Lukas 9

Yesusti, “Ambarel phululom,” aro aobare nang pogsiogha

(Matius 10:5-15; Markus 6:7-13)

1Yesusti aobare nang wepto pogsiog nang taneko yopsiogti, sinag mikipne tatsiog. Mikipne sinag tarelamsiog nena, “Nimi kulomag phia yonge ua ulamsilne ni yag lanalamsimundi, naikna naiktoba wali nenelamsululom,” aro sinag mikipne tatsiog. 2Tatsiogti poglamsiogti, “Pimundi nimi naiktopne wali nenelamsimundi, Allahri yubu sia lero mog so'oag nimi saelba uhiropne sembe ambarelamsululom. 3Inaag panne sembe sa'a-sa'a poa peheng kom. Kame tunguna babe, ag babe, kwaneng teroba babe, kamna kaptoba apna, ag nongag wanganne lumbanepne babe tomna koma, ot nong mo ambatto poa tongolamsululom. 4As nhonag wa'al pimunba, ae ngainge nhondi, ‘Nari aeag malamlulom,’ seleba wapmundi, ae enekoag aghabog malamlulom. As anekoag ambarelamsimundi, nhon aeag mal pang, nhon aeag mal pang uaheng kom. Ot nimi nhondi aeag malapmundi, as anekoag wamik nimi sembe komopto ambatsimun taneogna, laplobi agha as anekoag agha lambamundi, wali pululom. 5Aghana a'un as nhonag pimunba, nimi tanekori a'undi yubu ambarelamsimunne kipto topsiik kom tanena, as aneko laplobi agha pululom. Laplobi agha palapmundi, so'o ubun yanag wamlenge lupto pelengkalulom. Lupto pelengkamunne ane as aneko nimiri kembaikti, ‘Malia lebobonge ane Allahri ipsiori, nu opsileagti,’ aro sikne el taukang,” aro Yesusti eldi wepto pogsiog nang aobare nang taneko ambatsiog.

6Wene aro ambatsiogti pogsiogpa, aobare nang taneko as nhonag pang, nhonag pang Allah yubu walinge ambatto tongolamsiekti, nimi naiktopne tala-tala wamek nimi wali nenelamsiek.

Herodes wana inmon taogha

(Matius 14:1-12; Markus 6:14-29)

7-8Undo unulamekpa, nimiri Yesusti ulamogne sembe a'ero-a'ero seneraglamek. Nenneri, “Allah yubu silimu tiplamek nimi tebaek nimi agha nhon nen kamag taori, Allah yubu silimu tiplamlari ulamla,” senelamek. Nenneri, “Allah yubu silimu tiptopne nunisag Elia nen samoro yaori, el agha ane to?” senelamek. Nimi nhon-nhondi Yesus sembe senelamekti, “El Yohanes, nimi maghag pelengehiropne poneko wamla. Yohanes poneko samenag tebao aghana, nen kamag tangka yao,” aro lelamek. Nimiri Yesusti ulamogne sembe maiknoro lelamekpa, Galilea so'oag nimi saelba uhiropne nimi nubunge Herodesti babe ka'ebaogti, wana inmon taog. 9Wene aro yubu lelameka Herodesti ka'ebaogti, “Nari samenag, ‘Yohanesna usog ngangag agha karepto oplulom,’ senoba obong. Aghana nimi enena, nimi etne wamlari ulamlange neneko sembe nari maikno uro ka'elamna,” sembaogti Herodesti, “Na Yesusap haiptanunam,” aro ulamog.

Yesusti nimi teng-tengne (5.000) kwaneng tatsiogha

(Matius 14:13-21; Markus 6:30-44; Yohanes 6:1-14)

10Yesusti wepto pogsiog nang taneko samoro yaekti, sindi nia ulamekne Yesusag ambarek. Ambarekpa Yesusti, “Nu olog pina mo wamukap,” aro enero poa lepsiogti, as nhon Betsaida poa pihiog. 11Yesusap aobare nang tanekoap, “Mo pina wamukap,” aro ulamek aghana, nimiri el taekti, Yesusag neleplamek. Neleplamekpa Yesusti, “Wali nanag nelepto yaheng,” sembaogti, “Allahri mog so'oag nimi saelba uhiroba undo-undo saog wamla,” aro ambarelamsiog. Ambarelamsiogpa ma'arop nimi taneko elag neleplamek nimi agha naikna ua ulamsiog tanena, Yesusti wali nenelamsiog. 12Ambarelamsiogpa ae sin taogpa, aobare nang tanekori Yesusag yubu lelamekti, “Mog so'o ane ae sorop komag paiag wamap. Kwaneng orogti, andi nimi taneag, ‘A'un pululom,’ aro ambatsimenba, as kanero wamangneag kwaneng teneba tol piikti, ae usa manag ebaukang,” seek.

