SAN LUCAS 16
16
Techel tiꞌj junxin mayordomo yaaꞌn baꞌn
1Bix e xiꞌ tkbaꞌn Jesús cye t-xnakꞌatzxin:
—Cxeꞌl nkbaꞌna jun tumel cyey. At junxin akꞌanal tuya jun patrón kꞌina, bix e kꞌoj texin tuꞌn t-xiꞌ tcyeꞌyenxin cykilca tkꞌinemal tpatrónxin. At jun kꞌij oc cykbaꞌn cab xjal te tpatrónxin: “Jtey tmayordomo min tzꞌajben baꞌn. Nuk nbaj tyaaꞌn tpwaka,” tz̈ike. 2Bix e ttxoc jxin kꞌina ja mayordomo, bix e xiꞌ tkbaꞌnxin texin: “¿Ti ttenj tzin nbiꞌna nbaj tyaaꞌna npwaka? Kꞌom tcwenta weya ti ttenj tikꞌch weya at tuj tcwenta, cuma ya miꞌn tzꞌajbentla te n-akꞌanala,” tz̈i tpatrónxin. 3Bix e cub tbisen mayordomo tiꞌj: “¿Ti pjel weya tuꞌn witzꞌja, cuma qꞌuelel tiiꞌn npatróna waakꞌena? Yaaꞌn nakꞌl kena ncjoꞌna, bix at nchꞌixewa oj wakꞌa kanl ncotza. 4Aa, ma tzul tuj ncꞌuꞌja. Cwel nnincꞌuꞌna tiꞌj tuꞌn ttzaj cykꞌoꞌn xjal xtalbil weya tuj cyja oj tel kꞌiꞌn waakꞌena,” tz̈ixin. 5Bixsen e ttxocxin cykilcaj xjal jaaꞌ otk txaꞌ tkꞌoꞌnxin tpwak tpatrónxin te maan. E xiꞌ tkbaꞌnxin te tneel cꞌasbenel: “¿Jteꞌ tey tcꞌasben twitz npatróna?” tz̈ixin. 6Bix e xiꞌ tkbaꞌn: “Ex wiiꞌn weya jun syent bot te aseyt te olivo,” tz̈i. Bix e xiꞌ tkbaꞌn mayordomo te: “Lu tuꞌl lu. Kequey bix tuj ajkelbil kꞌoꞌnqꞌuey juntl uꞌj, bix tzꞌiꞌbacꞌax tuj nuk cincuenta bot,” tz̈ixin. 7Bix e xiꞌ tkanen mayordomo te juntl cꞌasbenel: “Yaj tey, ¿jteꞌ tey tcꞌasben?” tz̈ixin. E xiꞌ tkbaꞌn: “Ex wiiꞌn weya jun syent alma triwa,” tz̈i. Bix e xiꞌ tkbaꞌn mayordomo: “Lu tuꞌl lu. Kꞌoꞌnqꞌuex tuj juntl uꞌj nuk jun mutxꞌ,” tz̈ixin. 8Tej tbinte kꞌina ti otk bint tuꞌn mayordomo, e xiꞌ tkbaꞌnxin: “Jnmayordomiya yaaꞌn baꞌn, pero amale ot bint jun kaꞌ tuꞌn wiꞌja, pero te junx maj ẍbiꞌl, cuma ma cub tbisen tiꞌj tuꞌn titzꞌj yaj,” tz̈ixin―tz̈i Jesús.
Bix e xiꞌ tkbaꞌntl Jesús cye t-xnakꞌatz:
—Ja tumel lu ma txiꞌ nkbaꞌna cyey, tuꞌn t-xiꞌ nyeecꞌana cyey kej xjal yaaꞌn lepchec tiꞌ Dios mas ncub cybisen ti tten tuꞌn cyitzꞌj twitz txꞌotxꞌ cywitzj kej xjal lepchec tiꞌ Dios ncub cybisen ti tten tuꞌn tbint cyten tiꞌ cychunkꞌlal tuj cyaꞌj. 9Tisen te mayordomo oc tipen tiꞌj tuꞌn tajben te cykilcaj at tuj tcwent tuꞌn tcaman tuꞌn tkꞌoj xtalbil mas yaj cyuꞌnj cyuya, jaxse juꞌx cyey, il tiꞌj cꞌoquel cyipena tiꞌj tuꞌn tajben tikꞌch cyey tuꞌn cyela baꞌn te Dios, tuꞌntzen oj cybaja twitz txꞌotxꞌ, cycaman tzuna t-xel tuꞌn Dios tuj cyaꞌj.
