1 AkwaKorinte 9
9
Eyi i na roera kanganda
1Ene kadi no mukwa kurukuruka? Ene kadi no kanganda? Ene ka na monine Yesu Fumu wetu ko meho ange? Ene kadi mukaci kekwama yange ci mwakwa Fumu honi? 2Shaanga ci amweya aa ni shimba ci kadi no kanganda, yoshemwa ku kwenu po no kanganda. Amwe po yamwe mwa thsimonithso ethsi thsi monithsa ci no kanganda ka Fumu Yesu.
3Kenge dyodiyo ni na ciamberanga anu yoihe a ni fotithsithsa pokoro wange. 4Ene ka tu roerire ku piwa edya nenwa? 5Ene ka tu roerire ku endanga nanuwetu wakwakutawa eci edi tu na kwamanga tunganda tumweya, mofoci kengeyo namina Fumu no Peturu? 6Nji shime Banabasi name pohuma awa na roera ku kwama ku wana po ku yoyera?
7Ene dishwarare ne dyaa cipatareranga edya o ku di di mu mvo nji? Edye o ku kuna dikanda dyo veine, unone kadi wa ku dyako oko ku veine? Nji edye o ku futithsa mutanga o mangu, unone kadi wa ku dyako mahwe ao? 8Ene naa amba eyi kokoro onu nji? Ene murao ne ka u ambire kengeyo? 9Inene mu Murao wa Mushe ku na ñoriwa ci: “Wa anga puru ku kanwa o ku pura mashakara.” Ene Nyambi ne shime a anekerire yo mapuru ou a ambire kenge nji? 10Kadi shime a ambire yetu? Ii, shime ya ñoriwerire atwe, inene mukwakupurura na mukwakucora aa roera ku kwama kokurupero o ku wana ku dicora.
11Ngeci na tu kunu mbuto thzo Mupepo mu mwenu, ene ka tu roerire ku cora kweyi mu di nayo? 12Ngeci amweya aa roera ku tambura enu ku kwenu, kadi atwe honi po twaa wa pita?
Ka na tu cikwathsithsa ou oroero, twaa citanarithsa mwinu yoihe kupita ci twikare thsiparaka mu dikuñwa dyo Muthzimbu Ouwa wa Krisitu.
13Ene ka mu dimukire ci awa kwama mu Tembere aa wana edya yo mu Tembere, nowa na kwama pa katara aa wana edya yo kweyi i tupuriwa pa katara? 14Mofoci, Fumu naa raerera ci awa rongithsa Muthzimbu Ouwa aa roera ku yoyera pa Muthzimbu Ouwa. 15Unone ka na ni cikwathsithsa shaanga thsofoci kweyi i na ni roera. Karo ka ni ñorire eyi ko ku kurupera ci nga mu tateke ku ni kwamena eyi. Mane kenge nga ni fa kupita ci ni yawe oroero wange o ku cishangara ku honga kengekenge. 16Uno honi ku honga Muthzimbu Ouwa po kadi cingwa thsinu ethsi nga ni cishangarera, inene na ni tuminiwa ku tenda kengeyo. Mayuwane othsimo wange ngeci ka na ku honga Muthzimbu Ouwa!
17Ngeci naa rongithsa ko ku shima kwange, ni di no muyambo, unone ngeci ka ni rongithsire ko ku shima kwange, naa kwama pohuma ekwama eyi na ni piwa. 18Muyambo wange honi ne upi? Muyambo wange po ou, mu kuhonga Muthzimbu Ouwa, nga ni u honge kengekenge, ko kukana ku kwamithsa oroero wange ko kuyara mu ku honga Muthzimbu Ouwa.
19Shaanga ci no mukwakurukuruka ka ni di no ñathsire, na ni piruka mupika kwanu wahe ci nga ni twethse ku reta owangi kwa Krisitu. 20Ku Majuda na pirukire eci Mujuda ci nga ni rakwithse Majuda. Kowa a na shupwera murao o Thsijuda, name nekarire eci oyu na shupwera murao o Thsijuda (uno honi ame ka ni shupwerire murao o Thsijuda), ci nga ni twethse ku rakwithsa awa a na shupwera murao o Thsijuda. 21O ku ni di nAnukenge awa a na kana ku shupwera murao o Thsijuda, na pirukire eci oyu na kana ku shupwera murao o Thsijuda (Shaanga ci kadi cingwa no mukwa kurukuruka ku murao wa Nyambi, unone mushi thzo murao wa Krisitu ni di), ci nga ni twethse ku rakwithsa awa a na kana ku shupwera murao o Thsijuda.
22O ku ni di nowa o ku faratera na pirukire eci o ku faratera, ci nga ni twethse ku rakwithsa o ku faratera. Na ni piruka enu yoihe kwanu wahe ci momuhe omu nga ni twethsera nga ni yoyithseko amweya. 23Naa kwama yoihe eyo mukaci ko Muthzimbu Ouwa, ci nga ni citapere namweya thsiyauthzi thsao.
24Ene ka mu dimukire ci mu kurakaana mu kucira akwakucira wahe aa ciranga, unone munu yofoci na shimbanga muyambo? Mweyo, mu cire kengeyo ci nga mu tambure muyambo! 25Wahe awa a nekaranga mu rakaraka aa cikutekanga. Aa kwamanga kengeyo ci a wane muyambo o kuninga ci waa twethsa ku pwa, unone atwe twaa kwamanga kengeyo ci tu wane muyambo o diyere. 26Mweyo, naa cira ko murero, ka ni cirire eci mukwakurwa oyu kuha mafaindi mu mupepo. 27Uno honi naa endithsa erama yange, ku i irerithsa ci i kwame eyi i na roera ku kwama ci katere na ku honge amweya ame no ku kapuriwa.
Currently Selected:
1 AkwaKorinte 9: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company