युहान्ना 4
4
येसु नुङ् सामारि मामु
1युहान्नाङा हाक्निङ् येसुङा प्याक चेलाचि चोक्साङ् बाप्तिस्मा पिॽमासिमेॽना बाङ्ना चेॽया फारिसिचिङा ङ्खेप्सु॥ 2(जेप्पा कामाभोङ् येसुङा आफाइ बाप्तिस्मा पिचिहा मेन्ना, ङ्खाॽनिङ्गो खा काम उका चेलाचिङा न्जोक्मास्या॥) 3येसुङा खा चेॽया था तोक्तुहोङ् याहुदिया लिङ्खाम नाओहोङ् फेरि गालिल लिङ्खाम पोटि लासा॥ 4ङ्खिङ्बेला गालिलबे खेॽमानिङ् सामारिया लिङ्खाम लेङ्साङ् खेॽमा पोर्ने साया॥ 5येसु सामारियागा सुखार बाङ्ना तेनबे तायाब्या॥ न्ना तेनगा उयुम्बे याकुबङा उच्या योसेफ पिना जाग्गा वाया॥#उथुक ३३:१९; याहोसु २४:३२ 6न्नाबे याकुबङा खोन्दुना पाॽवा वाया॥ येसु लाम्माङा-लाम्माङा यागास्याहोङ् न्ना पाॽवागा उयुम्बे युङा॥ ङ्खिङ्बेला लेन्लुम लेक्सामासा॥
7ङ्खिङ्बेलामाङ् एको सामारि छोङ्गा मामु माङ्च्वा लाल्लासे न्नाबे ताया॥ येसुङा न्ना लु, “मामु, का माङ्च्वा उङ्मा पियाङ्॥” 8न्नाबे येसु से वाया, इजाङ्बाङ्निङ् उका चेलाचि चाम्योङ्बा इन्से साहारबे ङ्ख्यामासा॥
9न्हाङा सामारि मामुङा येसु लु, “न्दा याहुदि छोङ्गा याॽमिगान, का सामारि मामुगा आमुकपाहाङ् इमिन माङ्च्वा उङ्वाघा?” (इजाङ्बाङ्निङ् ङ्खिङ्बेला याहुदिचिङा सामारिचिनुङ् इहाचा साम्बान्धा ङ्युक्सुनिन॥)#एज्रा ४:१-५; नाहेम्याहा ४:१-२
10येसुङा न्ना पोलोवा पि, “न्दा निङ्वाफुमागा पिनिक्ला नुङ् न्दा माङ्च्वा नाक्खुबा याॽमि चिनाचोगुगानिङ्बि न्दा ले उङ् नाक्तुगाबि, न्हाङ् उङा न्दा हिङ्लुङ् पिखुबा माङ्च्वा पियागाबि॥”
11न्ना मामुङा लु, “चिन्खुबा, न्दानुङ् माङ्च्वा वाक्माना उयाङ्धाङ् मान, न्हाङ् पाॽवा चा घाइरोना, न्दा हेॽनाहाङ् हिङ्लुङ् पिखुबा माङ्च्वा तावाघा? 12इना न्दा आनिङ्गा पुर्खा याकुब हाक्निङ्चा मागानयि? उङा कानिङ् ना पाॽवा चोक्ताब्या, न्हाङ् उङ् आफाइ, उका उच्याचि नुङ् उका सामुङ् मेन्ध्वाकचि घाकङा ना पाॽवागा माङ्च्वा ङ्ङुङु॥”
13येसुङा पोलोवा पि, “खा माङ्च्वा उङ्खुबा घाक फेरि वेॽमा न्सिमे, 14ङ्खाॽनिङ्गो का पिङ्हा माङ्च्वा उङ्खुबा फेरि हेॽनिङ्चा वेॽमा न्सिमेन्ना॥ इजाङ्बाङ्निङ् का पिङ्हा माङ्च्वा च्हेन उङ्बे लोन्नुङ्खुबा माङ्च्वागा पुन्दुवाक लेङ्मे, न्हाङा खाङा उङ् हेॽनिङ्चा मेन्सिमाना हिङ्लुङ् पिवाना॥”
15न्ना मामुङा उङ् लु, “चिन्खुबा, ङ्खाॽलाभोङ् का चा ङ्खा माङ्च्वा पियाङ्, न्हाङ् का फेरि हेॽनिङ्चा वेॽमा न्सिमेङान न्हाङा नाबे माङ्च्वा लाल्लासे तानुङ्मा पोरान्जोङ्मेॽङान्ना॥”
16येसुङा लु, “ख्या, ङ्हिङ्खुबा कारा॥”
