SAN LUCAS 11

Tej t-xiꞌ t-xnakꞌtzaꞌn Jesús cye t-xnakꞌatz ti tten tuꞌn cynaꞌn Dios

(Mt. 6:9-15; 7:7-11)

1At juntl maj e naꞌn Jesús Dios tuj jun lugar. Tej tbaj naꞌnxin Dios, at jun t-xnakꞌatzxin e xiꞌ tkbaꞌn texin:

—Taat, xnakꞌtzantz keya ti tten tuꞌn knaꞌna Dios, tisenj te Juan Bautista e xiꞌ t-xnakꞌtzaꞌn kej xjal oc lpeke tiꞌ t-xnakꞌtzbil―tz̈i.

2Bix e xiꞌ tkbaꞌn Jesús cye t-xnakꞌatzxin:

—Oj cynaꞌna Dios, cykbanxa ju lu: “Kman Dios ata tuj cyaꞌj, jawxit nimsaꞌn tbiy xjan tuꞌn cykilca xjal. Tzulxit tcawbila twitz txꞌotxꞌ. Bint-xit jtajbila twitz txꞌotxꞌ kuꞌna tisenj nbint tuj cyaꞌj. 3Kꞌontza kwaya te jaꞌlewe. 4Bix najsama kila ncub kbinchaꞌna twitza, cuma juꞌx keya ncub knajsaꞌna jkaꞌ n-oc cybinchaꞌn xjal kiꞌja. Bix ko toney oj koca tuj niyꞌbebl, tuꞌn tiyꞌx kuꞌna,” juꞌ tz̈i cybela oj cynaꞌna Dios.

5Bix e xiꞌ tkbaꞌntlxin cye t-xnakꞌatzxin:

—¿Tkꞌaꞌpa Dios oj cycubsana cywitza te Dios juꞌwa? ¿Ti toc cyuꞌna tiꞌj ja tumel lu? Te chil akꞌbil oj tpon jun tuyey tjay. Pero mintiiꞌ waabj tuj tjay. Juꞌ tzunj cxeꞌley tuya tvesinta, bix cxeꞌl tkbaꞌna te cyjulu: “Taat, najsama, at jun il tiꞌj wiꞌja. Kꞌontz oxe pan nchꞌexa. 6Ma tzul jun wuleya njaya. Nakch ma tzaaꞌ, bix ma tzꞌoc takꞌ weyaj te, pero mintiiꞌtl weya nwa tuꞌn t-xiꞌ nkꞌoꞌna te,” tz̈i tbela. 7¿Cꞌaalpa ttzakꞌbeꞌn taaw jaaꞌ: “Mintiiꞌ. Cutxey. Lu kenwe nchin wutana cyuya ncwala, bix lu jaaꞌ lmoꞌna. Mlay chin jaw weꞌwa kꞌolte waabj tey,” tz̈ipa tbel tvesinta tey? 8Cxeꞌl nkbaꞌna cyey miꞌn txiꞌ tkbaꞌnxin juꞌwa. Il tiꞌj tkꞌaꞌxin. Amale tcyꞌit-xin txiꞌ tkꞌoꞌnxin nuk tuꞌnj tvesint tiibxin, pero il tiꞌj cxeꞌl tkꞌoꞌnxin tuꞌn miꞌn tzꞌel tchꞌixewxin cywitz xjal. Yaltzen te Dios, ¿miꞌmpa tzaj tkꞌoꞌnxin cyey alcye il tiꞌj, tuꞌn miꞌn cub baj nimbilte tbixin, bix tuya cykil tcꞌuꞌjxin? 9Juꞌ tzunj, tuya cykil cycꞌuꞌja cykanenx te Dios tuꞌn ttzaj tkꞌoꞌn jnajben cyey. Ka ma chi cubsana cywitza te, tzul tbiꞌn. 10Cxeꞌl nkbaꞌna cyey jaca juun xjal nxiꞌ tkanen te Dios tuꞌn ttzaj tkꞌoꞌn j-il tiꞌj, ctzaaltzen tkꞌoꞌn Dios te, bix jaca juun xjal ncubsan twitz te Dios tiꞌ onbilte, ctiikꞌeltzen, tisenj oj toc cytcoꞌna tlemel jaaꞌ bix cjketel cywitza. 11Bix jctzaal tkꞌoꞌn Dios cyey, ¿japaj min tzꞌajben? Cxeꞌl nkanena cyey, oj tkanente jun cycwala chꞌin tchiꞌ quis̈ cyey, ¿lbajpa cxeꞌl cykꞌoꞌna te? 12Bix oj tkanente jun cycwala jun niꞌ tjos, ¿siꞌcypa cxeꞌl cykꞌoꞌna te? 13Min. Mlay cybinchay juꞌwa. Amale aj iletkey, pero jaj baꞌn cxeꞌl cykꞌoꞌna cye cycwala. Yajtzen te Cymana tuj cyaꞌj, masxsen jaj baꞌn ctzaal tkꞌoꞌn cyey oj t-xiꞌ cykanena. Jaj baꞌn ctzaal tkꞌoꞌn Dios te cyey, hasta tuyax Espíritu Santo tkꞌaꞌxin te cyey―tz̈i Jesús.

