SAN LUCAS 14
14
Jun xjal otk jaw mal tiꞌj e kꞌanj tuꞌn Jesús
1At juntl kꞌij te ajlabl e xiꞌ Jesús te waaꞌl tja junxin xjal nenel cye fariseo. Bix oc cycyeꞌyen kej xin fariseo jaxin ka tuꞌn takꞌananxin tuj kꞌij te ajlabl. 2Bix e pon junxin xjal yaab twitz Jesús. Otk jaw mal tiꞌjxin. 3Bix e xiꞌ tkbaꞌn Jesús cye txꞌolbal ley bix cye fariseo:
—¿Ti ncub cybisena tiꞌj? ¿Tzimpa tkꞌoꞌn ley amleꞌn tuꞌn tkꞌanj jun xjal tuj kꞌij te ajlabl, bix ka min?―tz̈i Jesús.
4Mintiiꞌ aj cytzakꞌbeꞌn. Bix e cub tkꞌoꞌn Jesús ke tkꞌab tiꞌ tkul yaab, bix e tkꞌanexin, bix e xiꞌ tkbaꞌnxin te yaab tuꞌn taj tja. 5Bix e xiꞌ tkbaꞌnxin cye fariseo:
—Ka at jun cyxola nxiꞌ tzꞌak tbur bix ka twacẍ tuj jun jul, ¿miꞌmpatzen jatz tiiꞌn najxin, amale tujet kꞌij xjan?―tz̈i Jesús.
6Min-al jun e bint ttzakꞌbej tuꞌn.
Kej e txquet tuj mejoblenel
7Tej tpon tumel tuꞌn cywaaꞌn, oc tcyeꞌyen Jesús kej tuya fariseo e cyajbe tuꞌn cycub ke cyuj kꞌaꞌj toc ttxaꞌn mes mas cymunel. Juꞌ tzunj e xiꞌ tkꞌoꞌn Jesús jun tumel cyexin. E xiꞌ tkbaꞌnxin:
8—Ka ma ttxoc jun xjal ejeeꞌy tuj jun mejoblenel, miꞌn chi cub key cyuj kꞌaꞌj mas cymunel. Ka ma txiꞌ ttxcoꞌn taaw mejoblenel jun xjal mas nintzaj cywitza, 9oj tpon, iltzen tiꞌj ctkbaꞌ taaw mejoblenel cyey: “Najsamkey, chi aal lkꞌe chꞌina, cuma ma tzul jun xjal mas nintzaj cywitza,” tz̈i tbel. Bix jun chꞌixbajil nim oj cycub key cywiꞌj kꞌaꞌj menos cymunel. 10Juꞌ tzunj, oj cytxqueta tuj jun mejoblenel, juꞌ chi cwel key cywiꞌj kꞌaꞌj menos cymunel, tuꞌntzen baꞌn txiꞌ tkbaꞌn taaw mejoblenel cyey: “Cyixtekey tzalu cyuj kꞌaꞌj mas cymunel,” tz̈i. Bix kej xjal eteꞌ twiꞌ mes cyuyey, qꞌuelel cyniyꞌ tiꞌj ejeeꞌy nchi nimj cyuꞌn. 11Ja tumel lu tzin tyeecꞌan tiꞌj xjal njaw tniman tiib, cꞌoquel te chꞌin, bix alj xjal n-oc tkꞌon tiib te chꞌin, ckꞌojel te tuꞌn toc te nim―tz̈i Jesús cye xjal.
12Bix e xiꞌ tkbaꞌn Jesús te fariseo jxin otk txiꞌ txconte Jesús tuꞌn twaaꞌn tuyaxin:
—Oj t-xiꞌ ttxcoꞌna ke xjal tuꞌn cywaaꞌn tuyey, yaaꞌn nuk ejeeꞌ ke tuyey, bix ke titzꞌena, bix ke titzꞌen tmana, bix ke tvesinta kꞌina. Jax cxeꞌl cytxcoꞌn jay tuꞌn twaaꞌna cyuya, tuꞌntzen t-xelenta tiib. 13Oj t-xiꞌ ttxcoꞌna ke xjal tuꞌn cywaaꞌn tuyey, txcom ke mebe tuyey bix kej xjal tal tpaltel, coxle, mos̈le, bix atle mastl. 14Ka juꞌ nbint tuꞌna tuꞌn t-xiꞌ ttxcoꞌna kej mlay cyakꞌ t-xel tey, cwel xtalbil tibaja, cuma ckꞌojel t-xel tey tuj jkꞌij oj cyjatz itzꞌj cykilca kej xjal baꞌn cyten twitz Dios tuj cyamecy juntl maj―tz̈i Jesús te fariseo.