17सामारि मामुङा लु, “आहिङ्खुबामाङ् मान्ना॥”
येसुङा लु, “आहिङ्खुबामाङ् मान्नाभोङ् न्दा जेप्पा चेॽया कायागाना, 18इजाङ्बाङ्निङ् ङ्गा फा जाना ङ्हिङ्खुबा न्लेक्साब्यामा, ङ्खाॽनिङ्गो खिङ्बेला न्दा इसानुङ् वान्नेका, न्ना ङ्गा ङ्हिङ्खुबा मेन्ना॥ न्दा कायागाना चेॽया जेप्पा ओम॥”
19न्ना मामुङा लु, “चिन्खुबा, न्दा गो निङ्वाफुमाभाङ् चेक्खुबागानले राइछो॥ 20आनिङ्गा पुर्खाचिङा ना कोङ्गुबे निङ्वाफुमागा आराधाना न्जोगु, ङ्खाॽनिङ्गो न्निङ्दा याहुदिचि च्हेन निङ्वाफुमा आराधाना चोक्माना ठोङ् यारुसालेममाङ् ओम काइवागा॥”
21येसुङा न्ना मामु लु, “ओ मामु, का बिस्वास चोगाङ्॥ हाकु खाॽलाना बेला ताये, निङ्वाफुमा पागा आराधाना चोक्से याॽमिचि कोङ्गुबे, यारुसालेमबे हेॽने चा ङ्खेमेनिन्हा॥ 22न्निङ्दा इसा आराधाना चोग्वाम्गा ङ्खा न्निस्वाम्गान, ङ्खाॽनिङ्गो कानिङ् निस्वाम्ङाहोङ् आराधाना चोग्वाम्ङा॥ इजाङ्बाङ्निङ् याॽमिगा मुक्ति च्हेन याहुदिचिभाङ् तामेॽना॥ 23ङ्खाॽनिङ्गो बेला तायेॽना, न्ना बेला लोप्माङ् ओम, जेप्पा आराधाना चोक्खुबाचिङा पा आत्मा नुङ् सात्याताबे आराधाना न्जोग्वाना॥ इजाङ्बाङ्निङ् खाॽला आराधाना चोक्खुबाचिमाङ् पाङा योग्वाचिहा॥ 24निङ्वाफुमा आत्मा ओम, न्हाङ् उका आराधाना चोक्खुबाचिङा आत्मा नुङ् सात्याताबे आराधाना चोक्माना॥”
25न्ना मामुङा लु, “का था वान्ने, मासिहा तामेॽना (उङ् खिरिस्ट चा लुमे), उङ् तामेहोङ् उङामाङ् कानिङ् घाक चेॽया योक्मेमेहा॥”
26न्हाङा येसुङा लु, “न्दानुङ् लोप चेङ्नुङ्खुबा, कामाङ् न्ना खिरिस्टङान!”
27ङ्खिङ्बेलामाङ् येसुगा चेलाचि न्दायाब्या, न्हाङ् उङ् एको मामुनुङ् साला लेन्मास्याना न्निसुहोङ् उङ्चि आच्चाम्मा ङ्ङेता॥ ङ्खाॽनिङ्गो इसाङा चा “न्दा इ मिमेकाना? न्दा न्ना मामुनुङ् इजाङ् साला लेन्मासिमेकाना?” भोङ् न्छिम्दुनिन॥
28न्हाङा न्ना मामुङा उका घाइला न्नाबे नाओहोङ् साहारबे लासाख्या, न्हाङ् याॽमिचि खाॽला लुचि, 29“आबानिघोङ् सोयानुम, एको याॽमि! उङा का चोगुङ्हा घाक चेॽया योक्मेताङ्हा॥ काताइ उङ्माङ् खिरिस्ट को मेन्ना?” 30न्हाङा ङ्खा याॽमिचि साहारभाङ् न्लोन्दाहोङ् येसु वायानाबे ङ्ख्या॥
31ङ्खिङ्बेला चेलाचिङा उङ्चि मुक फाक्साङ् येसु खाॽला न्लु, “चिन्खुबा, चाम्योङ्बा चो॥”
32ङ्खाॽनिङ्गो येसुङा लुचि, “कानुङ् चामाहा चाम्योङ्बा वान्नेहा, ङ्खागा उतुम्बे न्निङ्दा इच्चा था मान्ना॥”
33न्हाङा येसुगा चेलाचि उङ्चि-उङ्चि छिम्खुसा न्जाया, “मेन्ना, इसाङा चाम्योङ्बा ङ्खुतुहालेम्बा?”
