Lukas 8

Kelabori Yesus yeplameka

1Neneko uro yabiogpa, Yesus ina yabalamogne, nhon asag, nhon asag pina kanero yabalamog. As ologne nubunge yabalamogti, yubu walinge Allahri yubu sia lero nimi saelba uhiroba sembe ambarelamsiog. Yesusti nimi aobare wepto pogsiog nang taneko babe Yesusap nhon yabalamekpa, 2kelabo etpare babe sinap nhon yabalamek. Kelabo sinap nhon yabalamek kelabo tanekona, Yesusti phia yonge kulomag wamsiog kelabo wali nembahiog kelaboap, naikna nhon saogne, nhon saogne naiklamekpa, wali nembahiog kelaboap nhon yabalamek. Kelabo taneko nhonna, Maria as Magdala agha urop kel phia yonge saekpare kulomag wamogpa, Yesusti yag lambahiog kel eneko nhon yabalamek. 3Kelabo yognena, Susana kel enekoap, Yohana kel enekoap, apna kelabo yogne maiknoap nhon yabalamek. Yohana kel enekona, ela'ange si Khuza wamog. Khuza ponekori nimi nubunge Herodes yepto eldi saeagha uroba paia ulamogne poneko wamog. Kelabo tanekoap Yesus elag neleptop nangap nhon yabalamekti, kelabo tanekori sindi saeagha sinag wamogne agha tenaba kamna toro Yesusap eldi wepto pogsiog nang aobare nang tanekoap yeplamsiek.

Yesusti sunumna wana togtoba yamoropne sembe ambatsiogha

(Matius 13:1-9; Markus 4:1-9)

4Yesusag nimi maikno as nubungeag ologneag wamek nimi elag yalamek. Nimi maikno yalamekti, winil dalameka kembahiogti, Yesusti sinag sunumna sunuro yubu ambarelamsiogti, 5“Awe weropne nhondi so'oag wana togtoba maikno yamoro toghol palamog. Yamoro toglamogpa, wana nenne inaag timbaog. Inaag timbaog wana togna toghogha taneko nimi pang yang ulamek nimiri ingisaplobekpa, winang im toman yabiropne yingkina ni toro teek. 6Nenne kirikag timbaog. Anekoag timbaogti, pongoro yabiog aghana, so'o si mag orogti, halo aro ul taog. 7Nenne babe pongoroba alog aba nusamag timbaogti, alog aba tanekoap nhon sirikto pongkarek aghana, alog aba tanekori oro niknibaogpa tebaog. 8Aghana nenne babe so'o mesaag sukuptobag timbaog. So'o mesaag yingkiogne wali uro pongkaogti, wana mauamog. Pongkaogti yo'o nhon-nhonag wana teng tombare saog maubaog,” aro Yesusti sunumna sunuro ambatsiog.

Wene aro Yesusti ambatsiogti, nen yubu lelamogti, “Aori ka'ebalomne nene nimi niri seneragto saelbamlulom,” seog.

Yesusti, “Tam nene sembe likiptop yubuag agha sunumna ambarelamsin,” aro tibin nembatsiogha

(Matius 13:10-23; Markus 4:10-20)

9Yesusti sunumna tol pina ambatsiogne sembe eldi yubu ka'ero neleptop nang tanekori, “Sunumna lomagna welaro wamlange sembe ambatsilam?” aro haibaek.

10Wene aro haibaekpa Yesusti, “Allahri mog so'oag nimi saelba uhiroba aneko samenagna tognoro wamog aghana wene, a'unag tibin nenero ambatnuahin andarina, el wamlulom. Aghana ora nimi sembe tognoro wamlaba, likiptop yubuag ambarelamsin. Undo ambarelamsine andarina,

‘Haingdi kemelamukang aghana, wanaag agha ibukang kom.

Aori ka'elamukang aghana, wanaag agha seneraghukang kom’,” aro ambatsiog.#Yesaya 6:9

