Lukas 6

Sabat sum nimiri uanepne sembe Yesusti o'oro tibin nembaogha

(Matius 12:1-8; Markus 2:23-28)

1Olog wameka, Yahudi nimiri tektek paptop sum Sabat sum taog. Sabat sum eneko Yesusap eldi yubu ka'ero neleptop nangap palamekti, kwaneng roti sumbaneba gandum awe wero meroba nubungeag ina palamek. Palamek abeneko pere, Yesus eldi yubu ka'ero neleptop nangdi gandum wana tagto lolobaekti, saeri pebaghongkia teek. 2Saeri pebaghongkia teekne Farisi nimi nhon-nhondi ipsiekti, yubu lelamekti, “Musari samenag, ‘Sabat sum eneko awe tomnep kom,’ aro mome tobog aghana, sa'a sembe a'undi yubu nene philamlomdi, gandum wana nene tagto tobom?” aro haibahiek.

3Wene aro haibahiekpa, Yesusti samoro ambarelamsiogti, “Nunisa nubunge Daud poneko elkaboap kwaneng yo uahiogpa, uaogne sembe mome toro pairopneag agha olog kemelamlom kom te? 4Nunisa Daud elkaboap kwaneng yo ulamsiogne sembe Daud poneko Allahri Mem Ae enekoag wa'iogpa, kwaneng roti Allah sembe pibekne taneko nimiri Daud ponekoag tarogpa tobog. Kwaneng roti neneko toro teogti, Daudti elkaboag tipto tatsiogpa teek.#Imamat - Memnang 24:8-9; 1 Samuel 21:1-6 Aghana kwaneng roti teekne tanekona, Musari samenag mome tobogne sunsunum uro, ‘Ot memnang Allah sembe palirop nangdi aghabog telamukang,’ seog,” aro samoro ambatsiog.

5Wene seogti, Yesusti nen tipto yubu lelamogti, “Nimiri Sabat sum uanepne neneko na mog so'oag nimi tahingeri saelba ulamnari o'obanepne wamna,” aro ambatsiog.

Yesusti sae tara malinge wali nembaogha

(Matius 12:9-14; Markus 3:1-6)

6Olog wamekpa, tektek papto urop sum Sabat sum taogpa, Yesus nen nimiri Allah yubu lero winirop aeag wa'iog. Wa'ina Allah yubu ambarelamsiogpa, nimi nhon sae sirik sae malinge ae lomag wamog. 7Wamogpa Farisi nimiap Musari yubu amohirop nangap ae lom neneag wamek. Sin nimi tanekori, “Yesusag tam pipsebe,” aro Yesusti ulamogne keme nenel elamek. Keme nelero seneraglamekti, “Tektek papto urop sum Sabat sum eneko Yesusti nimi ene wali nembalul to, kom to?” aro Yesus kemelamek. 8Ot sindi seneraglamekne Yesus el taog. Ane sembe eldi nimi sae tara mali nimi enekoag yubu lelamogti, “Sekmendi nimi ni whingag ane sekelalulam,” seog. Wene seogpa nimi eneko sekogti, whingag aneko sekel piog. 9Sekel piogpa, Yesusti ambarelamsiogti, “A'unag olog haibahinun. Musari samenag aruksirop yubu sunsunum uro Sabat sum eneko nimiri huanep? Nimiri walia uanep to, malia uanep to? Sabat sum wamap nena, nimi wali nembahinep to, nimi ya'ag opsinep to?” aro hairo ambatsiog.

10Wene aro ambatsiogti, sin nimi ni tanekoag kanero kembahiogti, Yesusti nimi sae tara mali nimi enekoag yubu lebog. Yubu lelamogti, “Sae nginikae,” seogpa poneko sae nginikaogpa, sae wali taog. 11Aghana Musari yubu amohirop nangap Farisi nimi tanekoap, sin yo maikno uahiog. Yo uahiogpa, sindi alniro, “Yesusag huaukap?” aro yubu lel palamek.

Yesusti nimi aobare nang wepto pogsiogha

(Matius 10:1-4; Markus 3:13-19)

12Wameka ik nhon sum Yesus, “Allahag molona molbanun,” aro yim nhonag waelbaog. Yimag waelbaogti, Allahag molona mololamogha ae inipna nhon ningki taog. 13Ae inipna nhon ningki mololamogha kwelekaogpa, eldi yubu ka'ero neleptop nimi yopsiogti, sin wamekne anabiag agha aobare nang wepsiog. Eldi aobare wepsiog nang taneko sembe, “Nari wepto pogsirop nang wamukang,” aro sekitsiog. 14Sin wepto pogsirop nangna sina, Simon, Yesusti si Petrus aro engeropne ponekoap, Simon ilipsae Andreasap, Yakobusap, Yohanesap, Filipusap, Bartolomeusap, 15Matiusap, Tomasap, Alfeus elme Yakobusap, Simon, el si nhon mo sekukap aro yin saleropne ponekoap, 16Yakobus elme Yudas apna, Yudas Iskariotne, eldi amik sum Yesus pan khebaogne ponekoap Yesusti wepsiog.

Yesusti yubu ambatto naiktop nimi maikno wali nenelamsiogha

(Matius 4:23-25)

17Yesus yimag anekoa sin wepsiog nangap kuluka yingkiekti, puluag aneko wamek. Aneko wamekpa, nimi maikno Yesusti yubu ka'ero neleplamek nimi wamekpa, nimi maikno as tala-tala Yudea mog so'oag wamek nimiap, as Yerusalema yingkirop nimiap babe wamek. Wamekpa as soro kalurop as mag longorop mag nubunge abolag wamek as Tirusap as Sidonap nimi babe yalamekti wamek. 18Sin yalamek nena, “Yesusti yubu lelamlenge ka'ebabeba, nu naikna naiklamapne wali nembahilul,” aro yalamek. Sinag phia yonge kulomag ulamsiog nimi babe yalamekpa, Yesusti wali nenelamsiog. 19Mikipne Yesus nongag wamogne agha nimi ni wali nenelamsiog ane sembe, nimi ni tanekori, “Yesus nongag po'obaberi, wali taukap,” aro ulamek.

“Nimi nenne awi sembaikpa, nenne seklebaukang,” aro Yesusti ambatsiogha

(Matius 5:1-12)

20Yesusti eldi yubu ka'ero neleptop nimi kembahiogti, yubu lelamogti,

“A'un teko uhirop nimi Allahri a'un sembe yubu sia lero saelbamsilul ane sembe,

awi uro wali wamlulom.

21A'un wene kwaneng yo uro wamlom nimi sembe teko uhiropne amik teknero tatsilul ane sembe,

awi uro wali wamlulom.

A'un wene engero wamlom nimi amik og soro wamlulom ane sembe,

awi uro wali wamlulom.

22Na mog so'oag nimi tahinge yubu ka'ero neleplamnelomne sembe,

nimiri a'un hausag senelamsiikti, sin anabiag agha yag lambahiikti,

a'un san tiliplamsiikti, ‘An si mali,’ aro wa'eplamsiik tanena,

awi uro wali wamlulom.

23Samenag babe sikini yabori Allah yubu silimu tiptop nimi tanekoag undo malia ulamsiek.

Ane sembe a'undi nari yubu ka'ero neleplamnelomne sembe nimiri a'unag babe malia ulamsiik sum eneko,

awi senelapmundi, ‘Nuringe kamna imag wamlange nubu uro tatsilul,’ aro yeng uro lolo'oplamlulom.

24Aghana a'un wene tup uro wamlom nimi teko semban koma a'undi saeag wana yeng neneroba wamla ane sembe,

amik nen tomna koma seklero wamlulom.

25A'un wene kwaneng mon og uro tero wamlom nimi

amik kwaneng yo uro seklero wamlulom.

A'un wene og soro si kerero wamlom nimi

amik a'un mantuk-tuka engero seklero wamlulom.

26Nimi niri a'un sembe ot omektop yubu agha a'unag kiplamsiik tanena, seklenne a'unag tanep.

Samenag babe orolena lerop nimina, ‘Allah yubu silimu tiptop nimi wamapti ambarelamsiap,’ aro orolenange ambarelamsiekpa,

samenag nimi tanekori sin orolena lerop nimi babe omekto kiplamsiek.