10Al ma cuyante tuj jun akꞌuntl chꞌin, jax juꞌx ctcuya tuj jun akꞌuntl nim. Bix al miꞌn tcuyan tuj jun akꞌuntl chꞌin, jax mlay tcuyan tuj jun akꞌuntl nim. 11Ka min ma chi ela baꞌn tuj jchꞌin at cyuyey twitz txꞌotxꞌ, jeyꞌtzen, ¿ti tten tuꞌn toc ke tcꞌuꞌj Dios cyiꞌja tuj jnim tuj cyaꞌj? 12Ka min ma chi cuyana tuj j-akꞌuntl nkꞌoj tuꞌn Dios cyey twitz txꞌotxꞌ, ¿ctzaalpa tkꞌoꞌn Dios t-xel tuj cyaꞌj? Min.
13Mlay tzꞌajben jun akꞌanal te caꞌba patrón. Ka ma tjoy tuꞌn tajben te jun patrón, cyjeltzen tkꞌoꞌn juntl. Bix ka jatz ma takꞌa tiib tuya tcab patrón, cyjeltzen tkꞌoꞌn jtneel. Juꞌtzen tten tuya Dios bix kꞌinemal. Ka tuya cykil cycꞌuꞌja ncheꞌx lpey tiꞌ kꞌinemal, mintzentiiꞌ cyaja tuꞌn cyajbena te Dios―tz̈i Jesús cye t-xnakꞌatzxin.
14Octzen cybiꞌn fariseo cykilcaj e xiꞌ tkbaꞌn Jesús cye t-xnakꞌatz tiꞌj kꞌinemal. Ocx takꞌ kꞌinemal cyexin, bix tuj cywitzxin otk kꞌoj kꞌinemal cyexin tuꞌnj nimxsen ajbenkexin te Dios. Juꞌ tzunj, oc cytzeꞌnxin ja Jesús. 15E xiꞌ tkbaꞌn Jesús cyexin:
—Cywitz xjal nxiꞌ cyyeecꞌa cyiiba ka baꞌn xjalkey. Pero ttzkiꞌn Dios ti niyꞌ tuj cycꞌuꞌja. Nchi ela baꞌn tuj cywitz xjal, pero twitz Dios ejeeꞌy tzuꞌkey. 16Nejl e kꞌoj cyey tley Dios bix cyyol tyolel Dios tuꞌn cynimante. Bix mas yaj ul Juan Bautista te kbalte jbaꞌn tpocbal tuꞌn tul tcawbil Dios, bix tuj ajkelbil nchi txquet cykil xjal tuꞌn cyocx tuj tcawbilxin. 17Pero tuj cyanema cycyꞌiy jtzin tkbaꞌn Dios. Pero mlay chi camana tiꞌj tzin tkbaꞌn Dios. Cyiw tuꞌn t-xitj twitz cyaꞌj bix twitz txꞌotxꞌ, pero mas cyiw tuꞌn tbaj tilel tyol Dios. Tcawbil tyol Dios mlay baj twiꞌ, mi nuket chꞌin tuꞌn tbaj tilel.
Tej tyole Jesús tiꞌj paxjlenel
(Mt. 19:1-12; Mr. 10:1-12)
18Tisen tzunj, tzin cykbaꞌna tumel tuꞌn tcub cypaꞌna cyiiba tuya cyxuꞌla, tuꞌntzen baꞌn cymajey tuya juntl. Pero tzin tkbaꞌn tley Dios, ka ma cub cypaꞌn cyiiba tuya cyxuꞌla bix ka ma chi majey tuya juntl, tzin cybinchaꞌna aj pajlel. Jax juꞌx ka ma maje jun xinak tuya jun xuuj o cub tpaꞌn tiib tuya tchmil, aj pajlel tzin tbinchaꞌn―tz̈i Jesús cye fariseo.