Tej cykbante fariseo ja taaw il kꞌol tipemal Jesús

(Mt. 12:22-30; Mr. 3:20-27)

14At juntl kꞌij e xiꞌ tkbaꞌn Jesús tuꞌn tel biman tiꞌ jun xinak. Tej toc ten biman tiꞌ xinak, min e bintl tyolen, pero tej tel biman, nbintltzen tyolen xinak. E jawxsen kleeꞌ cykilca xjal tiꞌj. 15Pero at juun cyxol xjal cycyꞌi tuꞌn tjaw nimset tbi Jesús, bix e xiꞌ cykbaꞌn:

—Jtipemal jxjal luwe cyibaj biman yaaꞌn te, sino o kꞌoj te tuꞌn cyaaw biman, jaj Beelzebú tbi―tz̈ike.

16At juuntl cyxol xjal e xiꞌ cykanen te Jesús tuꞌn tkꞌontexin jun yecꞌbil cywitz xjal ka otk kꞌoj tipemalxin tuꞌn Dios tuj cyaꞌj, cuma tuj cywitz yaaꞌn jaxin Jscyꞌoꞌn tuꞌn Dios, bix e cyajbexin tuꞌn tchicꞌajax mlay bint tuꞌnxin tuꞌn tyeecꞌantexin juꞌwa. 17Pero el tniyꞌ Jesús tiꞌj ti iyꞌ tuj cycꞌuꞌjxin, bix e xiꞌ tkbaꞌnxin cyexin:

