मति 21

यरुसलेममा येसुजिके राजक यादर

(मरकुस ११:१-११; लुका १९:२८-४०; युहन्‍ना १२:१२-१९)

1जब येसुजि हसे हुनेक चेलवाह यरुसलेमक लजिके जइतुन पहडावामा भेलि बेथफागे कहल ठउरियामा यापुगलसि, तब हुने यापन दु जन चेलवानिके 2यसके कहके पठोलसि, “तोहरा उअ यगाहेक गउँवामा जाह हसे वहवाँ पुगतेकि एगुडा गदहा हसे वकर बचवाके बान्‍हल पउबह। वकरेके फोके मोर लघिना यनिह। 3यगर कुनहुँ तोहराके किहो पुछतइ जउँ ‘इअ प्रभुजिक तहिँया चाहिँ बडइ’ कहके कहिह हसे उअ तोहराके वइघरहिँ याने देबिय।”

4अगमवक्‍तावाक कहलि बतवा पुरा हखइ कहके यसके भेलइ,

5“यरुसलेमक मन्‍सावानिके कहदेहि,

‘हेरहि, तोर रजवा तोर लघिना यवइ बडसि,

हुने नम्र भके गदहावामा चढके यवइ बडसि,

हुने त गदहावाक बचवा वपरा चढके सवार हखइ बडसि’।”#जकरिया ९:९

6तब दु जन चेलवाह जाके येसुजिक कहलि नहिँया करलइ, 7हसे हुनुका गदहावा हसे वकर बचवाके यनलइ। हुनुका वकर पिठियामा यापन-यापन होडलि लुगवाह विछा देलइ हसे येसुजि वकर वपरा बेठलसि। 8भिडवाक मन्‍सावाह फेनि यापन-यापन होडलि लुगवाह हसे याको जन गछवाक डरवा काटके पइडवामा विछा देलइ। 9येसुजिक यागा हसे पाछा बुललहरा मन्‍सावाह यसके कहते जयजयकार करे लगलइ, “दाउदक पुतरक जय हखइ! परमप्रभुक नाउँमा यलहरवा धन्यक हखसि! स्‍वरगमा रहलाहर परमेस्‍वरक जय हखइ!”#भजन ११८:२५-२६

10जब येसुजि यरुसलेम सहरवामा पेसलसि, तब जम्‍मे सहरवामा “इअ कुने हखिय?” कहके हाला भेलइ। 11तखनहिँ भिडवाक मन्‍सावाह कहलइ, “हुने त गालिल छेतरक नासरत सहरवासे याइल अगमवक्‍ता येसु हखसि।”

येसुजि मन्‍दिरवा भितरासे व्‍यपारिसभके निकडा देलसि

(मरकुस ११:१५-१९; लुका १९:४५-४८; युहन्‍ना २:१३-२२)

12वकरपाछा येसुजि मन्‍दिरवा भितराक यङनवामा पेसलसि हसे किनबेच करलहरा जम्‍मे जनके बाहरा खेदलसि। हुने पइसा सटलहारानिक टेबुलावा हसे कबतुरवा बेचलाहरानिक बेस्‍नावा घोप्‍टा देलसि। 13वकरपाछा, येसुजि हुनुकाके कहलसि, “परमेस्‍वरक वचनवामा यसके लिखाइल बडइ, ‘मोर घरवा परथानाक घर हखे परतइ’#यसइया ५६:७ बाकि तोहरा त यकरेके ‘डकुवानिक यडडा’ बनादेलह।”#यरमिया ७:११

14येसुजि मन्‍दिरवामा रहइकि, यन्‍हराह हसे लङडाह हुनेक लघिना यलइ तके येसुजि हुनुकाके डउल बनोलसि। 15जब मुख्‍य पुजेरियाह हसे व्‍यवस्‍थाक-गुरुसभ येसुजिक करलि यचम्‍मक कमवा देखलइ हसे मन्‍दिरवामा छोकनियानिके “दाउदक पुतरक जय हखइ!” कहके चिल्‍लाइकि सुनलइ, हुनुका खाँ खिसियलइ। 16हुनुका येसुजिके यसके कहलइ, “यपनहुँ सुनइ बडहुँ, हिनिका कथि कहइ बडइ?” तब येसुजि हुनुकाके कहलसि, “हँ, मुइ सुनइ बडहिँ। कथि तोहरा हइने पढल बडह? यसके लिखाइल बडइ ‘छोकनियानि हसे दुध पियलहरा बचवानिक मुहवासे यपनहुँ प्रसंसा करे लगोले बडहुँ’।”#भजन ८:२ 17तब हुने सहरवासे निकडके बेथानिया गउँवामा गेलसि हसे वहवाँहिँ रात बितोलसि।