11Yesusti likipto ambatsiog yubu eneko tibin nenero ambarelamsiogti, “Likiptop yubu lomag wamlange nenekona ane. Wana aweag togtopne neneko Allah yubu wamla. 12Wana toglamogpa, inaag timbaogne neneko sunumnana, Allah yubu ka'erop nimi. Aghana phia yonge sikini nubunge neneko yingkina, ‘Sindi Allah yubu sik sembaik komba, Allahri sin taluro wali nembahilul kom,’ aro wanaag agha pelepto tol ingkihirop. 13Wana aweag toglamogpa, kirikag timbaog nena, nimiri Allah yubu ka'ebi agha awi uro, ‘Saelbanun,’ aro torop aghana, yubu walinge neneko yareng pelengero sindi wanaag pongkanep kom nimi sembe lemna. Undop nimina, yubu walinge ambatsirop yubu eneko hae sesog sik sembanep aghana, sinag erarukne waelbanba, mipsirop tanena, Allah yubu sae limnep. 14Wana toglamnaba, pongoroba alog aba nusamag yingkiogne sunuro lemnange nenekona, nimi nenne Allah yubu ka'erop nimi sembe lemna. Undop nimi anekona Allah yubu ka'erop aghana, sindi wanaag sop-sop, ‘Welaro wamnun,’ aro wana ikin uro seneraglamang. Undo seneraglamangdi, ‘Tup tahaneri, nia ni walinge nari saeag taho,’ senenne sindi wanaag to'op tangtopneri, Allah yubu niknil orop. Oro niknilamlaba, sindi wanaag kolo orogti, Allah yubu pongoro wana maubanep kom saog wamla. 15Wana toglamnaba, so'o mesa sukuptobag yingkirop sen nena, sin wana sikne walingeag agha Allah yubu ka'ero wali uro seneragto salerop nimi sembe lemna. Sindi Allah yubu salero wana khapto uropne pere agha sindi wanaag Allah yubu pongoro wana maiknoro mauamla,” seog.

Yesusti sunumna wheaag tol pina ambatsiogha

(Markus 4:21-25)

16Wene seogti, Yesusti likiptop yubuag sunumna nhon babe ambarelamsiogti, “Nimi nhondi babe whea timbi agha kau agha niknibalul kom. Whea timbi agha ae usa mamneba mombolag babe tognobalul kom. Whea aneko timbi agha elba whea tinina yan iktoba anekoag meamle andarina, nimi ni ae lomag wa'ilamik nimiri tibin aneko imnep. 17Nia mangkina tognoro wamlange amik sum lag talul. Nia ni liliag wamlange nhon babe ya'ag liliag wamnep komdi, amik sum keknep tanepneog wamla. 18Ane sembe a'undi ka'elamlomne pere agha wali uro seneragto ka'ebalulom. Nimi etneri elag wamlenge, ‘O'oro saelbanun,’ senelamle tanena, elag tatnepne nen ma'aro yabilul. Aghana nimi etneri elag wamlenge, ‘Naria,’ sembale agha, ‘Limnun,’ senelamle tanena, elag wamlenge babe kom talul,” seog.

Yesus ilinap ilipsaboap sembe lebogha

(Matius 12:46-50; Markus 3:31-35)

19Yesus ilinap ilipsabo taptopneap elag yaek aghana, nimi maiknori sendebel alamekne sembe elag yubu lero haiptanep kom. 20Ane sembe nimi nhondi Yesusag ambarelamogti, “Aninap anipsaboap yaangdi, ‘Anap haiptaukap,’ aro asag sekamang,” aro ambarog.

21Wene aro ambarogpa, Yesusti samoro, “Nimi etneri Allah yubu ka'elamangdi, saelba ulamang tanena, nimi tane agha naninap naipsaboap wamang,” seog.

Yesusti khao aingnibaogha

(Matius 8:23-27; Markus 4:35-41)

22Ik nhon sum Yesusti eldi yubu ka'ero neleptop nimiag, “Nu mag longorop mag kauro tara sip pukap,” seogpa kabongag waelbaekti, mag alip toman palamek. 23Sin kabongag waelbaekti, “Phoanari ko'oro pabalamlul,” aro kerektoba towalengkaekti, mag alip toman agha palamekpa, Yesus kabongag aneko malamog. Malamogpa khao nubunge lo'om aro yalamogti, mag kula'epto kabongag wa'alamogpa, sin ni opsinep ulamog. 24Sin opsinep ulamogpa, sin Yesusag pina kamolamekti, “Nai! Nai! Nu magti nikniro opsineba ulamla!” aro kaombaek.

Wene aro kaombaekpa, Yesus pukogti, khaoap mag kula'eptoba nenekoap abenekoag wembahiogti aingnilopsiog. Khaoap mag kula'eptoba nenekoap aingnilopsiogpa, khao ulamlori, mag walelalo koma saog uro papto tebelaglobog. 25Tebelaglobogpa, Yesusti eldi yubu ka'ero neleptop nangag yubu lelamogti, “Sa'a sembe nanag wana palilamnelom kom?” aro sinag haibahiog.

Wene aro haibahiogpa, sin logti lo'om aro sin mamun yubu lelamekti, “Yaghe! Nimi ene etne wamlari, eldi arukahilba, khaoap maghapti eldi yubu ka'ebarangdi aingnibarang?” aro sin mamun hail dalamek.

