Maheveru 10
10
Thsiyambero thsa Krisitu rofoci karo ro mahurerero
1Murao o Thsijuda po muthzimbimbi pohuma wenu yoiwa eyi i keya, kadi cingwa thsikupuro thsayo shemwa. Mweyo, keyambero yao eyi i twarereriwa ku tendiwa mwaka no mwaka, tumba u dici kwononokithsa awa keya ku na rombera. 2Eyo eyambero nga shime ya twethsire ku kenithsa anu kwivi yo rofoci karo ro mahurerero, nga ya pwithsiwire inene akwakurombera nga ka ciyuvangire karo kwikara no mirandu. 3Uno honi eyi eyambero yaa wa vurukithsa mwaka no mwaka ci a di nevi. 4Inene tumba i tawa ci onyinga o mapoho no membe u tundithse evi.
5Mweyo, Krisitu ou a keyire muno mu kaye wa amberire Nyambi ci,
“Ko fotire eyambero no nupu,
uno honi no ni roithsera erama.
6Ko nyanyukithsiwire ko nupu thzo kutumekera,
nji keyambero yo ku tundithsa evi.”
7Ngou na ambire ci: “Yamono, naa thza ni ka kwame eshima
yoe, Nyambi,
eci edi i na ñoriwa yange mu vuka thzo Murao.”
8Thso kutanga, Krisitu wa ambire ci: “Ko fotire, nji ku roerithsiwa keyambero no nupu, nji nupu thzo ku tumekera nji eyambero imweya yo ku tundithsa thsivi” shaanga ci eyo eyambero yaa tendiwa kokuthza ko murao. 9Ngou a ambire karo ci: “O mone, naa keya na ni kwame eshima yoe.” Apo Nyambi aa pwithsa thsiyuvano thso kutanga no ku shisha thsothsipe. 10Keyo eshima ya Nyambi, na tu kenithsiwa kwivi yetu ko thsiyambero thserama ya Yesu Krisitu ethsi thsa piwire muendo ofoci pohuma, karo ro mahurerero.
11Mupurisita yomuhe aemananga diyuwa no diyuwa ku kwama ekwama yenthzi, ku hukahukera ku pa eyambero yo ku cipitura. Unone eyo eyambero tumba i twethsa ku tundithsa evi. 12Uno honi Krisitu aye ou a manine ku pa thsiyambero thsevi rofoci, karo ro mahurerero, wekarire ku dyoko dyo rudyo dya Nyambi, 13ku taterera ethso thsikati shime ku ka kuma apa a ku tendera Nyambi akwethzimbo yenthzi thsipura thsedyato yenthzi. 14Inene ko thsiyambero thsofoci na ononona diyere awa kenithsiwa kwivi yo.
15Mupepo Oukenu nao waa tu pa ombangi, inene ethsi u amba po ethsi,
16“Ethsi thsodiyo thsiyuvano na ku ciyuvano,
munyima thzao mayuwa, Fumu aa amba.
Kenge na ku paka mirao thzange mu micima thzo,
no ku thzi ñora mu maano o.”
17Ngou a ambire honi ci,
“Mbera ka ni vuruka karo
evi yo nomango wo.”
18Mweyo honi, apa ku na teteriwa evi, ka ku fotaharire karo thsiyambero thso ku tundithsa thsivi.
Tu henyenenu po pepi na Nyambi
19Mweyo, andengenu, tu di honi nondume o kwingena mu Ndau thzo Shokenu Nene konyinga wa Yesu. 20Na a tu yanthzurwera dikuñwa dyodipe, karo edi di yoya, edi na a yanthzurura ko dimbatu, ayo erama yenthzi. 21Karo pakuninga ci tu di no mupurisita shokuru oyu na endithsa nthzio thza Nyambi, 22tu henyenenu po pepi na Nyambi ko micima thzo shemwa no ku tawa shemwa oku ku retiwa ko thsitawo. Inene micima thzetu na thzi kenithsiwa ku mimoneno thzothzimango, nerama eyi na i kenithsiwa ko meyu oawa. 23Tu tanarithse nene eyi tu na kurupera eyi tu pa ombangi wayo, inene oyu na a tu kumbwethza wa ku rurama. 24Tu cikaraethzenu o ku tu cikwathsa oandu ku shima no ku kwama yoiwa. 25Twa thsia ku thzanga ku maciwaneno etu, eci edi a kwama amweya. Uno honi tu cikaraethzenu oandu eci edi mu na dimuka ci diyuwa dya Fumu dyaa kokera po pepi.
26Inene ngeci atwepo tu twarerera ku tenda thsivi ñenya munyima thzo ku dimuka oshemwa, apo honi po kwithsa karo thsiyambero ethsi nga thsi tu tundithsa thsivi, 27unone ku na tatereriwa pohuma raturo thza Nyambi thzo kuyapithsa, no dyangadiro edi dya ku na thzirithsa akwethzimbo yenthzi. 28Munu yomuhe oyu wa kanine ku hengeka murao wa Mushe wepaiwire ko kukana ku yuveriwa ñeke kombangi wanu aidi nji ahatu. 29Mwaa anekera ci thza ku kuma kupi honi humbithso ethzi thza ku roera munu o ku shwahura Mwana Nyambi, o ku shwahura onyinga o thsiyuvano thsa Nyambi ou na u mu kenithsa, o ku tuka Mupepo o thsihemo? 30Inene tu na mu dimuka oyu wa ambire ci: “Ditoto po dyange, kenge na ku huthsera.” Karo ci: “Fumu kenge a ku ratura anuenthzi.” 31Yaa yapithsa shemwa ku wera mu moko a Nyambi oyu yoya!
32Mu vuruke aya mayuwa o ku matatekero munyima thzo ku tambura mwethzi, uya mwa cithzuire makando oakuru. 33Pamweya shime mwaa tukathzaniweranga pa mbunga no ku nyandithsiwa. Ekati imweya mwemanenine mofoci nowa a tendiwire kengeyo. 34Mwa yuverire ñekeñeke awa ekarire mu kamenga, karo mwa tamburire ko thsinyanyu ku nyangiwa enu yenu, pakuninga ci mwa dimukire ci mu di nenu yoiwa ku i pita, eyi i na mi taterera yo diyere.
35Mweyo, mwa konthza okurupero wenu, inene kenge wa ku mi retera muyambo oukuru. 36Mwaa roera ku cithzua, ci yoihe mu tenda eshima ya Nyambi, nga mwa ku tambure eyi a kumbwethzire. 37Inene eci edi ku na ñoriwa ci,
“Ku na thsiara thsikati thsothsipu pohuma,
oyu na roera ku keya
kenge a ku keya.
Ka a ku katapa.
38Uno honi o muwawa wange
kenge a ku yoya ko thsitawo,
unone ngeci ayepo huka munyima,
ka na ku mu nyanyukera.”
39Uno honi atwe po kadi cingwa twanu o ku huka munyima no ku nongithsiwa, unone tu di no thsitawo karo twaa yoyithsiwa.
Currently Selected:
Maheveru 10: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company