SAN LUCAS 7
7
Tej tkꞌanj t-akꞌanal capitán tuꞌn Jesús
(Mt. 8:5-13)
1Tejtzen tpon baj tyol Jesús cye t-xnakꞌatz cywitz xjal, bix e xiꞌxin tuj tnom te Capernaum. 2Tuj tzunj ja tnoma at junxin xjal capitán cye soldado. Ja tzunj xin capitán at jun t-akꞌanalxin nimxsen tajbel texin. Bix oc yabel tiꞌj t-akꞌanalxin. Ya chꞌitk tcyim. 3E tbi capitán ka baꞌn kꞌane Jesús cyiꞌ xjal. Juꞌ tzunj e xiꞌ tsmaꞌnxin cab nintzaj xjal cye judío tuya Jesús te cubsal cywitz te Jesús tuꞌn ttzaj Jesús te kꞌanlte jxin t-akꞌanalxin. 4Tejtzen cypon tsanjel capitán twitz Jesús, bixsen e xiꞌ cykbaꞌnxin te:
—Taat, ma ko tzaja cubsal kwitza tey tuꞌn t-xiꞌy kꞌanlte t-akꞌanal capitán. Jxin ma tzaj chkꞌonte keya, baꞌn xjal texin. Juꞌ tzunj kaja jacꞌa txiꞌ chꞌina te kꞌanlte t-akꞌanalxin. 5Amale tet Roma texin, pero n-oc kakꞌ ejooꞌ judío texin, bix o bint jun kjaya camon tuꞌnxin te xnakꞌtzabl tyol Dios―tz̈i ke sanjel.
6Juꞌ tzunj e xiꞌ Jesús cyuyaxin. Chꞌitktzen cyponxin tja capitán, tej t-xiꞌ tchkꞌoꞌn capitán cabtl tuyaxin te tsanjelxin, bix e xiꞌ cykbaꞌn tyol capitán te Jesús.
—Taat, miꞌn txiꞌtla njaya, cuma mintiiꞌ wajbela twitza. Yaaꞌn tumel tuꞌn tocxa tuj njaya, cuma aj il kena. 7Bix tuꞌn nchꞌixewa min ẍin etza njaya tuꞌn npona tuyey. Yal tey tulel, yaaꞌn il tiꞌj tuꞌn tula tuj njaya, cuma n-el nniꞌya tiꞌj nuk tuꞌnj tyola baꞌn tkꞌanj wakꞌanala. 8N-el nniꞌya tiꞌj oꞌcx tuꞌn tyola baꞌn tbint tajbila, cuma jax juꞌx weya o kꞌoj woclena te cawel. Ka ma nkbaꞌya te jun soldado, “Cutxey,” ka ntz̈iya, il tiꞌj cxeꞌl, bix ka ma nkbaꞌya te juntl soldado, “Cyixtey,” ka ntz̈iya, jax il tiꞌj cꞌulel. Jax juꞌx ka ma nkbaꞌya te wakꞌanala: “Bincham jlu,” ka ntz̈iya, jax il tiꞌj cbinel. Jax juꞌx xsunj tey. Alcyej tzin tkbaꞌna tuꞌn tbint, il tiꞌj cbinel―tz̈i capitán te Jesús.
9Tej tbinte Jesús tyol capitán, e jaw kleeꞌ Jesús tiꞌ capitán, bix e jaw sutpajxin te cyeyꞌlte cyej xjal lepchec tiꞌjxin, bix e xiꞌ tkbaꞌnxin cye:
—Cxeꞌl nkbaꞌna cyey, bajxsen wilaꞌya jun aj Israel n-oc ke tcꞌuꞌj wiꞌja tisen ja capitán lu yaaꞌn aj Israel ma tzꞌoc ke tcꞌuꞌj wiꞌja―tz̈i Jesús.
10Bix aj meltzꞌaj ke tsanjel capitán tjaxin, bix tej cyponxin, otk tzul tnaabl t-akꞌanalxin.
