मार्कुस 4
4
याङ्लि ह्वेखुबागा ताप्चेॽया
(मात्ति १३:१-२३; लुका ८:४-१५)
1येसुङा फेरि गालिल तालगा उलाप्पे चिन्मा तारोक्तेहेक्सुसाचि॥ ङ्खिङ्बेला न्नाबे उका ओरिपोरि प्याक याॽमिचि न्छुप्सामासानाङा उङ् एको डुङ्गाबे थाङाहोङ् न्नाबे युङा॥ याॽमिचि च्हेन तालगा उलाप्पेॽमाङ् ङ्युङा॥#लुका ५:१-३ 2न्हाङा येसुङा याॽमिचि प्याक चेॽया ताप्चेॽयाभाङ् चिन्दुचि॥ उङा ङ्खाचि खाॽला लुचि, 3“खेप्सानुम! एको याॽमि याङ्लि ह्वेसे ख्या॥ 4याङ्लि ह्वेतुनिङ् इखिङ् याङ्लि लाम्बुबे आया, न्हाङ् ङ्खा याङ्लि न्वाकुच्याकचि न्दायाहोङ् ङ्गोबुचोइ॥ 5इखिङ् याङ्लि च्हेन लुङ्खाकसेॽना खामबे आया॥ न्नाबे ओछोङ्-ओछोङ् से खाम वायानाङा ङ्खा याङ्लि पोक्मा गो सोलोक पोगा, 6ङ्खाॽनिङ्गो उसाम घाइरो एम्मा न्दोक्तुक्सान्होङ् तुक्नुङ् नाम फेनानिङ् नामङा फोसि॥ 7इखिङ् याङ्लि च्हेन तिङ्गिभाक हाम्बे आया, न्हाङा तिङ्गिभाक पुसाक्याहोङ् ङ्खा याङ्लि पुमा म्बिन, न्हाङ् उसा ङ्गेक्सुन॥ 8ङ्खाॽनिङ्गो इखिङ् याङ्लि च्हेन मोलिलोना खामबे आया॥ ङ्खा याङ्लि उचुन पोगाहोङ् पुसाक्या न्हाङ् सुम्खेङ् गुना, याखेङ् गुना नुङ् होम्बोक गुना उसा केक्सु॥” 9न्हाङा येसुङा लुचि, “इसागा खेम्माहा उनाभाक ङ्वान्ने, न्नाङा खेप्सुनि॥”
10न्नाबे न्छुप्साहा प्याक लोॽवा याॽमि ङ्खेब्याहोङ् एहिच जाना चेलाचि नुङ् न्नाबे ङ्वायाहा एकोहिप्पाङ् याॽमिचिङा येसु न्ना ताप्चेॽयागा उतुम्बे न्छिम्दु॥ 11येसुङा ङ्खाचि लुचि, “न्निङ्दा गो निङ्वाफुमागा राज्यागा होङ्चेॽया आमाना ग्यान तोक्तुक्सुम्गा, ङ्खाॽनिङ्गो हेकोहा याॽमिचि च्हेन घाक चेॽया ताप्चेॽयाभाङ् माङ् चिन्द्वाङ्चिङ्हा॥
12 न्हाङामाङ् धार्मासाप्लाबे खाॽला छेप्तामा–
‘ङ्खाचिङा सोॽमा गो न्स्वा ङ्खाॽनिङ्गो न्निस्वानिन,
खेम्मा गो ङ्खेप्स्वा ङ्खाॽनिङ्गो ङ्ङास्वानिन॥
मानुङ्गो ङ्खाचिङा पाप चोक्मा न्लेप्तिहोङ् निङ्वाफुमाबे न्दायाबि
न्हाङ् उङा ङ्खाचिगा पाप छेमा चोक्तुबिचिबि॥’” #
यासाइया ६:९-१०
13न्हाङा येसुङा ङ्खाचि छिम्दुचि, “ना ताप्चेॽयागा तुम्बिला माङ् आमा ङ्यास्वाम्गान्हाभोङ्, हेकोहा ताप्चेॽया न्निङ्दा इमिन आस्वाम्घा? 14याङ्लि ह्वेखुबाङा निङ्वाफुमागा चेॽया ह्वेत्वा॥ 15इखिङ्गा निङ्वाबे खा चेॽया लाम्बुबे आयाहा याङ्लि लोॽवा लेङ्मे॥ ङ्खाचिङा निङ्वाफुमागा चेॽया ङ्खेप्स्वाहोङ् सोलोक साइतान तामेहोङ् ङ्खा कोभेतिॽवा॥ 