फर हइने भेल कोइलारक गाछ

(मरकुस ११:१२-१४,२०-२४)

18दोसरि दिन बिहना, जब येसुजि फेरि उअ सहरवावरि फिरके यवइ रहलसि, हुनेक भुख लगलइ। 19तब हुने पइडवाक तिरवामा एगुडा कोइलारक गाछ देखलसि। हुने उअ गछवामा फर पउबहि कि कहके गछवाक लघिना गेलसि, बाकि वकरमा पाता बाहेक याको किहो फेनि हइने पउलसि। तब हुने उअ गछवाके कहलसि, “याबेसे तोरमा कबहुँ फेनि फर झिन फरइ!” वइघरहिँ उअ कोइलरवाक गछवा झमलेलिय। 20इअ देखके चेलवाह यचम्‍म मनते कहलइ, “इअ कोइलरवाक गछवा वइघरहिँ कस्‍के झमलेलिय?” 21येसुजि हुनुकाके जवाफ देते कहलसि, “मुइ तोहराके सदियो कहइ बडहिँ, यगर तोहार विस्‍वास बडइ हसे तोहरा सक नाहिँ करबह जउँ, इअ कोइलरवाक गछवाके मोर करलि नहिँया तोहरा करे सकबह हसे उतुरा मतरे हइने, बाकि इअ पहडावाके ‘उखराके समुनदरवामा खसहि’ कहके कहबह जउँ, वसने हतइ।#मति १७:२०; १ कोरिन्‍थि १३:२ 22यगर तोहरा विस्‍वास करबह जउँ, परथानामा जथि मङले फेनि उअ पउबह।”

येसुजिक अधिकारक बारेमा यहुदि यगुवासभक प्रस्‍न

(मरकुस ११:२७-३३; लुका २०:१-८)

23जब येसुजि मन्‍दिरवामा सिछा देइ रहलसि, तब मुख्‍य पुजेरियाह हसे समाजक कतेक बडके यगुवासभ हुनेक लघिना याके पुछलइ, “यपनहुँ कहवाँसे अधिकार पाके इअ कमवा करइ बडहुँ? हसे इअ अधिकार यपनहुँके कुने देलिय?” 24येसुजि हुनुकाके जवाफ देते कहलसि, “मुइ फेनि तोहराके एगुडा बात पुछबहिँ। मोरके जवाफ देबह जउँ, मुइ कुन अधिकारसे इअ कमवा करइ बडहिँ, उअ तोहराके कहबहिँ। 25युहन्‍ना बप्‍तिस्‍मा देवेके अधिकार कहवाँसे पउलिय? परमेस्‍वरसे कि मन्‍सेसे?” हुनुका इअ बतवा सुनके एक-दोसरि जनसाङे यसके कहे लगलइ, “यगर ‘परमेस्‍वरसे कहबहुँ जउँ’, ‘तोहरा केहके युहन्‍नाके विस्‍वास हइने करलह त?’ कहके हमराके पुछबिय। 26यगर ‘मन्‍सावानिसे कहुँ जउँ’, हमराके मन्‍सावानिक डर बडइ, केहकेकि जम्‍मे मन्‍सावाह युहन्‍ना एक जन अगमवक्‍ता हखिय कहके विस्‍वास करइ।”

27उहेसे हुनुका “हमार हइने थाह बडइ” कहके येसुजिके जवाफ देलइ। तब येसुजि हुनुकाके कहलसि, वसके भेले “मुइ फेनि कहवाँसे अधिकार पाके इअ कामसभ करइ बडहिँ, उअ तोहराके नाहिँ कहबहिँ।”

दु गो बेटाक दृस्‍टान्‍त

28वकरपाछा येसुजि हुनुकाके फेरि यसके कहलसि, “मुइ तोहराके एगुडा दृस्‍टान्‍त कहबहिँ हसे उअ सुनके तोहरा यापन विचार कहे सकबह। एक जन मन्‍सेक दु गो बेटा रहलइ। उअ यापन बडकि बेटवा लघिना जाके कहलिय, ‘अरे मोर बेटवा, तुइ अंङगुरवाक बरियामा जाके याजु काम करसि।’ 29उअ जवाफ देके कहलिय, ‘मुइ नाहिँ जेबहिँ।’ बाकि पाछेसे उअ पछताप करलिय। 30वकरपाछा उअ मन्‍सावा यापन दोसरि बेटवा लघिना जाके वसने कहलिय। वकर बेटवा कहलिय, ‘मुइ जेबहिँ’, बाकि उअ हइने गेलिय। 31याबे इअ दु जन बेटवामधे कुने यापन बाबाक कहलि बतवा मनलइ?” तब हुनुका कहलइ “बडकि बेटवा।” येसुजि हुनुकाके कहलसि, “मुइ तोहराके सदियो कहबहिँ, कर उठोलहराह हसे बेस्‍यासभ तोहारसे पहिला परमेस्‍वरक राजमा पेसतइ। 32केहकेकि बप्‍तिस्‍मा देलाहर युहन्‍ना तोहार लघिना याके तोहराके धारमिकताक पइडा देखोलिय, बाकि तोहरा विस्‍वास हइने करलह। बरु कर उठोलहराह हसे बेस्‍याह विस्‍वास करलइ। तोहरा इअ देखके फेनि यापन-यापन मनवा पापसे हइने फिरोलोह हसे हुनेके विस्‍वास हइने करलह।”#लुका ३:१२; ७:२९-३०