Yesusti phia maikno nimi nhon kulomag agha yag lambahiogha

(Matius 8:28-34; Markus 5:1-20)

26Yesus el neleptop nangap kabong lomag mag alip toman kauro palameka mog so'o tara sip Gerasa so'oag piek. 27Gerasa so'o anekoag kabuni nhon phia yonge el kulomag samenag wa'iogpa, aeag mamna koma nimi teptoba kirik hogtobaag pail pirobag kerebenang ua ulamog nimi nhon wamog. Wamogpa Yesus kabong lomag agha kuluka yangkalamogpa, phia yonge kulomag wamogne poneko Yesusag yaog. 28-29Nimi enekona, samenag yog nimiri, “El yae wamukap,” aro ik sulu salero sae mamunap, yan mamunap haing kauplamek aghana, sop-sop pulpulukto eplamsiog. Yan sae haing kauplamek nena, nimiri haing pulukanep kom haing besiag agha sunurop haing babe kogto puluklolamsiogti, phia anekori ik sulu nimi eneko salero nimi oroghag poa piog. Phia yonge kulomag wamog nimi enekori Yesus yalamogha weag agha tiboghaogti, Yesusag yingkiog. Yingkiogpa Yesusti phia yonge nimi eneko kulomag wamogne nenekoag, “Lambae!” aro arukaog. “Lambae!” aro arukaog abeneko pere nimi enekori Yesus ibogti, yubu nubu uro haum aro Yesus yanag malingkiogti, “Yesus-o, Allah Paliag Sirikne Elme wamlamne! Andi nanag, ‘Huanun,’ aro yalam? Na, ‘Seklebale,’ aro na omneheng kom aro mololangken!” aro haum seog.

30Wene aro haum seogpa, Yesusti phia yonge anekoag hailamogti, “An si etne?” seog.

Wene seogpa, samoro lelamogti, “Na si Legion,” aro ambarog.

“Na si Legion,” seog nena, nimi eneko kulomag phia yonge teng-tenga teknero wa'iek ane sembe, “Na si Legion,” seog.#8:30 Legion - Roma nimiri yubuag yin salerop nang teng-tengne (6.000) poloro winirop nimi sembe, “Legion,” alamek.

31Phia tanekori Yesusag sarikto mololamekti, “Andi nu selenga we sirikne anukoag pelengkahiseng kom,” aro molbaek. 32Sin wamekag aneko pham maikno main alunag longolaekti, so'o ero tolamek. Phia yonge tanekori Yesusag mololamekti, “Andi nunag, ‘Pham taneag wa'isut,’ aro nu arukahilulam te,” aro molbaek. Molbaekpa Yesusti, “Hae, pululom,” seog. 33“Pululom,” seogpa phia yonge taneko ponekoag agha lambaekti, pham taneko kulomag wa'iek. Wa'iekpa pham taneko merelamekti, kwerenag eba timbom agha mag longorop maghag tag purukom seekti tebaek.

34Pham ni tebaekpa, pham yae paia ulamsiek nang taneko logti, laplobi agha merebaek. As peramag wamek nimiag merebaekti, uro yabiogne sembe ambarel pihiek. 35Ambarel pihiekpa, nimi taneko sindi asag lambaekti, “Sa'a uro yabil,” aro kemel aek. Yesusag yaekti kemelamekpa, el samen phia yonge maikno kulomag ua ulamogpa, Yesusti yag lambahiogpa, wali taogne poneko Yesus yan tamag pukamogpa ibek. Wali taogti, ag nongag wangkamogti, wana peket uro pukamog. Pukamogpa ibekti, “Welaro uro yabil?” aro log tahiog. 36Log tahiogpa, ni uro yabiogne ibek nimi tanekori sin kemelaek nimiag el nenelamsiek. El nenero ambarelamsiekti, “El phia yonge kulomag wamo nimi agha Yesusti phia yag lambahilba, wali tal,” aro ambatsiek. 37Ambatsiekpa ka'ebaekti, sin log maikno uahiogpa, nimi ni Gerasa so'oag wamek nimiri, “Nuri mog so'o eneag an wamnep kom. Pululam te?” aro molbaek. Wene aro molbaekpa, Yesus kabongag waelbaogti, “Pinun,” aro ulamog.

38“Pinun,” aro ulamogpa, phia kulomag wa'iogha wali taogne ponekori Yesusag sarikto mololamogti, “Nari anag nelepto wali nhon pukap te?” seog. Wene seog aghana Yesusti, “Nanap nhon pukap kom,” seog aghana, el poneko poglamogti, 39“Andi aeag pululam. Allah ponekori maiknoro yepkelne sembe angkaboag ambarel phululam,” seog. Wene seogpa nimi eneko piogti, nimi ni as soro kalurop as taneko wamek nimiag, “Yesusti na maiknoro yepneori, wali nembaneo,” aro ambarelamsiog.

