SAN LUCAS 10
10
Oxcꞌal tuya laaj tsanjel Jesús
1Tbajlenxitltzen yolen Kaaw tiꞌj tcawbil Dios, e jaw tscyꞌoꞌnxin juntl oxcꞌal tuya laaj xjal tuꞌn cyajben te tsanjelxin tuj jun akꞌuntl. Bix e pjeꞌx tpaꞌnxin ejeeꞌ caꞌcab cybaj tuj juun tnom bix lugar jaaꞌ at tuꞌn tponxin mas yaj. 2Bix e xiꞌ tkbaꞌn Jesús cyexin:
—Akꞌuntl cyiꞌ xjal tisen jun jaatxꞌen. Nimxsen jaatxꞌen, pero yaaꞌn nimxix akꞌanal at te chmolte. Juꞌ tzunj cykanenx te Kaaw tiꞌ akꞌuntl tuꞌn t-xiꞌ tsmaꞌnxin akꞌanal te chmolte twitz awal. 3Chi xeꞌla tuj juun tnom jaaꞌ cxeꞌl nkbaꞌna cyey. Qꞌuelel cyniꞌya tiꞌj ejeeꞌy cyisen tal carnel bix chi xeꞌl nsmaꞌna cyxolj xjal cyisen xoꞌj cyaj tzꞌoc cytxꞌaꞌn ejeeꞌy. 4Oj cyxiꞌy, miꞌn txiꞌ cyiiꞌna pwak, bix cypay, bix chꞌixpubl cyxaaba. Bix miꞌn chi yolena cyuya xjal tiyꞌ tuj be. 5Oj cyocxa tuj jun jaaꞌ, tneel cyyola cꞌoquex te taaw jaaꞌ cyjulu: “Tuꞌn tten ja jaaꞌ lu tuj jttz̈yal tzin tkꞌoꞌn Dios,” tz̈i cybela. 6Ka ma tiikꞌ cyyola tiꞌj ja ttz̈yal te Dios tzin cykꞌumena, ckꞌojeltzen te. Pero ka min ma tiikꞌ, mlaytzen kꞌoj te. 7Ka ma tzalaj taaw jaaꞌ tiꞌj yol tzin cykꞌumena, jatztzen chi temela chꞌina tuya. Jaxsele juꞌx oj ttzaj tkꞌoꞌn chꞌin cyway bix cycꞌaꞌy, miꞌn chjet cyuꞌna, cuma akꞌanalkey tiꞌ tyol Dios, bix cykilca akꞌanal tumel tuꞌn cychjet. 8Oj cypona tuj jaakꞌch tnom, ka ma cyiikꞌ xjal ejeeꞌy, miꞌn tzꞌel cyiiqꞌuena cyway oj ttzaj cykꞌoꞌn cyey. 9Bix chi kꞌanela kej xjal yaab cyxol, bix chi kbala cyej xjal aj tnom cyjulu: “Jcawel scyꞌoꞌn tuꞌn Dios o tzul twitz txꞌotxꞌ, bix juꞌx tcawbil Dios o tzul tiiꞌn. Nkatzen taꞌ te cyey,” tz̈i cybela. 10Pero ka ma tzꞌel cyiiqꞌuen xjal ejeeꞌy oj cypona tuj jun tnom, juꞌtzen chi xeꞌla cyuj nmak be tuj tnom, bix chi kbala cye xjal cyjulu: 11“Biꞌx cyjel ktz̈toꞌna cywitza jkuk te cytanema otk tzꞌoc tiꞌ kxaaba, te jun yecꞌbil te cyey. Tisenxsen otk tzꞌel cyiiqꞌuena tyol Dios, jaxse juꞌx qꞌuelel tiiqꞌuen Dios ejeeꞌy tuj tcawbil. Jaxte tzul tcawbil Dios, pero amale oyjet cyey, pero o tzꞌel cyiiqꞌuena,” tz̈i cybela. 12Nim castiwa e cub tuꞌn Dios tibaj tnom te Sodoma jun maj jatxe ootxa, pero cxeꞌl nkbaꞌna cyey, tuj jkꞌij te castiwa tzul, mas castiwa tzul tkꞌoꞌn Dios cyej tnom n-el cyiiqꞌuen tkꞌumj tcawbilxin twitzj e cub tkꞌoꞌnxin tuj Sodoma―tz̈i Jesús cyej setenta tsanjelxin.
