SAN LUCAS 6

Tej cyakꞌ ke t-xnakꞌatzxin piẍcꞌulbilte twitz triwa tuj kꞌij te ajlabl

(Mt. 12:1-8; Mr. 2:23-28)

1Te juntl maj excꞌa Jesús tuj triwa cyuya ke t-xnakꞌatz. Tujcꞌa jun kꞌij te ajlabl, jkꞌij xjan cyxol judío. Bix iyꞌ cyiiꞌ ke t-xnakꞌatzxin cab twitz triwa, bix el cyskꞌuchexin t-xcꞌomel tuya cykꞌabxin, tuꞌn t-xiꞌ cywaaꞌnxin twitz. 2Lepchtzen cyxiꞌ kej xjal fariseo tiꞌ Jesús, bix tejtzen toc cycyeꞌyenxin n-el cyiiꞌn t-xnakꞌatz Jesús tspigayil triwa, n-octzen cykaneltlxin te Jesús:

—¿Tikentzen tzin tcuyana tuꞌn tel cyiiꞌn tuyey twitz triwa tuj ja kꞌij lu te ajlabl? Tzin tkbaꞌn ley yaaꞌn tumel jtzin cybinchaꞌna―tz̈i ke fariseo, cuma cyiw tuj cyley.

3Aj ttzakꞌbeꞌn Jesús cyexin:

—¿Bajxpatzen txaꞌ cycyeꞌyena tuj tyol Dios ti e baj te kiyꞌjil David cyuya ke tuyaxin tej toc nim takꞌ weyaj cyexin jun maj? 4Ocx David tuj tja Dios bix etz tiiꞌnxin jpan kꞌoꞌn te Dios. Amale tzint tkbaꞌn ley ja xjan pan lu oꞌcx te cyej xin pala baꞌn t-xiꞌ cywaaꞌnxin, pero e xiꞌ twaaꞌn David, bix e xiꞌ tkꞌoꞌnxin te cywa ke tuyaxin, cuma otkxsen chi cyimxin tuꞌn weyaj. Katzen baꞌn o txiꞌ twaaꞌnte David jpan bix tuꞌn t-xiꞌ tkꞌoꞌn cye ke tuyaxin, jaxse juꞌx weya, mas baꞌn tuꞌn ncuyanteya tuꞌn t-xiꞌ cywaaꞌn nxnakꞌatza triwa jaꞌlewe, 5cuma inayena, Jsmaꞌn tuꞌn Dios tuꞌn ntena cyuya xjal, taaw jkꞌij te ajlabl―tz̈i Jesús cye fariseo.

Junxin xjal otk tzꞌel tanem tkꞌabxin

(Mt. 12:9-14; Mr. 3:1-6)

6Tuj juntl kꞌij te ajlabl, ocx Jesús tuj juntl camon jaaꞌ, bix akꞌxin xnakꞌtzal cye xjal. Bix at junxin xjal otk tzꞌel tanem tkꞌabxin. Min yucchtl tkꞌabxin te tmankꞌabxin. 7Bix eteꞌ tzunj xin txꞌolbal ley bix ke fariseo. Bixsen oc cycꞌuꞌjxin tiꞌ Jesús ka tuꞌn tkꞌanenxin cyiꞌ xjal tuj kꞌij te ajlabl, tuꞌntzen tcub tzꞌakxin tuj cyexin cyley. 8Pero el tniyꞌ Jesús tiꞌj ti iyꞌ tuj cycꞌuꞌjxin. Juꞌ tzunj e xiꞌ tkbaꞌn Jesús tej xin cyimnen tkꞌab:

—Weꞌwey, bix juꞌtzen cwel weꞌy cywitz xjal―tz̈i Jesús.

Bix e cub weꞌxin jaaꞌ otk tkba Jesús.

9Bix e xiꞌ tkbaꞌn Jesús cye fariseo:

—Cxeꞌl nkanena cyey, ¿tzimpa tcuyan tley Moisés tuꞌn tbint jun baꞌn tuj kꞌij te ajlabl, bix ka tuꞌn tbint jun kaꞌ? ¿Tzimpa tkbaꞌn kley tuꞌn tkꞌanj xjal, bix ka tuꞌn tbyet xjal?―tz̈i Jesús, cuma el tniyꞌxin tiꞌj e cyajbe tuꞌn tbyet-xin.

10Ocx tcyeꞌyen Jesús tuj cywitzxin cykil xjal, pero min-al akꞌ. Bix e xiꞌ tkbaꞌn Jesús te yaab:

—Nukpinx tkꞌaba―tz̈i Jesús.

