Saŋ 7
7
Xa teɓ axe Yeesu ngimee no ten
1A cinj kaaga, Yeesu a dalfooxa o widaa Galile. Bug’ee o wirlooxaa kam Yudee, yaam ne Yaawuur we a mbaaƭoogna maa da mbartuuna. 2Ndoofeen naa no Yaawuur waa, refna Xew fee no ƭiif ke, kaa matiid’u.#Paɗ 23:34; Cang 16:13 3Xa teɓ um a soƥiidaan a layin ee:
«Ga’aa koy, ndiiki waagaa o ret Yudee, ndax daalbe of fop a mbaag o nga a pi of. 4Waay waay, oxaa bugna o andel, naagee o ɗuuɗaa a pi um! O naagangaa o fi’aa ke o fi’aa kañ, fi’i boo fop a nga’ong.»
5O nanangaan koy, kaa xa teɓ um sax ngim’ee no ten. 6Yeesu a laya a den ee:
«Hap es fadafulee, nuun koy hap nuun mosee o fadaƭar. 7Adna fee mbaagee o sib a nuun. Mi koy, mbaagiraam o ñak o sib, yaam kaam seede’anaa a den a qool qac ee ke da mbi’aa faaxee. 8Nu mbaaga o ndet, mi o mat retkafuliim, yaam hap es fadafulee.»
9Yaa ta layna a den a ƭelem akaaga, a yoqa Galile.
Yeesu na Xew fee no ƭiif ke
10Yaa xa teɓ axe Yeesu a ndetna na xew faa, a reta ten itam. Ret’ee koy ndax ta laltinoox, ndaa na pet. 11Yaawuur we kaa mbaaƭoogun na xew fee, too a laamtiraa yee:
«Ndi mam a refu ref?»
12A jeg’a ñimatir ƭomu a ndeer no wiin we no kaa jofna no ten. Leng we kaa layoogu yee: «O kiin o paax oo.» Lakas we o mat a ndamtin na: «Heey, ha’aa! Oxeene na ruuxandaa moƴ-o-jaak we fop a koƥ.» 13O leng jaɓ’ee o lay ke ta xalaataa tigi no ten, yaam a saɗaraa Yaawuur we.
14Yaa xew faa a rokna a ndeer, Yeesu a reta no Mbind Roog naa, a jangnaa. 15A cangin ale Yeesu a bet’a Yaawuur we boo da ndamtin na:
«Nam a andtu a Pind a Tedu ke, too goƭee teen na cang?»
16Yeesu a doona a den ee:
«Refee yee na mi fa xoox es ke um jangnaa a hatu. Oxe hata no xe luliidaxama. 17Oxuu bugna o fi ke Roog a bugna, xan a and ndax a cangin ale mi na Roog a hatu ndax nam, ndi mi na kañaa kañ a xoox es. 18Oxe na kañaa a xoox um, gon um a bugu o jootand, ndaa oxe na waaƭaa gon no xe luluuna a joot, oxaaga ndigil kak a layaa, too njofaƭar leng refee no ten. 19Kaa refee yee Moyiis cooxu a nuun kebil ke? O leng na nuun boo nu nqet naagee o fi’aa ke kebil ke a simitna. Xar taxu nu mbaaƭaa maa nu saktaxama pexey?»
20Wiin waa ndeeƭna maaga a layaan ee:
«Too refee kaa jini a ref fa wo! An na waaƭaa maa ta saktoonga pexey ee?»
21Yeesu a doona a den ee:
«Mexey fi’a a pi katil a leng kut, soo nu mboor a kid tee kaa nu njaaxiɗ. 22Moyiis a cooxa a nuun nquc – refee koy sax ee no ten a inooru, ndaa no daan maak we – soo nu nqucnaa na bes fee na ñootnax ale.#Mbr 17:10; Paɗ 12:3 23Nu naangangaa o nqucaa o kiin na bes fee na ñootnax ale, yaam ndik kebil ke Moyiis a ƭapel, xar taxu nu mbuuxanaam yaam ne wodanduuma o kiin bo tee ceŋ na bes fee na ñootnax ale?#5:9 24Baa o nand a taxat nu ƥanjaa, naangyo ndoonaa a kid nuun no cofel.»
Ndax Yeesu refu Kiristaa fee?
25Leng-leng no waa ngenna Yeerusaleem a layooga yee:
«Andum oxeeke kaa refee oxe da mbaaƭoogna, ndax da mbarin? 26E, soo ta layaa neeke, too o kiin saɗiran o lay ee a ngid of lanq key teen. Too ree aa-adax we kaa ngimat ee o ten refu Kiristaa fee, o Muumucil oxe regteeena. 27Kaa koy, andiim ne ta saxitkaa, yaam oxeeke i anda o rimel um, too yaa Kiristaa fee a garkaa, o leng andkee me ta hatkaa.»
