युहन्ना 1
1
बचन हिङा लिनुङ लेम्बॽआ
1मक्खाम्डेम सिरिस्टि लिमा याक्लो बचन टुसे़। मो बचन चाहिँ निवाहाङ्नुङ टुसे़, मोबा बचननोॽ निवाहाङ ले़टे़। 2सिरिस्टि लिमा याक्लो बचन निवाहाङ्नुङ टुसे़। 3चोप थोक निवाहाङ्डे़ॽ बचनबाङ टोक्सु। इमाङ थोकसो खो मे़ॽनिङ मे़न्टोक्सा। 4खोबेॽ हिङ्मवा टुसा, मो हिङ्मवाडे़ॽनोॽ याॽमिजि उज्यालो पिसुजे। 5मो उज्यालो सेन्जुगुप्पेॽ पोॽइये। सेन्जुगुप्डे़ॽ इन्डोक्पेॽसो उज्यालो हेजोहेसुनि।
6निवाहाङ्डे़ॽ युहन्ना निङ्मा इक्को याॽमि पाङ्बॽआ ले़टे़। 7खोबाङ चोप याॽमिजिडे़ॽ जोतिमि टुम्बेॽ खेम्नुङ बिस्वास ले़टुजिरो लुनुङ, खो मोमि साक्छि पिसिॽ लेस्सा। 8युहन्ना खोमदाङ्बानोॽ मो जोति मे़ले़टा, तर मो जोतिमि गबाहि पिसिॽ लेम्बॽआ ले़टे़। 9मो चाइबमा जोति चोप जातिहा याॽमिजि पिसिॽ मक्खाम्डेमबेॽ लेम्मे़ॽनिङ्सिडे़।
10खो मक्खाम्डेमबेॽ टुसे़, खोबाङ्नोॽ इगो मक्खाम्डेम सिरिस्टि लिसा, मोडोक्सो मक्खाम्डेमबेॽहा याॽमिजिडे़ॽ खो मे़लेसुजि। 11खो टाङ्बामि याॽमिजिबेॽ लेस्सा, तर खोमि टाङ्बाङ्जिडे़ॽ खो बिस्वास मे़ले़टुजि। 12तर इन्डोक जनाडे़ॽ खो बिस्वास ले़टुजि, खोसे़ॽ खोजि निवाहाङ्मि पसाजि लिमे हक पिसुजि। 13माहाजि पाबा मामाबाङ ने़ॽनि, याॽमिडे़ॽ मिॽपॽआडोक्सो टोक्पॽआ ने़ॽनि, तर निवाहाङ्बाङ टोक्पॽआजि लिम्मे।
14बचन चाहिँ हिङा लिसा मोबा सत्यातानुङ अनुग्रहाडे़ॽ पुरा लिनुङ कानिङ याॽमिजिनुङ सोरि हिक्सा। कानिङे़ॽ खोमि महिमा खाङ्डोक्टुङ्मा, मो महिमा पाबाबाङ लेम्बॽआ इक्कोमा पसामिडोक्मा ले़टा।
15युहन्नाडे़ॽ खोमि टुम्बेॽ साक्छि पिसाङ बेॽए सेम्लाडे़ॽ लुसु, “खो मोनोॽ ले़ये, खोमि टुम्बेॽ के़ॽ लुबॽआ ले़टे़, ‘काबाङ ए़क्साङ लेङ्घुबा काबाङ एप्पा ले़ये, इन्ढोङ्होङ खो का टोक्मा याक्लोबाङ्नोॽ टुसे़।’” 16खोमि महान अनुग्रहाबाङ कानिङे़ॽ बेॽलो आसिस सोक्पेॽ आसिस चुप्मिटुङ्मा। 17इन्ढोङ्होङ कानिङे़ॽ मोसाबाङ यहुदि धारमिक नियम चुप्टुङ्मा मोबा अनुग्रहानुङ चाइबमा चाहिँ येसु खिरिस्टबाङ चुप्टुङ्मा। 18निवाहाङ असे़ॽसो आयुरो इन्डोक्पेॽसो मे़ङ्खाङ्डिॽ, तर खोमि इक्कोमा पसानोॽ, निवाहाङ ले़ये मोबा खो निवाहाङ पाबानुङ सोरि पेङ्इये। पसे़ॽनोॽ कानिङ निवाहाङ खाङ्मुसा।
बप्तिस्मा पिघुबा युहन्नामि साक्छि
(मत्ति ३:१-१२; मरकुस १:१-८; लुका ३:१-१८)
19यरुसलेमबेॽहा यहुदि डायोङ्बाजिडे़ॽ आढा याडाङ्बाजिनुङ लेबिजि युहन्नाबेॽ खे़ॽनुङ “हे़न असाडे ?” लुनुङ सिम्सिॽ पाङ्माबेॽ, युहन्नाडे़ॽ इडोक्मा साक्छि पिसु। 20युहन्नाडे़ॽ छे़ङ्गै इडोॽ लुबेॽटुजि, “का मुक्तिदाङ्बा खिरिस्ट ने़ॽनिबा।”
21मोबा माहाजिडे़ॽ खो सिप्सुजि, “हे़न असाडे ? इमा हे़न एलियाडे ?” खोसे़ॽ लुसु “मोगो का ने़ॽनि।” माहाजिडे़ॽ लुसुजि, “इमा हे़न कानिङे़ॽ आसा ले़ःॽपॽआ अगमबक्ता ले़ये ?” खोसे़ॽ लुसु, “मोसो का ने़ॽनि।”
22माहाजिडे़ॽ लुसुजि, “हे़न असाडे ? कानिङ लुमा, मोबा कानिङ पाङ्घुबाजि कानिङे़ॽ लुमा खे़ये। हे़ने़ॽ आम्टाङ्बामि टुम्बेॽ इमाङ लुन्डुए ?”
