मरकुस 3
3
हथवा सुखाइल मन्से डउल भेल
(मति १२:९-१४; लुका ६:६-११)
1येसुजि फेरि दोसरि विसराम दिनवामा सभाघरवामा गेलसि। तखनहिँ वहवाँ एक जन हथवा सुखाइल मन्से रहलिय। 2तब कतेक जन मन्सेसभ येसुजि विसराम दिनवामा उअ मन्सावाके डउल बनोबसि कि कहके दोस लगावेके तहिँया वहवाँ चुवा लागल रहलइ। 3तब येसुजि हथवा सुखइलि मन्सावाके कहलसि, “यवहि हसे जम्मे जनक यागा ठडियाहि।”
4वकरपाछा येसुजि हुनुकाके पुछलसि, “लो याबे कहह, विसराम दिनवामा डउल काम करेके यसल हखइ कि हइने डउल काम करेके यसल हखइ हसे प्रान बचावेके यसल हखइ कि नास करेके यसल हखइ?” बाकि हुनुका किहो जवाफ हइने देलइ।
5हुनुकर मनवाक खराब विचार देखके येसुजि खाँ दुःखित भके खिसियलसि हसे जम्मे जनवरि हेरके उअ हथवा सुखइलि मन्सावाके कहलसि, “तोर हथवा पसराउ!” तब उअ यापन हथवा पसरोलिय हसे वकर हथवा वइघरहिँ डउल भेलइ। 6वकरपाछा फरिसियाह सभाघरवासे निकडके गेलइ हसे हुनुका येसुजिके कस्के मारेके कहके हेरोद रजवाक मन्सावानिसाङे मिलके योजना बनोलइ।
7वकरपाछा येसुजि यापन चेलवानिसाङे तलवाक तिरवामा गेलसि। तब गालिल छेतरसे बहुत मन्सेसभ हुनेक पाछा लगलइ। 8वसने करके येसुजिक करलि यचम्मक कमवाक बारेमा सुनके यहुदिया हसे यरुसलेम सहरवासे, इदुमिया तके यरदन लदियाक वाहिकरवाक देसवासे, टायर हसे सिदोन सहरवाक चारिवरक छेतरसे फेनि बहुत मन्सेसभ हुनेक लघिना यलइ। 9तब मन्सावाक भिडवा येसुजिके झिन धङइ कहके हुने यापन चेलवानिके एगुडा डोङा तयार करे लगोलसि। 10केहकेकि येसुजि बहुत मन्सेसभके डउल बनोले रहलसि हसे जम्मे मनियइलि मन्सावाह हुनेके छुएके तहिँया धकिला-मकिलि करइ रहलइ।#मरकुस ४:१; लुका ५:१-३ 11असुद्ध-आत्मा लगलि मन्सावाह येसुजिके देखतेकि हुनेक गोडवामा परके चिलइते यसके कहइ, “यपनहुँ परमेस्वरक पुतर हखहुँ!” 12बाकि येसुजि उअ दुस्ट-आत्मावानिके मोर बारेमा मन्सावानिके झिन कहिह कहके काडा आग्या देलसि।
येसुजि बारह जन प्रेरितसभके छानलसि
(मति १०:१-४; लुका ६:१२-१६)
13एक दिन येसुजि एगुडा पहाडमा गेलसि हसे यापन मन परलि चेलवानिके यापन लघिना बलोलसि। हुनुका येसुजि लघिना यलइ। 14तब येसुजि बारह जनके यापनसाङे रहेके हसे परचार करेके तहिँया छानलसि। येसुजि हुनुकाके प्रेरित#३:१४ प्रेरित: सुसमाचार परचार करे हसे ख्रिस्टक मन्डलि स्थापना करेके हसे बिसेस करके पवितर-आत्मासे नियुक्त कराइल मन्सेके प्रेरित कहइ। याको थाह पावेके तहिँया सबद यरथमा हेरहुँ। नाउँ देलसि 15हसे हुनुकाके भुत-आत्मासभ निकडावेके फेनि अधिकार देलसि। 16येसुजिक छानलि बारह जन चेलवानिक नाउँ इअ हखइ-सिमोन, जकरेके हुने पतरुस नाउँ देलसि। 17जब्दियाक दु गो बेटा याकुब हसे वकर भयवा युहन्नाके हुने “बोअनर्गेस” रखलसि, जाकर यरथ “गर्जनक बेटासभ”। 18वसने करके अन्द्रियास, फिलिप, बारथोलोमाइ, मति, थोमा, अल्फायसक बेटा याकुब, थेदियस हसे देसभक्त दलक सिमोन, 19हसे यहुदा इस्कोरियोत, जुने येसुजिके सतरुवानिक हथवामा सपदेलिय। तब हुने घर गेलसि।