E xiꞌ tnukpiꞌnxin tkꞌabxin, bix ul tnaabl tkꞌabxin. 11Pero yalx cye fariseo, nimxe e tzaj cyexin cykꞌoj, bix nim e yolenkexin tuꞌn ti tten tuꞌn tcub cybyoꞌnxin.

Tej tjaw jyet cablaaj t-xnakꞌatz Jesús

(Mt. 10:1-4; Mr. 3:13-19)

12Attzen jun kꞌij ex Jesús naꞌl Dios cyxol witz jaaꞌ min-al xjal. Ex akꞌbil tnaꞌnxin Dios. 13Tej tul kꞌij, e tzaj ttxcoꞌnxin kej xin oc lpe tiꞌjxin, bix etz tscyꞌoꞌnxin cablaaj t-xnakꞌatzxin cyxol, bix e xiꞌ tkbaꞌnxin cye:

—Ejeeꞌy chi oquel te nxela―tz̈ixin.

14Kej cablaaj t-xelxin ejeeꞌ tzunj lu: Simón, jxjal oc tbi te Pedro tuꞌn Jesús, bix tuyax titzꞌen Pedro, Andrés, tuya Jacob, tuya Juan, tuya Felipe, tuya Bartolomé, 15tuya Mateo, tuya Tomás, tuya Jacobo, tcwal Alfeo, tuya Simón, jxjal tkꞌon tiib tuj kꞌoj nejl tuꞌn cytzakpinte judío tjakꞌ tcawbil Roma, 16tuya Judas, tcwal Jacobo, tuya Judas Iscariote, jxjal e xiꞌ tqꞌueyen Jesús tuj cyamecy mas yaj.

Tej t-xiꞌ t-xnakꞌtzaꞌn Jesús nim xjal

(Mt. 4:23-25)

17Tej tetz tscyꞌoꞌnxin kej t-xnakꞌatzxin lu, bix e cuꞌx tiiꞌnxin ke t-xnakꞌatzxin, bix e ponkexin tuj jun chkꞌajlaj. Bix nimxsen xjal e pon jaaꞌ waꞌlcꞌa Jesús. At xjal te Judea bix te Jerusalén bix at xjal te mlaj txꞌotxꞌ ttziiꞌ mar te mediterráneo cyej tnom te Tiro bix Sidona. 18E pon ke xjal te ebilte t-xnakꞌtzbilxin bix tuꞌn cykꞌanj tuꞌnxin. Bix kej otk tzꞌoc biman cyiꞌj, bix el tiiꞌnxin. 19Bix cykilxse xjal oc cyipen tuꞌn toc cymacoꞌn jaxin, cuma tej tpon canan cykꞌab tiꞌjxin, n-ultltzen cynaabl tuꞌn tipemalxin.

Kej xtalbil bix kej qꞌuixcꞌaj

(Mt. 5:1-12)

20Bix oc tcyeꞌyen Jesús cywitz t-xnakꞌatzxin, bix e xiꞌ tkbaꞌnxin cye cyjulu:

—Ejeeꞌy mebe, at t-xtalbil Dios cyibaja, cuma ckꞌojel cyey tuꞌn cycawena tuya Dios. 21Ejeeꞌy at weyaj cyey tiꞌ Dios jaꞌlewe, at t-xtalbil Dios cyibaja, cuma cnool cyanema. Ejeeꞌy nchi okꞌ jaꞌlewe, at t-xtalbil Dios cyibaja, cuma chi tzalajela. 22Ka ma chi el iiqꞌuena cyuꞌn xjal, bix ka ma chi el xooꞌna cyuꞌn xjal, bix ka ma chi xmucchaja cyuꞌn xjal, bix ka ma tkbaj kaꞌ xjalkey nuk tuꞌnj ncheꞌx lpey wiꞌja, 23ka juꞌ n-oc bint cyiꞌja, chi tzalajxa bix chi tenx aleyre, cuma jaxte ctkꞌaꞌ Dios nim t-xel tuj cyaꞌj. Juꞌx e baj cye tyolel Dios te ootxa.

24Pero ja tzunkej kꞌina, lastimke, cuma nuk jaꞌlewe at cykꞌinemal. 25Bix xsunkej nojne cycꞌuꞌj jaꞌlewe, lastimke, cuma cꞌoquel takꞌ weyaj cye. Bix xsunkej nchi tzeꞌn jaꞌlewe, lastimke, cuma tzul bisbajil cye bix chi ookꞌel. 26Bix xsunkej njaw nimset cybi cyuꞌn cykilca xjal te twitz txꞌotxꞌ, lastimke, cuma ejeeꞌ tzunja tisen kej ẍtakꞌ kbal tyol Dios te ootxa. Jax juꞌxkewe, e jaw nimset cybi cyuꞌn cykilca xjal.

