SAN LUCAS 15
15
Jun techel tiꞌj jun carnel e xiꞌ tzꞌak
(Mt. 18:10-14)
1Cykilca chmol chojentj bix cykilcatl kej yaaꞌn baꞌn tuj cywitz judío, nchi pon lkꞌe tiꞌ Jesús te ebilte tyol. 2Yal tzunkej xin te cloj fariseo cyxol judío bix ke txꞌolbal ley cye judío, e jaw yolenke tiꞌj lu. E xiꞌ cykbaꞌnxin:
—Juꞌx tej xin Jesús, jaan tej xina cyuyaj kej aj ila, hasta nwaaꞌn xina cyuya―tz̈ikexin.
3Bix e xiꞌ tkbaꞌn Jesús jun techel cyexin, tuꞌn tel cyniyꞌ tiꞌj tuꞌn tiken oca tjunen tiibxin cyuya aj il:
4—Jaca juun cylel carnel cyxola, ka at syent tcarnelxin bix ka ma txiꞌ tzꞌak junjil, ¿miꞌmpa cyaj tkꞌoꞌnxin jnoventa y nuevejil jaaꞌ eteꞌjil, tuꞌn t-xiꞌxin jyol tej jil otk cyaj tzꞌak, tuꞌn tcnetjil? 5Oj tcnetjil tuꞌnxin, cjawel tzalajxin, bix cjawel tkꞌoꞌnxin jajil tiꞌ tkulxin, tuꞌn tajjil cyxol tuyajil. 6Bix oj tponxin tjaxin, chi tzaal ttxcoꞌnxin ke tuyaxin bix ke tvesint-xin, bix cxeꞌl tkbaꞌnxin cye: “Chi tzalaj chꞌina wuyena, cuma jncarnela e cyaj tzꞌak, ma cnetjil wuꞌna,” tz̈ixin. 7Tisentzen te cylel njaw tzalaj tiꞌj carnel e cnet tuꞌnxin, juꞌtzen te Dios njaw tzalaj cyiꞌ aj il oj tcyaj cykꞌoꞌn cyil. Cxeꞌl nkbaꞌna cyey, nim tzalajebl at tuj cyaꞌj oj tcyaj tkꞌoꞌn jun aj il til, pero mintiiꞌ tzalajebl cyiꞌj noventa y nueve xjal mintiiꞌ cyil tuj cywitz.
Techel tiꞌj pwak xiꞌ tzꞌak
8Cxeꞌl nkbaꞌna juntl tumel cyey. Ka at jun xuuj at laaj pwak te dracma, bix ka ma txiꞌ tzꞌak jun, ¿miꞌmpa tzꞌoc ttxkoꞌn jun cantil, bix chebe qꞌueletz tmsoꞌnxuj tzꞌis tuj tjaxuj, tuꞌn tcnet? 9Ojtzen tcnet tuꞌnxuj, chi tzaal ttxcoꞌnxuj ke tuyaxuj bix ke tvesint-xuj, bix cxeꞌl tkbaꞌnxuj cye: “Chi tzalaj chꞌina wuyena, cuma jpwak e xiꞌ tzꞌak, ma cnet,” tz̈ixuj. 10Tisen tzunja xuuj lu cjawel tzalaj cyuya tvesint-xuj tiꞌj jun tpwakxuj oj tcnet, cxeꞌl nkbaꞌna cyey, njaw tzalaj Dios cyuya ke t-ángelxin tuj cyaꞌj tiꞌj jun aj il ncyaj tkꞌoꞌn til―tz̈i Jesús cye fariseo bix cye txꞌolbal ley.
Techel tiꞌj junkꞌa cwal el yuwint
11Bix e xiꞌ tkbaꞌn Jesús juntl tumel cye:
—At junxin xjal at caꞌba tcwal. 12At jun kꞌij e xiꞌ tkbaꞌn jkꞌa chꞌiꞌp te tmankꞌa: “Taat, kꞌontz weya nkab,” tz̈ikꞌa. “Cu,” tz̈i tmankꞌa, bix e xiꞌ tkꞌoꞌnxin juun kab te juun. 13Min el kꞌij tej takꞌkꞌa chmolte ke tikꞌch tekꞌa, bix e xiꞌkꞌa tuj jun tnom nakch. Bix e cub baj tpwakkꞌa bix tikꞌch tekꞌa jaaꞌj nponakꞌa, tuꞌn nuk tikꞌch e tajbekꞌa. 14Tejtzen tcub baj niyꞌj tkabkꞌa, ntzajcꞌatltzen jun weyaj tuj tnom jaaꞌ e ponakꞌa, bix e tzajtzen tcyajlal tiꞌjkꞌa. 15Bix e xiꞌkꞌa cubsal twitzkꞌa te junxin aj tnom tuꞌn tkꞌontexin taakꞌenkꞌa, bix e takꞌxin taakꞌenkꞌa te cꞌojlal boch. 16Bix yaaꞌn nimxix twakꞌa e takꞌ tpatrónkꞌa. Nimxsen takꞌ weyaj oc tekꞌa. Nimxsen e tajbekꞌa tuꞌn t-xiꞌ twaaꞌnkꞌa cywa boch, pero mi nuket cywa boch min e kꞌoj tekꞌa. 