Lik 24

A qontax ale Yeesu

(ɗeeti Mace 28:1-10; Mark 16:1-8; Saŋ 20:1-10)

1No nqes naa na diiboor faa, rew we a ndeta ƥiiɓ teel na mboy alaa, a saq ƭuumooxel ke da nqendand’ina boo a ƈut. 2Yaa da mbadna, a soƥa ɓil le a mboy ale a giŋlit’eena a berengel. 3A ndoka kam fee, ndaa soƥee maaga o dal ole no Yaal oxe Yeesu. 4Rew we and’ee ke da mbar’ina o mbi. Maaga, goor ɗik a mbeeñooxa a den, a saq toki kaa na meleƈaa. 5Rew we a ndiid’a lool, too a ngunga a lanq. Kaa koy, goor we a laya a den ee:

«Xar taxu nu mbaaƭaa oxe na ñoowaa a ndeer no xon we? 6Refatee mene, a xontooxa. Mbetandooxyo ne ta layit’uuna a nuun ye ta refna Galile.#9:22; 18:31-33; Mace 16:21; 17:22-23; 20:18-19; Mark 8:31; 9:31; 10:33-34 7Kaa lay’u yee: ‹O Ƥeenqe no kiin oxe a ware o ɓoxot na xa ƥay axe no baabakaad we, a rengel na kurwaa, soo a xontoox no ñaal ndadkandeer naa.› »

8Maaga, a mbetandooxa ke Yeesu a lay’ina. 9Yaa da ngatna na mboy alaa, a mbetandooxa kaaga fop daalbe xarɓaxay fo o taalbe o leng oxaa fo lakas we fop. 10We lay’ina apootar waa kaaga ndeeƭu Mari-Magdala fa Yowana fa Mari fee ya Saak fo lakas we ndeeƭna fa den. 11Kaa koy, fa lay faaga a reeƭa fa lay fa ñaku xoox na den, too ngim’ee ke rew we a lay’ina. 12Piyeer o mat a inooxa ndak fo ndak, a ƴuf na mboy alaa. Yaa ta fadna, a wootnooxa, too a ga’a njoor ne o dal ole a laxasit’eena soom. Maaga, a xaada, too ke xew’ina a bet’aan lool.

Yeesu a feeñooxa daalbe we ten na ƭat Emawus

(ɗeeti Mark 16:12-13)

13Na bes fa leng faaga, daalbe ɗik a ndetooga Emawus, goƭit’ina a Yeerusaleem kilomeet xarɓaxay fo leng, 14a laytaa ke xew’ina fop. 15Yaa da layaa, too a njeetaayaa, Yeesu a daawa a den, soo a yoon fa den. 16A nga’aan, ndaa a jeg’a kaa yaqan’ina a den da anddin. 17Yeesu a laya a den ee:

«Xar nu njeetaaytaa na ƭat ale?»

Maaga, a ngeenooxa, too kam den a faga. 18O leng na den oxaa ne’eena Kelewopaas a doonaan ee:

«Waagaa o gen Yeerusaleem, too andiro ke na xewaa meen na pe akene?»

19Yeesu a laamta yee:

«Xar ee?»

A ndoonaan ee:

«Ke xewna na Yeesu o Naanasaret oxe, reeƭna o tuleer o cegu sañ-sañ na pi fo na fa lay mbaambir Roog fo mbaambir xeet fee fop. 20Yeesu feene, saasadax maak we fo maak we in a ƥoxot’ina, ndax ta hate’el, a warel, soo a rengel na kurwaa. 21Kaa i yaakaaroogu yee o ten na watkaa a Isra’el, ndaa ga’aano, ye keene fop a helko fo fadaa, xaye refu ñaal ndadkandeer ne yaa kaaga a xewna a gar fa xaye. 22Rew leng-leng no we mbogna na in kaa njaaxɗand a in. Kaa ndet na mboy alaa ƥiiɓ teel, 23too soƥee maaga o dal olaa, a nomtooxiid a lay ee malaaka mbeeñooxu a den, soo a yegin a den ee oxe ñoowaa. 24Leng-leng no we ndeeƭna fa in a ndeta na mboy alaa, too a soƥa maaga fop ne rew we a layit’uuna, ndaa taxee da nga’in.» 25Maaga, Yeesu a laya a den ee:

«Nuun soo ñak a yiif, too xeeñ nuun a niid o gim ke na layeel no duleer we fop! 26Ndax Kiristaa fee war’ee o coono’it neene kañ, soo a rokkaa kam o ndam um?»

