SAN LUCAS 12

Min ko oc lpe tiꞌj cynaabl fariseo

1Tujx jtyem e cub cynincꞌuꞌn ke fariseo bix ke txꞌolbal ley ti tten tuꞌn tcub tzꞌak Jesús tuj cykꞌab, tnimaltl xjal nuk e cyajbe tuꞌn toc cybiꞌn tyolxin. Jteꞌle mil xjal e chmet tiꞌjxin, hasta e baj cywaꞌbe cyken. Eteꞌ t-xnakꞌatzxin tuyaxin, bix e xiꞌ tkbaꞌnxin cye:

—Cykꞌoꞌnc cycꞌuꞌja tiꞌj tuꞌn miꞌn txiꞌ cyiiꞌna cynaabla tisen cynaabl fariseo. Jawnex chi xnakꞌtzan, tuꞌntzen tuj cywitz xjal baꞌnxsenke, pero nojne tuj cyanem tuya kaꞌ. 2Pero jkaꞌ at tuj cyanem cchicꞌajaxeltzen. Cykilca eꞌwen cyjel tuj chicꞌaj. 3Miꞌn cub cyewena jkaꞌ tisen nbint cyuꞌn fariseo. Cykilcaj nbint cyuꞌna oj min-al n-oc cyeyente cyey, qꞌuelex tpocbal tuj cykil lugar. Bix cykilcaj nchi jasena tuj ewjel tuꞌn min-al tzꞌoc ebinte, cyjel tuj tzinen cywitz cykil xjal.

Mas il tiꞌj tuꞌn ttzaj ttz̈i Dios kiꞌj twitzj tuꞌn ttzaj cytz̈i kiꞌj kej xjal cyqꞌui Dios

(Mt. 10:26-31)

4Ejeeꞌy wuyena, cxeꞌl nkbaꞌna cyey, miꞌn tzaj cytz̈i cyiꞌja jxjal n-el iiqꞌuente cyey nuk wiꞌja. Oꞌcx cbinel cyuꞌn pjel cybyoꞌn cyxumlala. Oj tbint cyuꞌn juꞌwa, mintiiꞌtl cꞌoquel bint cyuꞌn cyiꞌja. Mlay cubtl cyanema cyuꞌn. 5Cxeꞌl nkbaꞌna cyey alj ctzaal ttz̈i cyiꞌja. Ja Dios, cuma at tipemalxin yaaꞌn nuk oꞌcx tuꞌn tcub byet cyxumlala, sino jax juꞌx at tipemalxin tuꞌn t-xiꞌ t-xooꞌnxin ejeeꞌy tuj kꞌakꞌ. Juꞌ tzunj nxiꞌ nkbaꞌna cyey tuꞌn ttzaj ttz̈i Dios cyiꞌja. 6N-oc tcyeꞌyen Dios cykilcaj nbaj cyey. Cꞌoquel cycꞌuꞌja cyiꞌj tal chꞌit. ¿Mimpatiiꞌ nqꞌueyj jweꞌ tuꞌn nuk caꞌba oxe centavo tuj plaza? Pero amale yaaꞌnt nim cywiꞌ, mi nuk jun qꞌuelel tuj tcꞌuꞌj Dios. 7Pero yaltzen cyey, jawnexsen cywiꞌy cywitz nim chꞌit. Pero katzen min chi el chꞌit tuj tcꞌuꞌj Dios, yajtzen cyey, ¿chi elelpey tuj tcꞌuꞌjxin? Min. Nim n-el tniyꞌ Dios tiꞌj ti nbaj cyey. Hasta ttzmal cywiꞌy ttzkiꞌn Dios jteꞌ. Juꞌ tzunj miꞌn tzaj ttz̈i jcbinel cyiꞌja cyuꞌn kej xjal iicꞌbel te weya, cuma Dios ncyeꞌyen tiꞌj nbaj. 8Cxeꞌl nkbaꞌna cyey kej xjal tzin cykbaꞌn cywitz xjal ka lepchecke wiꞌja, cxeꞌl nkꞌumena cywitz ke tsanjel Dios tuj cyaꞌj ka ejeeꞌ nxjalja, inayena, Jsmaꞌn tuꞌn Dios tuꞌn ntena cyuya xjal. 9Pero kej xjal cycyꞌi cykba cywitz xjal ka lepchecke wiꞌja, cxeꞌltzen nkbaꞌna cywitz t-ángel Dios ka yaaꞌn ejeeꞌja te weya. 10Kej xjal yaaꞌn ocslal wiꞌja, ka ma chi kꞌojl wiꞌja, inayena, Jsmaꞌn tuꞌn Dios tuꞌn ntena cyuya xjal, baꞌn tnajset cyil. Pero kej xjal tzin cykbaꞌn kaꞌ jnbint wuꞌna, amale n-elet cyniyꞌ tiꞌj nbint tuꞌn tipemal Espíritu Santo, mlay najset cyil. 11Oj cyxiꞌ tzyeta nuk tuꞌnj lepcheckey wiꞌja bix oj cypon kꞌiꞌna cywitz ke nejenel xjal tuj camon jaaꞌ tuꞌntzen cyel xooꞌna nuk tuꞌnj lepcheckey wiꞌja, miꞌn chi bisena tiꞌj ka tuꞌn cycuyantey alcyej cye cyaj, bix ka min, bix miꞌn chi labta tiꞌj alcyej cꞌaal cytzakꞌbeꞌna oj toc kanet cyey. 12Miꞌn chi xoba, cuma oj tpon tumel tuꞌn toc kanet cyey, cꞌoneltzen Espíritu Santo cyiꞌja oj taj cytzakꞌbeꞌna cyyol―tz̈i Jesús cye t-xnakꞌatzxin.

