Yohanes 15

Yesusti, “Na anggur tam sikne wamna,” aro ambatsiogha

1Nen Yesusti yubu lelamogti, “Na anggur tam sikne wamnaba, Nani anggur mo'oropne poneko wamla. 2-3Nanag agha wana maurop kom kal sae ni wamlenge eldi karepto toboghalul. Nanag agha wana maurop kal sae wamlenge, ‘Nen wana maikno maubalul,’ aro malinge wepto karebalul. Nari a'un ambarelamsin yubu toman agha sembenga a'unag wamogne wepto lanalamnoba, wana maubanep nimi taomdi wamlom. 4A'un nanap nhon ya'ag ma'ap tangto wapmunba, na babe a'unap nhon ma'ap tangto ya'ag wamukap. Kal sae aneko mori wana maubanep kom. Kal sae yo'oag ma'ap tangto pongkale kom tanena, wana maubanep kom. Ane saog uro a'un babe, a'un nanap nhon ya'ag ma'ap tangto wapmun kom tanena, a'un babe wana maubanep kom.

5Na anggur tam saog wamnaba, a'un kal sae pongoropne saog wamlom. Nanag ma'ap tan koma a'un mo wamsom tanena, a'undi sa'a-sa'a ulamnep kom. Ane sembe nimi etne nanag ya'ag ma'ap tangto wamleba, na elap ma'ap tangto wamneme taneogna, nimi eneko wana maikno maubalul. 6Nimi nanag ya'ag ma'ap tangto koma wamle nimi enekona, anggur mo'oropne ponekori toboghalul kal sae saog wamleri, ulne talul. Undop kal sae taneko nikag wimbaleri, aukag taplul. 7A'un nanag ya'ag ma'ap tangto wapmunba, nari ambarelamsin yubu a'undi wanaag meptaleba, ulapmun tanena a'undi, ‘Allahag molbahane,’ aro seneraglapmunne molbalulom. Molbamunne tatsilul. 8A'un undo nari yubu ka'ero neleptop nimi wapmundi, wana maikno maulapmun tanena, Nani paliag uroba kiptopne lag talul. 9Naniri na o'ona sembamnel saog uro nari babe a'un o'ona sembamsin. A'un nari o'ona sembamsinneag mep tangkapmundi wamlulom. 10Naniri nanag aruklamnel yubuag nari nelepto ulamnari, eldi na o'ona senelamnelneag meptangto wamna. Ane saog uro, nari a'unag aruklamsin yubuag a'undi babe nelepto ulapmun tanena, nari a'un o'ona sembamsinneag meptangto wamlulom. 11Ni aneko nari a'un ambarelamsin andarina, na awi ulamnelne neneko a'unag wamleba, a'undi wanaag awi uahinepne neneko a'unag teknero wamlul. 12Nari a'unag aruksirop yubu palilamnangena ane. Nari a'un o'ona sembamsin saog uro a'un mamun o'ona senel dalamlulom. 13Nimi o'ona senehinne nubu sirikne wamlangena, nimi nhon, ‘Tebanun,’ aro elkabo sembe tiro tebanep tanena, o'ona senehinne nubu sirikne phelektopne orange babe wamnep kom. 14A'undi nari aruksirop yubu ambarelamsinne saelba ulapmun tanena, a'unna na nangkabo wamlomne lag tangto yabalamlul. 15Nimi arukna nhondi ili ponekori, ‘Uanun,’ senenne ekon pagha aruksirop yubu mo sunsunum uro awe torop. Aghana na Naniri ambatneogpa, ka'ebahinge ni aneko a'unag tibin nenero ambareamsin. Ane sembe, nari a'un sembe, ‘Nari arukna,’ aro engelamsin kom aghana, nari a'un yopto engelamsin nena, ‘Na nangkabo,’ aro engkamsin. 16A'undi na wepnelum kom aghana, nari a'un wepsisi. Wepsisiri a'undi sa'oag yubu palilamsin nena, ‘Pimundi wana maikno maulamlulom,’ aro a'un wepto sekililamsin. ‘Pimundi ka'eseptanep kom wana ya'ag uropne maulapmun,’ aro sekililamsin andarina, na siag kekhaekto wapmunneag agha Naniag mololapmunne a'unag tatsilul. 17Nari aruksirop yubu a'unag ambarelamsin nena ane. A'un mamun o'ona senel dalamlulom,” aro Yesusti ambatsiog.

Mog so'oag nimiri Yesusap ma'ap tangtop nimi hausag senelamsukanga

18Yesusti nen tipto yubu ambarelamsiogti, “Mog so'oag wamang nimiri a'un hausag senelamsiik tanena, a'un el uro wamlulom nena, na samenag mog so'oag nimiri na sembe hausag senelamneekne el uro wamlulom. 19A'un mog so'o eneag nimiri seneragto ul piropneag neleptop nimi wamsom tanena, mog so'oag nimiri a'un babe, ‘Nuri nimi,’ aro o'ona sembahiseng. Aghana nari mog so'o eneag nimiag agha a'un kiliro wepsisiba, wene a'unna, mog so'oag nimiri seneragto ul piropneag neleptop nimi kom. Ane sembe mog so'oag nimiri a'un sembe hausag senelamsiang. 20Nari samenag a'unag, ‘Nimi arukna urop nimi nhonna, ili phibom agha nubu sirikne urop kom,’ aro ambatsino yubu eneko seneragto el wamlulom.#Yohanes 13:16 Na, ‘Seklebalul,’ aro unerop nimi wamang tanena, a'unag babe, ‘Seklebaukang,’ aro ulamsukang. Nari ambarelamsino yubu salero ul pirop nimi wamang tanena, a'undi ambarelamsimun yubu babe sindi salero ulamukang. 21Sin na pogneogne poneko sembe sin ekon wamang. Ekon wamang ane sembe, a'unna nari siag kekhaekto wamlomne sembe ni aneko a'unag ulamukang. 22Na sinag yingkina nari ambarelamsin yubu aneko ambatsisene kom tanena, sindi malia uropne sinag tam taho kom. Aghana yanori ambatsino ane sembe, sindi malia ulamangne sembe sindam nimi pelebel tanan yubu lemnepne wenena orog wamla. 23Nimi etneri na hausag senerop tanena, nimi enekori Nani babe hausag senelamla. 24Kekneba ora nimiri uanep komne sin nusamag agha nari uahane kom tanena, sindi malia uropne sinag tam taho kom. Agha wenena, nari kekneba ulamnonge sindi ililamongdi, nanap Naniap sembe hausag senelamsiang. 25Undo unulamang aghana, sindam nimiri, ‘Aruksirop yubu nene salero ul palamukap,’ senen yubuag nimi nhondina, ‘Tam orogha nanag mo hausag senelamneang,’ aro mome toro pairopne wamla.#Sepna 35:19; 69:5 Yubu ene sunup tanepne wene uro yabalamla.

26Nari a'un sembe tiro yebelan ahinne Nani ua urobag agha pogholaneba, Nani ua urobag agha lamba yaleri, El Yame Walinge sikne agha tibin uro ambatsiropne enekori na sembe lag nenero ambarelamsilul. 27A'un nanap alnirobag agha nhon wamubu paghabog, wene nhon wamap ane sembe, a'undi babe na sembe sikne agha lag nenero nimiag ambarelamsululom,” seog.

Currently Selected:

Yohanes 15: kklKOS

Highlight

Copy