SAN LUCAS 5

Nim quis̈ tzyet tuꞌn tipemal Jesús

(Mt. 4:18-22; Mr. 1:16-30)

1At jun kꞌij waꞌlcꞌa Jesús ttziiꞌ jun nimaꞌ Genesaret tbi. Nim xjal e chmet tiꞌjxin te ebilecte t-xnakꞌtzbilxin tiꞌ tyol Dios, bix oc cycutzꞌen cyiib tiꞌjxin. 2Bix oc nojxin tiꞌ caꞌba barc min-al xjal cyuj nka ttziiꞌ aꞌ. Cyaakꞌen jxin cyaaw barc tzyul quis̈kexin. Otktzen chi cyaj cykꞌoꞌnxin cybarcxin, bix nchi txjon tzunxin cyxiyꞌpaxin te kꞌiljawtz quis̈. 3Bix ocx Jesús tuj jun barc, bix e xiꞌ tkanenxin te taaw barc tuꞌn taac lkꞌe chꞌintl barc tuj aꞌ. Simón tbi taaw barc, bix juntl tbixin Pedro. Bix ocx ke Jesús tuj barc, bix akꞌxin xnakꞌtzal cye xjal.

4Tejtzen tbaj xnakꞌtzanxin cye xjal, e xiꞌ tkbaꞌnxin te Simón:

—Koꞌtzen. Kꞌinx barc maa jaaꞌ taꞌ nim t-xeeꞌ aꞌ, bix cyxooꞌnxsa cyxiyꞌpay tuj aꞌ, tuꞌntzen tjatz cyquis̈a―tz̈i Jesús.

5Pero aj ttzakꞌbeꞌn Simón te Jesús:

—Taat, ma tzꞌex cykil akꞌbil kquis̈ena, bix mintiiꞌ xjatz kuꞌna. Pero cꞌoquel ke ncꞌuꞌja tiꞌ tyola. Cxeꞌl kxooꞌna kxiyꞌpaya tuj aꞌ juntl maj―tz̈i Simón te Jesús.

6Bix e cuꞌx cykꞌoꞌnxin cyxiyꞌpaxin tuj aꞌ. Tej tjatz, nojnexsen tuya quis̈, ya nuk tuꞌn tel rotjtl cyxiyꞌpaxin. 7Bix mix e xcyebatlkexin tuꞌn tjatz tjakꞌ talel. Juꞌ tzunj e xaꞌ cyyeecꞌa Simón cykꞌabxin cyuya ke tuyaxin te cyej cabtl cyuyaxin tuj juntl barc tuꞌn cyponxin onjawtzte cyxiyꞌpaxin. Tejtzen cypon jcabtl cyuyaxin, entera xsunkexin e jatz onente, bix cycaꞌbel cybarcxin e noj tuya quis̈, ya nuk tuꞌn takꞌ xeꞌl bajtlke tjakꞌ aꞌ tuꞌn talel.

8Tejtzen toc tcyeꞌyen Simón Pedro ti otk baj, e cubxsen majexin twitz Jesús, bix e xiꞌ tkbaꞌnxin:

—Taat, ikch miꞌn tzaj lkꞌey wiꞌja, cuma aj il kena―tz̈i Pedro. 9E tkbaxin juꞌwa tuꞌnj e jaw kleeꞌxin cyuya ke akꞌanal tuyaxin tiꞌj nimxsen quis̈ e jatz cyuꞌnxin tuꞌn tipemal tyol Jesús. 10Jax juꞌx e jaw kleeꞌ kej xin Jacobo bix Juan, kej xin tcwal Zebedeo, bix tuya Simón ejeeꞌtzen xinja cyaaw barc.

Bix e xiꞌ tkbaꞌn Jesús te Simón:

—Miꞌn tzaj ntz̈iya tiꞌja. Tetzen jaꞌlewe miꞌntzen tzꞌakꞌanantl tey kꞌiljawtz quis̈, sino jatltzen teja taakꞌen tuꞌn t-xiꞌ tkꞌumena cye xjal tuꞌn cyoc wuyena―tz̈i Jesús te Pedro.