Jun kꞌina mintiiꞌ tnaabl

13Cyxoltzen tnimal xjal tocxe junxin xjal e jaw s̈-in tiꞌ Jesús:

—Taat Xnakꞌtzal, kbanxa te ntzicya tuꞌn tcub tpaꞌn kkaba bix tuꞌn ttzaj tkꞌoꞌn jweya―tz̈ixin.

14E xiꞌ tkbaꞌn Jesús texin:

—Xinak, yaaꞌn weja waakꞌen tuꞌn tcub npaꞌna cykaba―tz̈i Jesús.

15Bix e xiꞌ tkbaꞌn Jesús cye cykilcaj xjal:

—Cꞌoquel cycwenta tiꞌj tuꞌn miꞌn txiꞌ cyiiꞌna jun cynaabla tuꞌn tten mas cyuyey, cuma yaaꞌn tuꞌnj nim tkꞌinemal nojne tchunkꞌlal jun xjal tuya tzalajebl. 16Cxeꞌl nkꞌoꞌna jun tumel cyey. At junxin xjal kꞌina, bix nim twitz tawalxin e chmet tuj ttxꞌotxꞌxin. 17Bix akꞌxin bisel tiꞌ twitz tawalxin, bix e xiꞌ tkbaꞌnxin: “Nimxsen twitz wawala, hasta mlay tzꞌocx baj cyuj ntxꞌutxꞌa. ¿Ti pjel weya?” tz̈ixin. 18Bix e xiꞌ tkbaꞌnxin cyjulu: “Ma tzul tuj ncꞌuꞌja ti pjel weya. Cwel nxitiya ke ntxꞌutxꞌa, tuꞌn cyjaw bintl te mas nmak, tuꞌntzen tocx baj cykilca twitz wawala bix tikꞌch weya at. 19Nimxsen tikꞌch weya at. At nwaya te nim tyem. Miꞌntltzen chin akꞌanala, sino nuktzen cxeꞌl niyꞌbeꞌntla tikꞌch tal nwaya bix ncꞌaꞌya, bix tuj txubtx chin temela chꞌina,” tz̈ixin tuj tanemxin. 20Pero e xiꞌ tkbaꞌn Dios tej xin kꞌina: “Mintiiꞌ tnaabla. Tujx koniyan te jaꞌlewe qꞌuelel wiiꞌna tchunkꞌlala. Bix oj tcyima, cykilcaj tkꞌinemala o tzꞌoc tipena tiꞌj tuꞌn tchmet, cꞌaal te juntl,” tz̈i Dios tej xin kꞌina. 21Juꞌtzen pjel te cyej xjal min nchi bisen tiꞌj tuꞌn tbint alcyej baꞌn, sino nuk nchi bisen tiꞌj tuꞌn tchmet cykꞌinemal. Pero pjel―tz̈i Jesús cye cykil xjal.

Miꞌn ko labt miꞌn baj kcꞌuꞌj tiꞌj ti jilel tuꞌn kitzꞌj

(Mt. 6:25-34)

22Tej tbaj tkbaꞌn Jesús ja yol lu cye xjal, e xiꞌ tkbaꞌnxin cye t-xnakꞌatzxin:

—Cuma jkꞌinemal min tzin tkꞌoꞌn cychunkꞌlala, juꞌ tzunj cxeꞌl nkbaꞌna cyey, miꞌn chi labta tiꞌj waabj tuꞌn cyitzꞌja bix tiꞌj xbalen te cyxumlala. 23Min o kꞌoj cychunkꞌlala nuk tuꞌn cywaaꞌna, bix min o kꞌoj cyxumlala nuk tuꞌn toc cyxbalena.

24Cyway, Dios ckꞌolte cyway. Cycyeꞌyenc ke joj. Min nchi awanjil, bix min nchi jtxꞌonjil. Mintiiꞌ cycajonjil tcublel ixiꞌn, bix mintiiꞌ cytxꞌutxꞌjil. Pero nchi itzꞌjjil, cuma ntzaj tkꞌoꞌn Dios cywajil. Yaltzen cyey, mas jawnexkey cywitz joj. Juꞌ tzunj, ¿mimpa tzaj tkꞌoꞌn Dios cyway? 25Min tzꞌajben oj nchi labta tiꞌj jun tiiꞌ, cuma mi nuket jun kꞌij baꞌn txiꞌ cykꞌoꞌna te cychunkꞌlala tuꞌnj nchi labta tiꞌj.

26Katzen min tzꞌajben tuꞌn t-xiꞌ cykꞌoꞌna jun kꞌij te cychunkꞌlala tuꞌnj nchi labta, ¿tikentzen nchi labta tiꞌj cykilcatl? 27Cycyeꞌyenc kej abech. Min nchi chkon bix min nchi tz̈mon. Pero cxeꞌl nkbaꞌna cyey, mas cyeca cycyeꞌnc twitzj jawnex t-xbalen jrey Salomón. 28Ntzaj tkꞌoꞌn Dios cyxmaquel cꞌul, amale nuket caꞌba oxe kꞌij nten bix n-el tzꞌak bix ncub patet. Yaltzen cyey, ¿yaaꞌmpa mas jawnexkey cywitz cꞌul? Ejeeꞌy yaaꞌn nimxix n-oc ke cycꞌuꞌja tiꞌjxin. Ka ma tzaj tkꞌoꞌnxin cyxmaquel cꞌul, jax juꞌx ctzaal tkꞌoꞌnxin cyxbalena.

29Juꞌ tzunj, miꞌn chi labta tiꞌj jaaꞌ tuꞌn tcnet cyway bix cycꞌaꞌy, bix miꞌn baj cycꞌuꞌja ctzaal tkꞌoꞌn Dios tuꞌn cyitzꞌja. 30Kej xjal yaaꞌn lepchec tiꞌ Dios, nuk oꞌcx n-oc cyipen tiꞌj tuꞌn tcnet cywa bix cycꞌaꞌ. Pero cyey, ejeeꞌy ocslal tiꞌj Cymana Dios, bix ttzkiꞌnxin cyaja cyway bix cycꞌaꞌy. 31Juꞌ tzunj, cꞌoquel cyipena tuꞌn tbint tajbil Dios cyuꞌna. Ka ma bint cyuꞌna juꞌwa, ckꞌojel cyoclena tuj tcawbil Dios, bix jax juꞌx ckꞌojel cyway bix cycꞌaꞌy bix cyxbalena.

Jun kkꞌinemabl tuj cyaꞌj

(Mt. 6:19-21)

32Jatzen cyey lepchec wiꞌja yaaꞌn nim cybaja, miꞌn chi bisena ka nuk cyajxa oj nbint ti taj Dios cyuꞌna, cuma jaxte ckꞌojel cyey tuꞌn cycawena tuya Dios tuj tcawbil. Ja tzunj lu tajxin tuꞌn ttzaj tkꞌoꞌnxin cyey. 33Cyqꞌueyenx tikꞌch cyey at, bix cykꞌonx cye mebe. Oj nbint tajbil Dios cyuꞌna juꞌwa, j-o txiꞌ cykꞌoꞌna cye cabtl tisencꞌa chmoꞌn taꞌ tuj cyaꞌj te cyey. Jtzin cykꞌoꞌna chmoꞌn tuj cyaꞌj, mlay tzꞌoc kꞌanak, bix mlay cub naj cykꞌinemala jatzewe. Min-al alkꞌal baꞌn tocx tiꞌj, bix mintiiꞌ pocꞌ baꞌn tocx tuj te xitlte. 34Ka nchi kꞌona cykꞌinemala tuj cyaꞌj, ja tzunj lu tzin tyeecꞌan at jcyajbila tuya ti taj Dios, pero ka nuk oꞌcx n-oc cyipena tiꞌj cykꞌinemala twitz txꞌotxꞌ, ja tzunja nyeecꞌante mintiiꞌ cyanema tuya Dios.

Jun akꞌanal binne tten

35Tzul tcawbil Dios twitz txꞌotxꞌ. Juꞌ tzunj, cyitzꞌlem cyiiba, tuꞌntzen binne cytena oj wul meltzꞌaja, tisen kej xjal ntxakan cytzaj nbaj akꞌbil. 36Cyitzꞌleꞌn cyiiba tisen kej xjal nchi cꞌojlan tja cypatrón oj t-xiꞌ cypatrón tiꞌ jun mejoblenel. Chi ayol ke cꞌojlal jaaꞌ oj tpon meltzꞌaj taaw jaaꞌ, tuꞌntzen iꞌtzke tuꞌn tocx cyjkoꞌn tlemel jaaꞌ oj tocx tcoꞌn taaw jaaꞌ. 37Ctkꞌaꞌtzen taaw jaaꞌ xtalbil cyej cꞌojlal jaaꞌ cuma iꞌtzke bix nchi ayon oj tul meltzꞌaj cypatrón. Cxeꞌl nkbaꞌna cyey, tuꞌnj ttzalajeblxin cyiꞌj t-akꞌanalxin, cxeꞌl tkbaꞌnxin cye tuꞌn cycub ke tiꞌ mes, bix cꞌoquel jun twitz tkenxin, bix jaxxin cxeꞌl kꞌonte cywa, te yecꞌbil tanemxin cye. 38Ka ma tzulxin chil akꞌbil, bix ka ma tzulxin te chꞌitk kskix, ka ma chi ayon ke t-akꞌanalxin tiꞌjxin, ccyiikꞌeltzen jun chojbil cye tuꞌnxin.

39Cxeꞌl nkꞌoꞌna juntl tumel cyey. Cybisenx tiꞌj jun jaaꞌ jaaꞌ ocxe jun alakꞌ tuj, te alkꞌal. Nuket el tniyꞌ taaw jaaꞌ niꞌ hora tuꞌn tpon alkꞌal tuj tjaxin, cꞌojlaꞌntle tjaxin tuꞌnxin te tej hora. 40Jatzen cyey, miꞌn cybinchay tisenj taaw jaaꞌ, sino cykil hora cyitzꞌlem cyiiba, cuma mintiiꞌ tumel cyuyey jtoj tuꞌn wul meltzꞌaja, inayena, Jsmaꞌn tuꞌn Dios tuꞌn ntena cyuya xjal―tz̈i Jesús cye t-xnakꞌatzxin.