Il tiꞌj tuꞌn toc cyakꞌ kajkꞌoj ke

(Mt. 5:38-48; 7:12)

27Pero jatzen cyey, ejeeꞌy n-oc ebinte nyola, cxeꞌl nkbaꞌna cyey il tiꞌj cꞌoquel cyakꞌ cyey kej xjal nchi kꞌojl cyiꞌja. Cykꞌonx jun baꞌn te cyej n-el cyiiqꞌuen ejeeꞌy. 28Cykanenxa te Dios tuꞌn ttzaj tkꞌoꞌn xtalbil cyibaj kej nchi sbun cyiꞌja. Chi naꞌna Dios cyiꞌkej nchi yasen cyiꞌja. 29Ka ma txiꞌ ttzꞌajen jun xjal tkꞌoꞌtxa, cxeꞌl tkꞌoꞌntla juntle tuꞌntzen t-xiꞌ ttzꞌajen. Ka ma tzꞌel tiiꞌn jun xjal tcapẍeyena, bix ka taj tuyax tcamisa, kꞌonxa te. 30Ka at jun xjal ma tkane jun tiixja tey, kꞌonxa te. Ka ma tzꞌel talkꞌaꞌn jun xjal tiꞌja, miꞌn cub ttzyuꞌna tuꞌn tel tiiꞌna te j-otk tzꞌel talkꞌaꞌn. 31Ka taja tuꞌn tbint jun baꞌn tey cyuꞌn xjal, tneel ctbinchay jun baꞌn cye. 32Ka ma tzꞌoc takꞌ tey nuk jaj xjal n-oc takꞌa te, yaaꞌn jawnex jlu twitz Dios, cuma jax juꞌx kej xjal aj il n-oc cyakꞌ cyuya cye. 33Bix ka ma tbinchay jun baꞌn nuk tej xjal o tbincha jun baꞌn tey, yaaꞌn jawnex jlu twitz Dios, cuma jax juꞌx kej aj il nbint cyuꞌn juꞌwa. 34Bix ka nmanana pwak nuk tej xjal jaaꞌ cmanalatla mas yaj, yaaꞌn jawnex jlu twitz Dios, cuma jax juꞌx kej xjal aj il chi manal cyej xjal jaaꞌ baꞌn tuꞌn cymananatl cyxol. 35Pero weya, cxeꞌl nkbaꞌna cyey, il tiꞌj cꞌoquel cyakꞌ cyey kej xjal nchi kꞌojl cyiꞌja, amale miꞌnt tzꞌoc cyakꞌa cye. Bix il tiꞌj chi binchala jun baꞌn cye, amale miꞌnt cybincha jun baꞌn cyey. Bix il tiꞌj chi manala cyuya, amale miꞌnt cymana cyey te t-xel. Ka ma bint cyuꞌna juꞌwa, tkꞌaꞌ Dios nim t-xel te cyey, bix ejeeꞌ tzuna chi yecꞌlte kꞌiꞌntzen tnaabl jawnex Dios cyuꞌna, cuma ntzaj tkꞌoꞌn Dios t-xtalbil tibaj kej xjal kaꞌ bix min nchi kꞌon chjonte te. 36Cꞌoquel cykꞌoꞌna lastim cye xjal, tisente Kman Dios nkꞌon lastim cyey.

Miꞌn chi yolena kaꞌ cyiꞌ xjal

(Mt. 7:1-5)

37Miꞌn chi yolena tiꞌ cyuyey, bix miꞌn cykbaꞌy kaꞌke cyuyey, cuma ka ma bint cyuꞌna juꞌwa, juꞌx pjel cyiꞌja. Pero ka ma cub cynajsaꞌna cyil ke cyuyey oc cybinchaꞌn cyiꞌja, jax cwel najset cyey cyil tuꞌn Dios. 38Ka ma chi xtalena cye xjal, jax chi xtalel ke xjal cyey. Cnool cypay cyuꞌn tuyaj baꞌn, bix cwelex cutzꞌet, bix cjawel tz̈tet, tuꞌntzen tcuꞌx nim tuj, hasta ojxe ttztꞌet. N-oc tcyeꞌyen Dios laꞌ ti cyey nxiꞌ cykꞌoꞌn cye xjal, bix ctkꞌaꞌ t-xel cyey―tz̈i Jesús cye t-xnakꞌatz.

