Maheveru 11
11
Yo thsitawo
1Thsitawo po ku tawa shemwa eyi i na kuruperiwa, no ku rakwa enu eyi tu kana ku mona. 2Thsitawo thsodiyo thsa retithsire ci anu o ku kare a twethse ku shangariwa kwa Nyambi.
3Ko thsitawo twaa yuvithsithsa ci kaye kombiwire ko diywi dya Nyambi, ci eyi i moniwa ka ya tendiwire penu yo ku twethsa ku moniwa.
4Ko thsitawo Abele wa tupwerire Nyambi thsiyambero thsothsiwa kupita thsa Kaine. Karo ko thsitawo Abele wa shangariwire ci munu o muwawa, inene Nyambi wa tamburire ekunda yenthzi. Ko thsitawo, Abele ko ku amba a amba no pano tu di, shaanga ikare ci wa fa kare.
5Ko thsitawo Enoke ka a fire, unone shime a twariwire ku wiru o ku di oyumi. Ka a waniwire karo, inene Nyambi wa mu shimbire. O ku shime ku twariwa ku wiru, Mañoro aa monithsa ci oyu munu wa shangariwire kwa Nyambi. 6Tumba i tawa ku roerithsa Nyambi ko kupira thsitawo. Inene o ku keya kwa Nyambi aa roera ku tawa ci Nyambi kwaa di, no ku tawa ci aa pa muyambo awa a na mu fotafota nene.
7Nedi ko thsitawo Nuwe ou a yuverire Nyambi ou a mu nomenithsire yenu o ku i shime ku monahara. Wa umbire areka ku yoyithsa rupathsi rwenthzi ku dimina dyodikuru. Ko thsitawo thsenthzi wa raturire kaye, karo wa tamburire owawa ou u na waniwa ko thsitawo.
8Nedi ko thsitawo Aburahama ou a yuverire Nyambi ou a mwithsire ci a thze ku ditunga edi a mu kumbwethzire Nyambi ci kenge mba a di mu pa. Wa katukire no ku thza, shaanga ci ka a dimukire oku a thzire. 9Ko thsitawo Aburahama wa thzire no ku ka tunga eci mutundakure muya mu ditunga a mu kumbwethzire Nyambi. Wa ka yoyire mu matende, karo a Isaka na Jakovo nawo a yoyiremo mu matende, awa tamburire ethso thsikumbwethzo eci Aburahama. 10Shime a tatererire thsikuña thso mishisho, ethsi thsa funderiwire no ku umbiwa kwa Nyambi.
11Ko thsitawo Aburahama wa twethsire kwereka mwana shaanga ci wa kuruparire nene, karo munuwenthzi Sara wekarire mvumi. Eyi ya dikarire pakuninga ci wa kuruperire Nyambi ci kenge a ku mu pa eyi a mu kumbwethzire.#11.11 Amweya aa thzi toroka ci: “Ko thsitawo wa tamburire okoro o ku thza poremu, shaanga ci wekarire mvumi karo o ku na kurupara nene, pakuninga ci wa kuruperire Nyambi kenge a ku mu pa eyi a mu kumbwethzire.” 12Mweyo, kwa Aburahama, oyu wekarire eci wa kufa, ku kwenthzi aye yofoci kwa tundire anahoka owangi nene eci matungwethzi o ku wiru, nji eci ruheke ro pa diya dyo diwate.
13Awa anu awa wahe a fererire mu thsitawo. Ka tamburire eyi a kumbwethziwire, unone a i kambekethzire pohuma no ku i nyanyukera o kwa di kokure, no ku citawera ci nedi matundakure karo nedi enda mu kaye. 14Anu o ku amba kengeyo aa monithsa ci ko ku fota a fota ditunga dyo. 15Nga shime a anekerangire yo diya ditunga muya a ka tundire, nga a hukire. 16Uno honi shime a fotire pohuma ditunga dyodiwa kupita kaye, adyo dyo ku wiru. Mweyo, Nyambi ka a fire honyi kwithsiwa ci Nyambi wo, inene na a wa roithsera kare thsikuña.
17Ko thsitawo Aburahama wa tupurire mwanenthzi Isaka kwikara thsiyambero ou a mu erekire Nyambi. Aburahama oyu wa tamburire ekumbwethzo ya Nyambi wa ciroithserire ku tenda thsiyambero mwanenthzi pakamutwa Isaka, 18shaanga ci Nyambi shime a mu amberire ci: “Kwa Isaka ko kwa ku tunderera anahoka oe.” 19Aburahama shime a anekerire ci Isaka shaanga nga waa fire, Nyambi nga wa twethsire ku mu pindura kwafu. Mweyo, ko dikuñwa dyo kengeyo, Aburahama wa tamburire mwanenthzi eci o kupinduka kwafu.