Tej tjaw itzꞌj junkꞌa tal junxuj xuuj mebe tuꞌn Jesús
11Te cabtl kꞌij, e xiꞌ Jesús tuj tnom te Naín. E xiꞌ ke t-xnakꞌatzxin tuyaxin, cyuyax nimtl xjal. 12Tej tponxin ttxaꞌn tnom, n-eꞌlelcꞌa jun cyimne kꞌiꞌn cyuꞌn xjal xiꞌne tuj mukbilte. Junkꞌa cyimne, tal jun mebe xuuj. Nuk junx talxuj at. Nim xjal e xiꞌ lpe tiꞌ xuuj bix tiꞌ cyimne. 13Tej toc tcyeꞌyen Jesús ja xuuj, oc tkꞌoꞌnxin lastim te xuuj, bix e xiꞌ tkbaꞌnxin texuj:
—Miꞌn tzꞌokꞌa, xuuj―tz̈i Jesús.
14Bix e pon lkꞌexin tiꞌ tcajon cyimne, bix e cub tkꞌoꞌnxin tkꞌabxin tibaj, bix e weꞌ ke xjal kꞌilte. Bix e xiꞌ tkbaꞌnxin:
—Kꞌa cwal, weꞌwey―tz̈i Jesús.
15Bix e jaw kꞌukpajkꞌa, bix akꞌkꞌa yolel. Bix e xiꞌ tkbaꞌn Jesús te ttxukꞌa:
—Lutzen tala lu―tz̈i Jesús.
16Tejtzen toc cycyeꞌyen ke xjal jlu, nimxsen e jaw kleeꞌke, bix akꞌke nimsaljawte tbi Dios, bix e xiꞌ cykbaꞌn:
—Ma tzul jun jawnex tyolel Dios kxol. Dios ma tzaj kꞌonte te onlte ke, ejooꞌ t-xjalxin―tz̈ike.
17Bix e pon tpocbalel otk takꞌ Dios jun jawnex tyolelxin tuj cykilca cytxꞌotxꞌ judío bix cyuj tnom tiꞌjxe cytxꞌotxꞌ judío.
Kej tsanjel Juan Bautista
(Mt. 11:2-19)
18Cykilcaj e bint tuꞌn Jesús, ocx tpocbal te Juan Bautista tuj tzeeꞌ jaca kꞌij cyuꞌn kej lepchec tiꞌ t-xnakꞌtzbil Juan.
19Bix e ttxoc Juan caꞌba t-xnakꞌatz, bix e xiꞌ tkbaꞌnxin cye tuꞌn cyxiꞌ tuya Jesús te kanlte cyjulu: “¿Japa tey Jscyꞌoꞌn tuꞌn Dios tuꞌn tul te cawel, bix ka at juntl ko ayola tiꞌj tuꞌn tul?” tz̈i cybela.
20Ejeeꞌ tzunj caꞌba tsanjel Juan e ponke tuya Jesús, bix e xiꞌ cykbaꞌn te:
—Ja Juan s-aj chkꞌonte keya tuyey, bix taj tuꞌn t-xiꞌ kkanena tey cyjulu: “¿Japa tey Jscyꞌoꞌn tuꞌn Dios tuꞌn tul te cawel, bix ka at juntl ko ayola tiꞌj tuꞌn tul?” tz̈i Juan―tz̈i ke t-xel Juan te Jesús.
