SAN LUCAS 9

Taakꞌen cablaaj t-xnakꞌatz Jesús

(Mt. 10:5-15; Mr. 6:7-13)

1Attzen jun kꞌij e cub tchmoꞌn Jesús kej cablaaj t-xnakꞌatzxin. Bix e xiꞌ tkꞌoꞌnxin tipemalxin bix jtoclenxin cye tuꞌn tel cyiiꞌnxin biman cyiꞌ xjal bix tuꞌn cykꞌanenxin tiꞌ cyyabel xjal. 2Bix e xiꞌ tchkꞌoꞌnxin ejeeꞌ te kbalte tiꞌj tcawbil Dios bix te kꞌanlte ke yaab. 3Bix e xiꞌ tkbaꞌnxin cye:

—Mintiiꞌ cxeꞌl cyiiꞌna tuj be, mi nuk cybardóna, mi nuk cypay, mi nuk cyway, mi nuk cypwaka, mi nuk chꞌixpubl cyiꞌja. 4Bix ja tzunj jaaꞌ cnetel cyuꞌna jaaꞌ chi wutaley, hasta ojxe cyiꞌya tuj tnom cyjel cykꞌoꞌna. 5Ka at jun tnom ma tzꞌel t-xooꞌn cyyola, cytz̈toncjtzen kuk tiꞌ cyxaaba cywitz xjal oj cyiꞌya tuj tnom, te yecꞌbil min chi kꞌumentla tyol Dios cyxol, cuma cycyꞌi―tz̈i Jesús cye t-xnakꞌatzxin.

6Bix iyꞌke bix ocxkexin cyuj nim tnom. Tuj jaca juun tnom e baj cykꞌumenxin jbaꞌn tpocbalel tcawbil Dios, bix e kꞌanenkexin ke xjal yaab.

Tej t-xiꞌ tkane Herodes alcye toclen Jesús tocse

(Mt. 14:1-12; Mr. 6:14-29)

7Yal tzunj xin gobernador Herodes, cykilj tpocbal niyꞌ jnbint tuꞌn Jesús e pon tuj twiꞌxin, pero min e cnet tumel tuꞌnxin alj xin Jesús. Eꞌla tuj cywitz juun xjal ka ja Juan Bautista otk jaw itzꞌj juntl maj cyxol cyimne. 8Yal cabtl xjal, eꞌla tuj cywitz kape ja ktzan tyolel Dios Elías otk tzul jlet juntl maj. Yal cabtl xjal, eꞌla tuj cywitz kape jaj juntl tyolel Dios te ootxa otk jaw itzꞌj tuj cyamecy juntl maj. 9Tej toc tbiꞌn Herodes cyyol xjal, e xiꞌ tkbaꞌnxin:

—Yaaꞌn te Juan, cuma inayena e kꞌumente tuꞌn tel txꞌomet twiꞌ Juan. ¿Pero alcyenexin? cuma nim tzin nbiꞌna tiꞌj nbint tuꞌnj xin xjal―tz̈i Herodes tiꞌ Jesús. Bix nim e tajbe Herodes tuꞌn toc tcyeꞌyen jaxin.

Tej cywaaꞌn jweꞌ mil xjal tuꞌn Jesús

(Mt. 14:13-21; Mr. 6:30-44; Jn. 6:1-14)

10Yal tzunj cablaaj t-xnakꞌatz Jesús otk txiꞌ tsmaꞌnxin, bixsen ul meltzꞌajkexin tuya Jesús, bixsen e baj cykbaꞌnxin ti otk bint cyuꞌnxin cyuj tnom. Bix e xiꞌ tiiꞌn Jesús ejeeꞌxin tuj jun lugar nka ttxaꞌn tnom te Betsaida, tuꞌntzen cytenxin cyjunalxin. 11Pero oc cybiꞌn xjal jaaꞌ e xaꞌ Jesús, bix e xiꞌ ke xjal jaaꞌ e temaxin. Tej cypon xjal, e tiikꞌxin ejeeꞌ, bix akꞌxin kbalte tiꞌj tcawbil Dios, bix oc tkꞌaꞌnexin kej xjal yaab. 12Tejtzen chꞌitk tex kꞌij, bix e xiꞌ lkꞌej cablaaj t-xnakꞌatz Jesús tuyaxin, bix e xiꞌ cykbaꞌnxin texin:

—Kꞌumenx cye xjal lu tuꞌn cyxiꞌ jyol cywa bix cyposada tiyꞌ cyuj tnom nka tzalu bix tuj cojbil, cuma ja lu tuj tzkij txꞌotxꞌ, bix mintiiꞌ te cye at tuj―tz̈ikexin.

13Pero aj ttzakꞌbeꞌn Jesús cyexin:

—Ejeeꞌx cyey cxeꞌl kꞌonte cywa xjal―tz̈ixin.

Bix e xiꞌ cykbaꞌnxin texin:

—Nuk jweꞌ pan tuya caꞌba quis̈ at kuyena. ¿Tajpey tuꞌn kxiꞌya lokꞌol cywa xjal?―tz̈i ke t-xnakꞌatzxin, 14cuma atle jweꞌ mil xinak.

Bix e xiꞌ tkbaꞌn Jesús cye t-xnakꞌatzxin:

—Cykbanx cye xjal tuꞌn cycub ke juun cyaꞌwnak tuya laaj xjal qꞌuelela juun cloj cyuꞌna―tz̈i Jesús.

15Bix e cycuyaxin bix e xiꞌkexin te paꞌl cye xjal, bix e cub ke cykil xjal. 16Bix e xiꞌ ttzyuꞌn Jesús jjweꞌ pan bix jcaꞌba quis̈, bix e jaw tcyeꞌyenxin twitz cyaꞌj, bix e xiꞌ tkꞌoꞌnxin chjonte te Dios tiꞌ waabj. Bix akꞌxin piẍlte, bix e xiꞌ tkꞌoꞌnxin cye ke t-xnakꞌatzxin tuꞌn t-xiꞌ cypaꞌn cyxol xjal. 17Bix cykilca xjal e waaꞌnke tejxe tnoj cycꞌuꞌj. Tej cybaj waaꞌn xjal, bixsen e jaw chmet ttxꞌakan waabj otk cyaj, bix e noj cablaaj chiꞌl.

Tej t-xiꞌ tkbaꞌn Pedro ka ja Jesús jaj xjal o tscyꞌo Dios te cawel tibaj cykilca xjal

(Mt. 16:13-20; Mr. 8:27-30)

18At juntl kꞌij e ten Jesús tjunalxin cyuya ke t-xnakꞌatzxin. Bix e naꞌn Jesús Dios tjunalxin. Tej tbaj naꞌnxin Dios, e xiꞌ tkanenxin cye:

—Tuj cywitz xjal, ¿al-le kena?―tz̈ixin.

19Aj cytzakꞌbeꞌn t-xnakꞌatzxin texin:

—At juun xjal tzin cykbaꞌn jay Juan Bautista. At juuntl tzin cykbaꞌn jay jtyolel Dios Elías. Bix at juuntl tzin cykbaꞌn ja loy juntl tyolel Dios te ootxa o jatz meltzꞌaj juntl maj tuj cyamecy―tz̈ike.

20Bix e xiꞌ tkbaꞌn Jesús cye:

—Yajtzen cyey, ¿al kena tuj cywitza?―tz̈ixin.

Aj ttzakꞌbeꞌn Pedro:

—Jay jxjal o tscyꞌo Dios te cawel tibaj cykilca―tz̈i Pedro.

E tkba Jesús tuꞌn tcub byet cyuꞌn xjal

(Mt. 16:21-28; Mr. 8:31—9:1)

21Bix cyiw e xiꞌ tkꞌumen Jesús cyexin:

—Jax tuꞌna, Pedro, pero miꞌn txiꞌ cykꞌumena cye xjal ka inayena Jscyꞌoꞌn tuꞌn Dios. 22Inayena, Jsmaꞌn tuꞌn Dios tuꞌn ntena cyuya xjal, tuꞌn tiyꞌx nim qꞌuixcꞌaj wuꞌna, bix tuꞌn wel iiqꞌuena cyuꞌn nintzaj xjal tuj nintzaj tja Dios, bix cyuꞌn pala, bix cyuꞌn txꞌolbal ley. Chin cwel byeta, pero te toxen kꞌij oj njaw itzꞌjtla juntl maj tuj cyamecy tuꞌn Dios―tz̈i Jesús.

23Mas yaj, e xiꞌ tkbaꞌn Jesús cye xjal:

—Ka at juun cyey taj tzꞌoc lpe wiꞌja, cyjeltzen cykꞌoꞌna cykilcaj taj cycꞌuꞌja, bix qꞌuelel cyniꞌya tiꞌj qꞌuiyax qꞌuixcꞌaj cyuꞌna nuk tuꞌnj lepcheckey wiꞌja, ojxe cycyima. Ka jaca kꞌij at cyanema tuꞌn cyoc lpey wiꞌja, amale tuꞌnt cycuba nuk wiꞌjqꞌueya, juꞌtzen tten lepcheckey wiꞌja. 24Ja tzunj xjal tcyꞌi tzꞌoc lpe wiꞌja tuꞌnj n-oc tkꞌon tiib tiꞌj ti taj, cxeꞌl t-xooꞌn tchunkꞌlal. Pero ja tzunj xjal cyjel tkꞌoꞌn tchunkꞌlal te twitz txꞌotxꞌ tuꞌnj lepchec wiꞌja, ctcamantzen tchunkꞌlal te junx maj. 25¿Ti tajbel cykilca twitz txꞌotxꞌ te jun xjal oj tcaman tiꞌj bix ka otk txiꞌ t-xooꞌn tchunkꞌlal nuk tiꞌj? 26Jax juꞌx jxjal at tchꞌixew cywitz xjal wiꞌja bix tiꞌ nyola, jaxsele juꞌx weya at nchꞌixewa tiꞌj oj wul meltzꞌaja twitz txꞌotxꞌ juntl maj. Inayena, Jsmaꞌn tuꞌn Dios tuꞌn ntena cyuya xjal, chin ul meltzꞌaja tuya nimxsen wipemala bix tuya nim woclena tuꞌn Nmana Dios, bix cyuya ke jawnex tsanjel Dios tuj cyaꞌj. 27Pero cxeꞌl nkbaꞌna cyey, tiꞌj ja tipemal tcawbil Dios lu, at juun tocx cyxola jaꞌlecuwe, tuj cychunkꞌlala te jaꞌlewe, te ja minaꞌx cycyima, cꞌoquel cycyeꞌyena jun rato ti tten tipemal tcawbil Dios―tz̈i Jesús cye xjal.

Tej tcub meltzꞌaj tcyeꞌnc Jesús

(Mt. 17:1-8; Mr. 9:2-8)

28Otk tzꞌex junle smant tbajlen tkbaꞌn Jesús kej yol at toclel cycyeꞌyen juun xjal jun techel ti tten tcawbil Dios, bix e jawxin twiꞌ witz te naꞌl Dios. Bix e xiꞌ tiiꞌnxin Pedro bix Juan tuya Jacobo. 29Maatktzen nnaꞌnxin Dios, tej tcub chꞌixpet tcyeꞌnc twitzxin, bix e cub meltzꞌaj tilbil t-xbalenxin puro sak bix nkoptzꞌajxsen. 30Nuk tisen tiiꞌ tej tul caꞌba xjal bix akꞌke yolel tuyaxin. Ejeeꞌtzen Moisés tuya Elías, 31bix tzinxsen chi koptzꞌajxin. E yolenkexin tuya Jesús tiꞌj tcyamecyxin tuꞌn tnimantexin tuj Jerusalén. 32Bix otk tzaj chꞌin cywatl Pedro cyuya ke tuya, pero tej cyjaw qꞌuisjxin, e jaw cycyeꞌyenxin tzinxsen koptzꞌaj tcyeꞌnc Jesús tuyaj caꞌbatl tuyaxin waꞌlcꞌa. 33Tej chꞌitk cycub naj Moisés tuya Elías, e xiꞌ tkbaꞌn Pedro te Jesús:

—Taat, Xnakꞌtzal, ¡axsen tbanel etoꞌ tzalu! Cjaweltzen kbinchaꞌna oxe niꞌ pach, jun te tey, juntl te Moisés, bix juntl te Elías―tz̈i Pedro, pero mintiiꞌ oc tcꞌuꞌjxin tiꞌj.

34Mitknaꞌx tbaj yolen Pedro tej tcub jun muj, bix e cyaj baj Pedro bix Juan tuya Jacobo tuj muj, biꞌxsen e cub ttz̈i cyibajxin. 35Tujtzen muj etztzen jun yol. Tz̈i cyjulu:

—Jatzen xinj lu Ncwala, jatzen xjalja o nkbaꞌya tuꞌn tcawen. Kꞌonc cycꞌuꞌja tiꞌ tyol―tz̈i Dios tuj muj.

36Tej ttzaj baj jyol e xiꞌ cybiꞌnxin, bix akꞌ cywitzxin tiꞌ Jesús tjunalxtlxin tcubxin. Min e baj cykbaꞌnxin ti otk baj. Otktzen tzꞌel nim kꞌij bixsen e baj cykbaꞌnxin.

Ul tnaabl junkꞌa xjal tuꞌn Jesús otk tzꞌoc biman tiꞌjkꞌa

(Mt. 17:14-21; Mr. 9:14-29)

37Tetzen juntl kꞌij bixsen e cuꞌtzkexin twiꞌ witz, bix tej cycꞌuꞌlxin t-xeeꞌ witz, nimxsen xjal e pon twitz Jesús. 38Cyxoltzen xjal at junxin e xiꞌ tkbaꞌnxin te Jesús:

—Taat, cxeꞌl ncubsaꞌna nwitza tey tuꞌn ttzaj tonena ncyꞌaala, cuma oꞌcxcꞌa junx ncyꞌaala. 39O tzꞌoc jun biman tiꞌj, bix nim maj nbaj tyaaꞌn biman jakꞌa bix njaw s̈-inkꞌa tuꞌn, bix ncub xooꞌnkꞌa tuꞌn twitz txꞌotxꞌ, bix n-akꞌ eletz plut tuj ttzikꞌa. Tcyꞌi biman tzꞌel tiꞌjkꞌa, bix ma txiꞌ ncyꞌaala tuj il tuꞌn. 40Xiꞌ ncubsaꞌna nwitza cye t-xnakꞌatza tuꞌn tel cyiiꞌn biman tiꞌ ncwala, pero mix ma binne cyuꞌn―tz̈ixin.

41Aj ttzakꞌbeꞌn Jesús texin:

—¿Mimpatzenal xjal n-oc ke cycꞌuꞌj wiꞌja? ¿Jaaꞌtzen taꞌ cyocslabla? ¿Jteꞌtltzen maj cxeꞌl nyeecꞌana wipemala, tuꞌntzen toc ke cycꞌuꞌja wiꞌja? ¿Jteꞌtltzen maj tuꞌn cyiyꞌxa wuꞌna? Cyiiꞌntznej niꞌ cwale wuyey―tz̈i Jesús.

