युहन्ना 3
3
निकोदेमसके येसुजिक सिछा
1निकोदेमस नाउँ भेल फरिसि दाफाक एक जन मन्से रहलिय। उअ यहुदि महासभाक सदस्य रहलिय।#लुका २३:१३ 2निकोदेमस राति येसुजिक लघिना याके कहलिय, “गुरुजि, हमार थाह बडइ कि, यपनहुँ परमेस्वरसे याइल सिछक हखहुँ। यगर परमेस्वर साथ नाहिँ देबसि जउँ, यपनहुँक करलि यचम्मक चिन्हासभ कुनहुँ फेनि करे नाहिँ सकतइ।”#प्रेरित १०:३८
3येसुजि वकरेके जवाफ देते कहलसि, “मुइ तोरके सदियो कहबहिँ, यगर कुनहुँ लउठा जनम नाहिँ लेतइ जउँ, उअ परमेस्वरक राज देखे नाहिँ सकबिय।” 4निकोदेमस हुनेके कहलिय, “मन्से बुढ भेलेपर कस्के जनम लेवे सकतइ त? कथि उअ यापन दाओक कोखवामा दोसरि पारि पेसके जनम लेवे सकबिय?”
5येसुजि जवाफ देते कहलसि, “मुइ तोरके सदियो कहबहिँ, यगर कुनहुँ पानि हसे आत्मासे जनम नाहिँ लेतइ जउँ, उअ परमेस्वरक राजमा पेसे नाहिँ सकबिय। 6मन्से त देहियाक जनम देसइ, बाकि पवितर-आत्मा आत्मिक जनम देससि। 7तोहरा लउठा जनम लेवे परतइ कहलि मोर बतवा सुनके यचम्म झिन मनह। 8बयरवाक जते बहेके मन लगसइ वतहिँ बहसिय। तुइ बयरवाक स्वर त सुनसहि, बाकि उअ कहवाँसे यसिय हसे कहवाँ जेसिय, उअ हइने जनसहिँ। पवितर-आत्मासे जरमल जम्मे जन वसने रहसइ।”
9तब निकोदेमस हुनेके पुछलिय, “इअ कस्के हखे सकतइ?”
10येसुजि वकरेके जवाफ देलसि, “तुइ इस्राएलक गुरु हखहि, ताफेनि इअ बतवा हइने बुझसहि? 11मुइ तोरके सदियो कहबहिँ, हमरा जथि जनसहुँ उअ कहसहुँ हसे हमरा जथि देखले बडहुँ वकर गवाहि देसहुँ, बाकि तोहरा हमार गवाहि स्विकार हइने करसह। 12मुइ इअ संसारमा भेलि बतवाक बारेमा फदकइकि तोहरा हइने विस्वास करसह, यगर मुइ तोहराके स्वरगक बारेमा कहबहिँ जउँ झन कस्के विस्वास करबह त? 13कुनहुँ फेनि स्वरगमा हइने गेल बडइ। मन्सेक पुतर, जुने स्वरगसे याइल बडिय, हुने मतरे गेल बडसि। 14जसने उराठ-ठउरियामा मोसा पितरियाक सपवाके उठोलिय, मन्सेक पुतर फेनि वसने उठाए परतइ,#गन्ति २१:९ 15ताकि हुनेमा विस्वास करलहरा जम्मे जन परमेस्वरसाङे सबदिन रहना जिवन पउतइ।
16 “केहकेकि परमेस्वर संसारके यसनुक प्रेम करलसि कि, हुने यापन एक मतरे पुतरके देलसि, ताकि हुनेमा विस्वास करलहरा कुनहुँ फेनि नास झिन हखइ, बाकि परमेस्वरसाङे सबदिन रहना जिवन पवइ। 17परमेस्वर संसारक मन्सावानिके दोसि ठहरावेके तहिँया यापन पुतरके हइने पठोलसि, बाकि हुनुका बचइ कहके पठोलसि। 18हुनेमा विस्वास करलहरा कुनहुँ फेनि दोसि नाहिँ ठहरतइ, बाकि विस्वास हइने करलहरा यगाहेसे दोसि ठहरतइ, केहकेकि उअ परमेस्वरक एक मतरे पुतरमा विस्वास हइने करलिय। 19दोस यसके लगसइ, ज्योति संसारमा याइल बडिय हसे मन्सावाह ज्योतियासे बरु यन्हारिके रुचलइ, केहकेकि हुनुकर काम दुस्ट रहलइ। 20केहकेकि दुस्ट काम करलहरा जम्मे जन ज्योतियाके घिना करसइ हसे हुनुकर करलि कमवा देखार हतइ कहके ज्योतियामा हइने यसइ। 21बाकि सत्यमा चललाहर ज्योतियामा यबिय, ताकि वकर करलि कमवा परमेस्वरक इछासे कराइल हखइ कहके स्पस्ट देखेतइ।”