39Jax juꞌx e cyaj tkꞌoꞌn Jesús cabtl techel cye:

—¿Baꞌmpa t-xiꞌ tyeecꞌan jun mos̈ be te juntl mos̈? ¿Yaaꞌmpatzele junx chi xeꞌl tzꞌak tuj jun jul? 40Jaxse juꞌx jun maystro tuya jun t-xnakꞌatz. Ka min tzꞌel tniyꞌ maystro tiꞌj, jax cyjel t-xnakꞌatz min tzꞌel tniyꞌ tiꞌj, cuma jun xjal nxnakꞌtzan mlay tzꞌel tniyꞌ tiꞌj mas twitz tmaystro. Bix laꞌ alcye n-oc t-xnakꞌtzaꞌn maystro te, jaxsen cbinel tuꞌn. Junxsen qꞌuelele t-xnakꞌatz tuya maystro.

41¿Tikentzen nyolena tiꞌj jun tuyey tocx jun niꞌ tzꞌis tuj twitz, pero min tzꞌel tniꞌya tiꞌj tuj tey tocxe jun tzeeꞌ? 42¿Tiken nxiꞌ tkbaꞌna te tuyey: “Qꞌueletz wiiꞌna niꞌ tzꞌis tuj twitza,” tz̈iy, pero min tzꞌel tniꞌya tiꞌj at jun tzeeꞌ tuj tey twitz? Jay at tpalta, pero nbint tuꞌna tisencꞌa mintiiꞌ tila. Kꞌimetz jtey nejl jtzeeꞌ tuj twitza, tuꞌntzen baꞌn tetz tiiꞌna jte tuyey tocx tuj twitz.

Tuꞌnj cybinchben xjal qꞌuelel cyniyꞌa cyiꞌj

(Mt. 7:15-20)

43Jun tken loꞌpj baꞌn mlay takꞌ twitz yaaꞌn baꞌn. Jax juꞌx jun wik tzeeꞌ yaaꞌn baꞌn mlay takꞌ twitz baꞌn. 44Qꞌuelel kniyꞌ tiꞌj ka baꞌn jun tzeeꞌ bix ka yaaꞌn baꞌn laꞌ tiiꞌn twitz. Mlay tzꞌel loꞌpj te higo tiꞌ jun tzeeꞌ at chꞌutel, bix jax juꞌx mlay tzꞌel loꞌpj te uva tiꞌ jun skman chꞌiꞌx. 45Juꞌtzen japenina ke xjal. Kej xjal baꞌn chi binchal baꞌn, cuma tuj cyanem taꞌ baꞌn. Pero kej xjal yaaꞌn baꞌn, chi binchal kaꞌ, cuma tuj cyanem taꞌ kaꞌ. Tiꞌ yolen jun xjal tzin tyeecꞌan ti tten tuj tanem.

Jun techel cyiꞌj caꞌba tkꞌuklel jaaꞌ

(Mt. 7:24-27)

46¿Tikentzen tzin cykbaꞌna weya: “Kaawiya jay,” tz̈ikey, pero min cybiy nyola? 47Kej xjal tzin cybiꞌn nyola bix nbint cyuꞌn, cxeꞌl nkbaꞌna cyey, 48ejeeꞌ tzunja tisen jun xjal njaw tbinchaꞌn tja baꞌnxix cyjelel. Tneel, cjawetz tiiꞌn txꞌotxꞌ yaaꞌn cyiw, tuꞌn tcnet cyiw txꞌotxꞌ. Bix cwelex tkꞌoꞌn tsimyentel jaaꞌ, bix cjawel tbinchaꞌn jaaꞌ. Ojtzen tcub nintzaj jbal, bix ojtzen tjaw noj nimaꞌ bix cꞌoquel punntzꞌaj tiꞌ jaaꞌ, mlay yucch jaaꞌ bix mlay txiꞌ tuj il, cuma binne tten. 49Pero kej xjal tzin cybiꞌn nyola pero min cyniman, ejeeꞌ tzunja tisen jun xjal min cyajxix tja baꞌn. Min cuꞌx tkꞌoꞌn tkꞌuklel jaaꞌ, sino lookꞌ naj ncuꞌx tkꞌoꞌn tuj txꞌotxꞌ. Ojtzen toc punntzꞌaj aꞌ tiꞌ tja, niyꞌ tzꞌaktl jaaꞌ, bix juꞌtzen e pjaꞌ jaaꞌ―tz̈i Jesús cye t-xnakꞌatz.

Currently Selected:

SAN LUCAS 6: mamTS

Highlight

Copy