Lukas 16
16
Tupne saeagha o'oro paia urop nimiag sunumna tol pina Yesusti ambatsiogha
1Yesusti elag yubu ka'ero neleptop nimiag ambarelamsiogti, “Nimi nhon saeagha tupne nhon wamog. Tupne ponekori eldi saeagha maikno wamogpa, el yeptopne nhonag, ‘Nari saeagha wamlange yae o'oro paiamlulam,’ aro sekirog. Sekirogpa o'oro paia ulamog aghana, ora nimiri tup nimi enekoag, ‘Andi saeagha maikno eldi saeag pibomdi, “Yae o'oro paiamlulam,” seom aghana, nimi enekori andinge saeag uropne talupto salik-malik nenelamlaba, kom talamla,’ alameka iliri ka'ebaog.
2Wene alameka ka'ebaogti, eldi aba saeagha o'oro paia ulamogne poneko yobogti hailamogti, ‘Nimiri yubu lelamongdi, nari andi saeag pimnonge, “Salik-malik uro orog nenelamla,” alamongba ka'ebanonge nene sik te?’ aro haibaog. Wene aro haibaogti, ‘Andi nari aba saeagha o'oro paia uro kareploroba mome toro palilamlamne neneko a'iliro mome toatnemendi, lambamendi naringe saeagha paia unne wamlulam kom,’ aro ili ponekori wene seog.
3Wene seogpa, eldi aba saeagha o'oro paia ulamogne ponekori seneraghogti, ‘Yaghe, nari wene sa'a agha uanun? Nari nai saeagha ngainge ponekori, “An nen wamlulam kom,” senual. Wene seleri, na sae limnele tanena, na awe wel tonne nong mikip komdina, nimiag molom-molom ahinne babe na ali. 4Ane sembe wene nari uanunne el tan. Nari uahisene andarina, na naniri nanag, “O'oro paia ualulam kom,” aro sae komopto lambitnele tanena, nangkabo maikno wamikari na sindi aeag toro pimnukang,’ sembaog.
5Wene sembaogpa, ora nimiri sikini ponekoringe saeag agha tobekti, anam lunurop kom nang babe wamek. Sin anam lunurop kom nimi taneko agha tupne saeagha o'oro paia uropne ponekori nhon-nhon yopsiog. Nimi samenagne yobog nimi enekoag hailamogti, ‘Na nairinge saeagha andi anam lunurop komne etpare wamla?’ aro haibaog.
6Wene aro haibaogpa, nimi enekori, ‘Eldinge agha nanag wamlange kal zaitun wana lolterop mag longoro liroba teng tombare saog uro anam lumbamna kom,’ seog.
Wene seogpa, o'oro paia ulamogne ponekori, ‘Samenag teng tombare agha saekag lebobo aghana, hae keyagman nembanun. Elem uro pukapmendi, teng phende agha mome toro pipmen tanena, na babe saekag lero mome tomnun,’ seog.
7Wene seogti, nimi phendepne enekoag babe, ‘Na nairinge saeagha andi anam lunurop komne etpare wamla?’ aro haibaog.
Wene aro haibaogpa, nimi enekori, ‘Eldinge agha nanag wamlange kwaneng roti wana gandum kau liroba teng tombare saog uro anam lumbamna kom,’ seog.
Wene seogpa, o'oro paia ulamogne ponekori, ‘Samenag teng tombare agha saekag lebobo aghana, hae keyagman nembanun. Teng wilindi mome toro pipmen tanena, na babe saekag lero mome tomnun,’ seog.
8Wene seogti, mome toro pibogpa, ili ponekori amik mome toro pairopne nene kembi agha el taog. El taogti, ili ponekori, ‘Na saeagha maikno o'oro paia uropne ponekori sindi phelekto tatnepne neneko kom nembaori, wana hektopneag agha uao,’ seog.#16:8 Sindi samenag ul palamekne sunsunum uro, el tupne sae agha tolamek tanena, sindi amik sum samoro tatnepne, “Nen phelektopne samoro tatkenun,” aro mome toro palilamekti, tupne saeag agha tolamek. Ane sembe el o'oro paia ulamogne ponekori, “Keyagman nembaukap,” aro lebogne, “Phelektopne nenena kom nembaukap,” aro ulamog sembanep.