21Tejtzen cypon t-xel Juan, nkꞌanen Jesús nim xjal, bix etz ke biman tuj cyxumlal xjal nuk tuꞌn tyolxin, bix e jaw jket cywitz ke mos̈ tuꞌnxin. 22Bix e xiꞌ tkbaꞌnxin cye:
—Cyucxey tuya Juan bix cykbanx texin jnbint wuꞌna j-e tkba Isaías at tuꞌn tbint tuꞌn Jscyꞌoꞌn tuꞌn Dios. Cykbanx texin jaj ma cyila bix jaj ma cybiy. Cykbanx kej mos̈ ya lutlke nchi cyeꞌyena, bix ke cox ya lutlke nchi bet, kej yaab tuꞌn txꞌaꞌc ya lutlke ma chi kꞌanja, bix kej chquint ya niyꞌxtl tuj cywiꞌ, bix kej cyimne o chi jaw itzꞌj juntl maj, bix kej mebe lu n-oc cybiꞌn baꞌn tpocbal colbil cye. 23Cykꞌumenx te Juan ctzaal tkꞌoꞌn Dios t-xtalbil cyej xjal min baj cycꞌuꞌj wiꞌja, bix min cyaj cykꞌoꞌn tuꞌn cyxiꞌ lpe wiꞌja―tz̈i Jesús cye tsanjel Juan.
24Tej cyex tsanjel Juan, akꞌtzen Jesús yolel cye xjal, bix nim baꞌn yol e xiꞌ tkbaꞌnxin tiꞌ Juan. E tkbaxin cyjulu:
—Tej cyxiꞌy te cyeyꞌlecte Juan ttziiꞌ nimaꞌ Jordán, ¿e pompakey cuma e cyajbey tuꞌn toc cybiꞌna jun xjal yaaꞌn cyiw tnaabl, tisen jun tz̈ꞌim nbaj lajpaj tuꞌn cykꞌiꞌk? Min. 25¿Bix e pompakey nuk te cyeyꞌlecte t-xbalen jawnex? Min. Cykilcakey cytzkiꞌna nuk ejeeꞌ cyej xjal tuj tja cawel, jawnex cyxbalen bix nbint cyuꞌn nuk jaj alcye cyaj. 26¿Tikentzen e xaꞌkey te cyeyꞌlecte Juan? ¿Yaaꞌmpa e xiꞌkey te cyeyꞌlecte jun tyolel Dios? Jaxte jun tyolel Dios Juan, bix cxeꞌl nkbaꞌna cyey, cyxol cykilca tyolel Dios, 27nuk tiꞌj Juan tzꞌiꞌbena cyjulu: “E tkba Dios te Tcwal: ‘Cxeꞌl nsmaꞌna nsanjela nejl twitza, tuꞌn binne cyten xjal oj tpona,’ tz̈i Dios te Tcwal,” tz̈i tyol Dios. 28Cxeꞌl nkbaꞌna cyey, cyxol tyolel Dios itzꞌj cyxol xjal, min-al jun juꞌ jawnex twitzj Juan. Pero jxjal mas chꞌin tuj tcawbil Dios, ja tzunja mas jawnex twitz Juan―tz̈i Jesús cye xjal.
29Tej cybinte xjal bix kej xin chmol alcabala tyol Jesús tiꞌj Juan, el tyol baꞌn tuj cywitzxin, bix e xiꞌ cykꞌoꞌnxin chjonte te Dios tiꞌ tyol Jesús, cuma otk chi cuꞌxxin tuj aꞌ tuꞌn Juan. 30Pero yal cye fariseo bix ke txꞌolbal ley, min e xiꞌ cykꞌoꞌnxin chjonte te Dios tiꞌ Juan, cuma yaaꞌn cyuyaxxin otk chi cuꞌx tuj aꞌ tuꞌn Juan. El cyxooꞌnxin j-otk cub tnincꞌuꞌn Dios te cyexin.
