1 Timoti 6
6
Yapika
1Wahe awa di ku njoko thzopika a shimbe añathsire wo ci aa roera ku piwa direma, ci dithzina dya Nyambi nerongithsa yenthzi yepithsiwa dithzina. 2Apika awa di nañathsire wo wakwakutawa ka roerire ku wa shwahura wene ci aenthzo akwakutawa. Unone aa roera ku wa kwamena nawa inene awa kwathsiwa kwikwama yo yoiwa po akwakutawa nowa a shimiwa.
Erongithsa yo mbango no rufumo ro shemwa
Eyi yodiyo o na roera ku rongithsa anu no ku wa karaethza ci a i hengeke. 3Ngeci munu yumweya aa rongithsa erongithsa yayo, karo kadi wa ku enderera no maywi o shemwa a Fumu wetu Yesu Krisitu nerongithsa eyi i reta mwoyo o thsitawo, 4oyo o kengeyo po wa mununa, karo ka a dimukire thsimweya. Aa cikumbwethza pohuma enu yoimango, ku kanyeka no ku cirwithsa keyi yo maywi. Karo podiyo kwa tunda mbamba, mamvo, kwipithsa amweya mathzina no ku anekerera amweya enu yoimango. 5Podiyo kwa tunda karo dikanyi di shipu mu kaci kanu weanekera yo kwipa, awa na yumeniwa oshemwa. Awo aa anekera ci mwoyo o thsitawo po dikuñwa dyo ku fumena.
6Uno honi mwoyo o thsitawo no ku rakwa eyi a di nayo munu po rufumo roshokuru. 7Inene kwithsa ethsi na tu reta mu kaye, karo tumba tu twethsa ku shimba thsimweya mu kaye. 8Mweyo, o ku tu di nedya nevata twaa roera ku rakwa. 9Awa a na foto ku fuma aa wera mwiereka no kwingena mu thsiteama, necikumbwethza yotomba, karo yoihungu yoingi yo ku twethsa ku twara munu ku kwipa no ku kunonga. 10Inene ku shima nene madi odiyo matatekero omango ouhe. Amweya mu ku fota nene madi na yongo mu thsitawo thso, no ku cipaka athsinda mu mathsiwa oangi.
Eraerera yo mamaneneno ya Paulu kwa Timoti
11Uno honi Timoti, owe po o munu oyu kwamena Nyambi, o tunde kweyi enu yoimango. O koñomeke pohuma yowawa, mwoyo o thsitawo, thsitawo, thsishimo, othzui, no kuwamucima. 12O rwe mvo thzothziwa thzo thsitawo thso shemwa, o tanarithse mwoyo o diyere ou naa kwithsera Nyambi, ou no citawera nawa othsinda pa meho o mambangi oangi. 13Naa ku raerera pa meho a Nyambi oyu na panga mwoyo enu yoihe, no pa meho a Krisitu Yesu oyu wa citawerire nawa pa meho a Ponso Pilatu, 14o hengeke ethsi thsiraerera ko kupira katamwethzi nji ku shomororiwa, ku tunda pano shime ku ka kuma mu diyuwa edi a ku hokoka Fumu wetu Yesu Krisitu, 15oyu a ku hokora Nyambi ko thsikati ethsi thsi na roera, aye Mukwakutumina o thsiyauthzi, aye Fumu o mafumu no Ñathsire wañathsire. 16Aye Nyambi yodiyo pohuma shifu, inene aa yoya mu mwethzi o kukana ku henyena munu. Kwithsa oyu wa mu mona, karo kwithsa o ku twethsa ku mu mona. A piwe direma nokoro o diyere! Ameni.
17O raerere afumanyi o thsino thsikati ci a cinuneka, karo a paka okurupero wo pa rufumo, ayo enu i shikuruperiwa, unone a kurupere Nyambi aye oyu na tu panga kongi enu yoihe ci tu cikore. 18O wa tongwere a kwame yoiwa, ekare afumanyi mwikwama yoiwa, kwikara o kupa no ku ciroithsera ku citapera. 19Ko ku tenda kengeyo kenge a ku cishishera athsinda mushisho ouwa o ku rupara, ci nga a ku wane mwoyo o shemwa.
20Timoti, o hengeke nawa ethsi na thsi pakiwa mu moko oe, o tunde kwiambaura i shiremeka Nyambi no dikanyi dyeyi i thsiwa mbango ci odimukero. 21Anu amweya na yongo mu thsitawo mukaci ko ku shupwera eyo. Thsihemo thsa Nyambi thsikare nenu mwahe.
Currently Selected:
1 Timoti 6: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company