Mberaand 14

Abram, maad we fa Melkisedek

1A jeg’a jamaane, Amrafel fee o maad Sine’aar#14:1 Sine’aar refu ref saax le Babilon., Aryok fee o maad Elasaar, Kedorla’omeer fee o maad Elam fa Tiide’al fee o maad Goyiim, 2a mbokatoora, a nqire’ik fa Beera fee o maad Sodoom fa Birsa fee o maad Gomoor fa Sinab fee o maad Adma fa Semebeer fee o maad Seboyiim fo o maad oxe no saax le Bela refna ref saax le na xoyeel Sowaar. 3Weene a mbokat’a a yaj den na yulanq alaa Sidiim, maa o maag o Xanju laa a jangatna ndiiki. 4Kaa ƥoxotoox’u na Kedorla’omeer boo xa kiid xarɓaxay fo xa kiid xa ƭaq, soo no hiid xarɓaxay fo o hiid o dadkandeer ole da siiknoor fo ten. 5Kaa koy, no hiid xarɓaxay fo o hiid o nahkandeer ole, Kedorla’omeer fo maad we mbokatoor’ina fo ten a mbadiida soo a nqawit Reerefa we Asterot-Karnayiim, Susima we, da nqawit a den Ham, Ee-em we, da nqawit a den Saawe-Kiryatayiim, 6soo Hoohori we, da nqawit a den na xa coong axe den Seyiir boo a waaƭik ngariñ naa Paaraan paam a koƥ-a-ƥor alaa. 7Cinj kaaga, a nomtooxiida, boo a mbadiid En-Mispat refna ref Kades, soo a nqawit maaga Aa-amalek we no fiisel ole den fop fo Aa-amori we ndalna Hasason-Tamaar. 8Maaga, o maad oxe Sodoom, oxe Gomoor, oxe Adma, oxe Seboyiim fo xe Bela refna ref Sowaar a mbokatoora soo a njagandooxanit a ñoq ale na yulanq alaa Sidiim. 9A siiknoora fa Kedorla’omeer fee o maad Elam fa Tiide’al fee o maad Goyiim fa Amrafel fee o maad Sine’aar fa Aryok fee o maad Elasaar. Maad nahuk a siiknoora fo maad ɓetuk. 10A yulanq alaa Sidiim kaa may’u kas kaa njegna ƭok. O maad oxe Sodoom fo xe Gomoor a ngoda o joor soo a yen taaga. We yoqna a ƈufa farna fo o joong olaa. 11We nqawna a njanga kalal ke kam Sodoom fa Gomoor fop fo ke lakas we a yaxandoox’ina, cinj kaaga, a ndeta. 12A ndam’a itam a Lot fee o ƥiy no ndeɓ Abram, a njang ke ta jegna fop soo a ndet, yaam oxeene Sodoom a genoogu.

13O leng oxaa ɓostooxna a gara, a yegnin a Abram o Hebre xe genoogna no kariñ kaa Mamre. Mamre o Aa-amori a reeƭu, a ref o pog Eskol fa Aneer we nqaariitoor’ina fa Abram. 14Ndak fo ndak, ye Abram a yegna yee o pog um kaa ɓisel took o hup doole, a fokata goor teemeed tadik fo goor xarɓaxay fo goor ɓetuu daduk no we moƴna o njambaar no dag we ten ndimteena no mbind um, soo a daab maad waaga boo Dan. 15A xaaja a yaj ale ten, ndax ta song maad weene o yeng, ten fo dag we ten. A xawa a den, soo a daabaa a den boo Hoba fee garitna no ɓemb-roog o janoon ole Damaas. 16A nomtiida kalal ke fop, a nomtiid itam a Lot fee o pog um fo o jeg um fo rew we fa xeet fee.

17Cinj ye Abram a xawna a Kedorla’omeer fo maad we ta yoonit’ina boo a nomtooxiidaa, o maad oxe Sodoom a xetooxiidaan na yulanq alaa Saawe refna ref a yulanq ale no Maad we.

18Melkisedek#14:18 Melkisedek kaa tekit «o maad no cofel», ɗeeti Kt 110:4. Saleem xoyoogate Yeerusaleem. fee o maad Saleem a ɓisiidaan puuru fa biiñ. Ten koy kaa reeƭu o saasadax Roog fee Took-ee-took.#Heb 7:1-10 19A barke’a a Abram ee:

«Yaasam Roog fee Took-ee-took sakna asamaan fo lanq a barke a Abram! 20Tedaanga a hela Roog fee Took-ee-took! Ten fee ɓoxotna fañ we wo na xa ƥay of.»

Maaga, Abram a cooxaan a seek xarɓaxayandeer ale no ke ta jegna fop.

21O maad oxe Sodoom a laya a Abram ee:

«Ngela ɓoxotaam wiin es, jang halal fee!»

22Abram a doona o maad oxe Sodoom ee:

«Mexey jooxaa o Yaal oxe Roog fee Took-ee-took sakna asamaan fo lanq: 23Duqkiim dara no jeg of! Refee o sayoom mbaat o kumir xa ñaaƭ, yaam ndik o lay ee: ‹Mi taxu Abram a jeg halal.› 24Soxla’iim teen dara, a refangee kaa we yoonna fa mi a ñaamna fo a las Aneer fa Eskol fa Mamre we ndimle’iidaxama. Weene xan a njang a las den.»

Currently Selected:

Mberaand 14: SRR23

Highlight

Copy