2 AkwaKorinte 12
12
Thsimona thsa Paulu
1Kenge ni twarerera ku cishangara. Shaanga ikare ci kwithsa thso ku wanapo, kenge ni twarerera ku amba yemona nehokora eyi na i tundu kwa Fumu. 2Ni na dimuka Mukrisitu yumweya oyu wa twariwire ku diwiru dyo muthsihatu. Na ku piti pohuma myaka thzo dikumi na thzine ku tunda apa ya tendaharerire. Ka ni dimuka nawa nji shime a twariwire nerama yenthzi nji kadi nerama, Nyambi yodiyo na i dimuka. 3Karo ni na dimuka ci oyu munu shime a twariwire mu paradaisi. Unone ka ni dimuka nji shime a twariwire nerama nji kadi nerama, Nyambi yodiyo na i dimuka. 4Wa comboriwerire ku paradaisi oku a ka yuvire maywi o kukana ku twethsa ku a tongonona munu, karo kwithsa munu oyu na tawethziwa ku a amba.
5Kenge ni cishangara mukaci ko munu o kengeyo kadi ku cishangara mukaci kange nothsinda, unone naa twethsa pohuma ku cishangara keyi yo ku faratera kwange. 6Shaanga nga o ni fote ci ni cishangare, nga ka nikara thsitomba, inene kenge nga ni amba yoshemwa. Uno honi ka na ku i tenda, inene ka ni fotire ci munu a ni shimbe kokuru ku piterera eyi a mona o ku ni tenda, nji eyi a yuva oku ni amba. 7Mweyo, ci na cishangara mukaci keyi ehokora yoikuru nene kupiterera, na ni piwa muunga mwirama yange, ako kanganda ka Satana ku na ni yuvithsa kukora ci na cishangara.
8Miendo thzihatu o ku ni adikanena nene Fumu ci a i tundithse ku kwange. 9Unone aye wa ni tawire ci: “Thsihemo thsange thsi na ku kwana, inene okoro wange waa kwama nawa nene mu kufaratera.” Mweyo, kenge ni nyanyuka nene o ku ni cishangara mukaci ko kufaratera kwange ci okoro wa Krisitu wikare pa pange. 10Mweyo, mukaci ka Krisitu, naa nyanyuka mu kufaratera, mu matuka, mu makando, mu kunyandithsiwa, no mukaru ouhe. Inene yoihe ni faratera mbeci ni tanare.
Ecoyoka ya Paulu kwAkwaKorinte
11Na nikara eci thsitomba, unone yamwe na mu ni retithsera ci nikare kengeyo. Yamwe na mu roera ku pa ombangi keyi yange. Inene kadi no muonye o mamaneneno kotu tunganda twenu totukuru mu thsivaka, shaanga i ninge ci no thsikura. 12Yoshemwa, emonithso nekomokithsa, nekwama yoikoro yo ku monithsa ci no kanganda shemwa, na i tendiwa ku kwenu ko mucima outhzui. 13Mwinu mwine omu na ni kana ku mi tenda nawa kupita makereke amweya, shime pohuma yo kukana kwikara mupango ku kwenu? Mu ni kwatereko pa kwipithsa kengeyo.
14Pano honi ni na ciroithsera ku na mi hungerithsa ro muthsihatu, ka ni fotire ku nekara mupango ku kwenu. Inene ka ni fotire eyi mu di nayo unone naa fota amwe. Shaanga ikare kengeyo, ana ka roerire ku rera ashemi wo, unone ashemi wodiyo a na roera ku rera ano. 15Eci ame po ni na nyanyuka ku pa yoihe eyi ni di nayo, mane no ku cipa nothsinda mukaci kenu. Ngeci ame naa mi shima nene, ene amwe ne kenge mu ni shima kamanana nji?
16Shaanga ikare kengeyo, ka na nikara mupango ku kwenu. Unone amweya a anekera ci nekarire no dinyanyamena no ku mi kwatakwata pa meho. 17Unone ngepi? Ene shime na ni mi pupirika kowa na ni mi tumithsera nji? 18Shime na adikanenine Tite ci a keye oko ku kwenu, na mu tumine pofoci na muenthzetu yumweya. Ene Tite ne shime aa na mi pupirika nji ngepi? Dyombo! Inene twaa kwamena pofoci mu Mupepo ofoci, no kwikara no maano ofoci.
19Ene popahe apa mwaa anekeranga ci twaa cimanenanga twathsinda ku kwenu nji? Dyombo, twaa ambanga eyi ko kwikara angamba a Krisitu pa meho a Nyambi. Ashimiwa ange, eyi tu na tendanga yoihe twaa i tenderanga ci mu umbiwe mu thsitawo. 20Inene naa yapa ci ou na ku keya oko ka na ku na mi wana o ku mu di eci edi ni na foto, nji amwe ku na ni mona o ku ni di omu mu na kana ku fotera. Karo naa yapa ci kenge na ku na wana dikanyi no mbamba, noanthzi, oñondi, kwipithsa mathzina amweya no ruhopo, mununa, mikwangarakanyi no mikarero thzothzimango. 21Naa yapa ci ou na ku keya karo oko Nyambi wange kenge a ku na ni huthsa kushi pa meho enu, karo kenge na ku nekara mu mathsiwa mukaci kowa owangi awa na tende thsivi mwikati yo ku manyima, karo ka na cera ekwama yo yo dithziro, yo ruthziho nongurunde eyi na kwama.
Currently Selected:
2 AkwaKorinte 12: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company