Jun akꞌanal min nbint taakꞌen tuꞌn

(Mt. 24:45-51)

41Bix e xiꞌ tkanen Pedro te Jesús:

—Taat, jma baj tkbaꞌna cyiꞌ cꞌojlal jaaꞌ, ¿nukpa te ke keya, ma tuyax te cykilcatl xjal?―tz̈i Pedro.

42Aj ttzakꞌbeꞌn Kaaw texin:

—Jaj alcye mas il tiꞌj, tuꞌn tcub cybisena tiꞌj ti tten tuꞌn cyoca te baꞌn akꞌanalkey. Oj tex jun patrón, bix cyjel tkꞌoꞌnxin jun mayordomo te cyeyꞌlte ke t-akꞌanalxin bix te kꞌolte cywa, ¿ti toc cyuꞌna? ¿Miꞌmpa jaw tjyoꞌnxin jun mayordomo at tnaabl bix cꞌoquel ke tcꞌuꞌjxin tiꞌj? 43Cjyolxin juꞌwa, bix ctkꞌaꞌ patrón xtalbil te ka nbinchan mayordomo alcyej otk txiꞌ tkbaꞌn tpatrón te oj tul meltzꞌaj tpatrónxin. 44Cxeꞌl nkbaꞌna cyey, cxeꞌl tkꞌoꞌn patrón te mayordomo tuꞌn toc te cawel tibaj cykilca at te texin.

45¿Pero ti pjel tej mayordomo ka ma txiꞌ tkbaꞌn: “Tuj nwitza, yaj cꞌulel meltzꞌaj patrón,” ka ma tz̈i juꞌwa, bix ka ma tzakꞌ kꞌolte tzꞌuꞌn cyej akꞌanal xinak bix cyej akꞌanal xuuj, bix ka ma tzꞌoc tkꞌon tiib te nim waaꞌn bix te ncꞌan kꞌeꞌn, bix ka ma tzꞌoc te bola? 46Tuj jun kꞌij te min tzꞌayonxin tpatrónxin, ja ponj tpatrónxin, bix oj toc tcyeꞌyen patrón ka min tzꞌakꞌanan tmayordomoxin, sino nbinchan nim kaꞌ, cwel byet, tisen nbint te cykilcaj akꞌanal min cyniman tyol cypatrón.

47¿Titzen pjel te jun mayordomo n-el tniyꞌ tiꞌj alcyej taakꞌenxin e xiꞌ tkbaꞌn tpatrónxin, pero min nbint taakꞌen tpatrónxin tuꞌnxin, bix yaaꞌn binne ttenxin oj tul meltzꞌaj tpatrónxin? Te texin ckꞌojel nim tzꞌuꞌn. 48Yaltzen tej xin mayordomo mintiiꞌ tumel tuyaxin alcyej taj tpatrónxin tuꞌn tbint tuꞌnxin, bix ntzpet-xin tuj taakꞌen tpatrónxin, amale yaaꞌnt nim tilxin twitzj kaꞌ e bint tuꞌnj juntl mayordomo, pero ckꞌojel chꞌin tzꞌuꞌn texin. Pero ka nim ma kꞌoj te jun xjal tuꞌn n-el tniyꞌ tiꞌj alcyej akꞌuntl tuꞌn tbint tuꞌn, il tiꞌj tuꞌn tel taakꞌen baꞌn, cuma juꞌ ctkane tpatrón―tz̈i Jesús.

