लुका 15
15
मासाब्याना सामुङ्गा ताप्चेॽया
(मात्ति १८:१२-१४)
1इलेन प्याक तिरो पोक्खुबाचि नुङ् हेकोहा पापिचि येसुगा चेॽया खेम्से न्दाया॥ 2ङ्खाॽनिङ्गो फारिसि नुङ् धार्मासाप्ला चिन्खुबाचि खाॽला गान्गान चोक्मा न्दारोक्तु, “ना याॽमिङा गो पापिचि चा स्वागात चोग्वाचि, न्हाङ् ङ्खाचिनुङ् च्वाहा॥”#लुका ५:२९-३०
3न्हाङामाङ् येसुङा ङ्खाचि एको खाॽलाना ताप्चेॽया लुचि, 4“न्निङ्दा माध्येबे इसा याॽमि लोप्पि, उका ए होम्बोक सामुङ्चिबे एको मान्दिमेॽनिङ् पापा सामुङ्चि पुङ्दाबे नाॽवाचिहोङ् न्ना मासाब्याना एको सामुङ् मेन्दुम्ले सोम्मा ङ्योग्वान्ना? 5जोबो उङा मासाब्याना सामुङ् तुप्स्वा, न्ना चोन्सिसाङ् उफाक्ताङ्बे खुरावा, 6न्हाङ् उकाम्निभाकचि नुङ् पाङ्निवाकचि कावाचिहोङ् खाॽला ल्वाचि, ‘कानुङ् चोन्दास्यानि, इजाङ्बाङ्निङ् आका मासाब्याना सामुङ् का तुप्सुक्सुङ्ना॥’ 7का न्निङ्दा लुम्मेॽनेनिन, पास्चाताप चोक्मा पोरामेन्जोक्खुबा पापा#१५:७ उनान्साय धार्मोति याॽमिगा लागि हाक्निङ् पास्चाताप चोक्खुबा एको पापि याॽमिगा लागि वालोकपे प्याक आनान्दा लेङ्मेहा॥”
मासाब्याना युप्पा याङ्गा ताप्चेॽया
8 “हेॽना मामु लोप्पि, उका एखेङ् युप्पा याङ्बे # १५:८ इलेन काम चोगाहागा उमेन एको युप्पा याङ् साया॥ एको मासिभोङ् कुप्पि हान्द्वाहोङ् उङा न्ना युप्पा याङ् मेन्दुम्ले सोम्मा पाङ् फेक्साङ् ओक्खिपिक्खि ङ्योग्वान्ना? 9मासिना युप्पा याङ् तुप्स्वाहोङ् उङा उकाम्चि नुङ् पाङ्निवाकचि कावाचिहोङ् खाॽला ल्वाचि, ‘कानुङ् चोन्दास्यानि, इजाङ्बाङ्निङ् आका मासाब्याना युप्पा याङ् का तुप्सुक्सुङ्ना॥’ 10का न्निङ्दा लुम्मेॽनेनिन, ङ्खाॽलामाङ् पास्चाताप चोक्खुबा एको याॽमिगा लागि निङ्वाफुमागा वालोक्दुतचिगा उयुम्बे प्याक आनान्दा लेङ्मेहा॥”
मासाब्याना च्याबाबुगा ताप्चेॽया
11येसुङा हेकोना एको खाॽलाना ताप्चेॽया चा लुचि, “एको याॽमिगा हिप्पाङ् उच्या बाबु वायाचि॥ 12इलेन पाक्नाङा उप्पा खाॽला लु, ‘आप्पा, का तोक्माहा आका घाक आङ्सा फोक्साब्याङ्॥’ न्हाङा उप्पाङा चा ङ्खा हिपापाङ् उच्याचि उङ्नुङ् वायाहा घाक याङ्सा हाप्सुबिचि॥
13 “एहिलेन हेक्साङ् न्ना पाक्नाङा तोक्तुहा घाक याङ्सा खेतुहोङ् माङ्दुना खाम्युकपे ख्या, न्नाबे उङा उनिङ्वाबे इमिन चोक्मा मिता ङ्खाॽला चोक्साङ्, खुम्दु-खुम्दु चासाङ्-उङ्साङ् घाक याङ्सा याइ॥ 14ङ्खिङ्बेला न्ना खाम्युकपे माडा आनिकाल पोक्तु, न्हाङा उङा चामा-उङ्मा इहाचा न्दोक्तुन॥ 15न्हाङा एको याॽमिगा पाङ्बे काम योक्से भोङ् ख्या, न्ना याॽमिङा फाक कोप्माना कामबे एन्दु॥ 16उङा न्नाबे फाक्का चारोङा होङ्चा आफोक इप्तुङ्बि मिता, ङ्खाॽनिङ्गो इसाङा चा उङ् इहाचा चाम्योङ्बा म्बिनिन॥