Jun xjal kꞌina bix Lázaro
19Bix e xiꞌ tkbaꞌntl Jesús cye fariseo:
—At junxin xjal kꞌina. Oc tiꞌjxin nukxsen jaj tisen t-xbalen rey bix jawnexsen twiꞌ. Te jaca kꞌij jawnexsen tbel twaxin, bix nuk jaca kꞌij tziyꞌ tninkꞌijxin. 20Bix at juntlxin xjal mebe te junx maj, Lázaro tbixin. Nimxsen txꞌaꞌc tiꞌjxin. Bix e xiꞌ cykꞌaꞌx xjal jaxin ttzi tjaxin kꞌina, tuꞌntzen tkꞌoj chꞌin twaxin. 21Nim e tajbe Lázaro tuꞌn t-xiꞌ twaaꞌn nuk tbuchlel tpan kꞌina el tzꞌak tej nwaaꞌnxin, pero nuk el tcꞌuꞌj tiꞌj. Bix yaaꞌn nuk oꞌcx at takꞌ weyaj, sino jax juꞌx e pon ke txyan te lkꞌbilte twitz txꞌaꞌc tiꞌjxin. 22Tetzen jun kꞌij tej tcyim Lázaro. Bix e xiꞌ kꞌiꞌn cyuꞌn ángel jaaꞌ taꞌ Abraham. Jax juꞌx e cyim kꞌina, bix e cuꞌx maket. 23Jatz e pone kꞌina tuj cynajbil cyimne, bix oc tuj qꞌuixcꞌaj. Tej t-xiꞌ tcyeꞌyenxin, e tilxin Abraham. Nakch tcwaꞌ Abraham, bix tcub Lázaro ttxlajxin. 24Bix e jaw s̈-in kꞌina: “Taat Abraham, najsama, kꞌontz chꞌin lastim weya. Kbanx chꞌin te Lázaro tuꞌn ttzaj tiiꞌn aꞌ weya, ikch nuk tcuꞌx tmuꞌ twiꞌ tkꞌab tuj aꞌ, tuꞌn toc tkꞌoꞌn tiꞌ waakꞌa, tuꞌn tchewex, cuma nimsxen niyꞌx qꞌuixcꞌaj wuꞌna tzalu tuj kꞌakꞌ,” tz̈i kꞌina. 25Pero aj ttzakꞌbeꞌn Abraham: “Nchman, cꞌulel tuj tcꞌuꞌja tej ttena iꞌtza twitz txꞌotxꞌ, nuk te tey e cub ttzyuꞌna cykilca, pero te Lázaro, nuk jaj kaꞌ e kꞌoj te. Pero jaꞌlewe, te te tuꞌn tten tuj tzalajebl. Jatzen tey, tuꞌn ttena tuj qꞌuixcꞌaj. 26Bix yaaꞌn nuk oꞌcx jlu, pero jax juꞌx at jun jul mintiiꞌ tumel jaaꞌle npomnina baj t-xeeꞌ tmij jaaꞌ etoꞌwe, tuꞌntzen ka taj jun xjal tzalu tuꞌn tpon tuyey, mlay tziyꞌx tibaj jul, bix tuꞌntzen mlay tziyꞌtza tzalu kuyena,” tz̈i Abraham. 27Bix e xiꞌ tkbaꞌn kꞌina te Abraham: “Nchman, ka juꞌ ttena, cxeꞌl ncubsaꞌna nwitza tey tuꞌn t-xiꞌ tsmaꞌna Lázaro tja nmana twitz txꞌotxꞌ, 28cuma at jweꞌ witzꞌena, bix waja tuꞌn t-xiꞌ tkꞌumen cye ti ttenj jaaꞌ ntiiniya, tuꞌntzen miꞌn chi cuꞌtz tzalu tuj qꞌuixcꞌaj,” tz̈ixin. 29Bix aj ttzakꞌbeꞌn Abraham: “Min. At tyol Moisés cyuya, bix cyyol cabtl tyolel Dios. Baꞌn toc cybiꞌn,” tz̈i Abraham. 30Pero e xiꞌ tkbaꞌn kꞌina: “Pero mlay tzꞌoc cybiꞌn ke witzꞌena tyol Dios. Najsama, chkꞌonx jun xjal o cyim cyuya, tuꞌntzen toc cybiꞌn, tuꞌn tcyaj cykꞌoꞌn cyil,” tz̈i kꞌina. 31Bix aj ttzakꞌbeꞌn Abraham: “Ka min o tzꞌoc cybiꞌn alcyej e tkba Moisés bix cyej cabtl tyolel Dios, jax mlay tzꞌoc cybiꞌn oj tpon juntl te kbalte tyol Dios, amale njawet itzꞌj jun cyimne juntl maj, bix npon te kbalte,” tz̈i Abraham―tz̈i Jesús cye fariseo, kej xin nim oc cyachen kꞌinemal.
Currently Selected:
SAN LUCAS 16: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