Jun techel tiꞌj nintzaj waaꞌn
15Juntlxin xjal kꞌuklcꞌa tuya Jesús tiꞌ mes, tej toc tbiꞌnxin kej tyol Jesús lu, bix e xiꞌ tkbaꞌnxin te Jesús:
—Taat, cykilca ejooꞌ judío ko oquel tuj tcawbil Dios bix ckꞌojel xtalbil ke. ¿Yaaꞌmpa juꞌwa?―tz̈i jun judío.
16Pero e xiꞌ tkbaꞌn Jesús texin:
—Tuj cywitza juꞌ pjela. Pero cꞌoquel tcꞌuꞌja tiꞌj ja tumel lu. At junxin xjal e tajbe tuꞌn tiyꞌsanxin jun ninkꞌij tuj tjaxin, bix e ttxocxin nim xjal. 17Tej tpon tumel tuꞌn cypon tuj tjaxin, e xiꞌ tsmaꞌnxin jun t-akꞌanalxin te txcol cye xjal. Te jaca juun txoca e xiꞌ tkbaꞌn t-akꞌanalxin: “Ttzaj chꞌina te iyꞌsalte ninkꞌij, cuma cykilca chꞌin ma bint,” tz̈ixin te cykilca. 18Pero cykilca ke xjal e kbante ka mlay chi pon. Tneel e tkba junxin: “Najsama, kbanx chꞌin te tpatróna mlay chin pona. At chꞌin txꞌotxꞌ o cyaj nlokꞌoꞌna, bix il tiꞌj ma chixa cyeyꞌlte,” tz̈ixin. 19At juntl xjal e xiꞌ tkbaꞌn: “Najsama, kbanx chꞌin te tpatróna mlay chin pona. Ma cyaj nlokꞌoꞌna jweꞌ moj wacẍ, bix il tiꞌj tuꞌn toc nniyꞌbeꞌn ke jila te cjol,” tz̈ixin. 20Juntl xjal e xiꞌ tkbaꞌn: “Najsama, mlay chin pona, cuma ma chin majeya tuya jun xuuj,” tz̈ixin. 21Tej tpon meltzꞌaj tsanjelxin tuya tpatrónxin, e xiꞌ tkbaꞌnxin tikꞌch j-otk cykba xjal texin. Tej tbinte tpatrónxin juꞌwa, bix e jaw kꞌojxin, bix e xiꞌ tkbaꞌnxin te t-akꞌanalxin: “Cutxa tuj ajkelbil cyuj be te tnom, bix kꞌintz ke mebe bix kej xjal tal tpaltel, coxle, mos̈le, bix atle mastl,” tz̈i patrón. 22E tcuya t-akꞌanalxin, bix tej tbint alcyej otk txiꞌ tkbaꞌn tpatrónxin texin, e xiꞌ tkbaꞌnxin te tpatrónxin: “Taat, o bint wuꞌna cykilcaj e tkbay weya, pero nimx kꞌukbil at,” tz̈i t-akꞌanalxin. 23Bix e xiꞌ tkbaꞌn patrón te t-akꞌanalxin: “Jaꞌlewe cutxey ttxaꞌn tnom bix tiyꞌ cyxol jaaꞌ nakch, bix xmoxetz ke xjal tuꞌn cyul bix te waaꞌl, tuꞌntzen tnoj njaya cyuya xjal. 24Kej xjal e ntxoca nejl, cxeꞌl nkbaꞌna tey mi nuk juncye cxeꞌl waaꞌnte tuj nninkꞌija,” tz̈ixin—e xiꞌ tkbaꞌn Jesús tiꞌj alcye kej xjal chi oquel tuj tcawbil Dios.