दुस्‍ट किसानक दृस्‍टान्‍त

(मरकुस १२:१-१२; लुका २०:९-१९)

33येसुजि फेरि हुनुकाके कहलसि, याबे दोसरे दृस्‍टान्‍त सुनह। “एक जन जागावाक मालिक यापन बरियामा अंङगुर लगाके वकर चारिवर बेरहा लगोलिय। वकरपाछा, अंङगुरवा पेलेके तहिँया एगुडा कोल्‍ह राखके एगुडा वगराना माच फेनि बनोलिय। वकरपाछा खेति करलहरानिके बटइया देके तनाउ देस गेलिय।#यसइया ५:१-२ 34जब अंङगुरवा पाकेके जुन यलइ, तब खेतवाक मलिकवा यापन बखरा लेवेके तहिँया यापन बहरियावानिके हुनुकर लघिना पठोलिय। 35बाकि खेति करलहराह हुनुकाके पकडके, एक जनके पिटलइ, दोसरिके मारलइ हसे तिसरिके पत्‍थरासे पिटलइ। 36वकरपाछा उअ मलिकवा पहिलासे बहुत जन बहरियासभके हुनुकर लघिना पठोलिय। बाकि खेति करलहराह हुनुकाके फेनि वसने करलइ।

37 “याखिरमा उअ मलिकवा हुनुका ‘मोर बेटवाके पाका यादर करतइ’ कहके यापन बेटवाके हुनुकर लघिना पठोलिय। 38बाकि हुनुका वकर बेटवाके देखके एक-दोसरि जनसाङे यसके कहलइ, ‘इअ यकर हकदार हखिय। यउह, हमरा वकरेके मारदेउ हसे वकर सम्‍पतिया हमार हतइ।’ 39उहेसे हुनुका वकरेके पकडलइ, अंङगुरवाक बरियाक बाहरा लिगाके मारदेलइ।”

40तब येसुजि हुनुकाके पुछलसि, “याबे कहह, जब उअ खेतवाक मलिकवा यबिय, हुनुकाके कथि करबिय त?” 41हुनुका कहलइ, “उअ यपनहिँ दुस्‍ट मन्‍सावानिके मारबिय हसे जुने वकरेके ठिक समयमा बखरा देबिय, यसनुक मन्‍सेके अंङगुरवाक बरिया बटइया देबिय।” 42तब येसुजि हुनुकाके पुछलसि, “कथि तोहरा धरमसास्‍तरवामा हइने पढल बडह?

‘घरवा बनोलहरा मिस्‍तिरियाह जुन पत्‍थरावाके काम नाहिँ लगतइ कहके तिरा देले रहलइ,

याखिरमा उहे पत्‍थरवा घरवाक मुख्‍य पत्‍थरा बनलिय।

इअ कमवा परमप्रभु करले बडसि,

हसे हमार लजरियामा यचम्‍मक बडइ।’ # भजन ११८:२२-२३

43 “उहेसे मुइ तोहराके कहबहिँ, परमेस्‍वरक राज तोहारसे लियतइ हसे यसनुक एगुडा जातिके दियतइ, जुने वकर फर फरोबिय। 44उअ पत्‍थरवामा खसलहरा यपनहिँ खाडाखुसरि हतइ हसे जाकर वपरा उअ पत्‍थरवा खसबिय, वकरेके धुरि-पिठा बनादेबिय।”

45जब मुख्‍य पुजेरियाह हसे फरिसियाह येसुजिक कहलि दृस्‍टान्‍त सुनलइ, तब हुनुकर बारेमा कहइ बडसि कहके हुनुका बुझलइ। 46हुनुका येसुजिके पकडेके मउका खोजलइ, बाकि मन्‍सावानिसे डेरेलइ, केहकेकि मन्‍सावाह हुनेके एगुडा अगमवक्‍ता हखसि कहके मनइ।

Currently Selected:

मति 21: CTHR

Highlight

Copy