2 Timoti 1
1
Kuvumenena
1Yame no Paulu, kanganda ka Krisitu Yesu keshima ya Nyambi, na ni tumiwa ku tongora yo thsikumbwethzo thso mwoyo ethsi thsi di mwa Krisitu Yesu, 2naa ñorera Timoti mwanange oyu na shima, Nyambi Tata na Krisitu Yesu Fumu wetu a ku pe thsihemo, ñeke no thsiyaro.
Okanderero
3Naa kanderera kwa Nyambi oyu ni kwamena, ko mumoneno ouwa eci edi a tendire akwathsañurwange, naa ku vurukanga mwirombero yange thsikati thsothsihe mutenya nothsiku. 4Ou ni na vurukanga mihothzi thzoe, naa fotanga nene ci nga ni na ku mono, ci nga nikare no thsinyanyu thsothsikuru.
5Naa vuruka thsitawo thsoe thsoshemwa, thsitawo ethsi a tangire kwikara nathso kuku woe Loisi no mama woe Yunisi, naa tawa shemwa ci nowe thsodiyo ethsi o di nathso. 6Mweyo, naa ku vurukithsa ci o yuumithse karo thsipa thsa Nyambi, ethsi no piwa ko ku ku kambeka kwange moko. 7Inene Nyambi ka na a tu pa Mupepo o wowa, unone okoro, thsishimo no ku cihenga.
8Mweyo, wa fera honyi ombangi wa Fumu wetu, nji ku fera honyi ame no thsinthzinda thsenthzi. Unone o ni kwatithse mu ku nyandera Muthzimbu Ouwa kokoro ou naa ku pa Nyambi. 9Yodiyo na a tu yoyithsa no ku twithsera ku mwoyo oukenu, kadi mukaci kekwama yetu, unone mukaci kesheteka yenthzi no thsihemo thsenthzi. Ethsi thsihemo shime a thsi tu pire kare mwa Krisitu Yesu kaye o ku ka shime no kumbiwa. 10Unone ethso thsihemo na thsi hokoriwa ku kwetu ko kuhokoka kwa Muyoyithsi wetu Krisitu Yesu, aye oyu na a pwithsa okoro o kufa, no ku reta mwoyo no kukana ku fa ko Muthzimbu Ouwa. 11Oo Muthzimbu Ouwa odiyo na hangweriwire kwikara mukwakuhonga, kanganda no murongithsi.
12Eyo ngeyi ni nyandera kenge, unone ka i ni fithsire honyi, inene ni na dimuka oyu ni na tawa, karo ni na dimuka shemwa ci aa twethsa ku nyunga eyi ni na paka mu moko enthzi shime ku ka kuma mu diyuwa dyo ku ka huka kwenthzi. 13Eyi no yuvu ku kwange, o i hengeke ikare muro werongithsa yoshemwa ko thsitawo no thsishimo mwa Krisitu Yesu. 14O nyunge enu yoiwa eyi na i pakiwa mu moko oe, o i nyunge ko ku kwathsiwa ku Mupepo Oukenu oyu di mu mwetu.
15O na dimuka ci anu wahe o mu ditunga dya Asia na ni yeuka, amweya ku kwo po a Figelusi na Hemogenesi.
16Fumu ekare no ñeke ku mwanda wa Onesifora, inene wa ni roerithsangire ku mucima rorungi no ku ni tanarithsa. Karo ka a ni fererire honyi shaanga ci shime nekarire mu madyenge. 17Unone ou a na kumine mu Roma wa ni fotafotire nene shime ou a ni wanine. 18Fumu a ku monithse Onesifora ñeke mu diyuwa dyo mahurerero. Nowe o na dimuka nawanawa edi a ni kwathsire o ku tu di mu Efese.
Currently Selected:
2 Timoti 1: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company