प्रेरित 9
9
साउल येसुजिमा विस्वास करलिय
1उहे दिनवामा साउल प्रभु येसुजिक चेलवानिके मारेके धम्कि देते रहलिय। तब उअ सिदुकि पुजेरिया लघिना जाके, 2प्रभुक पइडामा लगलाहर जम्मे मरदाना हसे जनियानिके पकडके यरुसलेममा कइदि बनाके लिगाए पाउ कहके दमस्कसक सभाघरवाक नाउँमा अधिकारक चिठि मङलिय। 3जब साउल दमस्कसक सहरवाक लजिके पुगलिय, तब यरमरका यकसवासे वकर चारिवरि इजोर चम्कलइ। 4तखनहिँ साउल भुयवामा खसलिय हसे यसनुक एगुडा स्वर सुनलिय, “साउल, अरे साउल, तुइ मोरके केहके सतोसहि?”
5तब साउल पुछलिय, “प्रभु, यपनहुँ कुने हखहुँ?” हुने कहलसि, “मुइ येसु हखहि, जकरेके तुइ सतोसहि। 6याबे तुइ उठके सहरवा भितरा जाहि हसे तुइ कथि करे परतइ मुइ तोरके वहवाँहिँ कहबहिँ।”
7जुन मन्सावाह साउलसाङे रहलइ, हुनुका किहो हइने फदके सकके ठडियाइल रहलइ, केहकेकि हुनुका स्वर मतरे सुनलइ बाकि ककरहुँके फेनि हइने देखलइ। 8तब साउल भुयवासे उठके हेरे खोजलिय, बाकि किहो फेनि हइने देखलिय। उहेसे वकर सङहतियवाह वकरेके डोरयाके दमस्कसमा लिगलइ। 9उअ तिन दिनलइ किहो फेनि हइने देखे सकलिय हसे नत किहो खेलिय, न किहो पियलिय।
10तखनहिँ दमस्कसमा हननिया नाउँक एक जन विस्वासि रहलिय। प्रभु वकरेके दर्सनमा यसके कहलसि, “हननिया!”
तब हननिया कहलिय, “प्रभु कहहुँ।”
11प्रभु वकरेके कहलसि, “तुइ उठके सोझ कहल गलियावामा भेलि यहुदाक घरवामा जाहि हसे टार्सस सहरवासे यइलि साउल नाउँक मन्सेके खोजहि। उअ यखनि परथाना करइ बडिय, हसे 12यापन परथानामा हननिया नाउँक एक जन मन्से याके वकरेके देखेके तहिँया वकर वपरा हथवा राखके परथाना करदेबिय कहके दर्सन देखले बडिय।”
13हननिया जवाफ देते कहलिय, “प्रभु, इअ मन्सावा त यरुसलेममा भेलि यपनहुँक विस्वासिसभके खाँ सतोले बडिय कहके मुइ बहुत मन्सेसे सुनले बडहिँ हसे 14यपनहुँक नाउँमा विस्वास करलहरानिके पकडेके तहिँया मुख्य पुजेरियासे फेनि अधिकार लेके यहवाँ याइल बडिय।”
15बाकि प्रभुजि हननियाके कहलसि, “तुइ जाहि, केहकेकि मुइ वकरेके अयहुदियानिके, रजवानिके हसे इस्राएलियानिके मोर बारेमा परचार करेके तहिँया चुनले बडहिँ। 16उअ मोर तहिँया कतुरा दुःख सहे परतइ, उअ मुइ वकरेके देखोबहिँ।”
17तब हननिया यहुदाक घरवामा गेलिय हसे साउलक मुडवा वपरा हथवा राखके कहलिय, “अरे साउल भयवा, जुन प्रभु येसुजि तुइ यहवाँ यवइकि पइडावामा तोर लघिना देखा परल बडसि। हुने मोरके तुइ देखाह हखहि हसे पवितर-आत्माक सक्तिसे भराहि कहके पठोले बडसि।” 18तखनहिँ साउलक यखियासे यरमरका किचर नहिँया किहो चिजु झरलइ हसे उअ फेरि देखे सकलिय। तब उअ उठलिय हसे बप्तिस्मा लेलिय। 19वकरपाछा उअ जेउना खेलिय हसे वकरमा तागत यलइ।
साउल दमस्कस हसे यरुसलेम सहरवामा
साउल किहो दिनलइ विस्वासिसभसाङे दमस्कसमा रहलिय। 20तखनहिँसे साउल येसुजि परमेस्वरक पुतर हखसि कहके सभाघरवामा परचार करे लगलिय। 21वकर बतवा सुनलहरा जम्मे जन छक परलइ हसे यसके कहे लगलइ, “यरुसलेममा येसुजिके आराधना करलहरानिके जम्मे जनके ओरावे खोजलहरा मन्सावा इहे हइने हखिय त? यहवाँ फेनि त येसुजिके आराधना करलहरानिके पकडके मुख्य पुजेरिया लघिना कइदि बनाके लिगाएके तहिँया त याइल हखबिय।” 22बाकि साउल झन सक्तिसे परचार करते बरियार हखते गेलिय हसे येसुजि ख्रिस्ट हखसि कहके यसनुक पाका परमान देलिय कि दमस्कसक यहुदियाह कुनहुँ फेनि जवाफ देवे हइने सकलइ।
23बहुत दिन बितलेपर यहुदियाह साउलके मारेके योजना बनोलइ। 24बाकि हुनुकर योजनाक बारेमा साउल थाह पउलिय। तखनहिँ यहुदियाह दिन-रात दमस्कस सहरवाक दुवरियामा वगरइ रहइ, ताकि वकरेके पकडके मारे सकहुँ। 25बाकि एक दिन-रात हखइखुनि चेलवाह साउलके टोकरियामा राखके सहरवाक पर्खालवाक बाहरा झारदेलइ।#२ कोरिन्थि ११:३२-३३
26जब साउल यरुसलेममा फिरके यलिय, उअ येसुजिक चेलवानिसाङे भेटेके इछा करलिय। बाकि जम्मे चेलवाह वकरसे डेरेलइ, केहकेकि साउल फेनि येसुजिमा विस्वास करले बडिय कहके हुनुका विस्वास करे हइने सकलइ। 27तब बारनाबास साउलके यापनसाङे प्रेरितवानिक लघिना लिगलिय। साउल कस्के पइडावामा प्रभुके देखलिय हसे कस्के प्रभु वकरसाङे बात करलसि उअ जम्मे बतवा चेलवानिके कहदेलिय। बारनाबास कस्के दमस्कसमा इचिको फेनि हइने डेराके येसुजिक बारेमा परचार करलिय उअ बतवा फेनि हुनुकाके कहदेलिय। 28उहेसे साउल हुनुकरसाङे रहलिय हसे यरुसलेममा खुल्लमखुल्ला बुलके इचिको फेनि हइने डेराके प्रभुक बारेमा परचार करे लगलिय। 29उअ ग्रिक भासा फदकेलहरा यहुदियानिसाङे फेनि ठोरा-बोलि करलिय, बाकि हुनुका वकरेके मारे खोजलइ। 30जब साउलके मारे खोजइबडइ कहके विस्वासिवाह थाह पउलइ, तब हुनुका वकरेके कइसरिया सहरवामा लिगाके वहवाँसे टार्सस सहरवामा पठादेलइ।
31वकरपाछा यहुदिया, गालिल हसे सामरिया छेतरमा भेलि जम्मे मन्डलियामा सान्ति भके मन्डलि बरियार भेलइ। पवितर-आत्मासे उत्साह पउलेसे हसे परमेस्वरक डर मानके जिन्गि बितोलेसे मन्डलि बढते गेलइ।
पतरुस एनियासके डउल बनोलिय हसे डोरकासके मरलिसे जिउतोलिय
32जब पतरुस जम्मे ठउरियामा बुल्ते लुड्डा सहरवामा भेलि विस्वासिसभक लघिना भेट करे पुगलिय, 33वहवाँ उअ एनियास कहल मन्सेके भेटलिय। वकरेके धार-हइने चल्ना रोग लगलेसे आठ बरसलइ बिछोनवामा सुतल रहलिय। 34पतरुस वकरेके कहलिय, “एनियास, येसु ख्रिस्ट तोरके यखनि डउल बनोबसि। उठ हसे यापन बिछोनवा मिलोहि।” तखनहिँ एनियास वइघरहिँ उठलिय। 35तब वकरेके डउल भेल देखके लुड्डा हसे सारोनमा रहलहरा बहुत मन्सेसभ प्रभु येसुजिमा विस्वास करलइ।
36योप्पा सहरवामा तबिता नाउँक एक जन विस्वासि रहलिय। ग्रिक भासामा वकरेके डोरकास#९:३६ डोरकास सबदक यरथ हरिन हखइ। कहइ। उअ सबदिन मन्सावानिक तहिँया डउल काम करिय हसे गरिबवानिके फेनि मदत करिय। 37बाकि पतरुस लुड्डामा हखइखुनि उअ मनियाके मरलिय। तब मन्सावाह वकर मरलि देहियाके धोइ-धाके वपराक तलवाक एगुडा कोठवामा धरदेलइ। 38लुड्डा सहरवा योप्पा सहरवाक लजिके रहलिय। पतरुस लुड्डामा बडिय कहके विस्वासिवाह थाह पउलेपर, हुनुका दु जनके “हलहालि यउहुँ” कहके बलावे पठोलइ।
39तब पतरुस हुनुकरसाङे योप्पा सहरवामा गेलिय। वहवाँ पुगलेपर मन्सावाह वकरेके तबिताक मरलि देहिया भेलि वपराक तलवाक कोठवामा लिगलइ। विधुवासभ पतरुसक चारिवर बटियाके तबिताक सियलि लुगवाह देखोते काने लगलइ।
40बाकि पतरुस जम्मे जनके कोठवासे बाहरा निकडा देलिय हसे ठेहुँनाके परथाना करलिय। वकरपाछा उअ तबिताक मरलि देहियावरि फिरके कहलिय, “अरि तबिता, उठहि।” तब उअ यखिया खोललिय हसे जब पतरुसके देखलिय उअ उठके बइठलिय। 41पतरुस वकर हथवा पकडके उठोलिय। वकरपाछा उअ जम्मे विस्वासिसभके हसे विधुवानिके बलोलिय हसे जिउते भेलि तबिताके हुनुकर जिम्मा लगादेलिय। 42जब इअ बतवा जम्मे योप्पा सहरवामा फइललइ, वहवाँ बहुत मन्सेसभ प्रभुमा विस्वास करलइ। 43वकरपाछा पतरुस छालाक काम करलाहर सिमोनसाङे बहुत दिनलइ योप्पामा रहलिय।
Currently Selected:
प्रेरित 9: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
