Lukas 14
14
Yesusti Farisinge nhondi aeag yan sae noro naiktop nimi wali nembaogha
1Ik nhon sum tektek paptop sum Sabat sum taogpa, Yesus Farisi nimi nubungeri aeag, “Kwaneng nhon tukap,” aro piog. Aneko piogpa, nimiri Yesus wali uro keme nelbamek. 2Keme nelbamekti wamekpa, Yesus pukamogha whingag nimi nhon yan sae noro naiklamogne nhon pukamog. 3Pukamogpa Yesusti Musari aruksirop yubu amohirop nangap, Farisi nimiap tanekoag yubu yangaro hailamsiogti, “Nimiri Musari aruksirop yubu sunsunum uro uanep nena, Sabat sum tektek paptop sum eneko nimi naiktopne wali nembahinep to, kom to?” aro haibahiog.
4Wene aro haibahiogpa, Musari aruksirop yubu amohirop nang tanekoap, Farisi nimi tanekoap yubu kom taek. Yubu kom taekpa, Yesusti yan sae noro naiklamog nimi eneko sae saelbamogti, wali nembaogti, “Hae, wali pululam,” aro ambarog.
5Nimi enekoag wene, “Wali pululam,” seogpa piogpa, Yesusti nimi wamek nimi tanekoag hailamsiogti, “A'un wamlom nimi agha Sabat sum tektek papto wamnep aghana, a'undi mabo to, a'undi pham sapi to mag so'o lom walirobag eba timbanep. So'o lomag timbaho tanena, a'undi peket sum eneko babe a'undi me to, a'undi pham to sae kiliro lambitnep kom te?” aro haibahiog.
6Wene aro haibahiog aghana, Yesusti lebog tam eneko sembe samoro yubu lebek kom.
Yesusti, “Andamne mombolag nenep tangto wana mamleba, ora nimi paliag nenero walia ulamsululom,” seogha
7Yesus Farisi nimi nubunge ponekori aeag pukamogti kemelamsiogpa, Farisinge ponekori, “Nari aeag yalulom,” aro yopsiog nimi tanekori, “Ot waliag alikinag puknun,” aro wepto ulameka kembahiog. Ane sembe eldi yubu nhon sin ni tanekoag sunuro ambatsiog. 8Yubu ambarelamsiogti, “Nimi nhondi anag, ‘ “Kelabo tomnun,” aro kwaneng sani yobabeba yalulam,’ aro an yoplangkeik tanena, pimendi waliag alikinag pukseng kom. An waliag alikinag aneko pina pukapmen tanena, an ekonag an phelektopne nimi nubunge nhon sindi, ‘Yalulam,’ aro yobamikne amik yaleri, waliag alikinag aneko yingkina puknepne nhon wamnep. 9Undop pagha tanena, an samenag aneko pina pukapmen aghana, sani ngainge ponekori anap nimi nubunge ponekoap a'un ni phende yobamsiik nimi enekori anag yalul. Anag yaleri yubu ambarelangkeleri, ‘Nangkae, an puknebag weamapne ane kom. Ae usa puna ane, “El nimi nubunge pulalul,” aro weamap ane sembe, el kolbalulam,’ selul. Undo wene seleba, an ali lelem nimi liliag wailag sip pul pululam. 10Ane sembe, ‘An yalulam,’ aro yopkeik tanena, an pimendi nimi wailag sip sirikag pukapmen andarina, sani yolamika ngai nimi eneko an ipkeleri anag yalul. Yaleri anag ambarelangkeleri, ‘Nangkae, an yamendi ae usa waliag alikinag ane pulae,’ selul. Abene agha nimi ni wamika whingag agha an paliag nenero kipkelul. 11Nimi etneri eldamne paliag nenep tale tanena, nimi eneko mombolag talul. Nimi etneri eldamne mombolag nenep tale tanena, nimi eneko paliag talul,” aro Yesusti ambatsiog.
12Wene aro ambatsiogti, Yesusti ae ngainge ponekoag ambarelamogti, “Andi, ‘Kwaneng nikag tukap,’ aro yo'obi to, inipnag to nimi yoplamsimen tanena, andi ankabo og, andi nimi og, andi ando yabo og, andi anipsabo og, andi ae peram nimi saeagha yag nimi aghabog yopsiseng kom. Andi sin yopsimendi, andi uamenne sae paliro saog uamenba, sindi babe andi uamenne lunuropne anag uaukang. 13Ane sembe andi, ‘Sani nikag tukap,’ aro nimi yoplamsimen tanena, andi nimi yopsululam nena, saeagha orog nimiap, nong samnaiktop nimiap, yan mali nimiap, haing urop nimiap agha yoplamsululam. 14Andi sin nimi undop nimiag walia ulamsimenne sindi anag nen lumbanep kom saog wamik aghana, andi sinag uamenne sembe Allahri anag walia uagheleba, wali wamlulam. Andi uamenne lunurop saogne neneko Allahri nimi sik nimi kamag nenelamsile sum eneko kamna tatkelul,” aro Yesusti ae ngainge ambarog.
Sunumna sani nubunge yoropne sembe Yesusti yubu likipto ambatsiogha
(Matius 22:1-10)
15Sin nhon Yesusap kwaneng nikag telamekag anekoa, Yesusti yubu ambatsiog yubu ka'ebaog nimi nhondi yubu lelamogti, “Sin amik sum Allahri nimi mog so'oag nimi saelba uhiroba lag tale sum eneko nikag kwaneng telamik nimi tane wana awi uro wali wamukang,” seog.
16Wene seogpa, Yesusti samoro nimi enekoag yubu lelamogti, “Ik nhon sum nimi nhondi nimi maikno, ‘Yalulom,’ aro ambatsiogha sunsunum uro sani nubunge yobaogti, nimi yopsiog. 17Yopsiogti kwaneng ni yoro tengkongkia kwaneng alniro teneba peramag, ngainge ponekori eldi arukna arukto poglamogti, ‘Nari samenag, “Yalulom,” aro ambatsino nimiag pimendi, “A'un ni yalulom. Ni yoro webapti, yobol alamsin,” aro ambatsululam,’ aro poghog.
18Wene aro ambatsiog aghana, sin nhin, ‘Yalulom,’ aro yopsiog nimi tanekori seneraglamekti, ‘Nu yaukap komdi, wanaag waro yo sembahileag,’ aro sin nhin tanekori wene alamek. Nimi nhondi sani ngainge ponekori arukna anekoag yubu lelamogti, ‘Nari weneog awe so'o nhon kamna kapto tomnari kemel pinun. Kemel pinundi, “Yane komne sembe nanag mali sembaneheng kom,” aro ambatlulam,’ seog.
19Wene seogpa, el arukna yog nimiag piogti, ‘Yalulam,’ aro yobog. Nimi phendepne enekori, ‘Na sumene og pham sapi sa'obare kamna kapto tomnari wene, “Pham sapi taneko kemel pihineri mipnun,” aro palamna. “Na yane komne sembe nanag mali sembaneheng kom,” aro ambatlulam,’ seog.
20Wene seogpa, el arukna aneko wilindipneag yobol piog aghana, nimi wilindipne enekori, ‘Na weneog kelabo toro an. Ane sembe na yanep kom,’ seog.
21Sindi wene seekpa, el samoro pina ili ponekoag ambarelamogti, ‘Sinna undop-undopti ta'ap seang,’ aro ili poneko ambarog.
Wene aro ambarogpa, ka'ebi agha wanaag yo senelamogti, eldi arukna anekoag yubu lelamogti, ‘Elemag ina toman pimendi, as lom ina ero nimi yopsululam. Yoplamsimendi nimi saeagha orog nimiap, nong samnaiktop nimiap, nimi haing uhirop nimiap, nimi yan malingeap poa yahilulam,’ aro ambarog.
22Wene aro ambarogpa, eldi arukna anekori enel pihina samoro ili ponekoag payingkina lebogti, ‘Nai andi, “Enel phululam,” selamne saog uro enel pihin aghana, nen kolo wamla,’ aro ili poneko ambarog.
23Wene aro ambarogpa, ili ponekori arukna anekoag yubu lelamogti, ‘An pimendi nimi inaag wamik nimiap, as abolag paiag wamik nimiap emba yahimen andarina, nari ae eneag teknebaukang. 24Sik uro lelamna! Nimi nari samenag, “Yalulom,” aro ambatsinoba, yaong kom nimi taneko nari kwaneng tukang kom,’ seog,” aro Yesusti sunumna tol pina ambatsiog.
Yesusti nimiag, “Nia a'undi saeagha lipsimun taneogna, nanag yubu ka'ero neleplamnululom,” aro ambatsiogha
(Matius 10:37-38)
25Yesus ina palamoghag nimi maikno el amik nelepto palamekpa, Yesusti sin tangaro kembahiog. Kembahiogti yubu lelamogti, 26-27“Nimi etne nanag yalamik aghana, ili ilinap, eldi kelap eldi maboap, eldo eldo'el ilipsae ilipsa'elap, laplobi agha sae lipsinep kom tanena, nimi eneko nanag nelebanep kom. Eldamne sembe babe seneragtan koma na o'omne nenero neleplamnele taneogna, nanag yubu ka'ero nelepnerop nimi tanep. Nimi etneri nanag neleplamnele aghana, eldamne sembe sembongkia, ‘Kalag sipto ya'ag omneikagti, Yesusag nelepto siptop kal nene pabalamnun kom,’ sembale tanena, nari yubu ka'ero neleptop nimi tanep kom.
28Wali uro seneraglapmun taneogna, nanag neleplamnululom. Sunumna sumbatsinun. A'un tane wamlom nimi agha nimi nhondi, ‘Ae wenge nhon sopso waelbaukap,’ senerop tanena, ‘Nuri ae ene soroba tobukapne sembe kamna kaptoba etpare tenep,’ aro a'ilbanepneog wamla. 29-30Wali uro kamna a'ilban koma alniro sobaho tanena, eldi saeagha ni orog tahoba, aeog iklobongkia kwema kamna kapto tomnep komdina lilopsiso. Undop pagha tanena, nimiri kemelamsengdi, ‘Nimi ene ae aneko alniro aeog iklobongkia komopto soban koma lilopsio,’ alamsengdi og sobanep.
31Nen sunumna nhon babe sumbatsinun. Nimi yubu sia leropne ponekoringe yin salerop nang teng-tengne sa'obare saog saelbahinep. El aisanang, ‘Mal tabaukap,’ arop nimi enekoringe yin salerop nang teng-tengne lin tarabare saog saelbahinep. Tanena yin salerop nang teng-tengne sa'obare saog saelba uhiropne ponekori seneraglamnepti, ‘Mal tababeri, el yin salerop nang teng-tengne lin tarabare nuri luknubahinep to, kom to,’ aro seneragnepneog wamla. 32Wene aro seneraglamsori, ‘Nuna nimi teng ologti, nu sindi oro luknubahinep saog wamap,’ sembaho tanena, aisanang anam weag agha yalamsenga whingag mal pogna nang pogsinep. Pogsisoba ambarelamsisengdi, ‘Huahaberi mal mu seberi, nikag ma'ap taukap?’ aro hairo ambatsiseng. 33Ane saog uro, nari lelamnange wali uro seneraglapmundi karebalulom. A'un anabiag agha nimi etneri nia mangkina laplobi agha sae lipsinep kom tanena, nari yubu ka'ero neleptop nimi tanep kom,” aro Yesusti ambatsiog.
Nimi etneri, “Yesusag nelebanun,” arop nimiag Yesusti wenero garamag tol pina likipto ambatsiogha
(Matius 5:13; Markus 9:50)
34Yesusti nen tipto ambarelamsiogti, “Garam anena sao wali aghana, emem arop kom saog tale tanena, nimiri sa'a agha nen samoro garam sao wali nembanep komdi, teba'en sembanep. 35Pham ti yaroba babe, ‘So'o sukubalul,’ aro wen urumna pimnep aghana, garam emem arop kom saog tale tanena, ‘Wen urumna so'o sukubalul kom,’ aro mo toboglopnep. Aori ka'ebalomne nene nimi niri seneragto saelbamlulom,” aro Yesusti likipto ambatsiog.
Currently Selected:
Lukas 14: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
