1 AkwaKorinte 11
11
1Mu ni temunune eci edi ni temununa Krisitu.
Eraerera mbunga o ku thzi rombera
2Naa mi shangara pakuninga ci mwaa ni vurukanga thsikati thsothsihe, karo no ku ninga ci mwaa shupwera erongithsa eyi na mi pire.
3Uno honi ko thsi di ethsi ni fota ci mu yuvithsithse, Krisitu yodiyo mutwi o mukwerume yomuhe, mukwerume yodiyo mutwi wa munuwenthzi, karo Nyambi o mutwi wa Krisitu. 4Mukwerume yomuhe o ku rombera nji kukethza mutwi wenthzi o ku u na shupekiwa mu thsinu aa shwahura mutwi wenthzi. 5Unone mbuyama yomuhe o ku rombera nji kukethza o ku u na kana ku vata thsinu ku mutwi aa shwahura mutwi wenthzi, inene mofoci eci mutwi wenthzi o ku u na keriwa. 6Inene ngeci mbuyama ka a shupekire mutwi wenthzi mu thsinu, a tetere huki thzenthzi. Uno honi pakuninga ci ya ku fithsa honyi mbuyama ku kurura mutwi wenthzi nji ku u kera, a vate thsinu ku mutwi.
7Mukwerume ka a roerire ku vata thsinu ku mutwi, inene yodiyo thsikupuro no kutethzima kwa Nyambi, uno honi mbuyama po kutethzima kwa mukwerume. 8Inene mukwerume ka a kwamiwire pa mbuyama, unone mbuyama shime a kwamiwire pa mukwerume. 9Karo mukwerume ka a kwamiwerire mbuyama, unone mbuyama shime a kwamiwerire mukwerume. 10Mukaci keyi no tungeru, mbuyama aa roera ku vata thsinu ku mutwi ku monithsa ci mushi thzokoro a di.
11Shaanga kengeyo, kwanua Fumu, mbuyama ka a cimanenine kwa mukwerume, karo no mukwerume ka a cimanenine kwa mbuyama. 12Inene shaanga ci mbuyama shime a tundire pa mukwerume, mukwerume honi a erekiwa kwa mbuyama. Uno honi enu yoihe yaa tunda kwa Nyambi.
13Mu ciratwere yamwe mwathsinda, ene i di nawa ci mbuyama a rombere kwa Nyambi o ku na kana ku vata thsinu ku mutwi nji? 14Ene kadi kenu edi yekara pohuma twaa mona ci yaa fithsa honyi mukwerume kwikara no huki thzothzire. 15Uno honi mbuyama yoihe ekara no huki thzothzire, oo po owa wenthzi? Inene aa thzi piwa ku thsika mutwi wenthzi. 16Uno honi ngeci munu aa ootera ku kanyeka eyi, a dimuke ci shaanga atwe nji makereke a Nyambi, ka tu di no mukwameno umweya.
Murarero wa Fumu
17Uno honi mweyi eraerera i randako, ka ni mi shangara, inene o ku mu na ciwana pofoci ka mu kwamangire yoiwa, unone yo kwipa nene. 18Inene, thso kutanga, naa yuva ci ko ku di kucitepatepa mu kaci kenu o ku mu na ciwana pofoci ko kwikara kereke, karo naa i tawa yaa twethsa kwikara yoshemwa, 19inene kwaa roera kwikara kucitepatepa mu kaci kenu ci awa a na tawethza Nyambi a monahare.
20O ku mu na ciwana pofoci, kadi cingwa murarero wa Fumu mu na dyanga. 21Inene amweya ku kwenu aa yokororanga ku dya mirarero thzo ko kukana ku dya namweya. Mweyo, amweya aa fanga nthzara, unone amweya aa penda. 22Ene ka mu di no myanda thzenu oku nga mu dya no ku nwa nji? Nji mwaa shwahura kereke thza Nyambi no ku fithsa honyi awa a na piri? Ine eyi nga ni amba ku kwenu? Ene ni mi shangare nji? Dyombo! Ka ni mi shangara!
23Inene na tamburire kwa Fumu eyi na mi rongithsire name. Uya othsiku a ombiwire, Fumu Yesu wa shimbire dikende, 24no ku kanderera kwa Nyambi. Ngou a di kuyurire no ku amba ci: “Eyi po erama yange eyi i piwa amwe. Mu kwamange eyi ci mu ni vurukerangepo.” 25Mofoci, munyima thzo murarero wa shimbire karo nganja, no ku amba ci: “Ethzi nganja po thsiyuvano thsothsipe thsa Nyambi nanuenthzi konyinga wange. Mu kwamange kenge, thsikati no thsikati yoihe mu nwamo, o ku mu ni vuruka.” 26Inene thsikati thsothsihe yoihe mu dya edi dikende no ku nwa omu mu nganja, mwaa pa ombangi o kufa kwa Fumu Yesu shime ku ka kuma apa a ku keyera.
27Mweyo, yomuhe o ku dya edi dikende nji ku nwa omu mu nganja thza Fumu omu ku na kana ku roera kenge a kwikara no murandu o kwipithsera erama nonyinga wa Fumu. 28Munu no munu aa roera ku citatufa tango o ku shime ku dya ku dikende no ku nwa omu mu nganja. 29Inene yomuhe o ku dya no ku nwa ko kukana ku remeka erama ya Krisitu aa cidyera no ku cinwena raturo. 30Eyo ngeyi i reta ci owangi ku kwenu a faratere no ku kora, amweya na fu.
31Unone nga twaa citatufa twathsinda, nga ka tu raturiwire kwa Nyambi kenge. 32Uno honi Fumu aa tu ratura ku tu kuturura ci katere twa ku ratweriwe pofoci no kaye.
33Mweyo andengenu, yoihe mu ciwana pofoci ku dya, mu citatererange. 34Ngeci waa fa nthzara, o dye ku mwanda ci katere o ciretere raturo othsinda yoihe mu ciwana pofoci. Keyi imweya, kenge na ku na mi pa eraerera ou na ku keya.
Currently Selected:
1 AkwaKorinte 11: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company