11Bixsen e jatz cyiiꞌnxin cybarcxin tuj aꞌ bix e cyajke twitz txꞌotxꞌ, bix e cyaj cykꞌoꞌnxin cykilca, bixsen e xiꞌ cytzyuꞌnxin cyaakꞌenxin tuya Jesús.

Tej tkꞌanj jun xjal otk tzaj kꞌey

(Mt. 8:1-4; Mr. 1:40-45)

12At juntl kꞌij e pon Jesús tuj jun tnom. Bix attzen junxin xjal ncub tuꞌn jun yabel lepra tbi. Tejtzen toc tcyeꞌyen jxin yaab ja Jesús, e cubxsen majexin twitz Jesús, bix e xiꞌ tcubsaꞌnxin twitzxin:

—Taat, n-el nniꞌya tiꞌja at tipemala tuꞌn tkꞌanena wiꞌja, ka baꞌn tuj twitza―tz̈i yaab.

13Bix e xiꞌ tnukpa Jesús tkꞌab tibaj yaab, bix oc tmocoꞌnxin, bix e xiꞌ tkbaꞌnxin:

—Baꞌn tuj nwitza. Tuꞌn tel yabel tiꞌja―tz̈i Jesús.

Bix tzinx yolen Jesús tej tel yabel tiꞌ xjal. 14Bix e xiꞌ tkbaꞌn Jesús te:

—Miꞌn txiꞌ tkbaꞌna cye xjal ti ma baj tiꞌja. Nuk oꞌcx tej xin pala cxeꞌla tyeecꞌa tiiba ka baꞌntla, bix kꞌoncx jtoybila texin tisen o tkba Moisés, tuꞌntzen t-xiꞌ tkbaꞌn pala ya ma txjeta. Yeecꞌax cyexin tuꞌn tel cyniyꞌxin tiꞌj at wipemala tuꞌn nkꞌanena xjal―tz̈i Jesús.

15Pero amale otket tkba Jesús te yaab tuꞌn miꞌn baj ttxꞌolbaꞌn ka otk kꞌanj, pero elx tz̈it tpocbal tkꞌanbilxin. Tzajnexsen e tzaj lkꞌe nimxsen xjal tiꞌjxin te ebilte tyolxin bix tuꞌn cykꞌanj. 16E pon ke xjal te jyolte, pero at maj el lkꞌexin cyiꞌ xjal tuj jun lugar min-al xjal tuj, bix e naꞌnxin Dios.

E kꞌanj jun xjal tuꞌn Jesús min yucchtl t-xumlal

(Mt. 9:1-8; Mr. 2:1-12)

17At jun kꞌij e xiꞌ tkꞌoꞌn Jesús xnakꞌtzbil cye xjal. Twitztzen Jesús at cab xjal tej cloj cyiwxsen tuj cyley judío, fariseo tbi cyclojenxin, cyuyax cab txꞌolbal ley. Ejeeꞌ tzunxin e pon otk chi tzaj tuj nim tnom tuj departamento te Galilea, bix at juun otk chi tzaj tuj departamento te Judea bix tuj tnom te Jerusalén. Bix at tipemal Dios tuya Jesús tuꞌn tkꞌanen ke yaab. 18Nxnakꞌtzan Jesús tej cypon cab xinak. Kꞌiꞌn jun xjal twiꞌ jun wetbil cyuꞌnxin min yucchtl t-xumlal. Cyajxin ocxkexin tunwen tuꞌn tcub cykꞌoꞌnxin yaab twitz Jesús. 19Pero mix ocxe cyuꞌnxin, cuma nim xjal. Juꞌ tzunj e jaxkexin twiꞌyen tuꞌn cyjapanxin twiꞌ jaaꞌ, bix e jaw cycꞌobchexin twiꞌ jaaꞌ, bix e cuꞌx cykꞌoꞌnxin yaab tuyax twetbil. E cuꞌpan twitz Jesús cyxol xjal. 20Tej toc tcyeꞌyen Jesús yaab cyuyax kej xjal kꞌilte oc ke cycꞌuꞌj tiꞌjxin tuꞌn tkꞌanj yaab tuꞌnxin, e xiꞌ tkbaꞌnxin te yaab:

—Tey, ma najset tila―tz̈i Jesús.