—Tzin cykbaꞌna nchin akꞌanana te taaw il. ¿Pero ti tten juꞌwa? Cytzkiꞌntla ka ma tzꞌel tpaꞌn tiib jun tnom bix pjel cykꞌojlen cyiib xjal, cxeꞌl tnom tuj il. Jax juꞌx jun moj najlel, ka ma chi jaw kꞌoj, biꞌx cxeꞌl cynajleꞌn tuj il. 18Juꞌtzen tten tuya taaw il, Satanás. Ka ma txiꞌ tkbaꞌn te cyej eteꞌ tjakꞌ tcawbil tuꞌn t-xiꞌ cyniman juntl patrón, cxeꞌl tcawbil tuj il. Juꞌ tzunj, jcyey ncub cybisen, ka ja Beelzebú o tzaj kꞌonte wipemala tuꞌn nkꞌojla cyiꞌ cybiman, mlay bint juꞌwa. 19Bix oj tzin cykbaꞌna n-el wiiꞌna biman tuꞌn tipemal Beelzebú, ¿tzimpa cykbaꞌna oj tel cyiiꞌn ke cyuyey biman, tuꞌnpatzen tipemal Beelzebú? Miꞌn txiꞌ cyyolena juꞌwa, cuma cytzkiꞌntla mi nuk cyuꞌn bix mi nuk wuꞌna bixet tzꞌel biman tuꞌn tipemal Beelzebú. 20Juꞌ tzunj, tuꞌnx tipemal te Dios n-el wiiꞌna biman. Bix ka tuꞌn tipemal Dios, qꞌueleltzen cyniꞌya tiꞌj tuꞌnj wul-lena o tzul tcawbil Dios cyibaja. 21Cybisenx tiꞌj ja techel lu. At jun taaw jaaꞌ ncꞌojlan tja tuya tmacbil. Ka min-al tzul tuya mas tipemal twitz, mlaytzele tzꞌetz jtikꞌch te. 22Pero ka ma tzul jun tuya mas tipemal, bix ckꞌojlel tiꞌ taaw jaaꞌ, jatzen ccamal, bix qꞌuelel tiiꞌn cykilca macbil te taaw jaaꞌ oc ke tcꞌuꞌj tiꞌj, bix qꞌueletz tiiꞌn tikꞌch at tunwen. Jaxse juꞌx weya at wipemala tuꞌn tel wiiꞌna j-at tuj tkꞌab taaw il. 23Juꞌ tzunj, miꞌn chi tzpeta. Ka min ma tzꞌoc cykꞌon cyiiba wuya, nchi kꞌoj tzuna wiꞌja. Kej xjal min cyakꞌ cyiib wuya tuꞌn cyclet xjal tuj tkꞌab Satanás, juꞌtzen chi onen tiꞌ Satanás tuꞌnx cyxiꞌ ke xjal tuj il―tz̈i Jesús cyej xjal e xiꞌ cykbaꞌn ka jaxin el tiiꞌn biman tuꞌn tipemal cawel cyibaj biman.

Tej tkban Jesús tuꞌn cycojlanx cyiib xjal cywitz biman

(Mt. 12:43-45)

24Bix e xiꞌ tkbaꞌn Jesús cyiꞌj biman:

—Oj tel ljoꞌn jun biman tiꞌ jun xjal, nbettzen biman jaaꞌ min-al xjal. Njyon tuꞌn tajlan, pero min cnet jaaꞌ tuꞌn tweꞌban. Juꞌ tzunj nxiꞌ tkbaꞌn: “Chin aal meltzꞌaja tuyaj xjal jaaꞌ ntiiniya nejl,” tz̈i. 25Oj taj meltzꞌaj biman tuyaj xjal, oj toc tcyeꞌyen jxjal tisen jun jaaꞌ tzꞌisen tuj, bix binne tten, bix nayon al cꞌoquex tuj. 26Oj toc tcyeꞌyen min-al waꞌlcꞌa ttziyen, n-eltltzen biman jyolte mas tuya, bix cpomel meltzꞌaj tuya wuuktl tuya, mas kaꞌ twitz. Enteraxseke chi oquex tunwen tuꞌn cynajan, bix juꞌ tzunj yal tzunj xjal masxsen tuj il taꞌ twitz nejl―tz̈i Jesús.

Tzin tkꞌoꞌn Dios t-xtalbil te jaca juun xjal n-oc tbiꞌn tyol Dios bix nxiꞌ tniman

27At jun xuuj cyxol tnimal xjal. Tej toc tbiꞌnxuj nyolen Jesús juꞌwa, e jaw kleeꞌxuj cyiꞌ tyol Jesús, bix e jaw ts̈iꞌnxuj:

—Nim t-xtalbil Dios e kꞌoj tej xuuj jaaꞌ eꞌla itzꞌjey, bix jaaꞌ e chꞌuꞌney―tz̈i xuuj.

28Pero e xiꞌ ttzakꞌbeꞌn Jesús:

—Mas baꞌn tuꞌn t-xiꞌ tkbaꞌna tzin tkꞌoꞌn Dios t-xtalbil te jaca juun xjal n-oc tbiꞌn tyol Dios bix nxiꞌ tniman―tz̈i Jesús.