¡Ayxsen kej tnom o tzꞌel cyiiqꞌuen tyol Dios!
(Mt. 11:20-24)
13Bix at mastl tyolxin e tkbaxin cye tsanjelxin:
—¡Ayxsen kej judío te Corazín, bix ayxsen kej judío te Betsaida! cuma o tzꞌel cyiiqꞌuen tyol Dios, amale nimet e yecꞌj wipemala cyuj tzunj tnom lu. Nuket e yecꞌj jwipemala cyej aj il yaaꞌn judío cyuj tnom te Tiro bix Sidón, ya otetle tzꞌoc cykꞌoꞌn cyxbalen te bisbajil bix otetle chi cub ke tuj tzaꞌj te techel eteꞌtzen tuj bis tuꞌn cyil. 14Tuj jkꞌij te castiwa tzul, mas castiwa tzul tkꞌoꞌn Dios cyej xjal aj Corazín bix cyej xjal aj Betsaida twitzj tzul tkꞌoꞌnxin cyej xjal te Tiro bix cyej xjal te Sidón. 15Yaltzen cyej xjal te tnom te Capernaum, tuj cywitz baꞌnxsen chi elel twitz Dios bix chi camal jun jawnex lugar tuya Dios tuj cyaꞌj, pero yaaꞌn juꞌwa. Chi cwel baj tuj chꞌixbajil tuj kꞌakꞌ. 16Key nsanjel, kej xjal ma cyiikꞌ cyyola, inayen tzuna tzin cyiikꞌente. Pero kej xjal n-el cyiiqꞌuen cyyola, inayen tzuna n-el cyiiqꞌuen. Bix kej xjal n-el cyiiqꞌuen inayena, jatzen Dios n-el cyiiqꞌuen, ja Dios e tzaj tsmaꞌn inayena―tz̈i Jesús cyej tsanjelxin, bix e xiꞌ tsmaꞌnxin ejeeꞌ te kbalte tcawbil Dios.
Tej cymeltzꞌaj oxcꞌal tuya laaj
17Tej tpon baj cyaakꞌen jsetenta tsanjel Jesús, bix e pon meltzꞌajkexin, bix e tzalajkexin. Bix e xiꞌ cykbaꞌnxin te Jesús:
—Taat, tej t-xiꞌ kkꞌumena tbiy, cyuyax ke biman oc cybiꞌn ejooꞌya―tz̈ikexin.
18Bix e xiꞌ tkbaꞌn Jesús cyexin:
—Jaxte il tiꞌj tuꞌn cynimante ke biman nbiꞌya. Oc ncyeꞌyena tej tel tzꞌak taaw il, Satanás, tuj cyaꞌj. Tej tel tzꞌak, tuj ajkelbil tisen jun tken kꞌancyok bix ncub najtl. 19Jwipemala e xcye tibaj taaw il, o txiꞌ nkꞌoꞌna cyey, tuꞌn cycamana cyiꞌ biman bix tibaj cykilcatl n-oc cyiꞌja cyisen lbaj bix cyisen siꞌcy. Tuꞌn cyxcyey tiꞌj cykilca nbint tuꞌn taaw il cyiꞌja, o kꞌoj cyey cyipemala. Mlay caman cyiꞌja tuya jun kaꞌ. 20Pero miꞌn chi tzalaja nuk tuꞌnj o kꞌoj cyey cyipemala cyibaj biman. Ja te mas il tiꞌj, jaj o chi tzꞌibja tuj cyaꞌj―tz̈i Jesús cye tsanjelxin.