Ane sembe nimi niri a'un sembe ot omektop yubu agha kiplamsiik tanena,

Allahri orolena nimiag seklenne pelengkahinepne a'un babe seklelamlulom,”

aro Yesusti ambatsiog.

“A'undi aisa nimi sembe o'ona senelamsululom,” aro Yesusti ambatsiogha

(Matius 5:38-48)

27Wene aro ambatsiogti, Yesusti nen tipto yubu lelamogti, “Aghana wene ane nari yubu lelamnange ka'eamnelom nimi tane, nari yubu ene a'unag palilamna. A'undi aisa nimi sembe o'ona senero ulamsimundi, a'un hausag senehirop nimiag walia ulamsululom. 28Nimiri a'unag, ‘Seklebale,’ aro yo'olamsiikpa, sinag tangoro, ‘Wali wamlulom,’ aro lero ulamsululom. Nimiri a'unag yoaba ulamsiik nimi sembe Allahag molona molbarelamsululom. 29Nimiri an tara sip abom opkele tanena, andi whing tangoro, ‘Tara sip abom babe omnelul,’ aro aombalulam. Nimiri anenge ag siliro pelengen ag pelepto tople tanena, ‘Ag nongagne babe toro aleag,’ aro irikaheng kom. 30Nimi niri anag mololangkeikpa tatsululam. Nimiri anenge aba tolamik tanena, andi nen moloro toro aheng kom. 31A'undi, ‘Nimiri nanag walia uaneheng,’ senelamlomne sunsunum uro a'undina, nimi orangeag walia ulamsululom.

32Malia urop nimiri babe sindam nimi sembe o'ona senehirop nimi samoro o'ona senelamsiang. A'undina, ‘Ot na sembe o'ona senehirop nimi aghabog samoro o'ona senelamsinun,’ aro ulapmun tanena, wana yororo tatsineba a'unag loloro tahinep te? 33Malia urop nimiri babe sindam nimi sembe walia uhirop nimiag samoro walia ulamsiang. A'undina, ‘Ot nanag walia ulamneang nimi sembe walia ulamsinun,’ aro ulapmun tanena, wana yororo tatsiroba a'unag loloro tahinep te? 34Nimi malia urop nimiri babe ora nimi malia urop nimiag, ‘Sae kareploroba ni lunuro tatnululam,’ aro sesog sembe tarelamsiang. A'undina, ‘Sae kareploroba lunuro tatnelul,’ aro tarelamsimun tanena, wana yororo tatsiroba a'unag loloro tahinep te? 35Aghana a'unna, a'un aisa nenehirop nimi o'ona senelamsimundi, sinag walia ulamsululom. Sin kwema wamsileba, sindi a'unag, ‘Na kwema wamnelag yepnemenba, amik nen lumbaghenun,’ aro mololamsiikpa a'undi, ‘Nen lunuro tatnelul to, kom to?’ aro seneragna koma tarelamsululom. Undo unulapmun tanena, a'undinge kamna tatsiroba nubunge a'unag loloro talul. Allah Paliag Sirik wamlange ponekona, yoaba urop nimiap, nimiri wanaag, ‘Wali tatnel,’ semban koma urop nimiap babe, sin nimi palu ni phende abeneko Allahri walia ulamsil. Ane sembe Allahri walia ulamsil saog uro ulamsimun tanena, Allah elmabo taptopne wapmundi, sunsunum uro ulamlulom. 36A'uni Allah wana waliri yareag senero ulamsil saog uro a'undi babe nimi sembe yareag senehiro ulamsululom,” aro ambatsiog.

