Saŋ 3

Yeesu fa Nikodeem

1A jeg’a koy o koor oxaa fogna no Farisiya we too a ne’el Nikodeem, a ref o leng no kelfa ke no Yaawuur we. 2A gara a soƥiid a Yeesu o yeng o njeek, soo a layin ee:

«O Caajangin oxe! I anda xil ee o caajangin o inooru na Roog refo, yaam o leng waagee o fi xa anddiloor axe o fi’aa, Roog a refangee fo ten.»

3Yeesu a doonaan ee:

«No ndigil, no ndigil, mexe layang ee: O kiin waagee o ga Maat ne Roog a refangee kaa rimel o rimel o xas olaa inoorna na asamaan.»

4Nikodeem a layaan ee:

«Ca, nam o kiin a waage waag o rimit yaa ta nogoyna? Ndax a waaga o nomtoox no fud ya um, soo a rimatinel?»

5Yeesu a doonaan ee:

«No ndigil, no ndigil, mexe layang ee: O kiin waagee o rok no Maat ne Roog, too rimtaand foofi fo Yiif le Roog. 6Kuu cer a ndimna no cer a fogu, too kuu hatna no Yiif le Roog, no ten a fogu. 7Baa ke layoonga yee o rimel o xas waru a nuun, a jaaxɗandong. 8Nqeñ ne kaa wuuɗaa muu feluuna, o nanaa ñax le, ndaa koy andiro me ta inooraa, ne’atiim me ta jofaa. Neene deŋ a reftu no kiin oxaa rimteena Yiif le Roog.»

9Nikodeem a dakooxaan o lay ee:

«Nam kaaga a waagu jegit?»

10Yeesu a doonaan ee:

«Coo, o ref o caajangin o maak oxe Isra’el, too andiro keene! 11No ndigil, no ndigil, mexe layang ee: Ke i andna i laytaa, too a refangee kaa i ndoonna a ngid, i naangee o seede’aa lakas, ndaa koy nu njaɓee ke i seede’aa. 12Nu ngimangee ye layuuma a nuun ke jofna no ke refna took lanq ke koy, nam nu ngimitkaa yaa layuuma a nuun kaa jofna no kaa refna na asamaan? 13O leng mosee o ŋaay na asamaan, a refangee oxe fudooritna na asamaan, ta ref o Ƥeenqe no kiin oxe genna na asamaan. 14O Ƥeenqe no kiin oxe a wara o yoɗtel ne Moyiis a yoɗit’ina fangool faa na koƥ-a-ƥor alaa,#Lim 21:9 15ndax oxuu gimna no Ƥeenqe a jeg o ñoow o fagkeer ole. 16Yaam Roog a fexa adna fee boo a ci’it o Ƥiy o leng kut onqe ta jegna, ndax oxuu gimna no ten saŋkooxkee muk, ndaa ndax ta jeg o ñoow o fagkeer ole. 17Roog koy, luliidee o Ƥeem na adna fee, ndax ta hate adna fee, ndaa ndax ta muclin na pexey o Ƥeem. 18Oxuu gimna no ten hate’kaand, ndaa oxuu gimeerna a hate’e boo a ƴut, yaam ne ta gimeerna no Ƥiy o leng kut onqe Roog. 19O nanangaa hate faaga koy, kaa ye a qoolaand ale a garna na adna fee, wiin we kaa nqaƴin, a njil o niɓaan ole, yaam a pi den kaa mbaaxaƭar. 20Oxuu refna a anda yee oxaa na fi’aa paaxeer bugee maa xoolna, too kaa laqtooxaa a qoolaand ale, yaam ndik a pi um a nguytoox. 21Oxe na ñaaƴaa no ndigil ne koy, kaa garaa na qoolaand ale, ndax fop a nga ee Roog na ɗoxaa a pi um.»

Saŋ o Paabatiise xe a dakooxa o seede’an a Yeesu

22Cinj kaaga, Yeesu a yoona fo daalbe um, da ndet no jegel olaa Yudee. A refa maaga fa den, a batiise’aa. 23Saŋ o mat, oxaa batiise’tooga Enon paam Saliim, yaam maaga kaa may’u foofi lool, too wiin a ngarooga ndax da mbatiise’el. 24Na jamaane faaga, Saŋ ɓek’afulaand kaso.#Mace 14:3; Mark 6:17; Lik 3:19-20

25Daalbe we Saŋ a ñimatira fo o Yaawuur no kaa jofna no njap. 26A ngara me Saŋ, soo a layin ee:

«O Caajangin oxe! Oxe reeƭna fa wo ye i ndefaa kaltaa o xuluɓ ole Yordaan, too o seede’an’un de, kaa batiise’aa ndiiki. Wiin we fop, maaga a njoobatu.»

27Saŋ a doona a den ee:

«O kiin waagee o jang colu muud fee ta daawitna na Roog. 28Nuun weeke ngeenooxna, nu maada ye layuuma a koom ee: Refiim Kiristaa fee, o Muumucil oxe regteena. Oxe halaniiduuna a ƭat um soom refum.#1:20 29O kor-no-kulook oxe jegu o kulook oxe, ndaa xaariit fee ten na diikooxan soo a geenoox, a naaga o jegaa o ɗaay o maak, yaa ta nanna o ñuxur um. Neene koy, o ɗaay ole mi a nandu, too ten taxu ta may boo a ɓaxoox. 30Ten fa xoox um kaa war o yoɗoox, mi o mat um fudoox.»

Oxe hatna took

31«Oxe inoorna took hupu fop. Oxe hatna a lanq, a lanq rek a refu, too ke ta laytaa, a lanq a hataa. Oxe hatna took hupu fop: 32Kaa layaa ke ta ga’na, a nanin, ndaa koy o leng jaɓee seede um. 33Oxe jaɓna seede um o mat, a lalta a qool qac ee Roog ndigil oo. 34Oxe Roog a lulna, a ƭelem Roog a layaa, yaam Roog naagee o hendaƭooxaa yaa ta ci’taa Yiif le ten. 35Faap fee kaa fex o Ƥeem boo a xaƴtin fop.#Mace 11:27; Lik 10:22 36Oxuu gimna no Ƥeenqe, a jega o ñoow o fagkeer ole. Oxuu nananeeruuna koy, jegkee o ñoow oleene, too fuux le Roog oxe cay took um.»

Currently Selected:

Saŋ 3: SRR23

Highlight

Copy