13Wene aro ambarek aghana, Yesusti samoro sinag, “A'undi agha kwaneng tatsimunba tukang,” aro wene seog.

Yesusti wene seogpa sindina, “Nuringe teroba wamlangena, kwaneng roti taroba lambareap, ikan phendeap agha wamla. Andi nunag, ‘Hae kwaneng sin ni tane wamang nimi sembe tol pululom,’ selam te?” aro Yesusag wene seek.

14Sin taneko wamek nimina, nengabo mo a'ilbahin tanena, teng-tengne (5.000) wamek. Wamekpa Yesusti eldi yubu ka'ero neleptop nang ambarelamsiogti, “Tane wamang nimiag, ‘Puksut,’ sululom. Pukukangne palu nhonagna, teng phende saog uro puk-puk yabukang,” aro ambatsiog.

15Wene aro ambatsiogpa, eldi ambatsiogha sunsunum uro, “A'ero-a'ero puklulom,” seekpa nimi ni pul piek. 16Yesusti kwaneng roti lambareap, ikan phende abenekoap tobogti, imag tiwalengkia Allahag, “Wali tatsilam,” aro kibog. Allah kibogti, kwaneng roti taneko tobogti, eldi yubu ka'ero neleptop nangag, “Nimi taneko kwaneng tatsululom,” aro khepto-khepto tatsiog. Tatsiogti ikan phende abeneko babe sop kelekto-kelekto tatsiog. Tarelamsiogpa elag neleptop nangdi nimi ni tanekoag pogto tarelamsiek. 17Pogto tatsiekpa, sin nimi ni tanekori teekpa, mon og tahiog. Teekpa mon og tahiogpa, phelektopne babe wamog. Eldi yubu ka'ero neleptop nangdi kwaneng kheptoba phelektopne poloro pibekti, haing agha kau saog uro wiroba nubunge aobare liro pibek.

Petrusti Yesus sembe lag phoro lebogha

(Matius 16:13-20; Markus 8:27-29)

18Ik nhon sum Yesus elmo Allahag molona mololamogpa, eldi yubu ka'ero neleptop nang elag yaek. Elag yaekpa, Yesusti sinag hailamsiogti, “Nimi maikno taneri lelamangdi, na sembe etne alamang?” aro haibahiog.

19Wene aro haibahiogpa sindina, “Nimi nenneri an sembe, ‘Yohanes maghag pelengehiropne nen kamag taonge poneko ane,’ senelamangdi yubu lelamang. Nenneri, ‘Elna, samenag Allah yubu silimu tiptopne Elia poneko samoro kamag taogne wamla,’ senelamangdi yubu lelamang. Nenneri, ‘Elia kom aghana, samenag Allah yubu silimu tiptopne yogne kamag taogne wamla,’ senelamangdi lelamang,” seek.

20Wene seekpa, Yesusti nen hailamsiogti, “Aghana a'un morina na sembe etne senelamnelom,” aro haibahiog.

Wene aro haibahiogpa, Petrusti samoro lelamogti, “Anna, Allahri wepto pogkeogne Kristus wamlam,” seog.

21Wene seogpa, Yesusti wenelamsiogti, “Andi na sembe yubu leplamne neneko nimi nhonag babe lag phoro ambatsiseng kom,” aro irikahiog.

Yesusti el seklero tebanepne sembe ambatsiogha

(Matius 16:21-28; Markus 8:31—9:1)

22Wene seogti, Yesusti eldi yubu ka'ero neleptop nangag el amik seklebanepneog wamogne sembe ambarelamsiog. Ambarelamsiogti, “Na mog so'oag nimi tahinge wa'epto epnukang. Na wa'epto epnukang nimina, nu Yahudi nimi sembe wenehirop nimiap, memnang Allah sembe palirop nang sikini yaboap, Musari yubu amohirop nangapti na wa'epto epnepneog wamla. Wa'ebaneikti ya'ag omnukang. Ya'ag omnukang aghana, ik wilindip sum nen samoro kamag tanun,” aro ambatsiog.

