimiri, “Yesus Allahri poghol aogne kom,” alamek nimi tanekoap, Apolos ponekoap yubu mikip uro nimi whingag lel dalamek. Sinap lel dalamekag agha, Apolosti yubu ambarelamsiogne nimiri wali ka'elamek. Apolos ponekori Allah yubu mome toro pibogne lelekto lag nenero ambarelamsiogti, “Yesus poneko Allahri wepto poghol aogne Kristus wamla,” aro ambarelamsiog.

Currently Selected:

Pogsiog Nang 18: kklKOS

Highlight

Copy