42Bix e tzaj cyiiꞌnxin niꞌ cwal te Jesús, pero mitknaꞌx tpon neeꞌ twitzxin tej tcub t-xooꞌn biman ja neeꞌ twitz txꞌotxꞌ bix akꞌ neeꞌ balkꞌajel. Bix el tlojoꞌn Jesús biman bix e kꞌanj neeꞌ, bix e xiꞌ tkꞌoꞌn Jesús neeꞌ te tman. 43Bix cykilca xjal e jaw kleeꞌ tiꞌ tipemal Dios.

Tej t-xiꞌ tkbaꞌn Jesús juntl maj tuꞌn tcub byet

(Mt. 17:22-23; Mr. 9:30-32)

Nim e yolenke t-xnakꞌatz Jesús cyiꞌj jawnex tbinchben Jesús, pero e xiꞌ tkbaꞌn Jesús cye:

44—Cykꞌonc cycꞌuꞌja tiꞌj cxeꞌl nkbaꞌna cyey. Inayena, Jsmaꞌn tuꞌn Dios tuꞌn ntena cyuya xjal, chin kꞌojela tuj cykꞌab xjal tuꞌn nbyeta―tz̈i Jesús.

45Pero ke t-xnakꞌatzxin, min el cyniyꞌ tiꞌ tyolxin tiꞌj at tuꞌn tbyet-xin. Te cye, eꞌwen taꞌ ti japenina cuma min e cyocsla at tuꞌn tbyet-xin, bix at cychꞌixew tuꞌn t-xiꞌ cykanen ti japenina kej tyolxin.

Kej mas jawnex tuj twitz Dios

(Mt. 18:1-5; Mr. 9:33-37)

46Attzen jun kꞌoj e jaw cyxol t-xnakꞌatz Jesús. “Inayena mas jawnex,” tz̈i jun. “Min, inayena,” tz̈i juntl. 47Pero ttzkiꞌn Jesús te jaca juun e cub tbisen tuj tanem ka ja mas jawnex. Juꞌtzen e tzaaꞌ ttxcoꞌn Jesús jun neeꞌ tuꞌn toc weꞌ ttxlajxin, 48bix e xiꞌ tkbaꞌnxin cye:

—Alj ma tzꞌoc tkꞌon tiib tuꞌn tajben te jun xjal yaaꞌn jawnex, tisen ja neeꞌ lu yaaꞌn jawnex, bix tuꞌn toc wakꞌa cye, ja tzunja najben weya. Bix oj tajben weya, yaaꞌn nuk te weya, sino tuyax te Dios, jxjal e tzaj kꞌonte weya. Juꞌ tzunj, alj cyxola mas najben cye cabtl, ja tzunja mas jawnex tuj twitz Dios―tz̈i Jesús cye t-xnakꞌatz.

Alj min nkꞌoj kiꞌj, kuya taꞌ

(Mr. 9:38-40)

49Bix e xiꞌ tkbaꞌn Juan te Jesús:

—Taat, ejooꞌya t-xnakꞌatza e tjoya te kajbela tey. Pero oc kcyeꞌyena juntl xjal n-el tiiꞌn biman cyiꞌ xjal tuꞌn tipemal tey tbi. Pero e xiꞌ kkbaꞌna texin tuꞌn tweꞌxin tbinchantexin juꞌwa, cuma yaaꞌn jaanxin toc te tajlal t-xnakꞌatza kuyena―tz̈i Juan.

50Aj ttzakꞌbeꞌn Jesús:

—Miꞌn txiꞌ cymayoꞌna. Alj xjal min kꞌojl kiꞌj, kuya taꞌ―tz̈i Jesús.