31Bix e yolen Jesús mas cye xjal:
—Key xjal n-el cyiiqꞌuena j-e tkꞌumen Juan bix juꞌx jweya tzin nkbaꞌn, ¿ti techel cꞌajbel tuꞌn tel cyniꞌya tiꞌj ti cytena? 32Ejeeꞌ tzuna te jaꞌlewe tisen kej neeꞌ tuj be cycyꞌi tuꞌn cykẍan cyuya kej nchi kẍan. Oj cykẍan kej neeꞌ nchi kẍan tisen jun mejoblenel, cxeꞌl cykbaꞌn cyekej cycyꞌi chi kẍan cyjulu: “Keya, n-oc kxuxen. Cyey, ¿ti min chi tzaja te bixel kuyena?” tz̈ike. Bix oj cykẍan kej nchi kẍan tisen oj ncuꞌx maket jun cyimne, cxeꞌl cykbaꞌn cyekej cycyꞌi tuꞌn cykẍan cyjulu: “Keya, nko ookꞌa. Cyey, ¿ti min chi tzaja te ookꞌel kuyena?” tz̈ike. 33Cxeꞌl nkbaꞌna cyey, ejeeꞌy tisenj kej neeꞌ cycyꞌi chi kẍan, cuma tej tul Juan Bautista bix min ex tkꞌij nwaaꞌn pan bix ncꞌan vino, e xiꞌ cykbaꞌna: “Jxjal lu min nbint tuꞌn tisenj nbint cyuꞌn cykilca, bix juꞌ tzunj ma tzꞌoc jun biman tiꞌj. Juꞌ tzunj, il tiꞌj qꞌuelel kiiqꞌuen tyol,” tz̈ikey. 34Pero tej wul weya, bix min e cub npaꞌnwe weyaj tisen Juan, sino in waaꞌnwe bix in cꞌanwe tisex tten, tzin cykbaꞌna cyjulu: “Jxjal lu, min cub tpaꞌn weyaj tisen tten kxol, sino nuk nwaaꞌn bix ncꞌan vino bix nbet cyuya chmol alcabala bix cyuya niyꞌtl aj il. Juꞌ tzunj, il tiꞌj qꞌuelel kiiqꞌuen tyol,” tz̈ikey. 35Ja tzunkej n-el cyniyꞌ tiꞌj, cchicꞌajaxeltzen n-el cyniyꞌ tiꞌj tuꞌnj tzin cyocslaꞌn tyol Juan bix inayena―tz̈i Jesús cyej xjal el cyxooꞌn jaxin bix tyol Juan.
Tej tpon Jesús tuj tja jxin fariseo
36Junxin xjal cyxol fariseo, Simón tbixin, e xiꞌ ttxcoꞌnxin Jesús tuꞌn tpon Jesús waaꞌl tuyaxin tuj tjaxin. Bix e xiꞌ Jesús tjaxin, bix e cub kexin tiꞌ mes. 37Bix at jun e baj. Tuj tzunj tnom lu at junxuj xuuj nimxsen xinak tuꞌnxuj. Tej tbintexuj nwaaꞌn Jesús tuj tja jxin fariseo, e xiꞌxuj tjaxin. Bix e xiꞌ tiiꞌnxuj jun cꞌocꞌsbil cyiꞌ xjal wiꞌyelxsen tuj jun lmet te xak. 38Bix e xiꞌ lkꞌexuj tiꞌ Jesús, bix e cub majexuj t-xeeꞌ tkenxin, bix akꞌxuj ookꞌel. Bix e cub txꞌutl taꞌl twitzxuj twiꞌ tken Jesús, bix el tsuꞌnxuj taꞌl twitzxuj tiꞌ tkenxin tuya ttzmal twiꞌxuj. Bix el ttzꞌuꞌbenxuj tiꞌ tkenxin tuꞌn tyeecꞌantexuj tnimbilxuj, bix e cub tsuꞌnxuj jcꞌoꞌcsbil tibaj tkenxin.
39Ja tzunj xin fariseo e txconte Jesús te waaꞌl tuyaxin, tej toc tcyeꞌyenxin ti oc tbinchaꞌn jxuuj aj il tiꞌ Jesús, e cub tbisenxin tiꞌj: “Nuket ja xjal jlu smaꞌn tuꞌn Dios, mayetzele tzꞌel tniyꞌxin tiꞌj xuuja ma tzꞌoc maconte texin aj il xsunxuj.”
40Pero el tniyꞌ Jesús tiꞌj ti niyꞌ tuj tcꞌuꞌj fariseo, bix e xiꞌ tkbaꞌnxin te:
—Simón, at jun nyola tey―tz̈i Jesús.