23Wene aro eldi yubu ka'ero neleptop nang ambatsiogti, nen nimi wamek nimi ni tanekoag ambarelamsiogti, “Nimi etneri, ‘Na Yesusag nelepto nhon palamnunam,’ senelamle nimi enekona, eldamneri wanaag seneragtopne sop-sop lipsileri, eldi wanaag agha, ‘Nimiri na kalag sipto ya'ag omneika babe, na wana khapto Yesusag neleplamneri, siptop kal nene sa'olamnun,’ senelamle taneogna neleplamnelul. 24Nimi etneri, ‘Na mog so'o aneag wali wamnun,’ aro seneragto ulamle tanena, nimi eneko el kamag wamnepne ka'eseptalul. Aghana nimi etneri, ‘Na wali wamnepne sae limneri, tebahanea babe Yesusap ma'ap tanunam,’ aro seneragto ulamle tanena, nimi eneko ya'ag kamag uro unne elag talul. 25Nimi nhondi nia mangkina mog so'oag wamlange toro saelban aghana, eldamne optangto loba nenep taho tanena, ‘El tupne wamla,’ sembanep te? Kom. 26Nimi etneri mog so'oag nimi whingag logti, na sembe babe, nari ambarelamsin yubu sembe babe aliri, ‘Yesusap ma'ap tanunam kom,’ sele tanena, nari babe nimi eneko sembe, ‘Elna nari nimi kom,’ senun. Na mog so'oag nimi tahinge, amik nandamne imang wareroba lag taleba, samoro yanun. Nen samoro yalamne sum eneko, Allah eldamneri arukna imagnang tibin warerop nang malaikatap yaneri, Nani Allahringe imang wareropne nanag wamleba yanun. Yalamne sum eneko nimi etne aliri nanap ma'ap tangtop kom tanena, na amik yane sum eneko babe, na nimi eneko sembe aliri, ‘Nari nimi,’ aro lemnepne lemnun kom. 27A'un tane wamlom nimiag sikne agha ambarelamsin. A'un tane sekamlom nimi nhon-nhon anam teban komag, Allahri mog so'oag nimi saelbamsilula lag taleba iplulom,” aro ambatsiog.

Yesus nong a'eropne tangom agha haing omomne warebaogha

(Matius 17:1-8; Markus 9:2-8)

28Wene Yesusti, “Iplulom,” aro ambatsiogpa, ik linbare saog uro piogpa wamek. Yesusti Petrusap, Yohanesap, Yakobusap poa lepsiogti, “Allah omekto molona molbanun,” aro main nhonag poa pihiog. 29Aneko Yesusti Allah omekto molona mololamogpa, Yesus whing nhonne saog taogpa, eldi ag nongag wangkamogne babe lepna tingo-tingo alamloa saog uro solomne tingkia-tingkia up tangtopne taog. 30-31Up tangtopne taogpa, kemelamekag agha Allah yubu silimu tipto ulamdek nang Musaap Eliaap sin phenderi imang wareropne toman agha Yesusag lag tarek. Sin lag tarekpa, mome toro pairopne sunsunup talul aro uro yabinepne sembe Yesusap nhon yubu lelamek. Yesusap nhon yubu lelamek nena, ko'o we uro wamna komag Yesus as Yerusalem pineba, el tebanepne sembe yubu lelamek. 32Sin abeneko anam lag tan komag Yesus Allahag molona mololamog abeneko, Petrusap elkabo phende nangap kwahing ulamsiogpa, maro wamek. Maro wamek aghana, pukom agha haing whi tahiogpa kemelamsiekpa, Yesusag tibin warerop sirikne wareamogpa, Yesus sin phende nangap sekamekpa ipsiek. 33Sin phende nang abeneko, “Pinunam,” aro ulamdekpa, Petrusti wali uro seneragna koma, “Sa'a senep?” aro Yesusag ambarelamogti, “Nai, nu tane wamap nena wali. Ane sembe ae wilindi soro kaluna kaulbaukap. An sembe nhon, Musa sembe nhon, Elia sembe nhon sobatsukap,” aro Petrusti Yesus ambarog.