Kej xjal kaꞌ tzin cykana tuꞌn tbintl jun techel

(Mt. 12:38-42)

29Mas yaj aj ttzakꞌbeꞌn Jesús cyej xjal otk chi kanen jun yecꞌbil tuꞌnxin ti cbinel tuꞌnxin. Nim oc cycꞌutzen cyiib tnimal xjal tiꞌjxin, bix e xiꞌ tkbaꞌnxin cye xjal:

—Key xjal judío te jaꞌlewe kaꞌkey. Min chin cyiikꞌa, sino nuk eteꞌcꞌa kanlte we ti cbinel wuꞌn tetzen techel ka smaꞌn kena tuꞌn Dios. Pero jtechel eteꞌcꞌa kanlte, mlay kꞌoj cyey. Oj pjel wiꞌja tisenxj e baj tiꞌ Jonás, jatzen cꞌajbel te techel cyey. 30Tisenxj e baj tiꞌ Jonás ajben te techel cye aj Nínive ka smaꞌn Jonás tuꞌn Dios, jaxse juꞌx jpjel wiꞌja cꞌajbel te techel cyey judío o chin tzaj smaꞌna tuꞌn Dios. 31Oj tpon tumel tuꞌn cyoc cykil xjal tuj xkela tuꞌn Dios, jaj xuj xuuj e cawen tuj tnom te Saba jatxe ootxa cjawel yolel cyiꞌja judío te jaꞌlewe. E xiꞌxuj nakch te ebilte ke tyol rey Salomón, bix oc tbiꞌnxuj bix e tnimanxuj. Pero cyey, n-oc cybiꞌna tyol jun xjal mas jawnex twitz Salomón, pero min txiꞌ cynimana. Juꞌ tzunj ctkbaꞌxuj tuꞌn cyaaja tuj castiwa. 32Jax juꞌx chi jawel yolel kej aj Nínive cyiꞌj ejeeꞌy judío te jaꞌlewe tuj jkꞌij te xkela tzul. Tej t-xiꞌ tkꞌumen jxin tyolel Dios Jonás cye aj Nínive tuꞌn tajtz tiꞌ cyanem, ajtztzen tiꞌ cyanem. Pero cyey, amale nxiꞌt tkꞌumen jun xjal mas jawnex twitz Jonás, pero min cynimey―tz̈i Jesús cye judío.

Ntzaj tkꞌoꞌn Dios knaabl tuꞌntzen kten tuj spiꞌyen

(Mt. 6:22-23)

33Bix e xiꞌ tkbaꞌntl Jesús cye xjal:

—Min-al jun xjal n-oc txkonte jun cantil tuꞌn tcub teꞌwen bix ka tuꞌn tocx tkꞌoꞌn tjakꞌ alma, sino cjawel tkꞌoꞌn twiꞌ mes, tuꞌntzen at tken luz cywitz xjal oj cyocx tunwen. 34Yaltzen te tbakꞌ cywitza, najben tuꞌn cycyeꞌyena. Ka baꞌn tbakꞌ cywitza, baꞌntzen cycyeꞌyena alcyej cchicꞌajaxel tuꞌn tken luz. Pero ka yaaꞌn baꞌn tbakꞌ cywitza, eteꞌy tuj klolj. 35Tisentzen najben tbakꞌ cywitza te cyxumlala tuꞌn cycyeꞌyena, jaxse juꞌx najben cynaabla tuꞌn tel cyniꞌya tiꞌj alcyej ma yecꞌj cyey tuꞌn Dios. Juꞌ tzunj, cꞌoquel cycꞌuꞌja tiꞌj, cuma ka lmoꞌn cynaabla, tuj klolj eteꞌy. 36Pero ka yaaꞌn lmoꞌn cynaabla, cꞌoquexsen jaxxix yol tuj cyanema, bix qꞌueleltzen cyniꞌya tiꞌj jaxxix yol, bix cynimey, tisenj oj baꞌn tbakꞌ cywitza bix baꞌn cycyeꞌyena tuꞌn cantil tuj jun jaaꞌ bix baꞌn cybeta tuj tumel cuma chicꞌajxsen cybey―tz̈i Jesús.

