मार्कुस 7
7
पुर्खाचिगा रितिथितिगा उतुम्बे येसुङा चिन्दुचिहा
(मात्ति १५:१-९)
1इलेन यारुसालेम साहारभाङ् न्दायाहा फारिसि नुङ् धार्मासाप्ला चिन्खुबाचि येसुगा ओरिपोरि न्छुप्सा॥ 2न्हाङा ङ्खाचिङा येसुगा एकोहिप्पाङ् चेलाचिङा उङ्चि मुक मेवासिॽले चाम्योङ्बा न्जामास्याहा न्निसुचि॥ 3इजाङ्बाङ्निङ् फारिसिचि नुङ् घाक याहुदिचिबे मुक मेवासिॽले मेन्जामाना चालान ङ्खाचिगा पुर्खाचिभाङ् वान्ने॥ 4ङ्खाचिङा बाजारभाङ् न्दामेहोङ् नुहाबा न्जोङ्मेहोङ् सुद्दा मेलेङ्ले इहाचा चाम्योङ्बा न्ज्वानिन, खिङ्से मेन्ना थाल खोरेक, भाडाचि चा चोक्खे मेन्जोक्ले चाला न्जोग्वान्चिनिन॥
5न्हाङामाङ् फारिसि नुङ् धार्मासाप्ला चिन्खुबाचिङा येसु न्छिम्दु, “ङ्गा चेलाचिङा गो उङ्चि मुक मेवासिॽले न्ज्वाहा निस्वाम्चिम्ङाहा, इजाङ् एङ्गा पुर्खाचिङा न्जोगुक्तुहा रितिथिति ङ्गा चेलाचिङा ङ्ङेन्वानिन्हा?”
6येसुङा ङ्खाचि लुचि, “निङ्वाफुमाभाङ् चेक्खुबा यासाइयाङा छेप्तुहा खा चेॽया न्निङ्दा किहि काप्खुबाचिनुङ् ठिक्का तोङ्मेहा,
‘खा याॽमिचिङा का उङ्चि याङा से आदार चोङ्मे,
ङ्खाॽनिङ्गो ङ्खाचिगा निङ्वा च्हेन काभाङ् प्याक माङ्दुना॥
7 ङ्खाचिङा का बित्थाबे आराधाना चोङ्मे,
इजाङ्बाङ्निङ् ङ्खाचिङा याॽमिङा न्जोगुहा नियाम से न्जिन्द्वाचिहा॥’ #
यासाइया २९:१३
8 जेप्पा न्निङ्दा गो निङ्वाफुमागा आग्गे लेप्तिम्गाहोङ् याॽमिचिगा रितिथिति ले येन्मासिइवाघा॥”
9येसुङा ङ्खाचि फेरि लुचि, “न्निङ्दा प्याक निखुबा लेक्सिॽवाघोङ् न्निङ्गा रितिथिति पालाना चोक्मा सिपालु सिगान न्हाङ् निङ्वाफुमागा आग्गे च्हेन इन्कार चोग्वाम्गा॥ 10इजाङ्बाङ्निङ् मोसाङा कायामा, ‘न्निङ् पा-माचि आदार चोगानुम्चिम॥’ न्हाङा ‘उप्पा-उमा साराप पिखुबा याॽमि सिसानुम॥’#पारास्थान २०:१२; २१:१७; लेबि २०:९; ब्यावास्था ५:१६
11 “ङ्खाॽनिङ्गो न्निङ्दा च्हेन याॽमिचि उङ्चि पा-माचि खाॽला लुॽमा ले चिद्वाम्चिम्घा– न्जिङ्दा काभाङ् इहा साहायोग तोक्माहा साया ङ्खा निङ्वाफुमा ‘कुर्बान’ पिइक्सुङ्हा, (कुर्बानगा तुम्बिला ओम, निङ्वाफुमाबे तिसाहा भेटि)॥ 12ङ्खाॽला उप्पा-उमागा सेवा चोक्मा पोरान्जोङ्मेन्हा लुसाङ् सेवा चोक्मा म्बिवाम्चिम्गान॥ 13खाॽला न्निङ्दा न्निङ्गा रितिथिति पोटि लाचोगिॽवाघोङ् निङ्वाफुमागा आग्गे इहाचा मेन्हा लोॽवा मित्वाम्गा॥ न्हाङा न्निङ्दा हेकोहाचा प्याक ङ्खाॽलाहा काम चोक्मासिइवागा॥”
याॽमि आसुद्दा चोक्खुबा चेॽया
(मात्ति १५:१०-२०)