28Yeesu a foda kam Mbind Roog naa, a lay a maak ee:
«Kaa nu mboog ee nu andaxam, and me hatuuma! Atiim mene a xoox es. Oxe luliidaxama koy, ndigil kak a layaa, ndaa nu andee oxeene. 29Mi o mat andaanum, yaam no ten inoorum, too o ten luliidaxam.»
30Kaa mbaaƭoogu maa da ndamtuuna, ndaa o leng duq’iran, yaam hap um fad’afulee. 31Mayu no wiin waa a ngima no ten, too a layaa yee: «Kiristaa fee a garangaa, ndax xan a fi xa anddiloor xa kupu axe oxene a fi’na?»
Alkaati a lule, ndax da ndam a Yeesu
32Kaa wiin waa a layoogna na Yeesu a naaga xot no nof no Farisiya waa. A ndalfooxa o nga’ir fo saasadax maak waa, soo a lul alkaati, ndax da ndet a ndam a Yeesu. 33Yeesu a laya yee:
«Miñkatiim fa nuun, yaam kaam retaa maa no xaa lulaxama. 34Xan nu mbaaƭaam, ndaa nu nga’kiraam, too nu mbaagkee o ngar me um refkaa.»
35Naaga, Yaawuur we a layra yee:
«Ndi mam a rokkaa boo i mbaagkiran o nga? Ndax kaa retaa kam teeru ke no Geegeres we, maa ta waagna o soƥ xeet fee in pictoorna, soo a jangin itam we ndefeerna Yaawuur? 36Xar a ƭelem akene ta layna a tektu: ‹Xan nu mbaaƭaam, ndaa nu nga’kiraam, too nu mbaagkee o ngar me um refkaa›?»
A cur foofi fo ñoow
37Na bes fa mbalakaand faa, refna ref bes faa moƴna o magin na xew faa, Yeesu a inooxa a geenoox, a lay a maak ee:
«Oxuu hoɗomeena, fat a gar a yer me mi!#Paɗ 23:36 38Oxuu gimna na mi, xan a cur foofi kaa na ñoownaa a mbalit kam um, ne a Pind a Tedu ke a laytuuna.»#Hes 47:1; Sak 14:8
39Yeesu koy, Yiif Tedu le na ci’keel we na ngimkaa no ten a ne’oogu, ye ta layna keene. Na waxtu faaga, Yiif Tedu le ci’it’afulaand, yaam ne Yeesu a ɓoxot’afulandeena o ndam.
Mayu a xalaate na Yeesu
40Yaa wiin waa a nanna a ƭelem akaaga, leng-leng a laya yee:
«Oxeeke o mat refu o Tuleer oxe.»
41Lakas we koy, kaa layoogu yee:
«Ten refu Kiristaa fee o Muumucil oxe regteena.»
Wene a mbodit mene a ndamtin na:
«Ca! Ndax Kiristaa fee a waaga o hat Galile? 42Kaa a Pind a Tedu ke layee yee Kiristaa fee no kurcala Dawid a hatkaa? Kaa ndoonee teen ee Betleheem fee refna teeru faa Dawid a waru o inoor?»#2Sam 7:12; Mise 5:1
43Wiin waa a nqaajoora yaam o ten. 44Leng we kaa mbug’un o ndam a mbegnin, ndaa o leng duq’iran.
Ngimaƭar ne no aa-adax we no Yaawuur we
45Alkaati ke luliid’eena a naanga temel a nomtoox maa no saasadax maak waa fo Farisiya waa. Yaa da mbadiidaa mbadiid rek, ngoor ke a laamta a den ee:
«Xar taxu nu ngartiran?»
46Alkaati kaa a ndoona a den ee:
«Kaa naa adna gode ɓaax, o kiin mosee o lay fa lay fa nqentu naana!»
47Farisiya waa a laya a den ee:
«Mbaar refee nuun itam kaa a qoox nuun a laxadel? 48Kaa nu mos o nga o leng no aa-adax we mbaat o leng no Farisiya we oxaa gimna no ten! 49We mbatna o mbid a ƭak-ƭaknanan, refee kaa ndef wiin halakooxu waa andeerna dara no kebil ke Moyiis.»
50Nikodeem fee mos’ina o inoox, a ret maa Yeesu, too a ref o leng na den, a laya a den ee:#3:1-2
51«Ndax kebil ke Moyiis i mbarakooxna a njaɓa o kiin a xawel, too xaƴaand a xoxit a xoox um, soo ke ta fi’na a ɓaalel?»
52We ta laytoogna a ndoonaan ee:
«Mbaar refee wo itam o Kaagalile refo? Hori boo ga, ndax o tuleer a mosa o hat Galile.»
[53Cinj kaaga, o kiin oo kiin a xaada.
Currently Selected:
Saŋ 7: SRR23
Highlight
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal
