AkwaEfese 4
4
Kwikara thsofoci mwirama ya Krisitu
1Mweyo, naa adikana ku mi romba ame no thsinthzinda mukaci ko ku kwamena Fumu, ci mu yoye mwoyo ou u na roera kwithsiwa oku na mwithsiwera. 2Thsikati thsothsihe mu cihuthse kushi no kuwamucima, mu kwate micima, mu cikunde namweya mu thsishimo. 3Mu kwame momuhe omu mu na twethsera ci mu twarerere ku cikwata mu Mupepo ko thsiyaro ethsi thsi na mi waneka. 4Ko i di erama yofoci no Mupepo ofoci, eci edi mwethsiwerire kukurupero ofoci. 5Ku di Fumu yofoci, thsitawo thsofoci, korovethzo thzofoci, 6Nyambi yofoci aye Tata wanu wahe, oyu na endithsa wahe, karo oyu kwama mu mwo wahe, karo oyu di mu mwo wahe.
7Uno honi munu no munu ku kwetu naa piwa thsipa komu naa tu pera Krisitu. 8Eyo ngeyi a na ambera Mañoro ci,
“Ou a thzinine po kuthzinama,
wa shimbire dikanga dyakwakupukuriwa,
no ku pa epa kwanuenthzi.”
9(Pa ku amba ci: “Wa thzinine mu wiru” yaa monithsa ci shime a tangire tango ku shurumukera mu kaye. 10Oyu wa shurumukire yodiyo karo wa thzinine ku piterera mawiru oahe ci nga a yare mwinu yoyihe). 11Krisitu yodiyo wa pire tunganda, akwakukethza, angambi, adithsani narongithsi, 12ku pa okoro anuenthzi ku kwama ekwama yenthzi no ku umba kereke, ayo erama ya Krisitu. 13Eyi kenge ya ku twarerera shime ku ka kuma apa twa kwikarera no kucikwata mu thsitawo no mudimukero o ku yara wa Mwana Nyambi no ku kura mu thsitawo mane shime ku cishoka na Krisitu ko kuyara.
14Apo honi ka twa kwikara karo anuke, ku cimbathzokithsiwa ku mañithsingi no ku pungithsiwa ku mupepo ou u furafura werongithsa yo mbango, yo dinyanyamena yo kwangera yanu eyi a peremeka. 15Uno honi, kenge twa ku amba oshemwa mu thsishimo, no ku kura momuhe eci Krisitu, aye mutwi werama athzo kereke. 16Ku kwenthzi erama yoihe kodiyo i na cinunganungera no ku kwatiwa pofoci ko ku tanarithsiwa ku mithsipa thzothzihe. Yaa kura no ku ciumba yothsinda mu thsishimo, thsipo no thsipo o ku thsi kwama ekwama yathso.
Mwoyo oupe mwa Krisitu
17Pano honi naa mi tongwera eyi, karo naa i tanarithsa mu dithzina dya Fumu. Mwa yoya karo eci mahedeni edi a na kwamanga, keanekera yo yo mbango. 18Eanekera yo mu mirema i di, karo a na tepiwa ku mwoyo wa Nyambi mukaci ko kukana kwo ku dimukera enu, mukaci kokaru o micima thzo. 19Ka di no honyi. Nengena mu ungurunde, karo a na yara rununa ro ku tenda enu yoihe yo dithziro.
20Unone eyo kadi yodiyo mwa cirongithsire keyi ya Krisitu. 21Pakuninga ci na mu yuvu ya Yesu no ku yuva oshemwa ou u tunda ku kwenthzi, 22mu konthze onu wenu o kare no muyoyero wenu o kare ou u di necikumbwethza yoimango yerama no kwangera. 23Mupepo wa Nyambi u tende ope maano no mianekerero thzenu. 24Mu vate onu oupe, ou umbiwa kwikara eci Nyambi, owawa o shemwa nokenu.
25Mweyo, munu no munu ku kwenu a thsie kwangera, a ambe yoshemwa kwa muenthzenthzi, inene twaheno twepo yerama yofoci. 26“O ku mu na anthzipa mwa tenda thsivi” Dya ka toka diyuwa shimbi mwa anthzipera. 27Mwa pa shamaonga dipenga. 28Mwithzi a thsie withzi honi, a kwame ko moko enthzi ekwama yoiwa, ci nga ekare nethsi thsimweya ethsi nga a citapera nowa a na piri.
29Mwa tunda maywi ohungu mu tunwa twenu, unone ku tunde maywi oawa o ku twethsa ku umba amweya keyi i na fotahara kukwo, ci nga a kwathse awa a teerera. 30Mwa tendithsa Mupepo Oukenu wa Nyambi thsorokoto, inene yodiyo mwa pakiwire thsitamba kenthzi ko diyuwa dyo ku paturiwa. 31Mu thsie ndurungera thzothzihe, noanthzi, no kuanthzipa, maywi oamango, kwipithsa amweya mathzina, mofoci kengeyo no mishovo thzothzihe thzo mikarero thzothzimango. 32Mwikare no thsihemo kwamweya, mu ciyuvere ñeke oandu, no ku tetera amweya, eci Nyambi edi a mi teterire mwa Krisitu.
Currently Selected:
AkwaEfese 4: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company