SAN LUCAS 4

Tej toc niyꞌbet Jesús

(Mt. 4:1-11; Mr. 1:12-13)

1Tejtzen tjatz Jesús tuj aꞌ, bix etzxin tuj lugar Jordán. Ya at tzunxin tjakꞌ tipemal Espíritu Santo, bix e xiꞌ tiiꞌn Espíritu Santo jaxin tuj jun lugar min-al xjal najl tuj. 2Npontltzen taaw il tiꞌjxin te niyꞌbelte tnaablxin. E tenxin tuj lugar tzkij txꞌotxꞌ cyaꞌwnak kꞌij. Min e waaꞌnxin, bix tej tjapan baj cyaꞌwnak kꞌij, ¡otkxsen bajxin tuꞌn weyaj! 3Bix e xiꞌ tkbaꞌn taaw il te Jesús:

—Katzen Tcwal Diosa, binchancꞌa tzunj xaka te tway―tz̈i taaw il.

4Bix aj ttzakꞌbeꞌn Jesús:

—Tzin tkbaꞌn tuj tyol Dios cyjulu: “Mas il tiꞌj tuꞌn tnimante jun xjal Dios twitzj tuꞌn titzꞌj nuk tuꞌn twa,”―tz̈i Jesús.

5Bix e jaw tiiꞌn taaw il ja Jesús jawne bix e xiꞌ tyeecꞌan taaw il texin cykilca tnom twitz txꞌotxꞌ. Bix e tilxin cykilca tnom te jun niyꞌ rato. 6Bix e xiꞌ tkbaꞌn taaw il te Jesús:

—Cykilca kej tnom lu tuya cykilca kꞌinemal cyuj cxeꞌl nkꞌoꞌna tey, cuma te weya o chi kꞌoja, bix chi xeꞌl nkꞌoꞌna laꞌ al taaw waja. 7Ka ma cub maje tey nwitza nniman tzuna nwitza, chi xeꞌltzen nkꞌoꞌna tey―tz̈i taaw il te Jesús.

8Pero aj ttzakꞌbeꞌn Jesús te:

—Tzin tkbaꞌn tuj tyol Dios cyjulu: “Nuk ja Dios cjawel cynimsaꞌna, bix nuk te baꞌn cyajbeꞌney,” tz̈i tyol Dios cye xjal―tz̈itzen Jesús.

9Bix e xiꞌ tiiꞌn taaw il ja Jesús tuj tnom te Jerusalén, bix e jaw tiiꞌn taaw il ja Jesús maa twiꞌ tja Dios. Bix e xiꞌ tkbaꞌn taaw il texin:

—Ka jay Tcwal Dios, xooꞌnx tiiba twitz txꞌotxꞌ, tuꞌntzen tel cyniyꞌ xjal tiꞌja jay Scyꞌoꞌna tuꞌn Dios ka min xcyima. 10Mlay cyima, cuma tzꞌiꞌben tuj tyol Dios: “Chi tzaal tkꞌoꞌn Dios tsanjel tuj cyaꞌj te clol tey. 11Ejeeꞌ chi tzyulte tey tuj cykꞌab, tuꞌntzen miꞌn cub tzꞌaka twitz txꞌotxꞌ bix tuꞌn miꞌn tzakꞌ tkena twiꞌ xak,” tz̈i tyol Dios―tz̈i taaw il te Jesús.

12Pero aj ttzakꞌbeꞌn Jesús te:

—Tzin tkbaꞌn tuj tyol Dios cyjulu: “Miꞌn tzꞌoc cycyakwusaꞌna Dios tuꞌn toc cykꞌoꞌna tuj malbil te, ka jax tuꞌn,” tz̈i tyol Dios―tz̈i Jesús te taaw il.

13Tej mix e xcyeba taaw il tuꞌn t-xiꞌ tniman Jesús ja, bixsen e cyaj tkꞌoꞌn taaw il jaxin te ayolte juntl kꞌij tuꞌn t-xcye tibajxin.

Tej ttzyet taakꞌen Jesús

(Mt. 4:12-17; Mr. 1:14-15)

14Bix e pon meltzꞌaj Jesús tuj departamento te Galilea. Nim tipemalxin kꞌiꞌn tuꞌnxin tuꞌn Espíritu Santo, bix e pon baj tpocbalelxin tuj cykilca tnom nkaylex eteꞌ. 15Ocx Jesús cyuj camon jaaꞌ te xnakꞌtzabl tyol Dios, bix akꞌxin kbalte cye xjal ti tten tyol Dios, bix elxin baꞌn tuj cywitz cykil xjal.