34Wene aro Petrusti yubu lelamog abeneko, toa pololonga yaogti niknilogsiogpa, sin log sembaek. 35Toa nusamag anekoa ka'elamekpa, yubu nhon lelamogti, “Anena na Name, nari me wepsinge. Eldi yubu ka'elamlulom,” alamogha ka'ebaek.

36Yubu wene alamogne neneko komopnag tilamekpa, aneko Yesus el mo sekamogha ibek. Ni uro yabiogne sin Yesusti yubu ka'ero neleptop nang wilindi nang tanekori haingdi ibek aghana, Yesus wamog ko'o enekoag nimiag ambatsin koma sin agha mo el wamek.

Yesusti phia yonge me kulomag agha yag lambaogha

(Matius 17:14-18; Markus 9:14-27)

37Ane wamekpa, ae kwelekaogne neneko Yesus elkabo wilindi nangap mainag anekoa kulukaekpa, nimi maikno elag yalamek. 38Nimi maikno nusamag agha nimi nhondi haum aro Yesusag yubu lelamogti, “Nai, nu amolamsilamne! Nari me ot nhonog me ane seklelamlaba, kembalulam te? 39Phia yonge aneko yingkina elag salelamla tanena, el lo'om agha ngolol alamlari, nong toro yuklamlaba, si ka'en toman kamola makel alamla. Phia aneko eldi kulomag agha la'imban koma ua ulamlari, oro luknulamlaba, seklena seklelamla. 40Undo olamlaba, andi yubu ka'ero neleptop nangag, ‘Wali nembatnululom,’ aro molbahin aghana, sumbangba eraruktina, wali nembanep kom saog wamla,” aro Yesusag ambarog.

41Wene aro ambarogpa, Yesusti samoro yubu lelamogti, “Eh, a'un nanag sik semban koma kwanekto ka'eseptanepne ulamlom nimi. Na ko'o ik etpare a'un anabiag wamneri, ‘Nanag sik senelamseng,’ aro wana pailingkina wamnep? Anme ane payae,” seog.

42Wene seogpa, me eneko Yesus peramag poa palamogpa, phia yonge anekori me ene konkonoro so'oag taloro mambirogpa, me eneko pemagto lologlamog. Lologlamogpa Yesusti phia wenero, “Lambae,” aro arukaog. “Lambae,” aro arukaogpa lambaogpa, me eneko wali taog. Yesusti me eneko wali nembaogti, ili saeag samoro tarog. 43Nimi ni wamekne tanekori, lo'om seekti, “Yaghe! Allah mikipneri nubu sirikne ual,” sembaek.

Yesusti, “Ya'ag omnukang,” aro eldi yubu ka'ero neleptop nangag nen sarikto ambatsiogha

(Matius 17:22-23; Markus 9:30-32)

Yesusti ni uaogne sembe nimi niri yaghe senelamek abeneko Yesusti eldi yubu ka'ero neleptop nangag ambarelamsiogti, 44“A'un ekon tan koma nari yubu lelamnange wali uro ka'eamlulom. Nimiri na mog so'oag nimi tahinge pan khero aisa nimiri saeag nembanenep sum peram tal,” aro ambatsiog.

45Wene aro ambatsiog aghana, yubu nene sembe, “Yesusti sa'a sembe lepla,” aro wana hekahiog komdi, tognorop saog wamog. Sindi wali uro seneraghek kom aghana, elag haibanepne sembe logti, haibaek kom.

Nimi etne nimi nubunge tanepne sembe Yesusti ambatsiogha

(Matius 18:1-5; Markus 9:33-37)

46Yesus eldi yubu ka'ero neleptop nang sin mamun yubu lel dalamekti, “Nun anabiag etne agha nubunge wamnep?” aro yubu lelamek. 47Sindi wanaag seneraglamekne el taogti, Yesusti me ologne nhon sae kiliro el peramag sekirog. 48Sae kiliro toro sekirogti, sinag ambarelamsiogti, “Nimi etneri me ologne ene nari siag kekhaekto nembaleri, ‘Yesus kiploa saog uro kipnun,’ aro toro kiple tanena, nimi enekori na babe toro kipto pimneloa saog ulamlul. Na toro kipnelul nimi eneko na kipnelenge pere agha na mog so'oag pogneogne poneko babe kiplul. A'un anabiag agha nimi etneri eldamne nimi ologne nenep tangtop tanena, el agha nimi nubunge wamla,” aro Yesusti eldi yubu ka'ero neleptop nangag ambatsiog.