Tej tyole Jesús cyiꞌj txꞌolbal ley bix kej fariseo yaaꞌn baꞌn

(Mt. 23:1-36; Mr. 12:38-40; Lc. 20:45-47)

37Tej tbaj yolen Jesús, attzen junxin tej cloj fariseo e xiꞌ tkanenxin te Jesús tuꞌn t-xiꞌ tuyaxin tjaxin te waaꞌl. Bix e pon Jesús tjaxin bix ocx Jesús tunwen bix e cub ke tiꞌ mes. 38E jaw kleeꞌ aj fariseo tiꞌ Jesús tuꞌn min e tnima Jesús tiꞌj ti tten cye fariseo txꞌajbil cykꞌab tej cyakꞌxin waaꞌl. 39Bix e xiꞌ tkbaꞌn Kaaw texin:

—Ejeeꞌy fariseo nimel xsunkey tuj cyleya. Lepchkey tiꞌ cyleya tiꞌj ti tten tuꞌn tel cytxjoꞌna tiꞌjxe cyvasey bix cylaka, peroj tuj cyanema yaaꞌn sak. Nuk nchi bisena tiꞌj tuꞌn cyelkꞌana bix nuk n-oc cykꞌon cyiiba te cykilca cyaja. 40¿Mimpa tzꞌel cyniꞌya tiꞌj ocx tbinchaꞌn Dios cyanema, yaaꞌn nuk oꞌcx cyxumlala, bix il tiꞌj tuj twitzxin tuꞌn ttxjet cyanema, yaaꞌn oꞌcx cyxumlala? 41Ka cyaja tuꞌn tcyaj cyanema sak, cyonenxsen ke mebe. Ka ma txiꞌ cykꞌoꞌna cye tuya tzalajebl, sak tzunkey twitz Dios. 42¡Ay xsunkey fariseo! Nchi kꞌona jnuꞌẍ cyoybila te alwent bix n-ula bix cykilca itzaaj, pero min tzꞌoc cykꞌon cyiiba te onlte cye xjal bix min tzꞌoc takꞌ Dios cyey. Baꞌn tuꞌn t-xiꞌ cykꞌoꞌna tlajan paꞌ te cyawala, pero min tzꞌajben ka min txiꞌ cyiiꞌna cynaabla tisen taj Dios bix ka min tzꞌoc takꞌ Dios cyey. 43¡Ay xsunkey fariseo! Nuk te cyey n-oc takꞌ cyey. Oj cypona tuj camon jaaꞌ, nuk jaj kꞌukbil mas jawnex ncheꞌxa jyolte. Juꞌx oj ncheꞌxa tuj plaza, cyaja oj cyoc kꞌolben ke xjal cyiꞌja tuya nim nimbil. 44¡Ay xsunkey fariseo! Xmeletzꞌkey. Ejeeꞌy cyisen cyimne makuꞌn tjakꞌ txꞌotxꞌ tiyꞌ tuj cjoꞌn. Oj nchi bet ke xjal tuj cjoꞌn, min tzꞌel cyniyꞌ tiꞌj nchi bet cyibaj kꞌeynen. Jaxse juꞌx oj toc cybiꞌn xjal cyyola. Min tzꞌel cyniyꞌ tiꞌj ka kꞌeyna tuj cyanema―tz̈i Jesús te fariseo.

45Jax at jun txꞌolbal ley tuj tja fariseo, bix e xiꞌ tkbaꞌnxin te Jesús:

—Taat, oj n-oc ilena cyiꞌ fariseo juꞌwa, tuyax kibaj keya ejooꞌya txꞌolbal ley cwela jtyola―tz̈ixin.