23युहन्नाडे़ॽ लुसु, “यसैया अगमबक्ताडे़ॽ लुबॽआडोॽ, ‘परमपरभुमि राम पोरोगानुमे’ लुनुङ रे़क्रे़क्मा ठाउँबेॽ काघुबा का इक्को सेम्ला ले़ङे।#यसैया ४०:३ ” 24मोबा यहुदिजिडे़ॽ सिम्सिॽ पाङ्बॽआ माहा फरिसिजिडे़ॽ, 25युहन्ना इडोॽ लुसुजि, “हे़न खिरिस्टसो ने़ॽनि, एलियासो ने़ॽनि, कानिङे़ॽ आसा ले़ःॽपॽआ अगमबक्तासो ने़ॽनिहोङ इन्ढोङ बप्तिस्मा पिमे़ॽनिङ्सिन्डुए ?”
26युहन्नाडे़ॽ माहाजि लुसुजि, “के़ॽको योङाडे़ॽ बप्तिस्मा पिनुङे़, तर हे़निङ्मि रुम्बेॽ इक्को टुये, खो हे़निङे़ॽ लेसानुम्नि। 27काबाङ ए़क्साङ लेङ्खुबा खोनोॽ ले़ये। खोमि राङ्सुपमि तुना हेम्मारोमासो का ले़ःॽङानि।”
28इघा चोप खा यरदन यिवा मेॽयरेङ बेथानियाबेॽ लिबॽआ ले़टे़, मोबेॽ युहन्नाडे़ॽ बप्तिस्मा पिमे़ॽनिङ्सिडुए।
निवाहाङ्मि थुमा
29वागियाराम युहन्नाडे़ॽ येसु खोबेॽ आप्मे़ॽनिङ्सिबॽआ खाङ्डोक्नुङ लुसु, “खाक्सानुमे, मक्खाम्डेमबेॽहा याॽमिजिमि पाप खिघे़ॽखुबा निवाहाङ्मि थुमा! 30खो मोनोॽ ले़ये, खोमि टुम्बेॽ के़ॽ याक्लोनोॽ लुबेटुङे, ‘काबाङ ए़क्साङ लेङ्खुबा, काबाङ महान ले़ये, इन्ढोङ्होङ खो का टोक्मा याक्लोबाङ्नोॽ टुसे़।’ 31काङ्दाङ्बे़ॽसो खो असा ले़टे़ लुनुङ मे़लेसुङ, तर खो इस्राएलबेॽहा याॽमिजिडे़ॽ लेसुजिरो लुनुङ्नोॽ योङाडे़ॽ बप्तिस्मा पिसाङ का लेस्सिङा।” 32युहन्नाडे़ॽ इडोॽ लुसाङ साक्छि पिसु, “के़ॽ पबित्रा होङ्निवा उख्रिॽवाडोॽ थाङ्सिरिबाङ उङ्नुङ खोसोक्पेॽ पोप्पॽआ खाक्सुङ। 33के़ॽ खो मे़लेसुङे, तर असे़ॽ का योङाडे़ॽ बप्तिस्मा पिसे लुनुङ पाक्सिङा, खोसे़ॽनोॽ का लुसिङा, ‘असासोक्पेॽ पबित्रा होङ्निवा उङ्बॽआनुङ खोसोक्पेॽ पेम्बॽआ खाङ्डोइन्डुए, पबित्रा होङ्निवाडे़ॽ बप्तिस्मा पिघुबा खोनोॽ ले़ये।’ 34पबित्रा होङ्निवा उख्रिॽवाडोॽ खोसोक्पेॽ उङ्बॽआ के़ॽ खाङ्डोक्नुङ ‘निवाहाङ्मि पसा खोनोॽ ले़ये’ लुनुङ इगो साक्छि पिनुङे़।”
येसुमि याक्लोहा चोङ्साजि
35फेरि वागियाराम युहन्ना खोमि निप्पाङ चोङ्सानुङ सोरि येःप्मे़ॽनिङ्सिडा। 36येसु के़क्बाङ्नोॽ खे़ॽमे़ॽनिङ्सिबॽआ खाङ्नुङ युहन्नाडे़ॽ लुसु, “खाक्सानुमे, निवाहाङ्मि थुमा!”