17Cwatzen tel tniyꞌkꞌa tiꞌj texkꞌa tilkꞌa e tjoykꞌa, bix akꞌkꞌa bislte ti pjel tekꞌa. Ul tuj tcꞌuꞌjkꞌa: “At nim t-akꞌanal nmana, bix kꞌoꞌncye nim cywa. Pero weya tzalu, chꞌix ncyima tuꞌn weyaj. 18Chin pomel meltzꞌaja tuya nmana, bix cxeꞌl nkbaꞌna texin: ‘Taat, oxsen nbinchaya nim wila twitz Dios bix twitza. 19Miꞌn chin n-oc tkꞌoꞌntla te tcwala, sino nuk te jun t-akꞌanala chin oqueleya ka ma tzaj tkꞌoꞌna xtalbil tuꞌn wakꞌanana te tey,’ tz̈i nbela,” juꞌtzen iyꞌ tuj tcꞌuꞌj kꞌawa. 20Bix ajtzkꞌa cyxol boch bix e tzyet tbekꞌa tuꞌn tponkꞌa tuya tmankꞌa. Maat-x tzajnen ttzajkꞌa nakch tej tel tniyꞌ tmankꞌa tiꞌjkꞌa, bix oc kꞌaben tcꞌuꞌjxin tiꞌ tcwalxin, bix e xiꞌ ajkelenxin te clulte tekꞌa, bix e tzaj t-xkꞌeꞌnxin jakꞌa bix el ttzꞌuꞌbenxin twitzkꞌa. 21Bix e xiꞌ tkbaꞌnkꞌa te tmankꞌa: “Taat, oxsen nbinchaya nim wila twitz Dios bix twitza. Miꞌn chin n-oc tkꞌoꞌntla te tcwala,” tz̈ikꞌa. 22Pero min e tkba tcꞌuꞌj tmankꞌa juꞌwa, sino e xiꞌ tkbaꞌnxin cye t-akꞌanalxin: “Cykꞌoꞌnc cyipena. Cyiiꞌntz xbalen tbanel bix cykꞌoꞌnc tiꞌ ncwala. Bix cykꞌoꞌnccꞌa jxmul kꞌabbaj tzin tkbaꞌn ka ncwal kꞌeya, bix cykꞌoꞌnc t-xaabkꞌa. 23Bix cyiiꞌntz chꞌinj wacẍ n-oc tz̈ꞌis̈et tuꞌn tajben weya tuj ninkꞌij, bix cybyoꞌncꞌa, tuꞌntzen kwaaꞌn tiꞌj te tninkꞌij ncwala, 24cuma jncwala lu tisencꞌa o cyim, pero ma tzul meltzꞌaj wiꞌja. El tzpet, pero ma tzul jlet,” tz̈ixin cye tmaanxin.
Bix akꞌkexin iyꞌsalte jun ninkꞌij.
25Yal tzunj xin ttzicykꞌa, nakꞌananxin tuj cycojbilxin. Tejtzen tpon lkꞌexin nka taꞌ cyjaxin, bix e tzaj tbiꞌnxin nbajxsen jun tij ninkꞌij. 26Bix e xiꞌ ttxcoꞌnxin jun cymaanxin, bix oc tkanenxin: “¿Ti nbaj? ¿Ti ninkꞌiꞌl nbaj?” tz̈ixin. 27Bix e xiꞌ tkbaꞌn maan texin: “Ja titzꞌena ma tzul meltzꞌaj, bix baꞌnkꞌa. Juꞌ tzunj ma tkba cymana tuꞌn tcub jjil wacẍ cloꞌn tuꞌnxin te tninkꞌijxin, tuꞌntzen tiyꞌ tninkꞌij jkꞌa titzꞌena ma tzul,” tz̈i maan. 28Tejtzen tbaj tbiꞌnxin juꞌwa, bix e tzaj tkꞌojxin. Ya tcyꞌitlxin ocxxin tuj cyjaxin. Bix etz cymanxin cubsal twitz texin tuꞌn miꞌn kꞌojxin. 29Bix e xiꞌ tkbaꞌnxin te tmanxin: “Nimxsen tyem ma chin akꞌanana cyiw tuj taakꞌena, tisenx kej t-akꞌanala. Pero bajx tzꞌeꞌlen nxooꞌna tleya. Bix mintiiꞌ o tzaj tkꞌoꞌna weya, mi nuket jun niꞌ nchiviya tuꞌn tajben weya cyuya ke wuyena. 30Pero tej sul jkꞌa tey tcyꞌaal, jkꞌa xbaj yaaꞌnte tpwaka cyuya xuuj tiyꞌ jakꞌch tumel, bix ma cub tbyoꞌna jjil wacẍ cloꞌn tuꞌna te tekꞌa. Yaaꞌn tumel tuj nwitza,” tz̈i ttzicykꞌa. 31E xiꞌ tkbaꞌn tmanxin texin: “Ncyꞌaal, ma tena wuyena cykil tyem, bix cykilca tikꞌch weya, te tey. Oꞌcx ctzaal tkanena weya. 32Pero yal tzunj titzꞌena, e najkꞌa. Tisencꞌa e cyimkꞌa, pero jaꞌlewe ma tzul meltzꞌajkꞌa iꞌtzkꞌa. El tzpetkꞌa, pero jaꞌlewe ma tzul jletkꞌa juntl maj. Juꞌ tzunj tumel tuꞌn ktzalaj bix tuꞌn kiyꞌsan tninkꞌijkꞌa,” tz̈i cymanxin—juꞌxsen te Jesús e tkba cye fariseo.
Currently Selected:
SAN LUCAS 15: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