Kamna kaptoba o'oro paia uropne poneko sik komne aghana, ili ponekori el saeag uroba paia uropne poneko sembe, ‘Wana hektopneag agha uao,’ seog. Seog nena, kamna kaptoba paia uropne ponekori, ‘Nangkabo maikno nanag taukang,’ aro ulamogpa iliri, ‘Walinge uao,’ seog. Abene agha sin mog so'oag urop nimiri, ‘Na olog wali tanun,’ aro wali-waliaba mog so'oag wamlange agha sindam nimiri sikinkabo maikno nembahinep aghana, tibinag pirop nimiri undo unulamang kom. 9Abene agha nari a'unag wenero ambarelamsin nena, mog so'oag wana sengkwanektop nimi tup nenep tangtoba taneko a'un saeag wamla tanena a'undi, ‘Nangkabo nanag taukang,’ aro ulapmun andarina, ni mog so'oag wali-waliaba orog tanep sum eneko ya'ag uropne ponekori a'un lunuro eldi ua urobag ya'ag uro toro pipsilul.
10Nimi etneri tam ologne wali sik uro saelba urop tanena, tam nubunge babe, ‘Wali sik uro saelbalulam,’ aro eldi saeag pimnep. Apna nimi etneri tam ologne sik uro saelba urop kom tanena, tam nubunge babe sik uro saelba urop kom. 11Ane sembe mog so'oag uroba a'undi saeag pairopne tup nenep tangtoba a'undi sik uro sol wali uro saelbamnep kom tanena, Allahri tup nenep tangtoba taptopne neneko a'undi saeag piplul kom. 12Yog nimiri eldi aba a'undi saeag nenero, ‘Yae paiamlulam,’ senba a'undi sikne agha ulamsom kom tanena, nen a'unag, ‘Andinge hae ya'ag talul,’ aro tatsukang kom. 13Nimi nhon arukna wamnari, iliri awe tolamna tanena, eldi nik sum ili phendepneri yubu babe nelebahinep kom. Ili yabo ni phenderi yubu nik sum neleplamsiso tanena, nimi enekori, ‘Etne agha yepnun,’ aro ili nhon wanaag o'ona sembanepti, nhon karong sembanep. Awe nhondinge teba'en sembandi, awe nhondinge sol wali uro tomnep. Ane saog uro, a'undi mog so'oag tup nenep tangtoba sarekerepto neleplapmun tanena, Allahri awe tomnep kom,” aro Yesusti eldi yubu ka'ero neleptop nimiag ambatsiog.
Musari aruksirop yubuap, Allahri nimi Saelba Uhirobaap sembe Yesusti ambarelamsiogha
(Matius 11:12-13)
14Farisi nimi tup tanebari wana tohirop nimi taneko wamekti, Yesusti ni ambarelamsiogne ka'ebaekti, og soro yubu nebek. 15Og soro yubu nebek aghana, Yesusti ambarelamsiogti, “A'un Farisi nimiri na yubu neplamnelom nimiri a'undam nimi sembe, ‘Na sikne agha uropne nimiri imneikti el taukang,’ aro nimi whingag ul palamlom. Aghana a'undi wanaag seneragha ulamlomne Allah eldamneri el wamla. A'un mog so'oag nimiri, ‘Wali paliag sirik,’ seneropne Allahrina karong, ‘Elel,’ senelamla.
16Yohanes poneko anam yan komag, Musari aruksirop yubuap, Allah yubu silimu tiplamek nangdi yubuap saelba ambarelamsieka kekman Yohanes yaog. Yohanes yaog ko'o enekoag agha Allah yubu walinge Allahri nimi mog so'oag nimi saelba uhiroba sembe ambarelamsiapba, nimiri ka'elamsiang. Nuri ambatsirop yubu nene ka'ebi agha nimi ni wamang nimiri, ‘Allahri nu babe saelbamsilul,’ aro wepto nonoghol dalamang. 17Allahri imap so'oap sumbaogne hae amik sum kom tanep aghana, Allahri aruksirop yubu Musari mome toro pibog yubu neneag agha ologha babe kom tanep kom.
18Nengabo nhondi kelabo toamna agha kel eneko liropti, wendogne tol torop tanena, toropne ponekori ora nimiri kelabo haogha tohiropne ulamla. Apna nimi nhondi lalilamsile kel agha nengabo nhondi kel eneko tolamsil tanena, nene babe ora nimiri kelabo haogha tohiropne ulamla,” aro Yesusti ambatsiog.
