Mberaand 9

Ke Roog a regna a Nowe

1Roog a barke’a a Nowe fo xa ƥeem, a lay a den ee: «Ndimikyo, mayƭandik lanq ke.#1:28 2Muumeen ke na koƥ ale fop fo tiiƭ ke na asamaan fop fo ke na ɓoodaa a lanq fop fo liƥ ke no maag ole fop xan a ndiidaa a nuun, a saɗar a nuun. 3Ke na yo’nooxaa fop too a ñoowaa fat a refik ñaamel nuun. Ci’aanum a nuun ne fi’tanuuma no duufe le. 4Kaa koy, nu ñaamkee med, a tegeƴ fo fo’oy um, yaam fo’oy saqu o ñoow.#Paɗ 7:26-27; 17:10-14; 19:26; Cang 12:16, 23; 15:23 5Fat nu yeg fo and koy ee muumeen fuu warna o kiin, o ñis um a rabditkaa ole no kiin oxeene. O kiin oxuu warna o kiin o lakas itam, o ñis um a rabditkaa ole no kiin oxeene.

6O kiin oxuu ɓaxna fo’oy no kend um, xan o lakas a ɓax fo’oy um, yaam Roog kaa sak o kiin ta ref nitaal um.#1:26; Sut 20:13 7Nuun o mat, ndimikyo, mayƭandik lanq ke.»#1:28

8Roog a layahina a Nowe fo xa ƥeem ee: 9«Mi koy, xam dalin fa nuun ngiɓoor, dalnin fo xa taan nuun 10fo pindel ke ndefna fa nuun a ñoowaa, xotitna no tiiƭ ke boo no cegel ke fo muumeen ke fop took lanq ke fo fop ke sutoorna na kaal ale, muumeen ke no lanq ke fop. 11Dalnaam ngiɓoor es fa nuun. Njer nuu refna saŋkitkataand poofi ke no jaɓ ole, too o jaɓ jegkatee ndax ta yaq lanq ke.» 12Roog a laya yee: «Keeke refu o anddiloor ole no ngiɓoor ne dalnuuma a ndeer es fa nuun fo pindel ke na ñoowaa fop ndefna fa nuun yaam suk ke na ngaraa: 13Mexe doonaa a ñang-ee-ñang es na eel ake, ta ref o anddiloor ngiɓoor ne ndeer es fo lanq ke. 14Yaa um fokatkaa a eel ake da yooroox lanq ke, xan a ñang-ee-ñang ale a feeñ na eel ake. 15Maaga, xam wetandoox ngiɓoor es fa nuun fo pindel ke na ñoowaa fop, too poofi ke mbi’katee o jaɓ muk ndax da saŋik fop ke njegna njer. 16A ñang-ee-ñang ale xan a feeñ na eel ake, um ɗeetan ndax um wetandoox ngiɓoor ne na refkaa boo faw a ndeer Roog fo pindel ke na ñoowaa fop took lanq ke.» 17Roog a laya a Nowe yee: «Keene refu o anddiloor ole no ngiɓoor ne dalnuuma a ndeer es fo fop ke njegna njer too a ref took lanq ke.»

Xa ƥiy xa tadaq axe Nowe

18Xa ƥiy axe Nowe sutoor’ina na kaal ale ndeeƭu Seem fa Xaam fa Yafet. Xaam reeƭu faap Kanaan. 19Xa ƥiy xa tadaq axeene na Nowe axu qeet ke na adna fee fop.

20Nowe a refa no xooxaa lanq ke, soo a jimb a ƭing taxar biiñ. 21A yera biiñ boo a way, soo a yoq o ƥor kam ƭiif um. 22Xaam fee faap Kanaan a ga’a o ƥor ole faap um a yoqna, soo a ret tafil a laykin fog faap we ten. 23Maaga, Seem fa Yafet a nqota sabadoor, a mbi’in na kand den, a ñaaƴtaa o jiijing soo a ndokin a faap den. Kaa nquun’u boo nga’ee o ƥor ole faap den a yoq’ina. 24Yaa Nowe a salidna no way le ten, a yega ke mbat-fo-ɗeen ne ten a fi’’uuna. 25Maaga, a laya yee:

«Kanaan a salooxe,

fat a ref no maag we ten o paɗ oxe moƴna o hees!»

26A layahina yee:

«O Yaal oxe Roog fee Seem a hela o simatel.

Yaasam Kanaan a ref o paɗ Seem!

27Yaasam Roog a xayand o jeg Yafet!

Yaasam ta gen no ƭiif ke Seem,

soo Kanaan a ref o paɗ den!»

28Ye o jaɓ ole a faafna, Nowe a ñoowahina xa kiid teemeed tadik fo xa kiid qarɓeen ƥetik. 29Nowe a ñoowa fop oo fop xa kiid teemeed ɓetuu nahik fo xa kiid qarɓeen ƥetik, soo a xonkaa.

Currently Selected:

Mberaand 9: SRR23

Highlight

Copy