Yesusti, “Nu aisa nembamsil kom nimi nungkae wamla,” seogha

(Markus 9:38-40)

49Yesusti wepto poghogne nhon Yohanes ponekori lelamogti, “Nai, nuri kemelamoboba, nunap nhon yabalamap kom nimiri phia yonge nimi kulomag wamsionge an siag yag lanalamsioba ibobo. Ibobo aghana, nimi aneko nuri anag neleplangkeap saog uro anag sop nelepto yabalamla kom. Ane sembe nuri elag, ‘Undo unuaheng kom,’ aro irikabo,” aro Yesusag ambarog.

50Wene aro ambarogpa, Yesusti samoro ambarelamogti, “Irikaheng kom. Nimi etneri a'un aisa nenehirop kom tanena, nimi eneko a'unkae wamla,” seog.

As nhon Samaria so'oag wamek asag nimiri Yesus sembe karong aro uaeka

51Imag agha Yesus kiliro tomnep sum peram talamogpa, Yesus eldamne wanaag agha, “Yerusalem pinun,” aro wana nhonog uro palamog. 52Palamogha nimi samenag, “Yubu poa pululom,” aro nimi pogsiogpa, yubu poa piek. “Yubu poa pululom,” aro pogsiog nimi taneko samenag as nhon Samaria so'oag wamog asag piekti, “Yesus yalamla,” aro wero ulamek. 53Wero ulamekpa, Yesus aneko yaog aghana, nimi as anekoag wamek nimiri, “Yesus nuri as phibom agha as soro kalurop as Yerusalem palamlange nu karong,” aro Yesus kiplamek kom. 54As aneko nimiri Yesus kipna koma ulamekpa, Yesusti yubu ka'ero neleptop nang Yohanesap elkae Yakobusapti ipsirek. Ipsirekti Yesusag ambarelamdekti, “Nai, nu Saelba Uhiropne! Nuri imagne ponekoag, ‘Auk pog pelengero as ane nimi loba nembahilulam,’ aro molbaukapne yeng te?” aro Yesusag ambarek.

55Wene aro ambarekpa, Yesusti tangabom agha sin kembahiogti, “Undo kom,” aro wembahiog. 56Wembahiogti aneko laplobi agha as nhonag piek.

Yesusti nimi wenehiro elag nelebanepne sembe ambatsiogha

(Matius 8:19-22)

57Yesus eldi yubu ka'ero neleptop nangap inaag palamekpa, nimi nhondi Yesusag yubu lelamogti, “Nai, an tala-tala palapmenag na babe anag neleplangkenun,” aro wene seog.

58Wene seogpa, Yesusti samoro ambarelamogti, “Pai kam ae kwanero manag selenga ua urop. Winang im toman yabiropne tanekori ae manag ae soa urop. Ot na mog so'oag nimi tahinge enekori ae manag orog,” aro ambarog.

59Wene seogti, Yesusti yog nimi nhonag yubu lelamogti, “Nanag neleplamnululam,” seog.

Wene aro, “Neleplamnululam” seogpa nimi enekori lelamogti, “Nai, nu saelba uhiropne wamlam. Ot nari nai sam mali taleba, so'oag sikil pineri, amik nelebaghenunne hae te?” seog.

60Wene seogpa, Yesusti samoro nimi enekoag yubu lelamogti, “Teptop nimiri sin teptop nimi so'oag siksinep. Aghana anna pimendi, Allahri mog so'oag nimi saelba uhiropne sembe ambarel phululam,” seog.

61Nen nimi nhondi babe lelamogti, “Nai, na babe anag nelebaghenun aghana, na sam pineri ae lom nimiag, ‘Palamnundi wali wamlulom,’ aro ambarel pihineri nelebaghenun,” seog.

62Wene seog aghana, Yesusti nimi enekoag yubu lelamogti, “Nimi etneri Allahri awe wero alnibandi, tangabom agha wailag sip tisaombanep tanena, nimi enekona Allahri saelba ulamsil nimiap nikag awe tomnepne sembe sunsunum kom,” aro ambarog.

Currently Selected:

Lukas 9: kklKOS

Highlight

Copy