Tej tpon Jesús tuj tnom Nazaret

(Mt. 13:53-58; Mr. 6:1-6)

16E ponxin tuj tnom te Nazaret jaaꞌ otk tz̈ꞌiyxin. Tej tpon kꞌij te ajlabl, ocxxin tuj camon jaaꞌ te kꞌumlte xnakꞌtzbil tiꞌ tyol Dios, tisex tten tuꞌnxin. Tej tpon tumel, bix e jaw weꞌxin cywitz xjal tuꞌn tjaw ts̈iꞌnxin tyol Dios cywitz xjal. 17Bix e tzaj tiiꞌn jun xjal j-uꞌj tzꞌiꞌben tuꞌn Isaías, jxin tyolel Dios. Bix el tlicyꞌpe Jesús uꞌj, bix e tjoyxin, bix e cnet tuꞌnxin alcyej e tjoyxin. Bix akꞌxin s̈-ilte cyjulu: 18“Te weya o kꞌoj Espíritu Santo tuꞌn Dios, cuma o chin scyꞌeta tuꞌn Dios tuꞌn t-xiꞌ nkꞌumena jun baꞌn tpocbalel te colbil cye xjal. Inayena smaꞌn te onlte ke mebe xjal, bix tuꞌn cytzokpaj kej eteꞌ tuj cykꞌab ke enemiwa, bix tuꞌn tjket cywitz xjal mos̈, bix tuꞌn cyclet kej xjal at tjakꞌ cycawbil kej yajlal xjal, 19bix tuꞌn t-xiꞌ nkꞌumena ma pon tumel tuꞌn ttzaj t-xtalbil Dios cyibaj xjal.” 20Ejeeꞌ tzunj yol lu e jaw ts̈iꞌn Jesús tuj tuꞌj te Isaías. Bix e jaw tbalkꞌiꞌnxin uꞌj bix e xiꞌ tkꞌoꞌnxin te cꞌojlal uꞌj, bix e cub kexin tuꞌntzen t-xiꞌ ttxꞌolbaꞌnxin tyol Dios cye ke xjal eteꞌ tuj camon jaaꞌ. Bix oc txle cywitz xjal tiꞌjxin. 21Bix e xiꞌ tkbaꞌnxin cye:

—Jyol ma cybiy jaꞌlecuwe, jaꞌle tzuna matzen japan baj tuj chicꞌaj cywitza―tz̈i Jesús.

22Cykil xjal el cyniyꞌ tiꞌj ti e tkba Jesús, bix e jaw kleeꞌke tiꞌj otk tkbaxin jax xinj xjal at tulel, bix akꞌ ke xjal yolel cyxolx:

—¿Pero yaaꞌmpatzen jxjal lu nuk tcwal José?―tz̈ike.

23Bix e xiꞌ tkbaꞌn Jesús cye:

—Ntzkiꞌna mas yaj cykbaꞌy weya cyjulu: “Yeecꞌamne ka jawnex tipemala. O kbiya e bint nim tuꞌna tuj tnom te Capernaum. Binchamtzen tzalu kxola, ejooꞌya xjal te ttanema, tuꞌntzen kocslana tiꞌja,” tz̈i cybela. 24Juꞌtzen cykbaꞌy, cuma chin elel cyiiqꞌuena, cuma jun tyolel Dios tuj cyex cytanem n-el cyiiqꞌuen. 25Cxeꞌl nkbaꞌna cyey juꞌ pjel weya tisen te Elías, jxin tyolel Dios nejl. At nim xuuj viuda tuj txꞌotxꞌ te Israel tej tcub jun weyaj tuj Israel tuꞌn mintiiꞌ jbal e cub oxe jnabkꞌi tuya kak xjaw. 26Pero yaaꞌn juꞌ e xiꞌ chkꞌet Elías tuꞌn Dios cyeyꞌlcye viuda tuj ttanemxin, sino juꞌ e xiꞌ chkꞌet-xin cyeyꞌlte jun viuda tuj juntl tnom Sarepta tbi, tuj txꞌotxꞌ te Sidón. 27Bix juꞌ pjel weya tisen e baj tej xin tyolel Dios Eliseo. At jun tyem at nim xjal tuj Israel nim el kꞌey cykꞌab bix cyken tuꞌnj yabel lepra, pero min-al jun te ttanemxin e tkꞌanexin. Jun wikxitl xjal e tkꞌanexin, jatl jxin Naaman te tnom te Siria―tz̈i Jesús cye aj Nazaret.

28Tej cybinte kej xjal tuj camon jaaꞌ tyol Jesús juꞌwa, e tzaj cykꞌoj xjal, 29bix e jaw weꞌ ke xjal bix e xiꞌ cylichꞌoꞌnxin Jesús, bix e xiꞌ cykitexin twitz txꞌotxꞌ tuꞌn tex ttxaꞌn tnom. Toc Nazaret tcꞌuꞌj jun witz. Bixsen e xiꞌ cyiiꞌnxin Jesús twiꞌ witz tuꞌntzen tetz cyxooꞌnxin twitz xak. 30Pero nuk tisen tiiꞌ tetz jilpaj Jesús cyxolxin, bix e cuꞌx meltzꞌaj Jesús maa t-xeeꞌ witz.