34येसुङा ङ्खाचि खाॽला लुचि, “का पाङ्खुबागा उनिङ्वा लोॽवा चोक्मा नुङ् उका काम पुरा चोक्मामाङ् आका चाम्योङ्बा ओम॥ 35न्निङ्दा काइवागा ‘चाचिॽया तुम्मा हाकुचा ना मोनाम लाचोङ्मेहा’ ङ्खाॽनिङ्गो का लुमेॽनेनिन, न्निङ् मिक होसानुम्चिम्घोङ् उचुन सोयानुम, घाक चाचिॽया तुमाहोङ् हेॽमा हिक्तिक्सुहा॥ 36चाचिॽया हेखुबाङा उका जेला तोक्त्वा, न्हाङ् उङा हेॽनिङ्चा मेन्सिमाना हिङ्लुङ्गा लागि चाचिॽया छुप्स्वा॥ खाॽला ह्वेखुबा नुङ् हेखुबा हिपापाङ् सोरि-सोरि चोन्सिमेचि॥ 37इजाङ्बाङ्निङ् खा चेॽया जेप्पा ओम ‘एकोङा चाचिॽया ह्वेत्वा, न्हाङ् हेकोनाङा हेत्वा॥’ 38का न्निङ्दा खेति न्जोगुम्गान्हा ठोङ्बे चाचिॽया खोम्से पाङ्नुङ्नेनिन॥ न्नाबे हेकोहा याॽमिचिङा खेति न्जोगु न्हाङ् उङ्चिङा न्जोगुहा खेतिभाङ् न्निङ्दा फाइदा लेक्सिमिगा॥”
39न्ना सामारि मामुङा “का चोगुङ्हा घाक चेॽयागा उतुम्बे उङा योक्मेताङ्हा” लुचिहाङा न्ना तेनबेॽहा प्याक सामारिचिङा येसुबे बिस्वास न्जोगु॥ 40ङ्खा सामारिचि येसु वायानाबे न्दायाहोङ् “कानिङ्नुङ् वाया” लुसाङ् उङ्चि मुक म्फाक्तुचि॥ न्हाङ् येसु न्नाबे हिच लेन वाया॥ 41न्हाङा उङा चिन्दुचिहा चेॽया ङ्खेप्सुहोङ् झान प्याक सामारिचिङा उङ्बे बिस्वास न्जोगु॥
42ङ्खाचिङा न्ना मामु खाॽला न्लु, “हाकु कानिङ् न्दा लुयाघा चेॽया खेप्सुम्ङाहोङ् से बिस्वास चोगुम्ङाना मेन्ना, ङ्खाॽनिङ्गो कानिङ् आफाइ उका चेॽया खेप्सुम्ङाहोङ् जेप्पा उङ् कायुङ्लेनबेॽहा याॽमिचि मुक्ति पिखुबा ओम बाङ्ना चेॽया था तोक्तुक्सुम्ङाहा॥”
सार्खारि काम चोक्खुबागा उच्या बाबु नुयाना
43येसु न्ना ठोङ्बे हिच लेन वायाहोङ् गालिल लिङ्खाम पोटि ख्या॥ 44(येसुङा आफाइ खाॽला कायामासा “निङ्वाफुमाभाङ् चेक्खुबा उका खाम्युकपे आदार न्जोग्वानिन्ना॥)”#मात्ति १३:५७; मार्कुस ६:४; लुका ४:२४ 45जोबो येसु गालिलबे तायाब्या, ङ्खिङ्बेला न्नाबेॽहा याॽमिचिङा उङ् स्वागात न्जोगु, इजाङ्बाङ्निङ् यारुसालेमबे फोङ्होक्नामगा बेला येसुङा चोगुहा घाक आच्चाम्माहा काम ङ्खाचिङा न्निसुक्सा॥#युहान्ना २:२३
46न्हाङा येसु गालिलगा काना साहारबे लासाख्या॥ न्ना साहारबे उङा माङ्च्वा सिम्लेॽमाङ्गा माध चोगुक्सा॥ न्नाबे एको सार्खारि काम चोक्खुबा याॽमि वाया, न्नागा उच्या तुगाब्यामासा॥#युहान्ना २:१-११ 47येसु याहुदियाभाङ् गालिलबे तायाना चेॽया खेप्सुहोङ् न्ना याॽमि येसु वायानाबे ताया, न्हाङ् “सेहेक्साना आच्या बाबु आबाघोङ् नुमेतु” लुसाङ् उमुक फाक्तुचि॥
48येसुङा न्ना लु, “न्निङ्दा आच्चाम्माहा काम नुङ् चिङ्गो मेनिले सोम्मा का हेॽनिङ्चा बिस्वास न्जोङ्मेकान्हा॥”
49न्ना याॽमिङा लु, “चिन्खुबा, आच्या सिमा हाक्निङ् ओन्दाङ् आबा॥”
50येसुङा न्ना याॽमि लु, “लासाख्या, न्ज्या हिङ्मेॽना॥” न्हाङा न्नाङा चा येसुङा लुहा चेॽयाबे बिस्वास चोगु, न्हाङ् लासाख्या॥
51खेॽमास्यानिङ् लाम्बुबे उका नोकोरचिङा न्दुप्सुहोङ् न्लु, “ङ्गा न्ज्या नुयाना!”
52उङा उका नोकोरचि छिम्दुचि, “इखिङ्बेला नुयाना?”
ङ्खाचिङा पोलोवा म्बि, “आसेन लेॽनि ए मोक्तुनिङ् नाहाङ्तो जोरोङा लेना॥” 53न्हाङा उङा खा चेॽया था तोक्तु, येसुङा “न्ज्या हिङ्मेॽना” लुना, बेला नाहाङ्तोमाङ् उका उच्या नुयामाना राइछो॥ ङ्खोङ्माङ् उङ् नुङ् उपाङ्बेॽहा घाकङा येसुबे बिस्वास न्जोगु॥
54ना च्हेन येसु याहुदियाभाङ् गालिलबे आबाहोङ् चोगुना हिम्ना आच्चाम्माना काम साया॥
Currently Selected:
युहान्ना 4: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