37खोसे़ॽ लुबॽआ इगो खा खेम्नुङ मो निप्पाङ चोङ्साजि येसुमि ए़ङ्गुवा ए़ङ्गुवा खडाजि। 38येसुडे़ॽ ए़ङ्गुवाराम हिङ्घे़ॽनुङ खाङ्माबेॽ माहाजि खोबेॽ आप्मे़ॽनिङ्सिबॽआ खाङ्नुङ माहाजि सिप्सुजि, “हे़निङे़ॽ इमा योक्मे़ॽनिङ्सिन्डानुमे ?”
माहाजिडे़ॽ खो लुसुजि, “गुरु, हे़न हाम्बेॽ पेङ्इये ?” 39येसुडे़ॽ मोजि इडोॽ लुसुजि, “आप्नुङ खाक्साजे।” मोडोक्पेॽ युडामि रिबोङ कासिॽपोरोक्पॽआ ले़टा मोबा येसुनुङ सोरि खे़ॽनुङ खो पेन्ढाम ठाउँ खाक्साजु मोबा मो याक मोजि खोनुङ्नोॽ पेनाजि।
40युहन्नामि खा खेम्नुङ येसुनुङ खे़ॽखुबा मो निप्पाङ्बेॽ इक्को चाहिँ सिमोन पत्रुसमि निसा अन्दरियास ले़टे़। 41मोबा ए़क्साङ खोसे़ॽ याक्लो खोमि वावा सिमोन चुप्नुङ लुसु, “कानिङे़ॽ ‘मसिह’ चुप्मिटुङ्मा (गिरिक खाप्लाबेॽ ‘मसिह’ लुबॽआ ‘खिरिस्ट’ ले़ये)।” 42खोसे़ॽ सिमोन येसुबेॽ चिक्चे़डु। येसुडे़ॽ मो सिमोन खाङ्नुङ लुसु, “हे़न युहन्नामि पसा सिमोन ले़ये, हागोएम्बाङ हे़ने़ए़ निङ केफास लिये।” (“केफास” लुबॽआ “रुङ्गोॽवा” ले़ये मोबा गिरिक खाप्लाबेॽ “पत्रुस” लुन्डुजे।)
येसुडे़ॽ फिलिपनुङ नथानेल के़ॽपॽआ
43वागियाराम येसुडे़ॽ गालिल छेत्रा खे़ॽमे निधो ले़टु। मोबेॽ खोसे़ॽ फिलिप चुप्नुङ लुसु, “कानुङ राप्से।”
44फिलिपसो अन्द्रियासनुङ पत्रुसडोक्नोॽ बेथसेदा सहरबेॽएन्नोॽ ले़टे़। 45फिलिपडे़ॽ नथानेल चुप्नुङ लुसु, “मोसानुङ अगमबक्ताजिडे़ॽ खोमि टुम्बेॽ यहुदि धारमिक नियमबेॽ साप्पॽआ ले़टे़। येसु कानिङे़ॽ चुप्टुङ्मा, खो नासरतबेॽए योसेफमि पसा ले़ये।”
46नथानेलडे़ॽ इगो खा खेम्नुङ खो लुसु, “इमा नासरतबाङ्सो नुबा खा लिहेये ?” फिलिपडे़ॽ खो लुसु, “आप्नुङ खाक्से।”
47येसुडे़ॽ नथानेल खोबेॽ आप्मे़ॽनिङ्सिबॽआ खाङ्नुङ खोमि टुम्बेॽ लुसु, “खाक्से, इक्को चाइबमा इस्राएलि, खोसे़ॽ रेम्डेडुनि खोमि निवा कप्टि ले़ःॽनिबा।”
48मोबा नथानेलडे़ॽ सिप्सु, “हे़ने़ॽ का इन्डोक्टे लेसिङे ?” येसुडे़ॽ खो लुसु, “फिलिपडे़ॽ हे़न के़ॽमा याक्लोनोॽ, के़ॽ हे़न वेॽलाभुमि राडाङ्बेॽ खाङ्डोक्पेबॽआ ले़टे़।”
49नथानेलडे़ॽ येसु लुसु, “गुरु, हे़न निवाहाङ्मि पसा ले़येले़, हे़न गो इस्राएलिजिमि हाङ्बा ले़ये!”
50येसुडे़ॽ नथानेल लुसु, “के़ॽ हे़न वेॽलाभुमि राडाङ्बेॽ खाक्सुङ लुमाबेॽ बिस्वास ले़ङे ? हे़ने़ॽ इगोबाङ्सो बेॽहा खा खाङ्डोइन्डुए।” 51मोबा येसुडे़ॽ लुसु, “चाइबानोक्मा खा के़ॽ हे़निङ लुनिम्ने़, हे़निङे़ॽ थाङ्सिरि हेम्बोक्पॽआ मोबा निवाहाङ्मि थाङ्सिरिदुतजि याॽमिमि पसाबेॽ उङ्मे़ॽसिबॽआनुङ साङ्मे़ॽनिङ्सिबॽआ खाङ्डोक्इन्डानुमे।”
Currently Selected:
युहन्ना 1: YAMP
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