Tej tjaw tzalaj Jesús
(Mt. 11:25-27; 13:16-17)
21Tej tbaj cykꞌumen tsanjelxin cykilca ti otk bint cyuꞌn, e jaw tzalajxin, bix e naꞌnxin Dios. E xiꞌ tkbaꞌnxin:
—Nmana, Taat, jay taaw tibaj cykilca tuj cyaꞌj bix tibaj cykilca twitz txꞌotxꞌ. Bix nxiꞌ nkꞌoꞌna chjonte tey j-e cub tnincꞌuꞌna tiꞌj tcawbila eꞌwen tuꞌna te cyej xjal nimxsen baꞌn cyuꞌn tuj cywitz, pero te cyej xjal ajnintz cynaabl cyisen ke neeꞌ, o txiꞌ tkꞌoꞌna tuꞌn tel cyniyꞌ tiꞌj ti tten tcawbila. Juꞌtzen o bint tuꞌna, cuma juꞌ tajbila. 22Cykilca o kꞌoj tuꞌna tuj nkꞌaba, Taat. Min-al ttzkiꞌn nuk oꞌcx te weya, inayena Tcwala, o tbinchay jlu. Nuk oꞌcx jay ttzkiꞌna jlu, Taat. Bix min-al ttzkiꞌn ka Nmana jay. Nuk inayena etzkilte, bix xsunkej nxiꞌ nkꞌoꞌna tumel cye―tz̈i Jesús te Tman.
23Tej tten Jesús tjunal cyuya ke t-xnakꞌatzxin, e xiꞌ tkbaꞌnxin cye:
—Jun nintzaj xtalbil o kꞌoj cyey, cuma eteꞌy tuyaj xjal Scyꞌoꞌn tuꞌn Dios te cawel. 24Cxeꞌl nkbaꞌna cyey, nim tyolel Dios bix kej cawel ootxa e cyajbe tuꞌn toc cycyeꞌyen tipemal Jscyꞌoꞌn tuꞌn Dios, tisenj n-oc cycyeꞌyena jaꞌlewe, pero mixbe toc cycyeꞌyen. E cyajbe tuꞌn toc cybiꞌn kej tyol Jscyꞌoꞌn tuꞌn Dios, tisenj n-oc cybiꞌna jaꞌlewe, pero mixbe toc cybiꞌn―tz̈i Jesús cye t-xnakꞌatz.
Jun tbanel aj Samaria
25At jun maj e pon lkꞌe jun txꞌolbal ley tiꞌ Jesús te kanlecte ka n-el tniyꞌ Jesús tiꞌj ley. E xiꞌ tkbaꞌnxin:
—Taat Xnakꞌtzal, ¿alcyej il tiꞌj tuꞌn tbint wuꞌna tuꞌn ncamana nchunkꞌlala te junx maj?―tz̈ixin.
26Aj ttzakꞌbeꞌn Jesús texin:
—¿Ti tzꞌiꞌben tuj ley? ¿Alcyej cxeꞌl cymeltzꞌuꞌna tyol jilj?―tz̈i Jesús.
27Aj ttzakꞌbeꞌn txꞌolbal ley:
—Cꞌoquel takꞌ Cyaawey Dios cyey tuya cykil cycꞌuꞌja, bix tuya cykil cyanema, bix tuya cykil cyipena, bix tuya cykil cynaabla. Bix cꞌoquel cyakꞌ ke cyuyey cyey tisenj n-oc cyakꞌ cyiiba cyey―tz̈i txꞌolbal ley.
28E xiꞌ tkbaꞌn Jesús texin:
—Jax tuꞌna. Bincham ja lu, bixsen ccamala tchunkꞌlala te junx maj―tz̈i Jesús.
29Pero tcyꞌi jxin xjal lu tzꞌoc cyakꞌ ke tuyaxin texin. Juꞌ tzunj e xaꞌ tkbaꞌnxin te Jesús:
—¿Alcyetzen ke wuyena?―tz̈ixin.