16ङ्खाॽलामाङ् इखिङ्गा निङ्वाबे च्हेन खा चेॽया लुङ्खाकसेॽना खामबे आयाहा याङ्लि लोॽवा लेङ्मे॥ ङ्खाचिङा निङ्वाफुमागा चेॽया ङ्खेप्स्वाहोङ् सोलोक चोन्सिसाङ् उङ्चि निङ्वाबे ङ्युक्स्वा॥ 17ङ्खाॽनिङ्गो ङ्खा निङ्वाफुमागा चेॽयाङा उङ्चि निङ्वाबे घाइरो उसाम एम्मा न्दोक्त्वान्होङ् ङ्खाचिङा एहिलेन सोम्मा से बिस्वास न्जोग्वा॥ न्हाङ् खा चेॽयाबे बिस्वास न्जोगुहाङा तुखि आङ्मा पोराचोङ्मेॽनिङ् सोलोक बिस्वास न्लेप्तिॽवा॥
18 “फेरि इखिङ्गा निङ्वाबे च्हेन खा चेॽया तिङ्गिभाक हाम्बे आयाहा याङ्लि लोॽवा लेङ्मे॥ 19ङ्खाचिङा निङ्वाफुमागा चेॽया खेम्मा गो ङ्खेप्स्वा, ङ्खाॽनिङ्गो ना कायुङ्लेनबे हिङ्मानुङ् चामा, उङ्मा नुङ् थुङ्दुना लेङ्माहा चेॽयाबे से निङ्वा पिॽमाङा निङ्वाफुमागा चेॽया म्मुन्दिॽवा न्हाङा ङ्खाचिङा उसा ङ्गेक्स्वानिन॥ 20ङ्खाॽनिङ्गो इखिङ्गा निङ्वाबे च्हेन खा चेॽया मोलिलोना खामबे आयाहा याङ्लि लोॽवा लेङ्मे॥ ङ्खाचिङा निङ्वाफुमागा चेॽया ङ्खेप्स्वाहोङ् ङ्खाॽला न्जोङ्मे न्हाङ् सुम्खेङ् गुना, याखेङ् गुना नुङ् होम्बोक गुना उसा ङ्गेङ्मेत्वा॥”
कुप्पिगा ओम्ना
(लुका ८:१६-१८)
21येसुङा ङ्खाचि ना ताप्चेॽया चा लुचि, “याॽमिचिङा कुप्पि ङ्हान्द्वाहोङ् पाथिङा म्फोप्त्वानिन न्हाङ् खाट होङ्बे चा ङ्युक्स्वानिन, ङ्खाॽनिङ्गो पाङ्बे ताखुबाचि ओम ओतुचिनिभोङ् चान्चान्ना ठोङ्बे ङ्युक्स्वा॥#मात्ति ५:१५; लुका ११:३३ 22ङ्खाॽलामाङ् चुमिॽयाहा चेॽया इखिङ् वान्ने, ङ्खा घाक होम्भोङ्मे न्हाङ् आमा ङ्यासान्हा चेॽया इखिङ् वान्ने, ङ्खा घाक आमायामाहा लेङ्मे न्हाङा घाकङा ङ्ङास्वाहा॥#मात्ति १०:२६; लुका १२:२ 23इसागा खेम्माहा उनाभाक ङ्वान्ने, न्नाङा खेप्सुनि॥”
24न्हाङा येसुङा ङ्खाचि खाॽला लुचि, “न्निङ्दा खेप्सुम्घा चेॽयाबे उचुन निङ्वा पियानुम! इजाङ्बाङ्निङ् न्निङ्दा प्याक निङ्वा पिम्गाहोङ् खेप्सुम्गाभोङ्, न्ना नापङामाङ् न्निङ्दा चा तोक्त्वाम्गा, ङ्खा हाक्निङ्चा प्याक तोक्त्वाम्घा॥#मात्ति ७:२; लुका ६:३८ 25इजाङ्बाङ्निङ् इसानुङ् वान्ने, न्ना हाकुचा पिमे, ङ्खाॽनिङ्गो इसानुङ् मान, न्नानुङ् मिॽयाङ् वेॽहा चा नाप्निमे॥”#मात्ति १३:१२; २५:२९; लुका १९:२६
पोक्खुबा याङ्लिगा ताप्चेॽया