Eneng palamog kelap Yairus elmangkel teptopneap Yesusti wali nembahiogha

(Matius 9:18-26; Markus 5:21-43)

40Yesus samoro kabongag agha yalamogpa, nimi maiknori el yananne sembe tibogto longolamek. Longolamek nimi tanekori tibogto wamekag yaogpa, wana awi uro kibek. 41-42As anekoa nimi nhon Allah yubu lero winirop ae saleropne sina Yairus Yesusag yaog. Yairus elmangkel ot nhonogne hengkun aobare wamog aghana, naikna naiklamogti, loba tanep saog wamog. Ane sembe Yairus poneko yaogti, Yesus yan tamag yabu sanukto u amupto malingkina Yesusag, “Nari aeag yalulam,” aro molbaog.

Wene aro molbaogpa Yesus, “Eldi aeag pinun,” aro palamogpa, nimi maikno Yesusag nelepto seklem tarabal dalamek. 43Undo palameka nusamag kelabo nhon eneng palamogha hengkun aobare seklero wamog kel nhon babe nelepto palamog. Kel enekori, “Nimi whesinnangdi whebanehengba, wali tahane,” senelamogti elenge saeagha wamsiogne ni kamna tarelamsiogpa, saeagha orog taog. Aghana eneng palamogne whelameka babe olog karepto palamog kom. 44Undop pagha, kel eneko Yesus wailag sip yingkina Yesusti nongag wangaro siliplengkamog ag enekoag sirikag po'ol piog. Aghag po'olamog abeneko pere kel eneko eneng palamogne neneko pabog. 45Pabogpa Yesusti hailamsiogti, “Etneri nanag po'obanel?” aro haibahiog aghana nimiri, “Nuri kom,” aro wene seek.

Wene seekpa, Petrusti Yesusag, “Nai, an tara-tara tane nimi maiknori anag seklem taraplangkeang,” seog.

46Wene seog aghana Yesusti, “Nimi nhondi nanag po'obanel. Na el wamna. Mikipne nanag wamlange agha nimi wali tal,” seog.

47Yesusti wene seogpa, kel enekori, “Nari elag po'obanne lag tal,” aro log lelem pet-pet aro yingkina Yesus yan tamag yingkina u amupto malingkiog. U amupto malingkiogti, nimi ni wamek nimi tanekoag ambarelamsiogti, “‘Na wali tahane,’ sembandi nari wene eldi aghag saelban abeneko pere, eneng palamnelonge neneko papto yabilba, wali tan,” aro ambatsiog.

48Wene aro ambatsiogpa, Yesusti kel enekoag yubu lelamogti, “Namangkel, nanag wana palilamlamne neneri an wali nembaghel. Wana aingniro wapmendi pululam,” seog.

49Eldi wene aro ambarelamog abeneko, Allah yubu lero winirop ae saelbamogne poneko Yairusti aeag agha nimi nhon poghekne yaog. Poghekpa yaogti, Yairus ponekoag ambarelamogti, “Nai, anmangkel loba tal. Ya'ag loba talbana, yubu amohiropne poneri hualul kombana, el ina karepto enero poa peheng kom,” aro ambarog.

50Wene aro Yairus poneko ambarog yubu Yesusti ka'ebaogti, Yesusti Yairus ponekoag ambarelamogti, “An log sembaheng kom. Ot nanag sikne aro wana palilapmenba, anmangkel wali talul,” aro Yesusti Yairus poneko ambarog.

51Wene aro ambarogpa, Yesusap Yairus ponekoap nhon eldi aeag piekti, nimi wamek nimi tanekoag, “Nimi nhon babe nanap wa'aukang kom,” aro irikahiog. Irikahiog aghana, ot elag neleptop nang Petrusap, Yohanesap, Yakobusap kelme eneko ili ilinap aghabog, “Nhon wa'aukap,” aro ambatsiogti, nhon wa'iek. 52Wa'iekpa nimi ni wamekne kelme eneko loba taogne neneko sembe engelamekti, wana ikindi sindam nimi saramag ol dalamek. Aghana Yesusti lelamogti, “Engkaheng kom. Kelme ane ya'ag tebal kom. Elna mana agha malamla,” seog.

53Wene seog aghana, nimi taneko, “Kelme eneko sik ya'ag tebal,” aro el wamekti, “Sa'a sembe, ‘Mana agha malamla,’ sel?” aro og solamek. 54Og solamekpa, Yesusti kelme enekori saeag saelbamogti, “Namangkel puke,” seog. 55“Namangkel puke,” seog abeneko pere kelme enekori yame nen yaogpa pukog. Pukogpa Yesusti, “Kwaneng tatmunba telul,” aro ambatsiog. 56Kelme eneko kamag taogne sembe ili ilindi, “Yaghe, mane agha ual,” aro lo'om serek aghana, Yesusti ambarelamsiogti, “Yog nimi nhonag babe, ‘Nen kamag nembal,’ aro ambatsiseng kom,” aro irikahiog.

Currently Selected:

Lukas 8: kklKOS

Highlight

Copy