21Tejtzen cybinte ke txꞌolbal ley bix ke fariseo ja yol ka otk najset til yaab tuꞌn Jesús, bixse e tzaj cykꞌojxin, bix akꞌkexin kanlte cyxolxxin:

—¿Ti tten nyole ja xjal lu ka junx tuya Dios? Ncub t-xmucchaꞌnxin Dios, cuma min-alte jun baꞌn tnajsante til jun xjal, nuk oꞌcx te Dios―tz̈i ke xjal crinsipal cyxolx.

22N-el najtl tniyꞌ Jesús tiꞌj alj nyolen cyxolx, e xiꞌ tkbaꞌnxin cye:

—¿Tikentzen ncwaꞌ cybisena ka mlay bint wuꞌna tuꞌn tnajset cyil xjal? 23Baꞌn t-xiꞌ nkbaꞌna te yaab: “Ma najset tila,” bix baꞌn t-xiꞌ nkbaꞌna: “Tuꞌn tjaw weꞌy bix taja tjay.” Tuj cywitza ¿alcye mas nim t-xiꞌlen tuꞌn tbint tej yaab? 24Cbinel wuꞌna alcyej mas nim t-xiꞌlen cyey tuj cywitz tuꞌn tbint, jaj tuꞌn tkꞌanj ja yaab lu, tuꞌntzen tel cyniꞌya wiꞌja at wipemala tzalu twitz txꞌotxꞌ tuꞌn tnajset cyil xjal wuꞌna, inayena, Jsmaꞌn tuꞌn Dios tuꞌn ntena cyuya xjal―tz̈i Jesús. Juꞌ tzunj e xiꞌ tkbaꞌnxin tej xjal min yucch t-xumlal:

—Ebintz nyola. Weyꞌtztzen, kꞌinx twetbila, bix cutxetzen tjay―tz̈i Jesús te yaab.

25Tzinx yolen Jesús tej tjaw weꞌ yaab, bix e jaw tiiꞌn twetbil, bix aj tja. Nimxsen e jaw tnimsaꞌn yaab tbi Dios. 26Bix cykil xjal e jaw kleeꞌ, bix e jaw cynimsaꞌn tbi Dios. Bix e cub ttz̈i cyiꞌj, bix e xiꞌ cykbaꞌn cyjulu: “¡Bajxsen klaꞌ jma kil jaꞌlewe!” tz̈ike.

Tej ttzaj txquet Leví tuꞌn Jesús

(Mt. 9:9-13; Mr. 2:13-17)

27Tbajlenxetzen juꞌwa, bix el bet Jesús tuj tnom. Bix tej texxin twitz jun jaaꞌ jaaꞌ n-ele kanet alcabala, taac tcyeꞌyenxin tunwen kꞌuklecx jxin xjal kꞌilbelte alcabala, Leví tbi. Bix e xiꞌ tkbaꞌnxin te Leví:

—Lpetzen wiꞌja tuꞌntzen toc te nxnakꞌatza―tz̈i Jesús.

28Bix e jaw weꞌ Leví, bix e cyaj tkꞌoꞌnxin cykilca, bix oc lpexin tiꞌ Jesús. 29Tuꞌn tyeecꞌatexin a tanemxin tiꞌ Jesús, bix iyꞌ tiyꞌsaꞌnxin jun ninkꞌij tjaxin. Nim chmol alcabala bix nim xjal tuyax Jesús e pon tja Leví te waaꞌl. 30Kej xjal fariseo bix ke txꞌolbal ley oc cycyeꞌyenxin jlu, bix el kaꞌ tuj cywitzxin, bix e xiꞌ cykbaꞌnxin cye t-xnakꞌatz Jesús:

—¿Tikentzen nchi waaꞌncxey cyuya chmol alcabala bix tuya mastl aj il?―tz̈ikexin.