येसुजिक करलि कमवामा सक
(मति १२:२२-३२; लुका ११:१४-२३; १२:१०)
20येसुजि घरवामा पेसलेपर, वहवाँ फेरि यतुरा बहुत मन्से जामा भेलइ कि, येसुजि हसे हुनेक चेलवाह जेउना करेके फुरसद फेनि हइने पउलइ। 21इअ बतवा सुनके येसुजिक परिवरवाक मन्सावाह हुनेके लेवे गेलइ, केहकेकि हुने बउलेलसि कहके मन्सावाह कहइ रहलइ।
22यरुसलेमसे यइलि व्यवस्थाक-गुरुसभ यसके कहे लगलइ, “यकरमा बालजिबुल#३:२२ बालजिबुल: इअ नउँवा मन्सावाह सइतनवाके कहइ। भुत बडइ हसे भुतवानिक सिरदरवाक सक्तिसे इअ भुतवानिके निकडोसिय।”#मरकुस ३:२२; लुका ११:१५; मति ९:३४; १०:२५
23उहेसे येसुजि उअ व्यवस्थाक-गुरुसभके यापन लघिना बलोससि हसे दृस्टान्त देके कहलसि, “सइतनवा कस्के सइतनवाके निकडावे सकबिय त? 24जुन राजमा फुट हसइ उअ राज नास हतइ। 25जुन घरवामा फुट हसइ उअ घरवा फेनि नास हतइ। 26वसने करके, यगर सइतनवा यापन विरोध यपनहिँ करतइ जउँ, उअ नाहिँ टिकबिय। बरु वकर नास यासकल बडइ। 27यगर कुनहुँ मन्से एगुडा बरियार मन्सेक घरवा फोरके जम्मे चिजुवा लुटे खोजबिय जउँ कथि वकरेके पहिला बान्हे नाहिँ परतइ? तब मतरे बरियारि मन्सावाक जम्मे चिजुवा उअ मन्सावा लुटे सकबिय।#यसइया ४९:२४-२५
28 “मुइ तोहराके सदियो कहइ बडहिँ, मन्सावानिक जम्मे पाप हसे परमेस्वरक निना छमा हखे सकतइ। 29बाकि पवितर-आत्माक विरोधमा निना करलहराक कबहुँ फेनि छमा नाहिँ हतइ। उअ मन्सावा परमेस्वरक लजरियामा अनन्त पापक दोसि हखबिय।”#लुका १२:१० 30येसुजि इअ बतवा कहलसि, केहकेकि मन्सावाह हुनेमा “असुद्ध-आत्मा बडइ” कहके कहइ।
येसुजिक दाओ हसे भयवासभ
(मति १२:४६-५०; लुका ८:१९-२१)
31उहे समयमा येसुजिक दाओ हसे भयवासभ भेटे यलइ। हुनुका घरवाक बाहरा ठडियाइल रहलइ हसे कुनहुँ एक जनके हुनेके बलावे पठोलइ। 32तखनहिँ येसुजिक चारिवरि बहुत मन्से बइठल रहलइ। तब मन्सावाह हुनेके कहदेलइ, “गुरुजि, यपनहुँक दाओ हसे भयवासभ यपनहुँके भेटेके तहिँया बाहरा इसियाइ बडइ।”
33येसुजि हुनुकाके कहलसि, “मोर दाओ हसे मोर भाइसभ कुने हखइ?”
34वकरपाछा हुने यापन चारिवरि बइठलि मन्सावानिके हेरके कहलसि, “हिनिकहिँ मोर दाओ हसे मोर भाइसभ हखइ। 35जुने परमेस्वरक आग्या मनसइ हुनुकहिँ मोर भाइ, बहिन हसे दाओ हखइ।”
Currently Selected:
मरकुस 3: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