17 “ङ्खिङ्बेलाले उका ओचेत न्दाया न्हाङा खाॽला मिता, ‘आप्पागा इखिङ् प्याक नोकोरचि ङ्वान्ने, न्नाबे उङ्चिङा फोक खानुङ् न्ज्वा होङ्चा ङ्ङोन्द्वा, का च्हेन नाबे साकङा सेहेक्साङ्॥ 18हाकु का आप्पागाबे खेमेङ्होङ् ल्वाङ्, आप्पा का निङ्वाफुमानुङ् ङ्गा बिरुद्दाबे तुक्नुङ् इसिॽहा पाप चोगुक्सुङ्॥ 19हाकु का न्ज्या लुॽमा चा न्थेन्सिमेॽङान्ना, का एको न्नोकोर लोॽवा मिताङ्घोङ् युक्साङ्॥’ 20न्हाङा उङ् पोगाहोङ् उप्पागाबे लासाख्या॥ ङ्खाॽनिङ्गो उङ् तायेतासाना उप्पाङा माङ्दुन्धाङ् निसु, न्हाङ् उलुङ्मा तुक्तुगेतु॥ न्हाङा लुक्साङ् ख्याहोङ् उफाक्ताङ्बे हेप्तुहोङ् उम्मा चोगु॥ 21उच्याङा खाॽला लु, ‘आप्पा, का निङ्वाफुमा नुङ् ङ्गा बिरुद्दाबे प्याक पाप चोगुक्सुङ्, हाकु का न्ज्या लुॽमा चा न्थेन्सिमेङान्ना॥’#१५:२१ का ङ्गा एको नोकोर लोॽवा मिताङ्घोङ् युक्साङ्॥
22 “ङ्खाॽनिङ्गो उप्पाङा च्हेन काम चोक्खुबाचि काचिहोङ् खाॽला लुचि, ‘हानि घाक हाक्निङ् उचुन्हा तेक तायानुम्घोङ् वाप्मेतानुम॥ उमुक खेॽवाबे आङ्गुठि नुङ् उलाङ्बे लाङ्खोप वाप्मेतानुम॥ 23न्हाङा होक्ता एम्मागा चात्तुना जिवात सिसानुम, कानिङ् घाक चासाङ्-उङ्साङ् चोन्दिसिइ॥ 24इजाङ्बाङ्निङ् ना स्यामासाना आच्या हाकु हिङामा, मासाब्यामासा, ङ्खाॽनिङ्गो लोप तुप्सामा॥’ न्हाङा उङ्चि चोन्सिसाङ् चामा-उङ्मा न्दारोक्तु॥
25 “ङ्खिङ्बेला तुम्ना उच्या बाबु रोपाबे ख्यामासा॥ लासानिङ् पाङ्युम्बे तायाब्या, ङ्खिङ्बेला उङा पाङ्बे छेम लुसाङ् लाक्साङ् न्जोक्मास्याहा खेप्सुचि॥ 26न्हाङा उङा ‘खा इ लेङ्मासिम्मेहा?’ भोङ् एको काम चोक्खुबा नोकोर छिम्दु॥ 27न्ना नोकोरङा खाॽला लु, ‘न्नुन्छा नुनुङ्माङ् तायाब्याहोङ् म्बाङा चात्तुना जिवात सिसुहोङ् होक्ता एन्दुक्सुना॥’ 28खा चेॽया खेप्सुहोङ् ओलोक खोॽमाङा उङ् पाहोङ्बे उमा ङ्गाक्सान न्हाङ् उप्पा तायाहोङ् लेमु॥
29 “ङ्खाॽनिङ्गो उप्पा खाॽलाना पोलोवा पि, ‘खिङ्ना फिम्बिलिङ् सोम्मा का नोकोर लोॽवा लेक्साङ्होङ् काम चोगाङ्, ङ्गा चेॽया हेॽनिङ्चा ङ्खोक्तुङान, ङ्खोङ्चा काम्निभाकचिनुङ् चामा-उङ्मागा एको मेन्ध्वाक्कुच्या हेॽनिङ्चा म्ब्याङ्गान॥ 30ङ्खाॽनिङ्गो घाक तोक्तुहा आङ्सा बेस्याचिनुङ् याॽनिखुबा तामेॽनिङ् च्हेन खिङ् माडा जिवात सिस्वागा॥’
31 “न्हाङा उप्पाङा खाॽला लु, ‘आच्या, न्दा गो साधाइ कानुङ् वान्नेका बा, आका घाक याङ्सा ङ्गामाङ् ओम॥ 32ङ्खाॽनिङ्गो हेन कानिङ् होक्ता एम्माहोङ् चोन्सिप्मामाङ् पोर्ने ओम, इजाङ्बाङ्निङ् स्यामासाना न्नुन्छा हिङ्गिलिक लेक्सामा, मासाब्यामासा, ङ्खाॽनिङ्गो लोप तुप्सामा!’”
Currently Selected:
लुका 15: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