31Bix e xiꞌ tkbaꞌn Jesús cyexin:

—Kej xjal mintiiꞌ yabel cyiꞌj, mlay cheꞌx tuya kꞌanel. Ja tzunkej xjal yaab, il tiꞌj ncheꞌx tuya kꞌanel. 32Juꞌx xsunkej xjal aj il. Min o chin ula te cyej xjal mintiiꞌ cyil tuj cywitz tuꞌn tcyaj cykꞌoꞌn cyil, sino o chin ula te cyej xjal n-el cyniyꞌ tiꞌj aj ilke tuꞌn tul cyil tuj cycꞌuꞌj―tz̈i Jesús.

Jun kanbil tiꞌj epaj weyaj

(Mt. 9:14-17; Mr. 2:18-22)

33Mas yajtl at cabtl xjal e xiꞌ cykbaꞌn te Jesús:

—¿Titzen tten kej tey t-xnakꞌatz min ncub cypaꞌn weyaj? Ja tzunkej te Juan t-xnakꞌatz, nim maj ncub cypaꞌn weyaj bix nchi naꞌn Dios, tisex kej xin lepch tiꞌ cyley fariseo. Ja tzunkej tey t-xnakꞌatza, min ncub cypaꞌn weyaj. Nuk nchi waaꞌncye―tz̈i ke xjal te Jesús.

34Aj ttzakꞌbeꞌn Jesús:

—¿Titzen nbaj tiꞌ jun mejoblenel? Oj nchi pon xjal tiꞌ mejoblenel, ¿tzimpa cub cypaꞌn weyaj? Min, cuma tumel tuꞌn cyiyꞌsan xjal tuya chmilbaj. 35Juꞌtzen cye nxnakꞌatza. Tisen nchi tzalaj ke xjal tuya chmilbaj, juꞌxse nchi tzalaj ke nxnakꞌatza wuyena, cuma ntiina cyuya. Mas yaj, oj wel kꞌiꞌna cyiꞌj, ejeeꞌtzen nxnakꞌatza chi cyjel tuj bis bix cweltzele cypaꞌn weyaj―tz̈i Jesús.

36Bix e xiꞌ tkꞌoꞌn Jesús juntl xnakꞌtzbil cye xjal. E xiꞌ tkbaꞌnxin:

—Min-al jun xjal jacꞌa jatz tiiꞌn jun tkiyꞌ remyent tiꞌ jun acꞌaj xbalen tuꞌn tcuꞌx te remyent tiꞌ jun xbalen kꞌanak, cuma yaaꞌn tumel tuꞌn tcyaj jun oyaj tiꞌj acꞌaj, bix juꞌx jremyent acꞌaj oj tcuꞌx tiꞌj xbalen kꞌanak, tiiꞌn tcyeꞌnc mlay tzꞌel junx. 37Jax min-al jun xjal cwel tkꞌoꞌn vino acꞌaj tuj jun tzꞌuꞌn kꞌanak, cuma ka ma cub tkꞌoꞌn juꞌwa, qꞌuelel rotj tzꞌuꞌn tuꞌn vino oj tel ipcꞌaj. Juꞌtzen tten cxeꞌl tzꞌuꞌn tuj il tuyax vino qꞌuelel koj. 38Juꞌ tzunj, oj ncub vino acꞌaj tuj tzꞌuꞌn, il tiꞌj tuꞌn tcub tuj tzꞌuꞌn acꞌaj. 39J-acꞌaj vino tisenj weya nxnakꞌtzbil. Acꞌaj jnxiꞌ nxakꞌtzana, bix mlay tmojba tiib tuyaj xnakꞌtzbil te ootxa. Kej xjal cycyꞌi nxnakꞌtzbila tisen kej xjal nuk jaj vino kꞌanak cyaj, bix cycyꞌi vino acꞌaj. “Masxse baꞌn jkꞌanak,” tz̈ike.

Currently Selected:

SAN LUCAS 5: mamTS

Highlight

Copy