14येसुङा याॽमिचि फेरि उङ् वायानाबे काचिहोङ् लुचि, “न्निङ्दा घाकङा निङ्वा पिम्घोङ् आचेॽया खेप्सानुम न्हाङ् आसानुम॥ 15याॽमिङा चोहा, उङुहा चेॽयाङा उङ् आसुद्दा न्लेङ्मेन्ना, ङ्खाॽनिङ्गो निङ्वाभाङ् लोन्दाहा चेॽयाङामाङ् याॽमि आसुद्दा लेङ्मेॽना॥ 16इसागा खेम्माहा उनाभाक ङ्वान्ने, न्नाङा खेप्सुनि॥”
17येसुङा याॽमिचि नाओचिहोङ् पाहोङ्बे उया न्हाङ् उका चेलाचिङा “खा चेॽयागा तुम्बिला इहा ओम योक्मेता” भोङ् न्लु॥ 18येसुङा ङ्खाचि लुचि, “इना न्निङ्दा हाकुचा हेकोहा याॽमिचि लोॽवा इहाचा ङ्ङास्वाम्गान्हा? न्निङ्दा था मान्ना? चोहा चाम्योङ्बाङा याॽमि आसुद्दा न्लेङ्मेन्ना॥ 19इजाङ्बाङ्निङ् ङ्खा गो उका उनिङ्वाबे ङ्खेमेन, ङ्खाॽनिङ्गो ओफोकपे तास्वा न्नाभाङ्चा पाखा लोङ्खेन्दिमे॥” ङ्खाॽला येसुङा घाक चाम्योङ्बा सुद्दाहाभोङ् याॽमिचि योक्मेतुचि॥
20उङा फेरि लुचि, “याॽमिगा निङ्वाभाङ् इहा पाखा लोम्मे, ङ्खा चेॽयाङा च्हेन याॽमि आसुद्दा लेङ्मेॽना॥ 21इजाङ्बाङ्निङ् घाक खाले इसिॽहा चेॽया याॽमिगा निङ्वाभाङ्माङ् लोम्मे– इसिॽनुङ् मिॽमाना, ब्याभिचार चोक्माना, खुमाना, याॽमि सिमाना, बेस्यागामान, 22पोहोङ् लेङ्माना, इसिॽहा काम चोक्माना, ठागा चोक्माना, नाहेम्माना, लुन्चामाना, घामान्डि लेङ्माना नुङ् मुर्खा काम चोक्माना॥
23 “खा घाक इसिॽहा चेॽया याॽमिगा निङ्वाभाङ्माङ् लोम्मे, न्हाङ् खा चेॽयाङामाङ् उङ् आसुद्दा चोग्वाना॥”
हेकोना जाति मामुगा बिस्वास
(मात्ति १५:२१-२८)
24न्हाङा येसुङा न्ना ठोङ् नाओहोङ् टुरोस नुङ् सिदोन साहारगा योप्पारिक-खेप्पारिक्हा ठोङ्चिबे ख्या॥ न्हाङ् इसाङा चा था न्दोक्निन्निभोङ् एको पाङ्बे उया, ङ्खाॽनिङ्गो याॽमिचिङा था न्दोक्ति॥ 25ङ्खिङ्बेला इसिॽना मुइङा याक्सुना एको मामुगा उमाङा येसुगा उतुम्बे खेप्सुहोङ् सोलोक येसुगाबे ताया न्हाङ् उलाङ्बे फोप फोप्ता॥ 26न्ना च्हेन सिरिया खाम्युक्का फोनिके बाङ्ना लिङ्खामबे वाम लेक्साना एको गिरिक जातिगा मामु साया॥ न्हाङ् न्ना मामुङा “आच्या मामुभाङ् इसिॽना मुइ लोन्धाक्तुबिघोङ् उङ् नुमेतु” लुसाङ् येसुनुङ् उमुक फाक्तुचि॥ 27ङ्खाॽनिङ्गो येसुङा लु, “ओन्दाङ् पिछानाछाचि चामेॽमाहाचि, उङ्चिगा चाम्योङ्बा नाप्माहोङ् कुचुमाचि पिॽमा उचुन न्लेङ्मेन्हा॥”
28न्हाङा मामुङा लु, “ओम्बा चिन्खुबा, न्ना गो जेप्पा ओम! ङ्खाॽनिङ्गो कुचुमाचिङा चा टेबुलगा मोप्पारिक मिमिक आयुक्साहा जुठा गो चामा न्दोक्त्वा बा!”