26येसुङा फेरि लुचि, “निङ्वाफुमागा राज्या खाॽलाना ओम, एको याॽमिङा उलाम्धाङ्बे याङ्लि ह्वेतु, 27न्हाङ् न्ना याॽमि इम्नुङ् होङ्चा पोक्होङ्चा ङ्खा याङ्लि लेॽनिसेॽनि पुन्नुङ्मे॥ ङ्खाॽनिङ्गो ङ्खा याङ्लि इमिन पुमा सिम्मेहा उङा था न्दोक्त्वान॥ 28खामङा माङ् ङ्खा याङ्लि पोक्मेत्वा न्हाङ् उसा केङ्खुबा चोग्वा॥ ओन्दाङ् कालिलो टुसा केमे न्हाङ् पुसाङ् खेमेहोङ् उसा केक्स्वा॥ 29न्हाङा चाचिॽया तुम्मेहोङ् न्ना याॽमिङा काच्याकङा हेॽमा तारोक्त्वा, इजाङ्बाङ्निङ् चाचिॽया खोम्माना बेला लेङ्दिनुङ्मे॥”#योएल ३:१३
यारोगा दानागा ताप्चेॽया
(मात्ति १३:३१-३२,३४; लुका १३:१८-१९)
30येसुङा ङ्खाचि फेरि लुचि, “निङ्वाफुमागा राज्या का इनुङ् तोक्सुङ्? न्निङ्दा हेॽना ताप्चेॽया लुॽनेनिन्होङ् नागा तुम्बिला आमेॽनेनिन? 31ना गो यारोगा दाना लोॽवाना, यारोगा दाना कायुङ्लेनबे घाक हाक्निङ् मिना सामे॥ एको याॽमिङा न्ना दाना लाम्धाङ्बे ह्वेत्वा॥ 32न्ना एहिलेन बेॽमाङ् पुमेहोङ् खिउनेत्नुगा उथापचिबे घाक हाक्निङ् माडा लेङ्मे॥ न्नाङा माम्माहा ह्वाक हाक्त्वाचि न्हाङ् न्वाकुच्याकचि न्दामेहोङ् ङ्खाबे होप ङ्गावाचि॥”
33याॽमिचिङा निङ्वाफुमागा चेॽया ङ्ङासुनिभोङ् येसुङा खाॽलाहा प्याक ताप्चेॽयाभाङ् चिन्दुचि॥ 34उङा याॽमिचि चिन्दुचिनिङ् ताप्चेॽयाभाङ् से चिन्दुचि, ङ्खाॽनिङ्गो उका चेलाचि से ङ्वायाना बेला घाक ताप्चेॽयागा तुम्बिला योक्मेतुचि॥
येसुङा कुहिक लामेतुना
(मात्ति ८:२३-२७; लुका ८:२२-२५)
35न्ना लेन नाम आयाहोङ् येसुङा उका चेलाचि खाॽला लुचि, “लु लामानि, हाकु कानिङ् तालगा योप्पारिक खेइ॥” 36न्हाङा चेलाचिङा प्याक याॽमिचि न्नाओचिहोङ् येसु वायाना डुङ्गाबे न्थाङा न्हाङ् उङ् योप्पारिक ङ्खेतु॥ हेकोहा डुङ्गाचि चा उङ्चिनुङ् ङ्ख्या॥ 37ङ्खिङ्बेला थाप्थुम्बे तालबे माडा कुहिक ताया न्हाङ् छाल तायाहोङ् माङ्च्वाङा डुङ्गा इप्मा तारोक्तु॥ 38येसु च्हेन डुङ्गागा एको कुनाबे ताङ्गोक्मा कोक्सुहोङ् इप्साख्यामासा॥ न्हाङा चेलाचिङा उङ् पोक्साङ् खाॽला न्लु, “चिन्खुबा, कानिङ् लुप्सिखेइहेक्सिङाहा, इजाङ् न्दा च्हेन ढुक्काइ इम्नुङ्मेकाना?”
39येसु पोगाहोङ् कुहिक थिन्दु, न्हाङ् छाल खाॽला लु, “स्वाक वाया! लासाख्या!” ङ्खिङ्बेलाक्माङ् कुहिक लासा न्हाङ् छाल चा स्वाक वाया॥ 40येसुङा चेलाचि लुचि, “न्निङ्दा इजाङ् खाॽला किसितिॽवाघा? न्निङ्गा बिस्वास हेॽनायि?” 41न्हाङ् ङ्खाचि आच्चाम्मा ङ्ङेताहोङ् किसिसाङ् उङ्चि-उङ्चि खाॽला कामा न्दारोक्तु, “ना इसा ओम? कुहिक-वासिक नुङ् छालङा चा उका चेॽया ङ्येन्वाहा॥”
Currently Selected:
मार्कुस 4: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