46E xiꞌ tkbaꞌn Jesús texin:

—Jax juꞌx cxeꞌl nkbaꞌna cyey txꞌolbal ley, ¡ay xsunkey! Nimxsen ley cyiw o bint cyuꞌna tuꞌn tjaw cyiken xjal, pero mintiiꞌ o bint cyuꞌna tuꞌn tbint cyuꞌn. Tisen njaw cykꞌoꞌna jun iktz al tiꞌ cykul, pero mi nuket jun twiꞌ cykꞌaba txiꞌ onjawte cyiꞌj. 47¡Ay xsunkey! Ejeeꞌy cyisenx kej cyiyꞌjila e cub cybyoꞌn ke tyolel Dios ootxa, amale tet jaꞌlewe njaw cybinchaꞌna cyjayel te nabbilcye te cyey. 48Ke cyiyꞌjila te ootxa cycyꞌixin oc cybiꞌnxin cyyol ke tyolel Dios, bix juꞌ tzunj e cwaꞌ cybyoꞌnxin ejeeꞌ, bix e jaw cybinchaꞌnxin jawnex cyjayel. Bix lux key nbaj cybinchaꞌna jaꞌlewe cyjayel kej tyolel Dios e cub byet cyuꞌn ke cyiyꞌjila. Pero nuk cye cybakel nxaꞌ cykꞌoꞌna cynimbila. Juꞌ tzunj junx eteꞌy cyuyaj cyiyꞌjila e cub cybyoꞌn ke tyolel Dios, 49cuma baꞌn tuj cywitza cycublen byet ke tyolel Dios. Cykilca ttzkiꞌn Dios, bix e xiꞌ tkbaꞌnxin cyjulu: “Cxeꞌl nkꞌoꞌna ke nyolela bix ke nxela te cyej xjal lu. At juun cyxol ke n-akꞌanala byoꞌn chi temela, bix juuntl pjel yaset. 50Chi xeꞌl nkꞌoꞌna te cyej xjal lu, tuꞌntzen oj cycub byet, otktzen pon tumel tuꞌn ttzaj nkꞌoꞌna castiwa te t-xel cykilcaj nyolela o cub byet tbintlen twitz txꞌotxꞌ. 51Cwel cychjoꞌn cykilca cycublen n-akꞌanala, jatxe tcublen Abel, hasta tejxe tcub Zacarías tuj tja Dios twitz altar twitz tneel xjan cwart,” tz̈i Dios. Cxeꞌl nkbaꞌna cyey, juꞌtzen pjel. Ma pon tumel tuꞌn tkꞌoj castiwa te t-xel cykilcaj biꞌya o baj cye n-akꞌanala, bix ejeeꞌy judío te jaꞌlewe chi iklte ja castiwa lu. 52¡Ay xsunkey txꞌolbal ley! Cyey cyaakꞌen tuꞌn t-xiꞌ cytxꞌolbaꞌna tyol Dios cye xjal, pero min o bint cyuꞌna. Min o tzꞌel cyniꞌya tiꞌj tixix tten tyol Dios, bix tej cyaj cabtl xjal tuꞌn tel cyniyꞌ tiꞌj, bix oc cymayoꞌnkey tiꞌj―tz̈i Jesús te txꞌolbal ley tuj tja fariseo.

53Tej tetz Jesús tuj tja jxin fariseo, nimxsen e jaw cykꞌoj fariseo cyuya txꞌolbal ley tiꞌjxin. Nimxsen cyxkelbilxin oc te Jesús, tuꞌn tcub tzpet-xin cywitzxin. 54Bixsen e cyyoxin tuꞌn tcub tzꞌakxin tuj tyolxin, tuꞌntzen tjaw cytzyuꞌnxin tuj til. Pero mlay bint cyuꞌn.

Currently Selected:

SAN LUCAS 11: mamTS

Highlight

Copy