Bix aj ttzakꞌbeꞌn Simón:
—Kbantzney, taat.
41Bix e xiꞌ tkbaꞌn Jesús cyjulu:
—At junxin xjal e xiꞌ tkꞌoꞌnxin pwak te maan te caꞌba xjal. Attzen junxin e tmanaxin tisenj tzin tcamanxin te caꞌba jnabkꞌi, bix juntlxin e manan nuk tisenj tzin tcamanxin te caꞌba xjaw. 42Pero mix e xcyebakexin cychjontexin pwak. Juꞌ tzunj e xaꞌ tkbaꞌn jxin kꞌol pwak tuꞌn mintiiꞌ t-xel. ¿Alcye jun cyej xjal lu cxeꞌl kꞌonte nim chjonte tej xin kꞌol maan?―tz̈i Jesús te Simón.
43Aj ttzakꞌbeꞌn Simón:
—Tuj nwitza, jaj xjal cꞌasbenel nim―tz̈i Simón.
Bix e xiꞌ tkbaꞌn Jesús te:
—Jax toc tuꞌna.
44Bix aj meltzꞌaj Jesús cyeyꞌlte tej xuuj tcub, bix e xiꞌ tkbaꞌnxin te Simón:
—¿Tzimpa n-el tniꞌya tiꞌj ti nbint tuꞌn ja xuuj lu? Tej ẍin oca tuj tjay, min xiꞌ tkbaꞌna te tkꞌopaja tuꞌn ttzaj tkꞌoꞌn aꞌ te txꞌajbil nkena, tisenj tten kuꞌn. Pero ja tzunj xuuj lu, ma tzꞌel ttxjoꞌn nkena tuya taꞌl twitz bix ma tzꞌel tsuꞌnxuj nkena tuya ttzmal twiꞌxuj. 45Jatzen tey, min s-el ttzꞌuꞌbena nwitza te kꞌolbebl weya, pero ja tzunj xuuj lu, chꞌima maj ma tzꞌel ttzꞌuꞌbenxuj tiꞌ nkena jatxe tej ẍin oca tuj tjay. 46Tej ẍin oca tuj tjay, tey min xjax tkoꞌna chꞌin aseyt te olivo tuj nwiꞌya, tisenj tten kuꞌn, pero ja tzunj xuuj lu, ma cub tkoꞌn cꞌocꞌsbil cyiꞌ xjal jawnexsen twiꞌ tiꞌ nkena. 47Cykilca tzunj lu ma bint tuꞌnxuj, cuma n-el tniyꞌxuj tiꞌj niꞌj tilxuj, amale nimet, pero ma najset. Juꞌ tzunj nim ma tzꞌoc kꞌakꞌen tcꞌuꞌjxuj wiꞌja. Pero ktzkiꞌn jaj xjal yaaꞌn nimxix tzin tyeecꞌan jun tkꞌakꞌbil tcꞌuꞌj, jatzen xjalja yaaꞌn nim til tuj twitz tuꞌn tnajset―tz̈i Jesús te Simón.
48Bix e xiꞌ tkbaꞌn Jesús te xuuj:
—Ma najset tila―tz̈i Jesús te xuuj cywitz xjal.
49Kej xjal kꞌuklec tiꞌ mes tuya Jesús bix akꞌke yolel cyxolx:
—Nim o bint tuꞌnj xjal lu, hasta at jun najsabl til xjal tuꞌn. ¿Al tzunj xjal lu?―tz̈i ke xjal.
50Pero bix e xiꞌ tkbaꞌn Jesús te xuuj:
—Tuꞌnj ma tzꞌoc ke tcꞌuꞌja wiꞌja, ma cleta. Cutxa tzuna. Tujtzen ttz̈yal taꞌy jaꞌlewe tuya Dios―tz̈i Jesús te xuuj cywitz xjal.
Currently Selected:
SAN LUCAS 7: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