Cyiw tuꞌn koc lpe tiꞌj Jesús
(Mt. 10:37-38)
25Nimxsen xjal oc lpe tiꞌj Jesús. Bix aj meltzꞌajxin te cyeyꞌlcye, bix e xiꞌ tkbaꞌnxin cye:
26—Ka cyaja chi oc lpey wiꞌja, pero ka mas n-oc takꞌ cymana cyey, bix cytxuy, bix cyxuꞌla, bix ke cycwala, bix ke cyxibena, bix ke cyaneba, bix juꞌx cyey, mlay chi oca te nxnakꞌatza. 27Bix ka cycyꞌiy tuꞌn cybyeta wuyena bix tuꞌn tiyꞌx chꞌixbajil cyuꞌna tuꞌnj tuꞌn cyoc lpey wiꞌja, mlay chi oca te nxnakꞌatza. 28Ka al cyey taj tzꞌoc lpe wiꞌja, il tiꞌj cwel cybisena tiꞌj tikꞌch cyjel cykꞌoꞌna. Tisen tzunj ka cyaja jaw bint jun nmak jaaꞌ. Oj cybinchana cyjay, ¿yaaꞌmpa il tiꞌj tuj tneel cwel cybisena jteꞌ pwak cbinela, bix ka chi xcyebela tiꞌj tuꞌn tbint? 29Ka ma chi akꞌa binchal cyjay, bix nuk t-xeeꞌ cyjay cbinel cyuꞌna, ojtzen toc cycyeꞌyen xjal, chi tzeꞌl cyiꞌja. 30Cxeꞌl cykbaꞌn ke tzeꞌl cyiꞌja: “Jxjal lu oc ttzyuꞌn tuꞌn tbint tja, pero tuꞌn min e cub tbisen tiꞌ gast tiꞌj, mlay bint,” tz̈i cybel.
31Cxeꞌl nkꞌoꞌna juntl tumel cyey. Ka at jun rey tuꞌn tclonte ttanem nuk tuya laaj mil tsoldado twitz juntl rey tzul kꞌojlel tibaj tuya winkꞌan mil tsoldado, cwel tbisen tuj tneel ka baꞌn cyxcye tuya laaj mil tsoldado twitz winkꞌan mil. 32Ka tuj twitz mlay xcye nuk tuya laaj mil tsoldado, bix cxeꞌl tsmaꞌn jun tsanjel tuyaj rey tzajnen ttzaj tuya winkꞌan mil tsoldado te kanlte tuꞌn mlaype weꞌ kꞌoj, bix alcye taj tuꞌn tkꞌoj te tuꞌn tweꞌ kꞌoj. 33Juꞌtzen cytena. Cwel cybisena nejl ka cyaja tuꞌn cyxiꞌ lpey wiꞌja. Ka yaaꞌn tuya cykil cyanema tuꞌn tcyaj cykꞌoꞌna cykilca at te cyey tuꞌn cyxiꞌ lpey wiꞌja, mlay chi oc lpey wiꞌja.
Jun ocslal twitz txꞌotxꞌ juꞌ tisen atzꞌen
(Mt. 5:13; Mr. 9:50)
34Chi ajbela weya nuk ka tuya cykil cycꞌuꞌja lepchkey wiꞌja, tisen atzꞌen najben nuk ka baꞌnx. Ka ma tzꞌel baj tikꞌbil atzꞌen, ¿ti tten tuꞌn tajben te atzꞌen? 35Mintiiꞌ cꞌajbeletl, mi nuket te abono tuj txꞌotxꞌ, bix mi nuket te tuj cytxa alimaj tuꞌn tonen. Oꞌcx nuk tuꞌn tex xeꞌt. Ka cyaja tzꞌel cyniꞌya tiꞌj, cꞌoquel cycꞌuꞌja tiꞌj ma txiꞌ nkbaꞌna cyey―tz̈i Jesús cye xjal.
Currently Selected:
SAN LUCAS 14: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