29खा खेप्सुहोङ् येसुङा न्ना मामु लु, “न्दा खाॽला कायागानाङा ढुक्काइ लेक्साघोङ् म्बाङ्बे लासाख्या, न्ज्याभाङ् इसिॽना मुइ लोन्दाखेब्यामाना॥” 30न्ना मामु याॽमि उपाङ्बे तासुनिङ् उच्या मामु नुयाहोङ् उचुन खाटपे इप्सामासाना तुप्सु, इजाङ्बाङ्निङ् उङ्भाङ् इसिॽना मुइ लोन्दाखेब्यामासा॥
येसुङा चेक्मा मेयाखुबा याॽमि नुमेतुना
31येसु टुरोस पाहाङ् लामाहोङ् सिदोन साहार लेङ्साङ् डेकापोलिसका लाम्बु गालिलगा तालबे ताया॥ 32न्नाबे याॽमिचिङा उनाभाक मेङ्खेम्खुबा नुङ् उचुन चेक्मा मेयाखुबा एको याॽमि येसुगाबे न्दा॥ न्हाङ् ङ्खाचिङा येसु “न्ना याॽमि तोक्ति” लुसाङ् उङ्चि मुक म्फाक्तुचि॥ 33येसुङा उङ् प्याक याॽमिगा उलुम्भाङ् मियोरोक खेतुहोङ् न्ना याॽमिगा उनाभाकपे उमुक्खेॽवा एन्दुचि न्हाङ् थोक्तुहोङ्#७:३३ येसुङा उका उमुकपे थोक्तुहोङ्॥ ओलेम तोक्तितु॥ 34न्हाङा वालोकपोटि सोहोङ् केङ्गेॽना ओसोक्मा सोसाङ् खाॽला काया, “इफ्फाता” नागा तुम्बिला ओम “होसाब्या॥” 35खाॽला कायाना सोलोक न्ना याॽमि खेम्मा याखुबा, चेक्मा याखुबा लेक्साहोङ् उचुन्माचेक चेक्मा तारोक्तु॥ 36येसुङा ङ्खा याॽमिचि “खा चेॽया इसा चा न्लुयानुम्चिम्निन” भोङ् आग्गे पिचि॥ ङ्खाॽनिङ्गो याॽमिचिङा खा चेॽया झान खेम्मेसाङ् न्लामा॥ 37खा चेॽया खेम्खुबा घाकङा आच्चाम्मा एसाङ् खाॽला ङ्गाया, “उङा इखिङ् उचुन्हा काम चोग्वाहा॥ उङा नाभाक मेङ्खेम्खुबाचि खेम्मा याखुबा चोग्वाचि न्हाङ् चेक्मा मेयाखुबा चेक्मा याखुबा चोग्वाचिहा॥”
Currently Selected:
मार्कुस 7: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