Tej tyole Jesús tiꞌj tpabl kiib

(Mt. 10:34-36)

49Bix e xiꞌ tkbaꞌntl Jesús cye t-xnakꞌatzxin:

—O chin ula twitz txꞌotxꞌ tisen jun tzaj nkꞌon kꞌakꞌ tuj cꞌul, cuma wuꞌna cꞌoquel nim kꞌoj twitz txꞌotxꞌ. Nuket bint alcyej tuꞌn tbint wuꞌna. 50Pero minaꞌx tbint wuꞌna. At jun jawnex qꞌuixcꞌaj il tiꞌj qꞌuiyax wuꞌna, bix hasta ojxe wiꞌya tuj, nchin ayona tiꞌj tuya nim tchyonel―tz̈ixin.

51Bix e xiꞌ tkbaꞌntlxin:

—¿Tzimpa cub cybisena ka in ula tuꞌn tweꞌ cykil kꞌoj twitz txꞌotxꞌ wuꞌna? Yaaꞌn juꞌwa, sino in ula tuꞌn tbaj cypaꞌn cyiib xjal wuꞌna. 52Te jaꞌlewe, t-xol jaca juun najaj xjal pjel cypaꞌn cyiib wuꞌna. Ka at jweꞌ xjal tuj jun najaj, cꞌoquel kꞌojl oxe tiꞌ caꞌba, bix ka ja caꞌba tiꞌ oxe. 53Jax juꞌx chi kꞌojlel mambaj tuya tcwal, bix txuybaj tuya tal, bix elibj tuya tliib―tz̈i Jesús cye t-xnakꞌatzxin.

Techel tiꞌj ti nbaj jaꞌlewe

(Mt. 16:1-4; Mr. 8:11-13)

54Bix e xiꞌ tkbaꞌn Jesús cye tnimal xjal tiꞌjxin:

—Cyey, n-el cyniꞌya tiꞌj twitz cyaꞌj bix tiꞌj cykꞌiꞌk. Oj t-xiꞌ cycyeꞌyena njaw muj jaaꞌ n-exa kꞌij, nxiꞌ cykbaꞌna: “Tzul jbal,” bix juꞌ nbaja. 55Bix oj takꞌ cykꞌiꞌk, nxiꞌ cykbaꞌna: “Tzul cyak,” bix jax cyuꞌna. 56At cynaabla tuꞌn tel cyniꞌya cyiꞌj techel twitz cyaꞌj bix twitz txꞌotxꞌ. ¿Titzen tten min tzꞌel cyniꞌya cyiꞌj techel o tyeecꞌan Dios cyey tiꞌj ti nbaj cyxola tuj tyem te jaꞌlewe? Xmeletzꞌkey, cuma cycyꞌiy tzꞌel cyniꞌya tiꞌj alcyej o cub tyeecꞌan Dios, amale tzint cykbaꞌna ka cyaja.

Binchax tiiba tuya taj kꞌoja

(Mt. 5:25-26)

57Jax juꞌx, ¿tikentzen min n-oc cyipena tuꞌn tel cyniꞌya tiꞌj alcyej tuꞌn tbint cyuꞌna tuꞌn cycyaja jiquen twitz Dios? 58Cxeꞌl nkbaꞌna jun tumel cyey. Ka at jun cycꞌasbena te jun xjal, bix ka ma txiꞌ tkbaꞌnxin cyey tuꞌn t-xiꞌ tiiꞌnxin ejeeꞌy twitz juez, tuꞌn tchjet cyuꞌna, mas baꞌn cwel cynincꞌun cyiiba tuya taaw pwak te mitknaꞌx cypona twitz juez. Ka min ma cub cynincꞌun cyiiba, chi aal kꞌoꞌna tuj cykꞌab soldado tuꞌn juez, bix chi xeꞌla tuj tzeeꞌ, 59bix cxeꞌl nkbaꞌna cyey, miꞌn chi etz oka tuj tzeeꞌ hasta ojxe tocx baj tchjoj cykil cycꞌasbena hasta mancꞌbil centavo―tz̈i Jesús cye xjal.

Currently Selected:

SAN LUCAS 12: mamTS

Highlight

Copy