Tej toc tile Jesús Jacobo bix Juan

51At juntl maj e xiꞌ tkbaꞌn Jesús cye t-xnakꞌatzxin ti ctemela tej cytzpet. Tej chꞌitk tpon tumel tuꞌn tcyim Jesús bix tuꞌn tjaxxin tuj cyaꞌj, bix e tnimsaxin tcꞌuꞌjxin tuꞌn t-xiꞌxin tuj Jerusalén tuꞌn tbyet-xin. 52E xiꞌ tsmaꞌn Jesús cab tsanjelxin nejl twitzxin, tuꞌn tcnet cyposadaxin. Ocx ke tsanjelxin tuj jun tnom tuj departamento te Samaria. 53Pero tej toc cybiꞌn kej xjal tej tnom jaaꞌ tuꞌn tpona posadayin Jesús, cycyꞌi xjal tuꞌn tponxin, cuma cytzkiꞌn xjal nx-ajxin Jerusalén te iyꞌsal Pascua, bix yaaꞌn junx jlu tuyaj cyreligión aj Samaria. 54Tej cybinte ke t-xnakꞌatzxin Jacobo bix Juan otk tzꞌel cyxooꞌn kej xjal tej tnoma ja Jesús, e xiꞌ cykbaꞌnxin texin:

—Taat, ¿yaaꞌmpaxsele baꞌn tuj twitza tuꞌn t-xiꞌ kkanen kꞌakꞌ twitz cyaꞌj tuꞌn cynaj xjal lu?―tz̈ikexin.

55Bix oc tilenxin ejeeꞌ, bix e xiꞌ tkbaꞌnxin:

—Min, yaaꞌn juꞌwa. Yaaꞌn tumel cynaabla. 56Min in ula te xitl cye xjal, sino te coꞌplcye―tz̈ixin.

Bix e xiꞌkexin posadayil tuj juntl tnom.

Kej cyajbe tuꞌn cyoc lpe tiꞌj Jesús

(Mt. 8:18-22)

57At juntl maj oc noj junxin xjal cywitzxin tuj be, bix e xiꞌ tkbaꞌn jxin xjal te Jesús:

—Taat, chin xeꞌla tuyena nuk jaaꞌxja tuꞌn t-xiꞌy―tz̈i xjal.

58Pero aj ttzakꞌbeꞌn Jesús:

—Kej ẍiwel at cyja tuj tjulel xak bix kej chꞌit at cykꞌuꞌsem, pero jatzen tey, ka taja tzꞌoc lpey wiꞌj, iltzen tiꞌj qꞌuelel tniꞌya tiꞌj mintiiꞌ njaya bix nchin wutana te koniyan jaaꞌ nchin poniya―tz̈i Jesús.

59E xiꞌ tkbaꞌn Jesús te juntl xjal:

—Lpeꞌcꞌa wiꞌja―tz̈ixin.

Bix aj ttzakꞌbeꞌn jxin xjal:

—Taat, waja tuꞌn woc lpeya tiꞌja, pero najsama, waja cuꞌx nmakuꞌna nmana nejl oj tcyim―tz̈i xjal.

60Pero e xiꞌ tkbaꞌn Jesús te:

—Ka taja tzꞌoc lpeya wiꞌja, kꞌoncja tuꞌn tcuꞌx cymakuꞌn cyimne cycyimne. Jatzen tey, kꞌoꞌnc tiiba te kꞌumlte tiꞌj tcawbil Dios―tz̈i Jesús.

61At juntl xjal oc kbante te Jesús:

—Taat, chin oquel lpeya tiꞌja. Pero najsama, waja tneel pjel nkꞌolbeꞌna ke wermaniya ke nmana bix ntxuya―tz̈ixin.

62Bix aj ttzakꞌbeꞌn Jesús:

—Jun xjal ncjon tuya wacẍ, il tiꞌj cxeꞌl tcyeꞌyen twitz tuꞌn t-xiꞌ ttzꞌutzꞌ jiquen. Mlay txiꞌ jiquen ka n-ajxe tcyeꞌyen tiꞌjxe. Juꞌ tzunj xjal cꞌoquel lpe wiꞌja. Ka ma tzꞌaj tcwent tiꞌj ma cyaj tiꞌjxe, mintiiꞌ cꞌajbela tuj taakꞌen Dios―tz̈i Jesús.

Currently Selected:

SAN LUCAS 9: mamTS

Highlight

Copy