येसुजिक बारेमा बप्तिस्मा देलाहर युहन्नाक गवाहि
22वकरपाछा येसुजि यापन चेलवानिसाङे यहुदिया छेतरमा गेलसि हसे किहो समयलइ हुनुकरसाङे वहवाँहिँ रहलसि हसे मन्सावानिके बप्तिस्मा देलसि। 23युहन्ना फेनि सालिमक लजिके एनोनमा बप्तिस्मा देइ रहलिय, केहकेकि वहवाँ बहुत पानि रहलइ। वहवाँ मन्सावाह यवइ हसे बप्तिस्मा लेइ। 24तखनहिँलइ युहन्ना झ्यालखनवामा हइने परल रहलिय।#मति १४:३; मरकुस १:१४; ६:१७-१८
25तखनहिँ युहन्नाक कतेक जन चेलवानिक एक जन यहुदि मन्सेसाङे सुद्ध करेके विधिक बिसयमा ठोरा-बोलि भेलइ। 26हुनुका युहन्नाक लघिना याके वकरेके कहलइ, “गुरुजि, यरदन लदियाक वाहिकरवा यपनहुँसाङे एक जन मन्से रहलिय, यपनहुँ वकर बारेमा गवाहि देले रहलहुँ। यखनि उअ बप्तिस्मा देइ बडिय हसे जम्मे जन वकर लघिना जाइबडइ।”
27युहन्ना जवाफ देलिय, “स्वरगसे नाहिँ देइकलइ कुनहुँ फेनि किहो चिजु पावे नाहिँ सकतइ। 28‘मुइ मुक्ति देलाहर ख्रिस्ट हइने, बाकि मुइ हुनेसे यागा पठाइल हखहि’ कहके मोर कहलि बतवा तोहरा यपनहिँ सुनले बडह।#युहन्ना १:२० 29दुलहिया त दुलहावाक हखिय। दुलहावाक सङहतियावा जुने वकर पजरवामा ठडियसिय, उअ दुलहावाक सोर सुनके खाँ आनन्दित हखबिय। उहेसे मोर इअ आनन्द याबे पुरा भेल बडइ। 30हुने महान हखते जाए परतइ, बाकि मुइ झिनिक हखते जाए परतइ।
31“वपरासे यलहरवा सबसे महान बडसि। धरतियामा जरमल मन्सेसभ धरतियाक हखइ हसे धरतियाक बात करसइ। बाकि स्वरगसे यलहरवा सबसे महान बडसि। 32हुने जथि चिजु देखले हसे सुनले बडसि, वकर गवाहि देससि, ताफेनि हुनेक गवाहि कुनहुँ फेनि स्विकार हइने करसइ। 33जुन मन्से हुनेक गवाहि स्विकार करसिय, उअ परमेस्वर सत्य हखसि कहके स्विकार करसिय। 34केहकेकि जकरेके परमेस्वर पठोले बडसि, उअ परमेस्वरक बात फदकसिय, केहकेकि परमेस्वर हुनेके यापन आत्मा हइने नापके देससि। 35पिता यापन पुतरके प्रेम करससि हसे जम्मे चिजु हुनेक हथवामा देले बडसि।#मति ११:२७; लुका १०:२२ 36परमेस्वरक पुतरमा विस्वास करलहरा परमेस्वरसाङे सबदिन रहना जिवन पउतइ, बाकि पुतरके इन्कार करलहरा जिवन नाहिँ देखबिय, बाकि परमेस्वरक खिस वकरमा रहतइ।”
Currently Selected:
युहन्ना 3: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