“Nimiag tam pimna koma yareag senelamsululom,” aro Yesusti ambatsiogha

(Matius 7:1-5)

37Yesusti nen tipto yubu ambarelamsiogti, “A'undi ora nimi sembe tam kareplapmundi, ‘El mali nimiri malia ual,’ aro tam pipmun kom tanena, a'un sembe babe Allahri tam karebi agha, ‘Mali ual,’ aro a'unag tam pimna koma wamnep. Nimiri malia uaikpa, tam orog nembi agha wailag nembamun andarina, a'undi malia uamunne babe tam kom tanep. 38A'undi nimiag tatsimun tanena, Allahri babe a'unag tatsilul. Nubu uro sumbi agha tatsileba, toplulom nena, to'opto siriro ilag la'iniropne wea uropne a'unag tatsilul. Eldi a'un tatsinep nena, a'undi nimiag saeri sumbi agha tatsimunne sunsunum uro Allahri babe saeri sumbi agha a'un babe tatsilul,” aro ambatsiog.

39Wene aro ambatsiogti, Yesusti sunumna nhon tol pina ambatsiog nena ane. “Haing uropne nhondi elkae haing uropne nhon salero poa pinep te? El poa palamna tanena sin ni phende abeneko selengaag eba tinil pinep. 40‘El tahane,’ aro ka'ero neleptop nimi nhonna, elag yubu amoropne phibom agha paliag urop kom. Aghana, ‘El tahane,’ senerop nimi eneko ni el tan taneogna, elag yubu amorop nimi saog talul.

41Sa'a sembe ankaeri haingag kal sikin ua ulamlange, ‘Imnun,’ aro elamlam aghana, andi haingag kal la'asi optenabangkelne ilil dalamlam kom? 42Andam nimiri haingag kal la'asi optenabangkel aghana, welaro andi ankaeag, ‘Nangkae, kal sikin andi haingag wangkekelne toro la'imbitkenun,’ senep? Anna, ‘Wali sembanukang,’ aro lero uropne wamlam! Andam nimiri haingag samen kal la'asi optenabangkelne toro la'inip tamen taneogna, andi ankaeri haingag kal sikin ua ulamlange tibin wali uro ipmendi, toro la'iniloplulam,” aro ambatsiog.

Kal wana walingeap malingeap sembe yubu likipto sunumna ambatsiogha

(Matius 7:16-20; 12:33-35)

43Yesusti nen tipto ambarelamsiogti, “Kal wali uro pongorop kaldi kal wana malinge maurop kom. Ane saog uro kal iklerero pongorop kaldi wana walinge maurop kom. 44Nimiri kal sembe el tanep nena, kal wana mauropne kembi agha, ‘Kal ane undop saogne wamla,’ aro el tanep. Nimiri, ‘Kal ara wana to, anggur wana to, takto tenun,’ aro ulamnari, werengkel alog kalag agha takto tenep kom. 45Nimiri wanaag to'opto seneragnangeag agha nimiri yubu lanaro lerop. Ane sembe wali nimiri walinge aghabog pairopneag agha walinge lero ulamla. Yo nimiri yonge wanaag wamlangeag agha yoaba malinge lero ulamla,” aro ambatsiog.

Wana hekto ae soropneap limituk uro ae soropneap sembe Yesusti ambatsiogha

(Matius 7:24-27)

46Yesusti tipto ambarelamsiogti, “Sa'a sembe a'undi nanag ‘Nai, nu Saelbamsilamne,’ aro yoplamnelom aghana, nari yubu sunsunum uro ulamlom kom? 47Nimi nanag yalamleri, nari yubu lelamnange ka'ero saelba ul palamle tanena, el welaro saog nimi wamlange sembe sunumna nhon ambatsinun. 48Nimi nhon eldi, ‘Ae nhon sobanun,’ aro so'o walilamnari, so'o punag walil wa'ina yangan kirik anekoag aeog pubu ikto sorop. Ae soropba, mag telamnari, mag wenero yalamnari, ae eneko tupnep. Tupnep aghana, aeog so'oag walil wa'ina wali uro soamla ane sembe, ae eneko lebe aro tupnep kom. 49Aghana nimi nhondi nari yubu lelamnange ka'eban aghana, eldi salero ul palamle kom tanena, nimi eneko yangan kirik alibag aeog pubu pimna koma salik-malik soropne saog wamla. Mag telamnari, wenero yalamnari, ae enekoag siplamna tanena, ae eneko tupnep. Ae tupnepne neneko ya'ag mali uro kwerek tangto yabinep,” aro ambatsiog.

Currently Selected:

Lukas 6: kklKOS

Highlight

Copy