30E xiꞌ tkbaꞌn Jesús texin:
—Cxeꞌl nkꞌoꞌna jun tumel tey alcyej tuyey. At junxin xjal e tzaj tuj tnom te Jerusalén tuꞌn tponxin tuj tnom te Jericó. Pero e cub tzyuꞌnxin tuj be cyuꞌn alakꞌ. El baj tikꞌch texin, tuyax ke tiꞌjxin toc. Bix e baj pjuꞌnxin hasta chꞌitk tcyimxin, bix el ke alakꞌ tiꞌjxin. 31Juꞌx e xiꞌ junxin pala tujx be. Tej toc noj jxinak tcub tuj be tiꞌjxin, min e weꞌxin, sino txucl exxin ttxlaj. 32Jax juꞌx e xiꞌ junxin aj Leví tujx be, junxin cyuyaj jxin akꞌanal tuj tja Dios. Tej toc noj jxin elninakexin tiꞌjxin, jax juꞌx min e weꞌxin tuꞌn tjaw tonenxin, sino txucl exxin ttxlaj. 33Jax juꞌx e baj tej junxin aj Samaria e xiꞌ tujx be. Tej toc tcyeꞌyenxin jxjal iken elninakexin tuꞌn, bix oc kꞌakꞌen tcꞌuꞌjxin tiꞌj. 34Bix e xiꞌ lkꞌexin tiꞌj, bix oc tsuꞌnxin aseyt te olivo bix vino tiꞌj elninakexin iken tuꞌnxin, tuꞌn tkꞌanj, bix oc tpotzenxin tuya xbalen, bix e jax tkꞌoꞌnxin jaxin tibaj tburxin, bix e xiꞌ tiiꞌnxin tuj jun posada, bix e cyaj tenxin te cꞌojlalte. 35Te juntl kꞌij bix ocx tkꞌoꞌnxin pwak te plata te taaw posada, bix e xiꞌ tkbaꞌnxin te: “Cꞌojlanx chꞌin jxjal elninakexin. Ka ma tzꞌajben mas pwak, cxeꞌl nkꞌoꞌntla tey oj wul meltzꞌaja,” tz̈i aj Samaria. 36¿Ti toc tuꞌna? ¿Altzen jun cyej oxe xjal lu oc te tuyaj xin otk tzakꞌ cyuꞌn alakꞌ?―tz̈i Jesús te txꞌolbal ley.
37Aj ttzakꞌbeꞌn txꞌolbal ley:
—Jaj xjal oc kꞌakꞌen tcꞌuꞌj tiꞌj elninakexin―tz̈ixin.
Bix e xiꞌ tkbaꞌn Jesús texin:
—Jax tuꞌna. Cutxeney bix binchama tisenj e bint tuꞌn aj Samaria―tz̈i Jesús.
Tej tpon Jesús kꞌolbelte Marta bix María
38At juntl maj tej cybet Jesús cyuya t-xnakꞌatz tuj be, bix e ponkexin tuj jun chꞌin tnom. Tuj tzunj tnom lu at junxuj xuuj Marta tbi, bix e ttxocxuj ja Jesús tuꞌn tponxin tjaxuj. 39Ja tzunj xuj xuuj lu, at jun titzꞌenxuj María tbi. Tejtzen tpon Jesús tjaxuj, e cub ke María twitz Jesús tuꞌntzen toc tbiꞌnxuj ti toc tuꞌn Jesús. 40Pero yal te Marta, nuk taakꞌen texuj oc tipenxuj tiꞌj tuꞌn tbint. E xiꞌ lkꞌexuj tiꞌ Jesús, bix e xiꞌ tkbaꞌnxuj:
—Taat, ¿mimpa ma tzꞌoc tcyeꞌyena ma cyaj tcyeꞌyen witzꞌena akꞌuntl nwitza? Kbanx chꞌin texuj tuꞌn tonenxuj wiꞌja―tz̈i Marta.
41Aj ttzakꞌbeꞌn Jesús texuj:
—Marta, Marta, oꞌcx ncub tbisena tiꞌj nim taakꞌena, 42pero at jun mas ilxsen tiꞌj. Yaltzen te María, ma baj tscyꞌoꞌnxuj alcye mas baꞌn, jaj tuꞌn t-xiꞌ tbiꞌnxuj nxnakꞌtzbila, bix mlay tzꞌel wiiꞌna texuj―tz̈i Jesús te Marta.
Currently Selected:
SAN LUCAS 10: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
