1 AkwaKorinte 14
14
Thsipa thsokethzi no ku amba madimi
1Mu koñomeke thsishimo! Karo mu takamithse ku shima epa yo Mupepo, thsikurupo thsipa thsokethzi. 2Munu o ku amba madimi ka a ambire no munu, unone aa amba na Nyambi. Kwithsa o ku twethsa ku i yuvithsithsa inene aa amba kokoro o Mupepo eyi i na cihoreka. 3Uno honi o kukethza aye aa amba kwanu ku wa umba mu thsitawo no ku wa tanarithsa no ku hengawethza. 4Karo munu o ku amba madimi aa citanarithsa aye thsinda pohuma. Uno honi o kukethza aye aa tanarithsa kereke thzothzihe.
5Kadi edi ni na foto ci nga mwahe mu ambe madimi, unone nene po naa fota ci mwahe mukethze. Inene mukwa kukethza mukuru nene kupita mukwa ku amba madimi, shime ngeci ko a di oyu nga twethsa ku i tongonona ci kereke thzothzihe thzi umbiwe.
6Andengenu, nga amepo ni keya ku kwenu no ku na amba madimi ne, thsine ethsi nga i mi kwathsa? Kwithsa! Shime ci ni mi retere ehokora, odimukero, okethzi nji erongithsa. 7Mane shaanga enu yo kupira mwoyo yo ku cipitura eci paro nji harepa ngeci ka i punithsire murumo o ku yuvahara nawa ne ngepi nga a i dimuka munu? 8Karo ngeci munu aa shika torombita ko murumo o kukana ku dimukera ne kwaa di oyu nga ciroithsera ku thza ku mvo?
9Mweyo, yaa cipitura namwe, anu ne ngepi a ku i dimuka ngeci mwaa amba ku kwo ko mushovo ou a na kana ku yuva? Kamona mu tenda kengeyo po mu dimuke ci mwaa ambera mupepo pohuma.
10Ku di mishovo thzothzingi mu kaye thzo ku cithsiathsia, unone mushovo no mushovo u di neyi u na amba. 11Uno honi ngeci ka ni dimuka eyi u amba oo mushovo, no mutundakure koyu u amba, karo oyu u amba mutundakure ku kwange. 12Mweyo, ku kwenu amwe mu shima nene ku wana epa yo Mupepo mu ereke nene ku fotithsithsa eyi nga i umba kereke.
13Munu o ku twethsa ku amba madimi aa roera ku rombera ci a piwe no thsipa thso ku twethsa ku i tongonona. 14Inene ngeci naa rombera ko ku amba madimi, mupepo wange nao waa rombera. Unone tumba ni i yuvithsithsa eyi ni amba. 15Ngepi honi ni na roera ku tenda? Kenge ni rombera ko mupepo wange, karo kenge ni rombera ko maano ange. Kenge nimba ko mupepo, karo kenge nimba ko maano ange. 16Inene ngeci waa shangara Nyambi ko mupepo pohuma ne, ngepi nga i kwathsa munu oyu na teerera thsirombero thsoe thsokanderero ko ku amba pohuma ci “Ameni.” Aye ko kukana ku dimuka eyi o na amba? 17Inene shaanga ci thsirombero thsoe thsokanderero thsiwa, tumba thsi tanarithsa munu yumweya.
18Naa kanderera kwa Nyambi ci naa amba madimi ku mi pita amwe mwahe. 19Uno honi o ku tu na ciwana ko kwikara kereke, naa fota nene ku amba maywi o mutanu ko maano ange ci ni twethse ku rongithsa amweya, kupita ku amba maywi oangi o ku kuma mu 10,000 mu dimi ethzi thzi na kana ku dimukiwa.
20Andengenu, mwa anekera eci anuke. Mwikare eci tumbu kwinu yoimango, uno honi ku maano mu piruke eci akuru. 21I na ñoriwa mu Murao ci:
“Kenge na ku amba kwanuange ko mishovo thzathzo no miromo thzanuawo, unone ka ku ni yuvera. Fumu yodiyo naa i amba.”
22Thsipa thso ku amba madimi po thsimonithso kwakwakukana ku tawa, kadi kwakwakutawa. No thsipa thsokethzi po thsimonithso kwakwakutawa kadi kwakwakukana ku tawa. 23Ngeci kereke thzothzihe o ku thzi na ciwana, karo anu wahe no ku amba madimi, ci ku keye anu awa a na kana ku dimuka madimi nji akwakukana kutawa ne, ene nga ka mi ningi ci mwahe mwaa thzaruka? 24Unone ngeci mwahe mwa okethza, nga akopo kwingena munu o kukana ku tawa nji o kupira odimukero, kenge a citawera thsivi thsenthzi no ku raturiwa keyi mu amba. 25Neanekera yo eyi i na cihoreka mu micima yaa tunda. Karo kenge a tongama ku manwi no ku rombera ci: “Yoshemwa Nyambi mu kaci kenu a di.”
Dyo ku rombera mu kereke
26Andengenu, ine nga ni amba? Ou mu na ciwananga pofoci, munu no munu ku kwenu a ekaranga no dimbo, nji erongithsa, ehokora, dimi nji ku tongonona eyi i na ambiwa. Eyi yaa tendahara kengeyo ci kereke thzi umbiwe. 27Unone ngeci kwaa di oyu amba mu madimi, ku ambe pohuma anu aidi nji ahatu. Munu no munu a ambe yofoci ko ku ciranderera, karo kwikare mukwa ku tongonona. 28Ngeci kwithsa mukwa ku tongonona, mukwa ku amba madimi a tutware mu kereke. A ambere pohuma mu mucima na Nyambi.
29Ku ambe akwakukethza aidi nji ahatu, awa amweya a i fotithsithse ku mona ci ine eyi i ambiwa. 30Uno honi nga akopo ku keya ehokora kwa yumweya oyu nekara omo, oya amba a tutware. 31Inene mwahe mwaa twethsa kukethza yofoci yofoci ci a cirongithserepo amweya no ku tanarithsiwa micima. 32Akwakukethza a di nokoro peuru thzo mipepo thzo. 33Inene Nyambi po kadi Nyambi o mikwangarakanyi, unone wa thsiyaro, eci edi i di mu makereke oahe anua Nyambi owakenu.
34Ambuyama aa roera ku tutwara mu kereke. Inene ka tawethziwire ku amba, a cihuthse kushi eci edi u na amba murao. 35Ngeci ko i di eyi a na foto ku dimuka a kepure anuwo ku myanda. Inene ya ku fithsa honyi mbuyama ku amba mu kereke. 36Nji mwaa anekera ci diywi dya Nyambi shime dya tundire ku kwenu? Nji mwaa anekera ci ku kwenu pohuma na di kumu? 37Ngeci kwaa di oyu na anekera ci mukwakukethza nji ci o di no thsipa thso Mupepo, aa roera ku dimuka ci ethsi ni mi ñorera pano po thsiraerera thsa Fumu. 38Unone ngeci kadi wa ku vara eyi, naye a variwa.
39Mweyo, andengenu, mu shime nene kukethza, unone mwa kanithsa ku amba mu madimi. 40Unone mu mone shemwa ci enu yoihe yaa tendiwa nawa komu ku na roera.
Currently Selected:
1 AkwaKorinte 14: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company