27Maaga, Yeesu a tektana a den ke lay’eena no kaa farna no ten kam a Pind a Tedu ke fop, a eetit na safe ke Moyiis boo a suur na safe ke no duleer we fop.

28Yaa da matiidaa saate fee da ndetoogna, Yeesu a fi’a nen oxaa bugna o xaajoor fa den. 29Kaa koy, goor we a ndamaan, a layin ee:

«Yoqi fa in, yaam tige oxe yengiidaa, too njeeƈ ne xe mudiidaa.»

Maaga, a roka ndax ta yoq fa den. 30Yaa ta reerna fa den a ñaamaa, a janga mbuuru, too a cinj ye ta gidimna a Roog, a xustaan, a cooxin a den. 31Maaga, a kid den a mbetooxa, too a anddaan. Kaa koy, ndak fo ndak a mo’ta mbaambir den. 32Cinj kaaga, a layrooga a ndeer den ee:

«Ndax xeeñ in ɓut’ee, ye ta layaa fa in na ƭat ale, soo a tektaa a in a Pind a Tedu ke?»

33Na waxtu faaga sax, a inooxa, a nomtoox Yeerusaleem, too a soƥa maaga daalbe xarɓaxay fo o taalbe leng oxaa fo lakas we ndeeƭna fa den, a mbokatoor, a layaa yee:

34«No ndigil, o Yaal oxe a xontooxa, too a feeñooxa a Simoŋ!»

35Den oo, a mbetandooxa we da soƥ’ina maaga ke dal’ina a den na ƭat ale fo ne da anddit’uuna ye ta xustaa mbuuru naa.

Yeesu a dakooxa o feeñoox daalbe um

(ɗeeti Mace 28:16-20; Mark 16:14-18; Saŋ 20:19-23; Pi 1:6-8)

36Yaa da ndefna no layaa kaaga, Yeesu a feeñooxa a den, too a lay a den ee:

«Nu yaaree jam!»

37Den fop a njaaxiɗ’a, too a ndiid, yaam kaa mboog’u yee o qon-o-paaf a nga’aa. 38Kaa koy, Yeesu a laya a den ee:

«Xar taxu nu njaaxiɗ, njeg a yiif-a-ƭak kam nuun? 39Ƭeetyo xa ƥay es fo a caf es: Mi o mat oo! Nduqaamoo, too nga, yaam o qon-o-paaf jegee njer, jegee xa kiiƈ, ne nu nga’tuuna na mi.»

40Yaa ta layna kaaga, a lala a den xa ƥay um fo a caf um. 41Ne da sawar’ina, too a njaaxiɗ boo mbaagee o ngim, Yeesu a laya a den ee:

«Ndax nu njega mene kaa nu ñaamna?»

42Daalbe we a cooxaan o ɗeg liƥ njuɗe. 43A jangaan, soo a ñaamin mbaambir den. 44Cinj kaaga, a laya a den ee:

«Kene refu ke layooguuma a nuun, ye maaduuma o refaa fa nuun, ndax ke bind’eena na mi fop kam a safe ke Moyiis fo na safe ke no duleer we fo na Kim a tedu ke a fadnoox.»

45Maaga, Yeesu a wetana a den a yiif den, ndax da and a Pind a Tedu ke. 46A laya a den ee:

«A binde yee Kiristaa fee a wara o coono, a xontoox a ndeer no xon waa no ñaal ndadkandeer naa, 47soo qeet ke fop a mbaare’el, a eetit Yeerusaleem, ndax da mbes pakaad den a cinj, a ndaaw a baasan ale no pakaad ke no gon um. 48Seede nu ndefu no keene fop. 49Yaaga boog, xam fudniid took nuun ke Faap es a regitna. Kaa koy, yoqyo kam teeru fene boo yaa nu muurkeel doole fee took.»#Pi 1:4

Yeesu a ŋaaya na asamaan

(ɗeeti Mark 16:19-20; Pi 1:9-11)

50Yeesu a ɓisa a den boo Betani, too a yoɗa xa ƥay um, a barke a den.#Pi 1:9-11 51Yaa ta barke’aa a den, a riƈatooxa a den, Roog a yoɗin na asamaan. 52Den o mat, a mbaɗooxaan soo a nomtoox Yeerusaleem fo o ɗaay o maak, 53too a ndefooga kam Mbind Roog ne, a simataa a Roog.

Currently Selected:

Lik 24: SRR23

Highlight

Copy