Tup nimi nubungeap Lazarusap sembe Yesusti ambatsiogha
19Yesusti nen tipto sunumna sunuro ambarelamsiogti, “Nimi nubunge tupne nhon wamog. Eldi ag wangaro siliro pelengka urop ag wangalamogne mauk-terek saogne agha wirop ag wet purum winne agha wirop ag walinge wangalamog. Ag walinge agha wangalamogti, elag sop-sop kwema orogti, eldi wanaag agha sa'a-sa'a, ‘Nanag taho,’ senenne toro saelbamogti, yeng sirik uro ua ulamog. 20Yeng sirik uro ua ulamog aghana, nimi nubunge ponekori ae aram ina siramag aneko nimi nhon saeagha orogne si Lazarus, ‘Nimiag mololamsilul,’ aro nimiri pail palamekpa, meneng sisua kundiktopne wamog. Saeagha orogne poneko eldi konag sorogti seklero 21kwaneng yori, ‘Nimi nubungeri kwaneng pairo terobag agha telamleri, ubun pelengeloplea babe tehene,’ senelamog. Kwaneng yo wamogpa, ot kam agha yingkina eldi konag sorog tanekoag kamdi lolaglamek. 22Undo wamogti, saeagha orog nimi eneko tebaog. Tebaogpa Allah arukna imagnang malaikatti yingkina poa lebekti, nunisag Abraham imag wamoghag el kipto sombanebag poa piek. Poa piekpa, amik sum saeagha tupne nimi nubunge poneko babe tebaogpa, so'oag sikek. 23So'oag sikekpa, samen saeagha tup nimi teptop nimi ua urobag seklero wamog. Seklero wamogti, imag tiwalengelamogpa, nunisag Abrahamdi Lazarus poneko kipto somoro waliag nikag pukamdeka tiwalengkahiog.
24Tiwalengkahiogti el samen saeagha tupne ponekori yubu lelamogti, ‘Nani Abraham, na yareagti o'ona sembane. Na auk ogti seklelamnari, andi na yepnululam. O'ona sembanemendi, andi Lazarus ambatmenba, eldi sae tom maghag werebongkia lepleri, nari silimu eneag pelaghal anelul,’ aro yubu lelamog.
25Wene seog aghana Abrahamdi, ‘Name an el talulam. An teban koma wamomag sa'a-sa'a walingeog an saeag taoba, yeng uro wamom. Lazarusna mali uro seklero wamo aghana, wene elna wana aingniro ane pukamlaba, anna seklero wamlam. 26Apna a'un anabi nu anabiag kweren nubunge pairopne wamlaba, a'un ano wamlomne agha ane phiro yanep kom. Nu ane wamapne babe a'unag phiro yanep kom,’ aro wene seog.
27Wene seogpa, nimi samenag saeagha tup nimi enekori Abrahamag yubu lelamogti, ‘Nai, wene selam tanena, nari anag mololangkenne, andi Lazarus nari nai taptopne aeag wamlangeag poglulam. 28Pogmenba pileri, nari nangkabo lambare wamang nang taneko wenero ambatsile andarina, sin babe seklero unag na wamnaag ane yaikti, wamukang kom,’ aro wene seog.
29Wene seogpa, Abrahamdi samoro el samenag saeagha tupne ponekoag, ‘Sindinge saeag wamlangena, Musari mome toro pibog yubuap, Allah yubu silimu tiplamek nangdi mome toro pibek yubuap sindi saeag wamla. Sindi yubu mome toro pairop yubu nene ka'ebi agha el tanep,’ aro samoro ambarog.
30Wene aro ambarog aghana, el samen saeagha tupne ponekori samoro Abrahamag yubu lelamogti, ‘Nani Abraham, andi, “Mome toro pairop yubu mo ka'ebaik,” seheng kom. Nimi teptop nimi agha samoro pileri, ambatsile tanena, sindi malia senero ulamangne lipsiikti, Allahri senenne salero ulamukang,’ seog.
31Wene seog aghana, Abrahamdi samoro ambarelamogti, ‘Sindina Musari yubuap, Allah yubu silimu tiplamek nangdi yubuap ka'eban koma ul palamang. Wene ka'eban koma ul palamang pagha tanena, nimi teptop nimi kamag tangka sin ambatsilenge babe sindi sik sembaukang kom,’ seog,” aro Yesusti Farisi nimiag sunuro ambatsiog.
Currently Selected:
Lukas 16: kklKOS
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
