1 Timoti 5
5
Erongithsa yo kereke
1Wa kuturura mukuru o mukwerume, unone o mu thsiurure eci tata woe. Mishumba o thzi shimbe eci aminoe. 2O shimbe akuru wambuyama eci anjinoe, karo o shimbe ambanda eci andumbuthzoe, mu kukena kokuhe.
3O remeke mafakathzi awa a na piri shemwa o ku wa kwathsa. 4Uno honi ngeci difakathzi o di nana nji ekurwa, thso kutanga ethsi a na roera ku kwama po ku monithsa mwoyo o thsitawo pa mwanda wo no ku huthsera ashemi wo ko ku wa nyunga, inene eyi po yaa roerithsanga Nyambi.
5Difakathzi shemwa oyu di muthsiana aa kurupera Nyambi. Aa romberanga othsiku no mutenya ku romba Nyambi ci a mu kwathse. 6Uno honi difakathzi o ku cingenithsa mwicikora po na fu kare shaanga ci aa yoya. 7Eyi yodiyo o na roera ku raerera anu ci kwa kupire thso ku wa shomorora.
8Uno honi ngeci munu kadi wa ku nyunga apenthzi, nenepo awo o mwanda ofoci nenthzi, oyo na hamura thsitawo thso shemwa. Oyo o kengeyo po mane tango naho awa na kana ku tawa.
9Wa tara difakathzi ku taro thzo mafakathzi ngeci ka a di no myaka makumi mutanu na dyofoci. Karo shime oyu wa ruramine kwa munuwenthzi. 10Aa roera ku dimukiwa kekwama yoiwa yo ku cipitura eci kurera anuke, kutambura nawa enda mu mwanda wenthzi, kuyoa edyato yakwakutawa, oyu na a kwathsanga akwakunyanda no kucipaka nene kwikwama yoiwa.
11Uno honi mafakathzi wanuke wa wa tarako, inene ecikumbwethza yerama ou ya ku wa fotithsa ku yeka kenge a ku tunda kwa Krisitu. 12Mweyo, kenge a ku ciretera raturo athsinda, inene a na coro kucianga kwo ko kutanga ku kwenthzi. 13Kadi eyo pohuma, unone kenge ya ku wa retera kucikarera, karo kadi kucikarera pohuma, unone no ruhopo o kwa thza o yembaera mu myanda no ku cingenithsa mwinu eyi i na kana ku wa vanda. 14Mweyo, naa fota ci mafakathzi wanuke a yekiwe, a wane ana no ku mamera myanda thzo. Apo honi mukwathsithzimbo ka a ku twethsa ku amba yoimango keyi yetu. 15Inene amweya na pambana kare, na tateka ku shupwera Satana.
16Ngeci mbuyama o mukwakutawa o di napenthzi o mafakathzi, aa roera ku wa vavarera ci kereke thza piwa mupango. Apo honi kereke kenge thzi vavarera mafakathzi awa na piri shemwa. 17Akuru awa na kwama nawa ekwama yoendithsi o kereke, aa roera ku remekiwa rwidi, nenepo awa kwama nene ku honganga no ku rongithsa. 18Inene ku na ñoriwa ci: “Wa anga kanwa ko puru o ku pura tumbi.” Karo ku na ñoriwa ci: “Akwakukwama aa roera ku horithsiwa!”
19Wa teerera eyi a na shangethza mukuru o kereke, shime ngeci yaa piwa ombangi ku mambangi edi nji ahatu. 20Awa na tende thsivi aa roera ku kutururiwa pa meho anu ci amweya nawo a yape.
21Naa ku romba pa meho a Nyambi no pa meho a Krisitu Yesu no pa meho o tungeru to ku hanguriwa ci o hengeke eyi eraerera ko kupira ku hangura nji ku tenda mavwevwe. 22Wa yokorwera ku kambeka anu moko mwikwama ya Nyambi, nji ku vanda ku thsivi thsamweya. O cihengeke o ku di o mukenu.
23Wa nwanga pohuma meyu, o nwange no tuwaine totumanana mukaci ko dira dyoe no ku korakora koe.
24Evi yamweya yaa monahara pa mwanjanja o kwa shime no ku raturiwa. Unone yamweya yaa monahara munyima. 25Mofoci, ekwama yoiwa yaa monahara, neyi yo kukana ku monahara tumba i shimbi thsikati thsothsire shimbi ya horekiwera.
Currently Selected:
1 Timoti 5: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company