Jun xjal otk tzꞌoc biman tiꞌj

(Mr. 1:21-28)

31Bix e pon Jesús tuj tnom te Capernaum tuj departamento te Galilea. Jaca kꞌij te ajlabl ocx Jesús tuj camon jaaꞌ, bix e xiꞌ tkꞌoꞌnxin xnakꞌtzbil cye xjal. 32E jaw kleeꞌ ke xjal tiꞌj t-xnakꞌtzbilxin, cuma e xnakꞌtzanxin tuya nim tipemal tyolxin. 33At jun kꞌij e pon junxin xjal tuj camon jaaꞌ. Otk tzꞌoc biman tiꞌjxin, bix e jaw s̈-inxin:

34—¡Ko tkꞌaꞌcja, Jesús te Nazaret! ¿Mapa tzula te kꞌolxte keya ejooꞌya biman tuj castiwa? Ntzkiꞌna alcyey. Jay Tcwal Dios mintiiꞌ tila―tz̈i biman te Jesús.

35Bix e xiꞌ tkbaꞌn Jesús:

—Cꞌola bix texa tuj ja xjal lu―tz̈i Jesús.

Tbinte biman tyol Jesús, bix e cub t-xooꞌn jxjala twitz txꞌotxꞌ cywitz xjal tuꞌn tis̈j xjal, bix etz biman tuj. Pero min is̈j te xjal. 36Nimxsen e jaw kleeꞌ ke xjal tiꞌj lu, bix e jaw yol cyxolxxin:

—¿Ti tten nuk tuꞌn tyolxin nchi etz ke biman tuj jun xjal? Nimxsen tipemalxin―tz̈i ke xjal. 37Bix el tpocbalelxin e pon cyuj tnom tiꞌjxe Capernaum.

Tej tkꞌane Jesús tiꞌj jxuj tjiiꞌ Pedro

(Mt. 8:14-15; Mr. 1:29-31)

38Tej tetz Jesús tuj camon jaaꞌ, e ponxin tuj tja Simón. Attzen tjiiꞌ Simón tuya, bix yaabxuj tuꞌn nim cyak tiꞌjxuj. Ejeeꞌ tzunj xjal eteꞌ tuj tja Simón e xiꞌ cykanen te Jesús tuꞌn tkꞌanenxin tiꞌjxuj. 39Bix e pon lkꞌe Jesús jaaꞌ tocxexuj, bix e xiꞌ tkbaꞌnxin tuꞌn tetz jyabel tuj t-xumlalxuj, bix nweꞌtl cyak tiꞌjxuj. Tex rato njaw weꞌtlxuj, bix akꞌxuj kꞌolxte waabj cye xjal tuj jaaꞌ.

Nim xjal ul tnaabl tuꞌn Jesús

(Mt. 8:16-17; Mr. 1:32-34)

40Te xsunj kꞌij te ajlabl, bix mitknaꞌx tex kꞌij, bix e pon nimtl xjal cyuya yaab jaaꞌ taꞌ Jesús. Bix e cub tkꞌoꞌn Jesús tkꞌab tibaj juun yaab, bix ul cynaabl tex hora. 41Bix nim xjal e pon toc biman cyiꞌj, bix e xiꞌ tkbaꞌn Jesús cye biman tuꞌn cyel cyiꞌ xjal. Tejtzen cyel, e jawxsen s̈-inke: “Jay Tcwal Dios,” tz̈i ke biman te Jesús. Pero bix e xiꞌ tmyoꞌn Jesús ke biman tuꞌn miꞌn chi yolentl, cuma el cyniyꞌ biman tiꞌj ka jaxin Jscyꞌoꞌn tuꞌn Dios.

Tej tbet Jesús cyuj tnom te Galilea te kbalte tyol Dios

(Mr. 1:35-39)

42Te juntl kꞌij, te jyaꞌx, bix iyꞌxin tja Simón, bix e xiꞌxin jaaꞌ min-al xjal. Nim xjal e jyon tiꞌjxin, bix e cnet-xin cyuꞌn, bix e cubsanke cywitz texin tuꞌn miꞌn tziyꞌxin cyxol. 43Pero e xiꞌ tkbaꞌnxin cye:

—Il tiꞌj tuꞌn nxiꞌya cyuj cabtl tnom, tuꞌn t-xiꞌ nyeecꞌana cye niyꞌtl xjal ti tten tcawbil Dios, cuma smaꞌn kena tuꞌn Dios te kbalte tzul tcawbil Dios―tz̈i Jesús.

44Juꞌtzen tten tej t-xiꞌ Jesús cyuj cytanem judío. Oj tponxin tuj juun tnom, bix ocxxin tuj camon jaaꞌ, bix akꞌxin xnakꞌtzalte tyol Dios.

Currently Selected:

SAN LUCAS 4: mamTS

Highlight

Copy