1 AkwaKorinte 12
12
Epa yo Mupepo Oukenu
1Honi andengenu, keyi yepa yo Mupepo, ka ni fotire ci mwikare ko kukana ku dimuka thsimweya. 2Namwe mu na dimuka ci uya na mwikara mu uhedeni shime mwaa kokiwera nene kwanyambi wekupuro i shiamba. 3Mweyo, naa fota ci mu dimuke ci kwithsa munu oyu u na endithsa Mupepo wa Nyambi oyu wa ku amba ci: “Yesu a kutiwe.” Karo kwithsa munu o ku amba ci: “Yesu po Fumu,” shime oyu u na endithsa Mupepo Oukenu.
4Epa yo Mupepo ya ku cithsiathsia, unone yoihe yaa tunderera ku Mupepo ofoci. 5Ku di ekwama yo mishovoshovo, unone Fumu yofoci. 6Nyambi aa kwama ko makuñwa o ku cithsiathsia, unone Nyambi yofoci oyu i kwama yoihe kwanu wahe.
7Ku munu no munu kwaa hokoka thsipa thso Mupepo ku kwathsa amweya. 8Inene ko Mupepo ofoci yumweya aa piwa thsipa thso ku amba konyanyami. Yumweya karo aa piwa thsipa thso ku amba kodimukero. 9Kou Mupepo ofoci yumweya aa piwa thsitawo, yumweya aa piwa epa yo ku porithsa akwakukora. 10Kou Mupepo yumweya aa piwa okoro o ku tenda ekomokithsa, oyu yumweya aa piwa thsipa thsokethzi. Yumweya karo aa piwa thsipa thso ku fotithsithsa nawa mipepo ku mona ci thzaa tunda kwa Nyambi nji thzaa tunda kwako. Yumweya aa piwa thsipa thso ku amba madimi o mishovoshovo, yumweya thsipa thso ku tongonona eyi i na ambiwa. 11Eyi yoihe yaa tunda ku Mupepo ofoci. Aa pa munu no munu kokuthza komu a na shimena aye Mupepo Oukenu.
Erama nepo yayo yoingi
12Erama yo munu i di nepo yoingi, unone yoihe eyo epo yoingi yaa kwama erama yofoci. Dyo i di kengeyo noku kwa Krisitu. 13Twahe twa korovethziwire ko Mupepo ofoci kwikara erama yofoci, ikare Majuda nji Magerike, mupika nji mukwa kurukuruka, twahe twaa nwithsiwa Mupepo ofoci.
14Erama po kadi cingwa thsipo thsofoci, unone i di nepo yoingi. 15Nga thsidyato ci thsi ambe ci: “Kadi no thsipo thserama, inene kadi no dyoko,” eyi nga ka i di kwangithsa kwikara thsipo thserama. 16No ditwi ci di ambe ci: “Kadi no thsipo thserama, inene kadi no dithziho,” eyi nga ka i di kwangithsa kwikara thsipo thserama. 17Ou nga yekarire ci erama yoihe nga dithziho pohuma ne, nga ngepi edi tu na yuvanga? Inji nga ditwi pohuma ne ngepi nga tu na yuvanga munuko?
18Uno honi eci edi i di, Nyambi shime a pakire epo yoingi perama, thsirama no thsirama kokuthza komu a shimenine. 19Nga thsipo thsofoci pohuma po, nga ka i di erama. 20Ii, epo ingi perama yo munu, unone erama yofoci pohuma. 21Dithziho tumba di ambera dyoko ci: “Ko fotaharire ku kwange!” No mutwi tumba u ambera mauru ci: “Ko fotaharire ku kwange.”
22Dyombo, mane epo eyi i na monahara ku faratera perama yodiyo i na fotahara nene kwirama. 23Karo epo eyi tu na varanga ci ka ya remekiwa nene perama yo munu, yodiyo tu na remekanga nene. Mweyo, twaa vavareranga nene epo eyi i na kana ku roera ku moniwa, 24uno honi epo yo ku roera ku moniwa ka i mameriwire nene. Nyambi shime a pakererire erama pofoci no ku pa direma dyodikuru thsipo ethsi thsi na kana ku roera ku remekiwa. 25Mweyo, eyo yaa monithsa ci kwithsa kucitepatepa mwirama, uno honi thsipo no thsipo thsaa kwathsa muenthzathso. 26Ngeci thsipo thsofoci thsaa shupeka, epo yoihe kenge i shupeka nathso. Karo ngeci thsipo thsimweya thsaa remekiwa, epo yoihe yaa nyanyuka nathso.
27Erama ya Krisitu po yamwe, munu no munu ku kwenu thsipo thsayo. 28Mweyo, mu kereke Nyambi na a paka mu ndau thzo kutanga tunganda, thzo muthsidi akwakukethza, thzo muthsihatu arongithsi. Mbeci honi ku keye akwa ku kwama ekomokithsa, sho ku keya awa di nepa yo kuporithsa, sho ku keyako akwa kukwathsa amweya, sho ku keya aendithsi nakwa ku amba madimi o mishovoshovo. 29Ene twahe ne twa tunganda nji? Inji twahe twakwakukethza? Ene twahe twarongithsi nji? Inji twahe twaa tenda ekomokithsa? 30Ene twahe tu di nepa yo ku porithsa anu nji? Inji twahe twaa amba madimi? Inji ku tongonona madimi? Ka i di kengeyo! 31Mu takamithse ku shima nene epa yoikuru mu thsivaka. Pano honi tango ni mi nehethze dikuñwa dyodiwa nene kupiterera.
Currently Selected:
1 AkwaKorinte 12: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company