20Ko thsitawo Isaka wa fiyawerire Jakovo na Isau keyi yo mwoyo wo o ku rupara.
21Ko thsitawo Jakovo o ku kokangera, wa fiyawerire ana Josefa aidi, wa thsakaterire pa mutaa wenthzi o ku rombera Nyambi.
22Ko thsitawo Josefa o ku di po pepi no ku fa wa ambire keyi yo diyaru dyo Maisiraele mu Egepita, wa wa pire thsiraerera ci a ku shimbe eshoko yenthzi ou mba yaruka mu Egepita.
23Ko thsitawo ashemi a Mushe a mu horekire maonda ahatu ku tunda pa kwerekiwa, inene shime a mu monine ci nedi mwana o muwa nene, karo ka yapire thsiraerera thsa fumu.
24Ko thsitawo Mushe ou a kurire, wa kanine kwithsiwa ci mwana mwana Faro o mbuyama. 25Wa cihangwerire ku nyandera pofoci no mbunga thza Nyambi, kupita ecikora yo thsivi yo mu thsikati thsothsipu. 26Wa anekerire ci ku di nawa ku tukathzaniwera Krisitu kupita rufumo ro mu Egepita, inene shime a tatererire muyambo ou mba a tambura ku rupara. 27Ko thsitawo Mushe wa tundire mu Egepita ko kukana ku yapa oanthzi wa fumu. Uno honi wekarire no muooto pakuninga ci shime a monine Nyambi shimoniwa. 28Karo ko thsitawo Mushe wa tendire Paseka no ku raerera Maisiraele ci a wethse onyinga pa mathsero o manthzio o, ci kangeru ko difu katere kepae edi wo wakwerume.
29Ko thsitawo Maisiraele a cinakanine Diwate Dyodikihu ko ku enda pa mburundumburundu, unone Maegepita ou a erekire ku wa shupwera, wahe a fire ku meyu.
30Ko thsitawo mamota a Jeriko a wire, munyima thzo ku a thzinguruka Maisiraele mayuwa o mutanu na edi.
31Ko thsitawo Rahaba o diherehere ka a fire no waya a kanine ku yuvera Nyambi, inene shime a tamburire nawa tuya tunenga.
32Ene ni shumune ku amba nji? Ka ni di no thsikati thso ku amba keyi ya Gidioni na Baraki, ya Samisoni na Jefuta, neyi ya Davida na Samuele nakwakukethza. 33Ko thsitawo awa anu a kuparire matunga, a tendire yoiwawa no ku wana eyi a kumbwethzire Nyambi. A vukire tunwa to nyime. 34A thzimine midiro thzothzikoro, karo a parire ku kwipaiwa no myere. A tanarithsiwire mu kufaratera kwo, karo a tanarire mu mvo shime ku kuma pa ku othza mashwarare o matundakure. 35Ko thsitawo ambuyama amweya a pindweriwire afu wo kwafu.
Amweya a yuvithsiwire kukora pa ku kana kwo ku tawa ku rukururiwa. A tendire kengeyo ko ku fota ci nga a ku pindukere mwoyo ouwa munyima thzo ku fa. 36Amweya ku kwo a teururiwire no ku mwashuriwa, awa amweya angiwire no madyenge no ku pakiwa mu kamenga. 37Epaiwire ko ku povauriwa no mawe, a tetauriwire epinthzi idi idi no thsaha, amweya epaiwire no myere. Amweya a yembaerire o kwa na vata pohuma etumba yo mangu no membe, a pirukire ahepwe, a nyandithsiwire no ku tendiwa dyodimango. 38Awa anu kaye ka ka wa roerire! Shime a yembaerire mu makunguthsitu no mu mikinya, no ku yoya mu mahorongo no mu mateke o mu muve.
39Awa anu wahe ekarire no kapupo kokawa mukaci ko thsitawo thso, unone kwithsa shaanga yofoci ku kwo oyu wa tamburire eyi a kumbwethzire Nyambi. 40Inene Nyambi wa tu cekerire enu yoiwa kupita eyo, ci nga a ku tendiwa o kwononoka ko kupira atwe.
Currently Selected:
Maheveru 11: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company